Emiighom 9
9
Ẹnaan ekiran ịyo rꞌaNoa
1 #
Emi 1.28
Kụ Ẹnaan ẹseph Noa rꞌạnmuny phọ ọdi kụ ẹḅeni bịdi mọ, “Ịmaraghian ẹbughe emuzeḍi sịen aḅirini phọ. 2Oomo ịnam, rꞌịnun, rꞌina, kighiilaan ghan inyina: mị mạḅogh bịdi ạlogh ḍịghaagh anyina. 3Nyịidipho nyina ketue ni ẹba ghan bịdi, ẹḅile ele ghan oomo ịizupha. Mị mịngo inyina oomo phọ ịphen mọ eḍighi eḍien anyina. 4#Lịv 7.26, 27; 17.10-14; 19.26; Dut 12.16, 23; 15.23Eniin ịyaar dị nyina kẹ́ba, ẹnam dị emughom ịḅaal, mị agbi ni loor esi dị ịḅaal phọ kụ aghuḍum mọ. 5Tọrobo oye lọ aphiemi ghuḍum oye kọliom ni. Mị kạliomom ḍuugh tọrobo ẹnam lọ ephiemi ghuḍum oye. 6#Ẹḍua 20.13; Emi 1.26Tọrobo oye lọ azu ịḅaal oye, pọ ọnon oye kakiigh aani ni nyọdi, ịdi eḍighi bọ Ẹnaan ịlhem oye ẹghighima loor.
7 #
Emi 1.28
“Kụ nyina, ịmaraghi emuzeḍi eleenye aḅirini phọ.”
8Ẹnaan ẹḅeni Noa rꞌạnmuny phọ ọdi mọ, 9“Mị rakiran ịyo phọ ạmi rꞌanyina, ḅịle rꞌẹemara ẹemara anyina, 10ḅịle rꞌoomo ạraraar dị ẹmoogh ḍiphooghu — oomo ịnun, rꞌịnam — rꞌạtorobo ịyaar dị ẹḍua sịphe ologhi oghuugh phọ kụ emite. 11Rꞌikpo ọnhu phọ ịphen mị rakiran ịyo rꞌanyina. Mị raguanaan mọ amem kẹ́tol mun dị ạmuum-aḍigho kapiemi oomo ạraraar dị ẹmoogh ḍiphooghu; amem kẹ́tol mun dị ạmuum-aḍigho kapiemi de phọ. 12Ẹphen kụ eḍeenaan ịyo kꞌagee-pọ phọ mị rꞌanyina rekiran bọ rꞌoomo ịpe ẹmoogh aani bọ ḍiphooghu. 13Mị raseere ghozogh oburukeeny ẹpe ạnyu okuaḍio phọ. Ọdi kaḍighi eḍeenaan ịyo phọ ạmi rꞌaḅirini phọ. 14Tọrobo amem lọ mị ạsighe ọotu aakpereghiom okuaḍio phọ kụ aghozogh oburukeeny phọ amite, 15bịn mị mạatughian oguanaan phọ ạmi esi anyina rꞌịnam mọ mꞌaḍigho képiemi mun oomo ạraraar phọ ịpe ẹmoogh bọ ḍiphooghu. 16Mem lọ aghozogh oburukeeny phọ amite ẹpe okuaḍio phọ mị kạmiin ni kụ mị ạatughian ịyo kꞌagee-pọ phọ mị aghiran bọ rꞌoomo ạraraar dị ẹmoogh ḍiphooghu. 17Ẹphen phọ kụ eḍeenaan oguanaan phọ ạmi esi oomo ạraraar dị ẹmoogh ḍiphooghu.”
ANoa rꞌạnmuny phọ ọdi
18Bụen kụ ạnmuny phọ aNoa omite bọ sịphe oghuugh phọ: ạSem rꞌạHam rꞌaJafet. ẠHam kụ ọde aKenan. 19Ịraar phọ ạnmuny phọ aNoa ạbuen phọ kụ ạburude ạburude oomo awe phọ odi bọ sịen aḅirini phọ.
20ANoa aḍighi oḅephom ozo. Ọdi kụ ọḅel oye dị ạzuph ireeny avain. 21Mem dị ọdi mạphughol miim dị aghiigh nyọdi, ọdi ạkatanaan ukpe ọdi ạrol ẹdaḅa ologhi otu ọdi, 22Mem dị ạHam ọde phọ aKenan ạmiin bọ mọ ọde phọ ọno odi ẹdaḅa, ọdi ạghi kụ ạḅeni ịyal phọ abumor phọ ọdi. 23Kụ ạSem rꞌaJafet ọghi ọsighe ukpe kụ ọpham ọpha ạbidi kụ orelhiom ẹgum ọman ọghi sịphe otu phọ kụ ozuom ọde phọ ạbidi. Bịdi ụgbole ni sighisigh ạbidi ọbo bịdi kọmiin ghan bọ ẹdaḅa ọde phọ ạbidi. 24Mem dị aNoa malhoghoma loor, kụ alegheri ịpe emite bọ rꞌịpe ọkaraghi ọbam ọony phọ ọdi aḍighi bọ nyọdi, 25ọdi ạḅem mọ,
“Itulughian ẹrolonaan Kenan.
Ọdi kaḍighi ẹbene abumor phọ ọdi.
26Iboom ni Ọmoogh-we Ẹnaan phọ ạSem,
aKenan kụ kaḍighi ẹbene ạSem.
27Ẹnaan eḍume bụo Jafet!
Ẹemara ẹemara ọdi orughan rꞌawe ạSem!
AKenan kụ kaḍighi ẹbene aJafet.”
28Aḍigho phọ eru bọ eten, aNoa ạḅile ạrol ịraar okuron rꞌooghdi ạsia, 29ọḅar ọḅophoghi aNoa ạrol esugha okuron rꞌooghdi ạsia kụ agbi omugh.
Currently Selected:
Emiighom 9: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
