Emiighom 8
8
Eekuna ạmuum-aḍigho phọ
1Kụ Ẹnaan ẹetughian Noa rꞌoomo ịnam mọ ịpe ẹrol bọ sịphe oghuugh phọ rꞌọdi. Kụ Ẹnaan emitiom ookuugh dị aghugh sịen aḅirini phọ kụ ạmuum mọ amiigh osoorom. 2Kụ oomo asikol ạmuum ọlha-ude phọ rꞌarughuugh ạrunhu-aḍibuo aḍigho phọ ẹpe kꞌạke phọ eghughian yogh kụ ọlophia phọ ạsoroph. 3Kụ ạmuum mọ ạkoronaan asoor esi oniin okuron rꞌooghdi aḍughul-otu. 4Sịphe aḍioph rꞌoḍual aḍughul-otu, omuneniom oḍual ụnwanyu phọ, kụ ẹdi oghuugh phọ atirian ạnyu eniin eegum, Ạrarat. 5Ạmuum mọ asoroghu ḍio etum ḍio tụtu ẹteeny ḍịḅel aḍughul-otu omuneniom aḍioph ụnwanyu phọ. Pọ kụ amem dị ogbi ọmiin ạnyu aruugum mọ.
6Rẹman inyadi aḍughul-otu kụ aNoa aghughuron eghuugh-ookuugh 7kụ amitiom ẹghiligho. Ẹghiligho phọ ịphepheghuan ghan ni bịn tụtu ạmuum mọ amoopha ạmadan. 8ANoa ạḅile arom ọkurughozo ọghi ophogh mụghumo ạmuum mọ mạḍuaghu sịphe ade phọ. 9Ọkurughozo phọ ạghi kụ ọ́miin esi lọ kạlel, kụ aḅula, ịdi eḍighi bọ ạmuum mọ kọ̋ḍuaghu omuneen sịen aḅirini phọ. Kụ aNoa asiph nyọdi aḅulemi ạlogh ologhi oghuugh phọ. 10Ọdi akoriom ẹman ịnon oḍual aḍughul-otu kụ ọdi ạḅile amitiom ọkurughozo phọ. 11Kụ ọkurughozo phọ ạghi, kụ arigheel dulhe aḍio phọ ạḍiphe phọ rꞌạḍinya oreeny-ọliv dị ạkapharan; kụ aNoa alegheri mọ ạmuum mọ mamooph amuneen sịen aḅirini phọ. 12Kụ ọdi akori ịnon oḍual aḍughul-otu, kụ ạḅile amitiom ọkurughozo phọ; egi phọ ẹphen ọdi óḅula mun.
13Mem dị aNoa ạman odiiny okuron rꞌoniin ạlha, ḍịḅel aḍughul-otu ọḅel ụnwanyu phọ, kụ ẹdi ạmuum mọ ạḍuaghu amuneen. Kụ aNoa azughuron ạgalaga phọ ozuom bọ oghuugh phọ kụ aphogh aaghironom, kụ ạmiin mọ ade phọ rẹkaraghar. 14Omuneniom ịyaldi rꞌoḍual aḍughul-otu, ụnwanyu dị amuneniom ịyal kụ ẹdi ade phọ ẹgharaghar ẹmadan.
15-16Kụ Ẹnaan ẹḅeni Noa mọ, “Mite sịphe ologhi oghuugh phọ, nạ rꞌạnir phọ ạna, rꞌạnmuny phọ ạna rꞌạnmariir phọ ạbidi. 17Sịghe oomo ịnam mọ rꞌịnun phọ amitiom, pịdi bịdi ọmaraghian omuzeḍi sịen aḅirini phọ.” 18Kụ iḍighi kụ aNoa rꞌạnir ọdi, rꞌạnmuny phọ ọdi rꞌạnmariir phọ ạbidi, omiteghu sịphe ologhi oghuugh phọ osoor: 19ịnam mọ, rꞌịnun phọ, aḍita etum ḍita, oomo phọ ạbidi emiteghu aani.
ANoa ạpighiron ẹkia
20Kụ aNoa ạkananaan Ọmoogh-we phọ enmeny ạrikia, kụ ạsighiogh eniin eniin oomo ọdo ịnam mọ, rꞌịnun phọ ịpe eseleman bọ, kụ ạphighironom ẹkia oguom ạnian sịphe enmeny ạrikia phọ. 21Eḍu ẹkia phọ ịḅeeraan ni Ọmoogh-we phọ kụ ọdi ạḅenian loor ọdi mọ, “Mị kạ́tuan mun ịkaraph oye atonyon de phọ, ịdi eḍighi bọ kꞌẹghoroghor phọ oye ịkaraph ịitughian kụ edi ghan sịphe ologhi phọ ọdi. Mị kạ́ḅile mun apiemi oomo ạraraar phọ ịpe mị ạlhem bọ ẹmoogh bọ ghuḍum ịduon mị aḍighi bọ mem mọ ạmuen. 22Eḍighi mạar dị ade phọ edi ni rẹki, pọ amem iḅeph rꞌamem ibugha kẹtol li. Amem osipheeny rꞌamem ẹghologhol kẹtol li; unu rꞌaghozogh, ḅịle ootaany rꞌaḍughul kẹtol ghan kẹn ni.”
Currently Selected:
Emiighom 8: ẠḌI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS