Ẹḍua 2
2
Ịdi ọmar bọ Mozis
1Oniin oye ọlo eghun aLivai kụ ạghi aphin ạnir ọnyo ạbidi, 2#Iiḍ 7.20; Hib 11.23kụ ạmaranaan olephiri ọony. Mem dị ạnir phọ ạmiin ẹnighe ọony phọ kụ ạaghi nyọdi ịraar ụnwanyu. 3Kụ útue mun ụbooghi, kụ ạsighe ikpu aloom egunum agbul ạḅay ịdi ạmuum káḍigh, kụ ạlogh mọony phọ ologhi aseere esi dị kepooph ọgbal ọphiiny phọ. 4Kụ umarani ọony phọ ạbona esi dị ẹkel ophogh ghan ịlo kemitenaan nyọdi.
5Kụ ọnyani ọdaam eelhe phọ aru esiḍia owura ạmuum, kụ ạnmanyaan-otu ọdi orelhe yogh ghan ẹpe ọgbal ọphiiny phọ. Kụ ạmiin egunum mọ sịphe ikpu phọ, kụ arom oniin ọnyani phọ mọ ạghi ạsighe aruom nyịno. 6Kụ ọnyani ọdaam eelhe phọ rokpegheron kụ ạmiin ọony phọ dị ramoghi. Kụ aḍigh igbiririph esi ọdi kụ ạḅem mọ, “Ọphon oniin ọony ọlo aHibru phọ.”
7Kụ umarani ọony phọ apuru ọnyani ọdaam eelhe phọ mọ, “Mị ụki ạmaghanaan nyịna oniin ạnir ọnyo aHibru dị kaakonominaan nyịna mọony phọ ḍụghum?”
8Ọnyani ọdaam eelhe phọ ạḅeni nyọdi mọ, “Kịa.” Kụ ọdi ạghi ạmagh onhiin ọony phọ. 9Ọnyani ọdaam eelhe phọ ạḅeni ạnir phọ mọ, “Pạm mọony phọ ọphon agheelom, uukonominaan imi, mị kạkpe ni nyịna ikpoki arookonom.” Kụ ạnir phọ ạpham mọony phọ agheelom aakonom. 10#Iiḍ 7.21Kụ ọony phọ rọmanam kụ ạnir phọ ạsighe nyọdi aḅulemi ạghiom ọnyani ọdaam eelhe phọ. Kụ ọdi ạsighe ọony phọ mọ ọlo ọno. Kụ ọdi ạatughian mọ, “Mị ụḅom nyọdi ologhi ạmuum kụ iḍighi kụ mị akol ḍien ọdi mọ aMozis.”
AMozis asuma akeel eelhe ạMidian
11 #
Iiḍ 7.23-28
#
Hib 11.24
Eniin aḍio, mem dị aMozis mạmanam, ọdi amite ni ạghi ophogh ạbuo aHibru awe phọ ọdi, kụ ạmiin ịdi ọkpaariom ghan bịdi oḍighi ịikpara iiḍighi. Rọmiin dị ọnyo Ijipt rakuphogh oye ọlo aHibru, 12ọdi ạnmanaghian, aphogh ẹphen aphogh ẹpe, oye ọ́miin, kụ aghiigh ọlo Ijipt phọ bịn aguph esi ịisaar aḍi. 13Ḍịeri phọ aḍio phọ kụ ọdi ạḅile ạghi kụ ạmiin ịdi ịyal awe ạbuo aHibru robeeghi, kụ ọdi ạḅeni nyọpo ạpioman bọ mọ, “Esi ika kụ ẹdi nạ ạtu bọ rakuphogh onyoogbo phọ ạna?”
14Kụ ọdi ạphagharanaan apuru nyọdi mọ, “Ạnhian kụ aḍighi bọ nyịna uwo ẹmhu rꞌoogboom ịiruen dị nạ kusophonaan iyoor ọoruen? Nạ rạwa ghan oghiigh aani ạmi ịdipho nạ aghiigh bọ nyọpo Ijipt phọ ḍụghum?” Kụ eḍigh ruugu esi aMozis, kụ aloghoma loor mọ, “Awe molhegheri ni ịphen phọ.” 15#Iiḍ 7.29; Hib 11.27Kụ mem dị ọdaam eelhe phọ ạnaghan bọ ịphen phọ, kụ aasophoghian ghan Mozis ịlo oghiigh. Kụ aMozis asuma ạḍua risigh ọdaam eelhe phọ, ạghi arugh ẹpe de ạMidian.
16Eniin aḍio, aMozis odi ọgbal aghuḍia ạtol ude, kụ oḍual ạnmanyaan aJetro oyil ạrikia ọlo ạMidian phọ uru ni ọkpaaghi ạmuum odoghoḍi arokoom ạmuum dị iyool-ịga rꞌạrutu-ịga ọde phọ ạbidi kẹpughol ghan. 17Kụ buniin abupoghom iyool-ịga oru ophorogh nmạnyaan phọ. Pọ kụ amem dị aMozis aḅetenu ạloghonaan bịdi ḍịghaagh ạngo ịnam mọ mụum. 18Mem dị bịdi origheel osi ọteeny Jetro ọde phọ ạbidi, ọdi apuru mọ, “Uḍighi ika kụ nyina ẹnuun ịduon erigheel rodon?”
19Kụ bịdi ọḅeni nyọdi mọ, “Oniin ọnyo Ijipt kụ ụtagharan iyoor ḍịghaagh abukoriom iyool-ịga phọ, ạḅile ụkpaaghinaan iyoor mụum dị ịnam mọ ẹpughol.” 20Kụ apuru nmạnyaan phọ ọdi mọ, “Oye phọ odi ẹghen? Uḍighi ika kụ nyina ẹwile bọ nyọdi erigheel? Ịki ẹmagh ọdi aru olhe eḍien rꞌayira.” 21Kụ ẹḅeeraan Mozis orughan rꞌoye phọ kụ oye phọ ạngo oniin ọnyani ọdi Zipora mọ aphin. 22Ọnyani phọ ạmaranaan Mozis olephiri ọony, kụ aMozis aloghoma mọ, “Mị ooruen sịen ade phọ ạḍien kụ mị akol ḍien ọdi mọ aGersom.”
23Ịman ni sịa kụ ọdaam eelhe phọ Ijipt amugh, kụ awe phọ Ịzirel rọkunuma ghan dọl ạrebene phọ ạbidi, kụ omoghi ghan ọmoogh ạpeleeny. Kụ Ẹnaan ẹnaghan emoghi ịminimiin phọ ạbidi. 24#Emi 15.13, 14Kụ Ẹnaan ẹnaghan ịḅiphighu phọ ạbidi kụ ẹetughian ịyo phọ ọdi aghiran bọ rꞌEbraham rꞌẠizik rꞌạJekob. 25Ọdi ạmiin dọl ạrebene awe phọ Ịzirel kụ ạnmanaan bịdi ighirigiir.
Currently Selected:
Ẹḍua 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
