Job 31
31
1Mị maguanaan ni rꞌiikunya
mọ mị kápogh ạnir-ephoph kụ ạmoogh ẹephua.
2Eeghia kụ ẹdi Ẹnaan Oomo Ịikpo phọ uḍighi iyira?
Ika kụ ẹdi ọdi raanmo ghan ruunmo iiḍighi awe?
3Ọdi raagulemi ghan
bụphe ọpiom bọ.
4Ẹnaan elegheri ni tọrotoro ịyaar lọ mị aḍighi;
ọdi rạmiin ghan ni tọrobo ịlo mị arelhe.
5Mị akunya ni mị kőḍighi ghan ịkaraph
ḅịle kẹn mị kőokeleghi ghan bụnon awe.
6Ẹnaan ẹsighe ni ogey ọtoom kụ uphoghom ịmi,
bịn ọdi kạmiin ni ịpe mị aseleman bọ.
7Eḍighi ịyaar dị mị mạgbol ghan eten igey phọ,
ọbo kẹn mị mạmoogh ghan ẹephua ịkaraph;
eḍighi ịyaar dị ạraghaagh ạmi ịḅaal esi ịkaraph,
8pọ ịizupha ạmi eegulaan,
ḅịle kẹn ạbunon awe kụ ole eḍien lọ mị aḅeph!
9Eḍighi ịyaar dị mị mạmoogh ghan ẹephua esi ạnir amatuman ạmi,
kụ ạḅukian akori ghan ạnir phọ ọman eghuugh,
10pọ ạnir phọ ọphon ạmi ạsa eḍien ọnon oye,
ạḅile ạmina ẹmina ọnon oye!
11Ịikpia ọdo ịkaraph phọ ịpe phọ ẹkpe oḍighi aḍuugh.
12Kẹkighimaam nịan ooni ạnian phọ rele ghan bọ
tọrotoro ịyaar lọ mị ạmoogh.
13Mem lọ oniin otelhedom ạmi kụ ạghaaph ịlo ạmi,
mị ụnaghanan ghan ni ạḅile aḍighi nyọdi ịlo ẹnighe.
14Eḍighi ịyaar dị ịduon phọ mị úḍighi, mịna kạmeera bọ ika risigh Ẹnaan?
Mịna mụkaaph eeghe mem lọ Ẹnaan eru osoph ọoruen ọngo ạmi?
15Eniin phọ Ẹnaan phọ ịlhem bọ ịmi
kụ ẹlhem bọ kẹn ni butelhedom mọ ạmi.
16Mị kọ̋wile ghan ọloghonaan ạḍighaagh rukulom;
mị kőmeera ghan arukpukele ạnmariir ọrol dọl iniin-kụ-eeghe,
17ọbo kẹn ameera mọ ạbunyigo ạnmuny ọrol ọkoony mem dị mị rale ni.
18Oomo aghuḍum mọ ạmi mị maako ni bịdi.
19Mem lọ mị ạmiin oye lọ ịyaar rẹeḅaghami
kụ kátue ako ukpe loor esi eboom ekulom,
20mị ụngo ghan ni ạsuoma ẹghologhol
dị oḍighinom suphuugh iyool-ịga phọ ạmi
kụ ọdi ụseph ịmi rꞌoomo ologhi ọdi.
21Eḍighi ịyaar dị mị maagbegheḍiom ghan ọnyigo ọony,
loor esi dị mị alegheri bọ ni mọ mị katue ni ạkpar apu nyọdi mem lọ ọghi otu asighiton,
22pọ ạraghaagh ạmi ewunughian,
bịdi ẹkporonu sịen asikpe phọ ạmi!
23Loor esi dị mị rakiilaan ghan bọ ịpe Ẹnaan rẹliom ghan bọ oye,
mị útue uḍighi ịyaar dị ẹrol ịdipho.
24Mị kọ̋kpasi ghan emooph ạmi esi ẹelha,
25ọbo kẹn aphoophe loor ạmi loor esi ẹelha phọ ạmi.
26Erumuḍio phọ mị kọ̋oḅereghi ghan loor esi ạḍimu phọ ọdi,
ọbo kẹn ụnwanyu phọ loor esi ẹnighe phọ ọdi.
27Mị kőphe ghan eten oghueni ạbidi
ḅịle rꞌọkpun ạḍighaagh ạmi oghueniom ạbidi.
28Ịikpia ọdo ịkaraph phọ ịpe phọ ẹkpe oḍighi aḍuugh;
ịpe phọ rẹparanaan ghan Ẹnaan Oomo Ịikpo phọ.
29Ologhi ạmi kọ̋ḅaal ghan mem lọ ẹpomoghian ạmi rạmiinom,
ọbo kẹn ologhi ạmi ạḅaal mem lọ ịiḅaghami esoorom bịdi.
30Mị kọ̋pioman ghan ọoḅereghi mọ bịdi omuughu.
31Oomo awe dị ruḍighinaan ghan ịmi iiḍighi olegheri ni
mọ mị rạlogh ghan ni otu ruuruen.
32Mị ụmagh ghan ni buteneneen ạlogh otu ạmi
kụ úmeera ghan bịdi ọmina ẹpe eten phọ.
33Ạbunon awe rọbooghi ghan ni ịkaraph ạbidi,
kụ ọlo kꞌekulha mị ụ́booghi ịlo ạmi.
34Mị úkiilaan ghan ịlo awe kọḅem;
mị kőḅoorian ghan ọrol ologhi otu bịn
loor oghiilaan ạreer ạbidi.
35Oye kạ́tol dị kạnaghanan ịphen mị rạkaaph bọ?
Mị akunya ni mọ tọrotoro ekpo ọnhu ạmi eḍighi ni ịne.
Ẹnaan Oomo Ịikpo phọ ịphagharanaan ịmi!
Eḍighi ịyaar dị ịphen ọpo utomoghi bọ ịmi rụgbaanaan bọ ịmi,
kụ eḍighi ịdi ọge esi dị mị kạmiin,
36rꞌọḅaal ologhi kụ mị ạsighe ạkpologhian
ạḅile azua ẹmhu ạmi ịdipho eghoony.
37Mị mụkaaph ni ạḅeni Ẹnaan tọrotoro ịlo mị maḍighi ghan
ạḅile aphoophe ẹmhu ạmi ạmeremi sịphe ghisigh ọdi.
38Eḍighi ịyaar dị mị ami de phọ ạḍiphe mị raḅeph ghan bọ ozo phọ,
ạḅile aziton ḍịghaagh ọpo ạkaraghi bọ ạmoogh —
39eḍighi ịyaar dị mị malhe ghan eḍien dị oḅeph sịphe phọ
kụ aseere buḅephom iizo phọ ọkoony —
40pọ kpạripe lọ ịbiakpa rꞌabali kụ kesi,
ạroogho rꞌiitoor kụ esi!
Ikpo ọnhu phọ aJob mesi eekuna.
Currently Selected:
Job 31: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
