MAK 7

Iyi Uvwovwu N-nyarɛ

(Mat 15:1-9)

1Afarisi keeni umeseyi we embisegeni Undwa oko banɛ nu Jɛrusalɛm, aa ụlwatagwụ pi Jisus. 2Aka na ta a kwụbɛ te eseshi-iyi Jisus a ya iyimɛyɛ uzawa i'ɛlɛ tusukwutwo!

3Afarisi keeni Eju elele, yaa shɛ oo sukwutwo su i'ɛlɛ ya aba tebiye a zha shɛ a ya iyimɛyɛ o. A untanganɛ iyi nɛ ogwunukwoshi aba mbisegeni aŋ. 4A zha shɛ a ya iyi elele nɛ banɛ nu udukwo, semi ta a dụrɛ tugwo meni.#7:4 ta a dụrɛ tugwo meni: Tɛjɛshɛrɛgatu ko ti hiɛŋ, ta a njɛ…Ubaptizim. Inyɛ iyi ifwugwo namba aa untanganɛ gana na te e mbisegeni aŋ, ti ihwumbɛlɛ nkolo mu meni tuswa, tu nkwasha, ti iyi uhwugwa nɛ aa njɛ nɛ ɛtumburɛ keeni shɛdugwa.#7:4 shɛdugwa: Tɛjɛshɛrɛga tu ko tu zasa shɛdugwa o. #Mat 23:25; Luk 11:39

5Ibɛ po Afarisi ne embisegeni Undwa unseni Jisus, ɛɛ hiɛŋ, Iwembe po eseshi-iyi bu 'wa sụ iyi uvwovwu n-nyarɛ, aa ya iyimɛyɛ uzawa i'ɛlɛ tusukwutwoo? #Gala 1:14

6Ge Jisus jishijɛ aŋ, bɛɛ hiɛŋ, Ahiɛba atwa na a nda iyi tɛnda-te-eshe, ga Ayizaya jɛmɛ tigesere tu na ti teni cɛŋ ne hiŋ aka na bɛɛ hiɛŋ,

Atwa ga ma muna ụjɛrụma nu unu wo ohondo,

ama shɛmɛ sha aba kaa shɛ dụlụmɛ ne mi.

7Tɛgadaga aa ma n zhɛba,

o mbisogono atwa iyi nɛ atwa peni aŋ unu ibɛ gana maa imbisegeni ya Agwatana ta.

8Hia laka unu-tupana wa Agwatana maa hi untangana iyi uvwovwu ya atwa.#Ayiz 29:13

9Ge Jisus hiɛŋ aŋ sasana, Iwɛ-tɛkana, hia laka ga unu-tupana wa Agwatana maa hi untangana iyi uvwovwu hiŋ! 10Go Moses peni atwa unu, bɛɛ hiɛŋ, Muna bishi bu keeni bino bu ụjɛrụma. Bɛɛ hiɛŋ sasana, Bụtụ be elele na twajɛ bishi bwa keeni bino bwa, ga kwụnɛ bụ uzawa ụjita tuto.#Ụban 20:12; 21:17; Liv 20:9; Undwa 5:16 11Ama tuba hio mbisogono maa ga bụtụ mbishi bishi bwa kwo kaa bino bwa maa, Iyi elele nɛ ɛbi gɛ zhɛ ba ya ule ibɛ no ofwo mi, M pwonuo iŋ Agwatana upwaŋ.#7:11 M pwonuo iŋ Agwatana upwaŋ: Nu gana na te Eju a nda iyi na tɛzhɛba ta aba, iyi elele nɛ ɛɛ hiɛŋ o pwonuo Agwatana upwaŋ, a zhashɛ a nda ya uhwara we elele ni ibɛ o, okwo emeci bu zha shɛ o tumongono iŋ maa a njɛ iyi elele ni ibɛ o. 12Hi leneni shi atwa maa a ndanɛ ya eshi aba kwo kaa ono aba ugondu we elele kwukwuŋ o. 13Hia fwula n-ndumwa ma Agwatana iwɛ iyi uvwovwu hiŋ nɛ ehio mbisogono atwa. Iyi ifwugwo inyɛ namba nɛ ahia ndaanana gana ata.

Iyi nɛ ya hashɛgana Atwa

(Mat 15:10-20)

14Ge Jisus suyananɛ atwa ofwugwo no ofwo ubwa, bɛɛ hiɛŋ aŋ, Shɛlaga ma iyi elele nɛ Ngɛɛ zhɛ ma duma maa hi eshiciji. 15Iyi elele nɛ beni no tupohondo teni na amɛ bụtụ, eri shi ya hashɛgana bụtụ o, semi iyi nɛ ya banɛ na amɛ bụtụ, ibɛ kiri eri ya hashɛgana bụtụ. 16[Bụtụ be elele na 'yajɛ acɛbɛ, ga hwuga].

17Aka na te e genji ufwugwo wa atwa ata, ge Jisus teni nu umwono uko, eseshi-iyi ubwa unseni bu ecilo n-ndumwa ma ata baa manganjɛ.

18Ge Jisus heŋteni aŋ, bɛɛ hiɛŋ, Asha hi te eshiciji shi du suu? Hi eshiciji shi suu maa iyi elele nɛ beni no tupohondo teni na amɛ bụtụ eri shi ya hashɛgana bụ? 19Iwɛnɛ ti yaa shɛ shɛ na ahaŋsa ubwa yee teni, ama nu ugbokwo ubwa yee teni nazhɛ bɛɛ zhɛ bo inzo iŋ nu ubizo. (Gabata ge Jisus eshicigeni aŋ maa iyimɛyɛ ye elele namwawaŋ shɛshɛshɛ.)

20Nazhɛ ge Jisus to tuhwulo, bɛɛ hiɛŋ aŋ, Iyi nɛ ya banɛ na amɛ bụtụ ibɛ ya hashɛgana bụtụ. 21Iwɛnɛ ti yaa shɛ na amɛ bụtụ ahaŋsa awɛ a banɛ; 22tɛ tuwɛle, ti izunde, ta bụtụ tụkwụna, tu ukwedeyi ụwɛ iyi ti'yaga, tu umungwuta, ta tuhalakaka, ta masha mụ wɛ, te eshe awɛ, to tugbozhigo, tu unyangana, tụ ụlagwụ, 23na amɛ bụtụ ijɛ iwɛ ya banɛ hwɛɛ, ibɛ kaa ya hashɛgana bụtụ.

Rishe-tɛtɛtana re Biyikwo

(Mat 15:21-28)

24Ti ge Jisus beni apata, baa sanɛ na cɛnjɛ tu Taya keeni Saidụn.#7:24 keeni Saidụn: Tɛjɛshɛrɛga tu ko tu zasa keeni Saidụn o. Bee teni nu umwono uko, i namɛ na amɛ ubwa maa kede bụtụ be elele mepi o, ama bi eri shi kaa ba swakana aŋ o. 25Gunu ata biyikwo bu ko na mpiala mụ wɛ mu namɛ na amɛ yɛu ibwɛ yo o hwụjɛ iwɛ Jisus, baa zhajɛ bee leyi ni ivwunɛ Jisus. 26Biyikwo ata kaa shɛ Bigrik, ama na cɛnjɛ tu Sairo-fonikia ee meci bu. Baa tabwa Jisus maa ga bacɛnga butumwa ata bi ibiri namɛ na amɛ yɛu ibwɛ yo o.

27Ge Jisus jishijɛ bụ, bɛɛ hiɛŋ, Lono maa miaụŋ mi shigeji tugwo, iwɛnɛ ti yaa zhɛshɛ maa e shepi iyimɛyɛ miaụŋ maa e keleni oywoywo shiwawa.

28Ama biyikwo ata jishijɛ Jisus, bɛɛ hiɛŋ, Iyɛri, bwonu ga, ama tuba oywoywo shiwawa du kaa o tulono tuta tu uteburu, aa zanga owunzu iyimɛyɛ ɛtɛ ya layajɛ.

29Ge Jisus jishijɛ bụ, bɛɛ hiɛŋ, Zhaga, butumwa ata bi ibiri bonuo na amɛ yɛu ɛtɛ bu, iwɛ n-ndumwa mu ga abu jɛmɛ.

30Te biyikwo ata ji ni ihwɛ ibwɛ, bee jiteni ga yɛu ibwɛ te e wecinji bu na adugwa, tobwolo butumwa ata bi ibiri bonuo na amɛ ubwa cebe.

Ge Jisus Nɛnjɛ Bụtụ na Kwụrụmɛ

31Ge Jisus beni sasana na cɛnjɛ tu Taya, bee duri Saidụn, bee zhe ni Itekwu Galili, bee duri cɛnjɛ ti Dikapolis.#7:31 Dikapolis: Kwụba ti'eshicigono tu 5:20.

32Nazhɛ atwa oko shapɛ bụtụ bu ko na shɛ akwụrụ, na kaa 'yajɛ sasana tugbudu. Aa tabwa Jisus maa patana bu u'ala ubwa.

33Ge Jisus zeriji bu zalụ bu ko, ee genji ufwugwo wa atwa ata, bee tepegeni ivwɛ ibwɛ na acɛbɛ akwụrụ ata. Baa 'wɛŋ mecemi, bee timengeni bụratụ ba bụtụ ata.#Mak 8:23 34Ti ge Jisus shepi eshe na azuba, bee 'nyenji, bɛɛ hiɛŋ bụtụ ata, Ɛfata,#7:34 ɛfata: N-ndumwa mu ga mɛ shɛ nu unu Ru'aramaik, ruba rɛ shɛ rɛjɛmɛ ru na aa duma la pa'ụtụ na cɛnjɛ te Eju na aka na ti ge Jisus zhajɛ. (ecilo ibɛ shɛ, Ushigwo.)

35Nazhɛ acɛbɛ bụtụ ata ushigwo, ti iyi nɛ ge umpi bụratụ bwa yoo tufwurungwo, baa jɛmɛ n-ndumwa tebiye. 36Ge Jisus tɛtaganɛ aŋ unu maa kede e mbishi bụtụ be elele o. Ama okwo tu baa tɛtaganɛ aŋ unu gana elele, gobwonu du kaa ee keeni unabarɛ ubwa tu'ananga duwa.#Mak 1:44 37Yaa dama atwa ata duwa, ɛɛ hiɛŋ, Bɛ njɛ iyi elele tebiye. Be usheji shɛkwụrụ maa shɛ hwụjɛ iwɛ, tu n-nguronu maa mu dumanɛ iwɛ.

Currently Selected:

MAK 7: RBT

Highlight

Copy