Iiḍighi 14
14
Ẹpe Aikoniom
1Kụ ẹpe Aikoniom, ạPol rꞌạBanabas ọḅile kẹn oḍigh obughotu ạbuo aJu phọ kụ ọghaaph dị ịminighan ạbuo aJu rꞌaruuruen phọ omeeraam. 2Kụ ạbuo aJu emeera phọ owiiliom ọnhu ruuruen phọ, kụ ọphue iloghi ạbidi esi ạbuo ạsiosi phọ. 3Abutelhedom mọ ụrol li ẹpe ḍịminighan ạdol, ọghaaph ghan ịlo Ọmoogh-we phọ rꞌạkpo ologhi. Kụ Ọmoogh-we phọ ạkparami ghan ọghaaph ạḍiseph phọ ạngoom bịdi ịikpo oḍighi yogh ịiḍaany rꞌareḍeenaan. 4Kụ aḍita ẹmha phọ odia, buniin oḍighan rꞌạbuo aJu phọ, buniin oḍighan rꞌabutelhedom mọ.
5Kụ aruuruen phọ, rꞌạbuo aJu phọ, rꞌạbuo ạrumhu phọ ạbidi, ọḅoph ọnhu ịlo ọgilaam rꞌoroḅol ạbidi ikpo. 6Kụ ẹdu eḍigh rụru ạbidi kụ osumughu omite Lịstra rꞌaDaabi rạmha aLaikonia rꞌịphalagbal phọ. 7Kụ bịdi ụrol li ẹpe phọ ọghaaph ghan ooḅi ọghaaph phọ.
Ẹpe Lịstra rꞌaDaabi
8Ẹpe Lịstra, oniin oye ạrol li dị aḍighi ẹkugha kꞌọkuruḅaka onhiin ọdi, dị kꞌekulha kőrelhe ghan. 9Oye phọ ọphon ạnaghan ni ọghaaph phọ ạPol, kụ ạPol aphogh nyọdi akananaam kụ ạmiin mọ ạmoogh ni omeeraam dị kookonomom nyọdi, 10kụ amoogha mọ, “Mẹera aaleeny!” Kụ ọdi gburughutuph aḅetenu amiigh orelhe. 11Kụ aḍita awe phọ ọmiin bọ ịpe ạPol aḍighi bọ ọyughuron ọnhu aLaikonia mọ, “Ạrumugh phọ meeteneghian we isooraan iyoor!” 12Kụ ọta Bạnabas mọ aZius, mọ ạPol aHemis ịdi eḍighi bọ ọdi kụ uwo ẹmhu ọghaaph phọ. 13Kụ oyil ạrikia eru phọ oghol bọ mọ aZius, ẹpe ọloghonaan bọ otu emitenom ẹmha phọ, ạsighe ịizughum rꞌipoola ireeny aanmenemi sịnam amiteghom pạ ọnhu-aḍibuo phọ, kụ ọdi rꞌaḍita awe phọ ọwa ọphighiron ẹkia ọngo abutelhedom mọ.
14Kụ mem dị ạPol rꞌạBanabas ọnaghan bọ ịphen phọ, urunyian ni ibura ạbidi loor ophin ologhi, kụ oḍigh ogbo aḍita awe phọ ọlooghi mọ, 15#Ẹḍua 20.11; Ạsuo 146.6“We phọ! Iḍighi ika kụ nyina reḍighi bọ rạraar phọ ịphen phọ? Yoor awe ni. Yoor ọmoogh ni ḍiniin aḍizu ịdipho anyina. Yoor ọsighe ooḅi ọghaaph iruomonaan inyina, ọbo nyina ẹwile oopho ạraraar phọ ịphen ekiton esoman Ẹnaan phọ edi ghan bọ, ẹpe ẹlhem bọ kẹ rꞌade rꞌọphiiny phọ rꞌịlo esi rꞌesi. 16Gediidi, ọdi ạwile ni mọ oomo areelhe ọtuan reten phọ ịpe ạbidi, 17kụ ọ́wile bịn dị ụ́maaghi iniin ịlo aḍimite phọ ọdi. Raḍighi ghan iiḅi, odi kꞌạke rạngo ghan ọlophia, rꞌamem ẹeḍiom, kụ rịpheremi ghan inyina eḍien rꞌọḅaal ologhi.” 18Ụkpar ri kụ ikpo ọnhu phọ ịphen emirighan we phọ ọphighiron ẹkia phọ ọngo ạbidi.
19Kụ buniin ạbuo aJu dị ọḍua ẹpe Ạntiok rꞌAikoniom kụ oru, ọponyon iloghi aḍita awe phọ kụ oroḅol Pọl ikpo ọghogh ọḍuanam pạ ẹmha phọ, ogbiom ghan mọ mamugh. 20Kụ ạbumatuan phọ ọmeregha oko nyọdi ọlogh ogbo, kụ aḅetenu aḅula ẹmha phọ. Kụ rẹḅaal kụ ọdi rꞌạBanabas ọḍua ọghi Daabi.
Ịdi ọḅile oḅula osi Ạntiok phọ ọpo ạSiria
21Kụ ẹpe Daabi, ạPol rꞌạBanabas ọghaaph ooḅi ọghaaph phọ dị ạbuminighan awe omeeraam aani, kụ ogbi oḅula Lịstra, rꞌAikoniom rꞌẠntiok. 22Ọkparami ghan ruwaloor ạbumatuan phọ oromoghiom mọ bịdi kụ́bile omeeraam mọ ạbidi, mọ kọmiinom ni iboom ịminimiin kụ ogbi oḍigh aani ọmar phọ kꞌẸnaan. 23Kụ rọson ikumoor awe rosereghi sịosi ạsiosi phọ, rꞌịiḅereghi rꞌọrol ọkoony kụ ọḅogh bịdi ọngo Ọmoogh-we phọ bịdi omeeraam bọ.
24Kụ bịdi okiton Pisidia ọghi osi Pamfilia. 25Bịdi rọghaaph ọghaaph phọ Ẹnaan pạ Paaga kụ ọghi Atalia. 26Kụ oḍigh oghuugh origheel Ạntiok, ẹpe ọḅogh bọ bịdi ọngo ḍịseph Ẹnaan ịlo oḍighi phọ ọpo bịdi mọmadan bọ.
27Rosi bọ kụ ookpomoghi bụo ạsiosi phọ ọghaaph oomo phọ ạraraar phọ Ẹnaan mẹtuan bọ bịdi eḍighi yogh, rꞌịdi ọdi maghughuron eghuugh omeeraam ạngo ruuruen phọ. 28Kụ bịdi ọrolan rꞌạbumatuan phọ pạ ẹmha phọ obia.
Currently Selected:
Iiḍighi 14: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
