Iiḍighi 15
15
Ookpomoghan dị asoor Jeruselem
1 #
Lịv 12.3
Buniin awe dị ọḍua Judia oru Ạntiok ụtughemi ghan bụo ạsiosi phọ mọ, “Emuton lọ nyina ẹdaph iilogh phọ aMozis eḍuna yogh, pụruku nyina kẹmoogh pẹleeny.” 2Ịtughemi phọ ạbidi ịghagh ni iloghi ạPol rꞌạBanabas kụ ịgbaragbara esoor. Kụ ạbuphe omeeraam bọ Kraist ọlogh Pọl rꞌạBanabas rꞌạbunon sịphe ogbo phọ ạbidi mọ ọghi Jeruselem ọteeny butelhedom mọ rꞌikumoor awe phọ ịlo aḍighiton phọ ạḍien.
3Kụ ạbuo ạsiosi phọ ororori bịdi osiemi eten. Bịdi ukiton rạmha aFinisia rꞌaSameria ọghaaph ghan oomo phọ ịpe aruuruen phọ mokiton bọ omeeraam. Kụ ịphen phọ ẹngo oboom ọḅaal ologhi oomo ạbuo ạsiosi ẹpe phọ. 4Osi bọ Jeruselem, abutelhedom mọ rꞌikumoor awe phọ rꞌạbueri phọ ạbuo ạsiosi phọ ụsighe ni bịdi. Kụ bịdi ọghaaph oomo ịdi Ẹnaan mẹtuan bịdi eḍighi yogh. 5Kụ buniin ạbuo otul aFarisi dị momeeraam uḅerenu ni kụ ọḅem mọ oḍun ghan ruuruen phọ, kụ ọkpaariom mọ bịdi ooko ghan iilogh phọ aMozis.
6Kụ abutelhedom mọ rꞌikumoor awe phọ ookpomoghan egina esi ịlo ọoḅeghion ọghaaph phọ ọphon. 7#Iiḍ 10.1-43Bịdi rọzughan ịminighan, kụ aPita aḅetenu ạḅeni mọ, “Bụo asiya, nyina elegheri ni mọ mebia ni Ẹnaan ịzua bọ ịmi sịen ogbo phọ anyina, mọ mị ụkaaph ooḅi ọghaaph phọ ụḅeni ruuruen phọ, ọbo bịdi ọnaghan kụ omeeraam aani. 8#Iiḍ 10.44; 2.4Kụ Ẹnaan phọ ẹpe elegheri bọ oomo ịitughian awe ẹngo aani Uwaloor Iigbia phọ ruuruen phọ ịdipho ọdi ụngo bọ iyira, oḍeenaan mọ ọno ạsighe ni bịdi ạloghoma. 9Kụ ọdi ọ́lhogh ọku ogbo ayira rꞌạbidi, ạtuan omeeraam mọ ạbidi kụ awoph iloghi phọ ạbidi. 10Kụ nyịidipho, iḍighi ika kụ nyina rẹdegh bọ Ẹnaan, ịlo ọsighe okuru ịminimiin ọnyaari irum aruuruen phọ momeeraam bọ, ọpo yira rꞌạburude ạburude phọ ayira útue bọ ụnyia? 11Eeye, yira omeeraam mọ esi ạḍiseph ạJizos Ọmoogh-we phọ kụ ẹdi yira ọmoogh bọ pẹleeny ịdipho ạbidi.”
12Kụ oomo aḍita awe phọ oḅoroghian ọnaghan ịpe ạBanabas rꞌạPol rọkaaph bọ ịlo areḍeenaan rꞌịiḍaany phọ Ẹnaan mẹtuan bọ bịdi eḍighi yogh ogbo aruuruen phọ. 13Bịdi rọghaaph rọwile, kụ aJems ạghaaph akureriom mọ, “Bụo asiya, ịnaghanan ịmi! 14ASaimon mạghaaph ni ịdi Ẹnaan mẹphur ri eeko ruuruen phọ ẹsaḅar we ogbo ạbidi ọghaaphaan aḍien phọ ọdi. 15Kụ ịphen phọ ẹḅophan ni rꞌịpe ariil phọ Ẹnaan ọge bọ mọ,
16 #
Ẹmos 9.11, 12 “‘Ịphen reten, kụ mị atigheel
ạḅile kẹn ạlogh otu phọ aDevid mameleghu bọ,
17ọbo ạbueri phọ awe phọ osugha bọ ọwa Ọmoogh-we phọ,
ḅịle rꞌoomo aruuruen phọ mị mạmagh bọ ạloghoma.
18Ịphen kụ ịdi Ọmoogh-we phọ aḍeenaan mọ olegheri kꞌaḍiodiidi.’
19“Kụ loor ịphen phọ, ọphon kụ ọnhu ịiruen ạmi, mọ yira kụ́uḅaghami ruuruen phọ rokiton bọ kolegheri Ẹnaan. 20#Ẹḍua 34.15-17; Lịv 18.6-23; Lịv 17.10-16Ọge ghụn ḍịnya ọghiom mọ bịdi ọgbatanaan ịipuan ạraraar lọ mọkoom ịko ọngo ruru mọ ạregelenya ạnmariir rꞌalephiri ẹmha kúle ghan, mọ kụ́ba ghan ịlo ọphur orum kụ oghiigh, rꞌịlo emughom ịḅaal. 21Kụ ạri mạal li iilogh phọ aMozis rubughotu phọ tọrobo aḍio ophooghian kꞌaḍiodiidi, ọkaaph ikpo ọnhu phọ ọdi ẹmha kịrokiro.”
Ạḍinya dị ọge ọghiom ruuruen phọ momeeraam bọ
22Kụ abutelhedom mọ rꞌikumoor awe phọ, rꞌoomo ạbuo ạsiosi phọ, omeeraam ọson awe sịphe ogbo phọ ạbidi, lọ kọḅaram Pọl rꞌạBanabas ọki Ạntiok. Kụ ọma Judas Bạsabas rꞌạSailas, ikpolom awe ogbo phọ ạbidi. 23Ịduon kụ ịdi ọge bọ ọghiom mọ,
“Yoor, abutelhedom mọ rꞌikumoor awe phọ, mipuru inyina aruuruen ạbuo asiya phọ ayoor odi bọ Ạntiok rꞌạSiria rꞌaSilisia. 24Yoor mọnaghan ni mọ abuniin awe dị yoor kụ́logh, ọḍua ni ogbo ayoor otu rịiḅaghamiom inyina ikpo ọnhu odughiom aruwaloor phọ anyina. 25Mọtuan ịphen phọ ọḅoph ọnhu omeeraam ọlogh awe oru ọteeny anyina. Bịdi kọdaph Bạnabas rꞌạPol, iiḅi asiya phọ anyina, 26bụen phọ mophiemi bọ ghuḍum ạbidi ọkuom esi aḍien phọ ạJizos Kraist Ọmoogh-we phọ ayira. 27Yoor ọlogh Judas rꞌạSailas, bụdi kọtuugh ni igina phọ ịphen phọ kụ ọkaaph ọnhu ạbidi ịḅeni inyina. 28Uwaloor Iigbia phọ rꞌayoor kụ usoph ịiruen phọ ịphen, mọ kị́leti inyina ḍiboom adool, omuton rạraar phọ ịphen eḍighi bọ ephigh phọ, 29mọ kéle ghan rạraar lọ ọphighironom ẹkia ọngo ruru, mọ kẹ́ba ghan ịlo emughom ịḅaal rꞌịlo ọphur orum kụ oghiigh, mọ ạregelenya ạnmariir rꞌalephiri ẹmha kúle ghan. Nyina ẹwile yogh ịphen phọ, pọ kịnighenaan ni inyina. Ịmaar ẹrol.”
30Urorori ni ọḅeniom mọ ẹghi ẹnighe, kụ bịdi ọghi osi Ạntiok, kụ ookpomoghi ḍita awe ạsiosi phọ ọngo ḍịnya phọ. 31Awe phọ rạal bọ ḍịnya phọ, kụ ọmoogh iboh rꞌịidereghi. 32Kụ aJudas rꞌạSailas, bụphe oḍighi bọ ni riil, ụghaaph ni ịminighan ạraraar ọḅeni bụo ạsiosi phọ, ịlo ọkparamiom rꞌọodereghiom ạbidi. 33Kụ mem dị bịdi mọrol ẹnum amem ẹpe phọ, kụ ororori bịdi rꞌedughom kụ oḅula esi ạbuphe orom bọ dom mọ. [ 34Kụ ẹkpianaan ni rꞌạSailas ọrol ịpa.]
35Kụ ạPol rꞌạBanabas ọrol aani Ạntiok ebianam, kụ rꞌịbadi ạbunon ạbuo asiya phọ ọghaaph ghan ọtughemiom ịlo Ọmoogh-we phọ.
ẠPol rꞌạBanabas ọgbaranaan
36Ịyal-ikpo aḍughul-otu reten, kụ ạPol ạḅeni Bạnabas mọ, “Ooḅula oomo ạramha phọ ophogh ịlo ạbuo asiya phọ odi, bụphe yira mọghaaph bọ ọghaaph Ọmoogh-we phọ ọḅeni.” 37Kụ ạBanabas ạwa ni mọ ọpham aani Jọn Mạk. 38#Iiḍ 13.13Kụ ạPol ómeera, ịdi eḍighi bọ ạMak ạgbatanaan bịdi ẹpe Pamfilia ọ́rolan ọteeny eekuna oḍighi phọ. 39Kụ oboom ọokonoghian asoor sịphe ogbo phọ ạbidi kụ ọgbaranaan. ẠBanabas ạpham Mạk aḍighom oghuugh agheel Sạipros. 40Kụ ạPol ạsaḅar Sạilas kụ anyeeniom. Bụo ạsiosi phọ rọḅogh bịdi rọngo ḍịseph Ọmoogh-we phọ, 41kụ bịdi okiton Sịria rꞌaSilisia ọkparami ghan bụo ạsiosi phọ.
Currently Selected:
Iiḍighi 15: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
