MAK 6

A Lacɛ Jisus nu Nazarɛt

(Mat 13:53-58; Luk 4:16-30)

1Ti ge Jisus beni apata, bee gwuri nu ụshɛpwụ ubwa. Eseshi-iyi ubwa 'wa bụ. 2Tụ Ụjita-ụhinjanụ ci, ge Jisus kwuni atwa iyi timbisogono nu umwono Tụ'ụlwatagwụ. Ibɛ po iwɛ ubwa dama atwa ofwugwo a na hwụjɛ iŋ, ɛɛ hiɛŋ, Cee bụtụ ga seshi ijɛɛ? Ti'inta ti imbe nɛ ee peni bu upo baa nda ugondu wa arụhwajɛ i ci gana gaa? #Mat 7:28; Mak 1:21 3Shɛ ubwa maa shɛ bishebi ata, yɛu Meri, shɛ ubwa suu shɛ batagwụ ba ata Jemis, no Josɛs, no Juda keeni Saimon? Shɛ angwụfwụ ubwa na suu namɛ no tu epe? Ibɛ po iwɛ ubwa tatụlanụ sụ aŋ, aa lacɛ bụ.

4Ge Jisus hiɛŋ aŋ, Bigesere vwụnjɛ shɛ ụjɛrụma o, semi no ofwo na ee meci bu, keeni na ashashɛ atwa ubwa, ta atwa ihwɛ ibwɛ.#Jon 4:44

5Iwɛ ecilo ata ge Jisus eri shi ba nda ugondu wa arụhwajɛ duwa apata o, semi i'ɛlɛ kwakwa bee petengeni no ohiuhiu agwumanshɛ na twa sụ ofwugwo baa nɛnjɛ aŋ.#Mak 5:23; 7:32; 8:23 6Yaa dama Jisus iwɛnɛ ta a tɛtanɛ shɛ bụ rishe.

Ge Jisus Tumwanɛ Eseshi-iyi Ubwa Utumwa

(Mat 10:5-15; Luk 9:1-6)

Ge Jisus rinji na ashɛpwụ na rungwutwonu apata, boo mbisogono atwamwa iyi. 7Baa suyanɛ eseshi-iyi umpwa-na-ba-eyebi pu bwa, baa tumwanganɛ aŋ utumwa atwa eyeyebi. Bee peni aŋ du ụhwada maa a lasụ mpiala mụ wɛ.#6:7 mpiala mụ wɛ: Kwo kaa mpiala mu na mu zasa shɛshɛshɛ. #Luk 10:1 8Ge Jisus peni du eseshi-iyi ubwa unu maa kede a 'waŋna iyi elele na tahaŋnụ ta aba o, semi shekwute kiri. Bɛɛ hiɛŋ aŋ, Ta 'waŋna ma iyimɛyɛ, okwo ulapa, okwo ukwuribi na shɛrɛta she embi hiŋ o. 9Ama hwuŋtongono ma shibida, to urogono ma n-nduka mi yeyebi o. 10Ge Jisus hiɛŋ aŋ, Ofwo elele na ehi zhe, ehi teni ni ihwɛ, nama ma apata uuwa i ci aka na ɛhi zhɛ hia bana apata. 11Ofwo elele na ehi teni, ee hi le shi, kwo kaa aa hwụjɛ shɛ iwɛ hiŋ, bana ma apata, bibizo ma opwupwutu shivwɛvwɛjɛ shi hiŋ maa e hi le tiseyida no ofwo aba.#Ugo 13:51

12Nazhɛ eseshi-iyi ubwa beni ga ee enenji maa ga atwa jɛshɛrɛjɛ-shihaŋsa sha aba. 13Ee becenje atumwa-ibiri ofwugwo, ee zwegeni manɛbɛ ma buta no ohiuhiu atwa ofwugwo a na a gwumanga, aa nɛnjɛ aŋ.#Jem 5:14

Tu'wo tu Jon Bɛnjɛ-bu-ubaptizim

(Mat 14:1-12; Luk 9:7-9)

14Aka na ta Agwuma Hɛrod#6:14 Agwuma Hɛrod: Ubwa shɛ gɛ Hɛrod Antipas na shɛ gɛ Hɛrod ata ụ'wụtụ. hwụjɛ unabarɛ Jisus#6:14 unabarɛ Jisus: Kwo kaa, Izeci ibwɛ. iwɛnɛ ti izeci Jisus beni urishi na cɛnjɛ ta ata. Ibɛ po atwa oko hiɛŋ,#6:14 atwa oko hiɛŋ: Tɛjɛshɛrɛga tu ko tụ ngwụshɛ ti hiɛŋ, bɛɛ hiɛŋ. #Mat 16:14; Mak 8:28; Luk 9:19 Ga Jon bɛnjɛ-bu-ubaptizim ubwa hiɛ no tu'wo, ibɛ po ukpahiŋ ga wa nda ugondu tedure nu bwa.

15Ama atwa oko hiɛŋ, Ge Elaija, atwa oko hiɛŋ, Bụtụ bu ko na ashashɛ egesere angwụshɛ baa shɛ.

16Ama aka na ti gɛ Hɛrod hwụjɛ iŋ, bɛɛ hiɛŋ, Ga Jon ata Ngee mwi la uhiuhiu, ubwa hiɛ.

17Iwɛnɛ ti gɛ Hɛrod tumwanɛ la atwa aa 'imɛ Jon ee kepi bu nu umwono-tishi iwɛ Hɛrodias biyikwo bi yɛu-bino bwa ge Filip, iwɛnɛ ti bee zeni bu.#Luk 3:19,20 18Ga Jon mbishi Hɛrod, bɛɛ hiɛŋ, Undwa leni shi maa zeni biyikwo bi yɛu-bino bu o.

19Iwɛbɛ po gɛ Hɛrod ba lụma ya Jon, baa jala maa kwụna bụ, ama bi eri shi kaa ba kwụna bu o. 20Gɛ Hɛrod kaa ba nda inyɛsɛ Jon, iwɛnɛ ti bee mepi maa ga Jon shɛ bụtụ bi tiririri keeni bụtụ bi tijilo, iwɛbɛ po baa ima bụ u'ala tebiye. Okwo tu n-ndumwa mu Jon ma gwumana Hɛrod, gɛ Hɛrod kaa ba jala waa maa bu na hwuga n-ndumwa mu Jon nu unyasa aka elele.

21Aka na ti gɛ Hɛrod teyinje ụjita tumata tu bwa, baa ndanɛ azhɛgba ubwa, ne ehiu asaza, keeni ehiu Galili iyimɛyɛ, apata tuba gɛ Hɛrodias gwushiji ya ohwolu. 22Aka na ti yɛu-yo-o hɛrodias teni baa hiɛbɛ tɛhiɛba, tɛhiɛba tu bwa kaa tu kwụlanɛ Hɛrod, na atwa na tileni a ya iyimɛyɛ nu bwa. Ibɛ po agwuma gɛ Hɛrod hiɛŋ owo ata, N lụpɛ iyi elele nɛ aba jala, N zhɛ ma bu pana iŋ. 23Gɛ Hɛrod du to-tuwa, bɛɛ hiɛŋ bụ, Iyi elele nɛ ɛbi zhɛ bu ma n lụpa, okwo tutu ashashɛ cɛnjɛ-ta-tugwama ti mi, N zhɛ ma bu pana iŋ! #Est 5:3,6

24Ibɛ po yɛu ɛtɛ yo o beni yee zhegeni bino bwa, bee heŋteni bu, bɛɛ hiɛŋ, Imbe Ngɛɛ zhɛ ma lụpa agwumaa?

Bino bwa jishijɛ bụ, bɛɛ hiɛŋ, Ga shɛ uhiuhiu Jon ata ba nda ubaptizim.

25Ibɛ po yɛu ɛtɛ beni kakayɛ gunu ata, bee teni pa agwuma, bɛɛ hiɛŋ bụ, I n kwụlanɛ maa n shiyeneni uhiuhiu Jon ubaptizim nɛ ɛkpɛtɛ hwuwayɛ hwuwayɛ go.

26Ama amɛ agwuma hashɛganụ tebiye iwɛ tuwa tu na boo go towo ne eshe atwa na gɛgajɛ a ya iyimɛyɛ nu bwa. Ibɛ po bee jeri shi ya maa nyasa yɛu ɛtɛ iyi nɛ baa lụpɛ bụ. 27Ibɛ po agwuma tumwanɛ busaza bu ko, bee peni bu unu maa ga zha u mwe uhiuhiu Jon nu umwono-tishi. 28Ibɛ po busaza ata sanɛ ga nu umwono-tishi, bee mwe uhiuhiu Jon, bee shiyeni uŋ nɛ ɛkpɛtɛ, bee peni yɛu ɛtɛ towo, nazhɛ yɛu ɛtɛ shepi uŋ bee peni bino bwa.

29Aka na te eseshi-iyi Jon hwụjɛ iwɛ ɛtɛ, aa zhajɛ ee shepi ru'wo ru bwa ee ni ru nu u'uye.

Ge Jisus Peni Atwa igbɛɛ-iyebi-na-akpakwụ-a-ta iyimɛyɛ

(Mat 14:13-21; Luk 9:10-17; Jon 6:1-14)

30Nazhɛ atumwa Jisus ụlwatagwụ pu bwa, ee swegeni bu iyi elele nɛ ɛɛ njɛ keeni iyi nɛ ee mbisegeni atwa.

31Ge Jisus hiɛŋ aŋ, Zhajɛ ma tugwo zalụ bu ko no ofwo na bụtụ zasaba ahiɛba hiɛba, maa hi to ụhinjanụ cwɛŋ. Iwɛnɛ ta atwa na a zhajɛ o hwulo gembi ofwugwo, hi beni shi kaa udama maa hiɛ yɛ okwo iyimɛyɛ o. 32Ee teni ga nụ ụhaŋtụ ee hwuri no ofwo na bụtụ zasaba abaaba.

33Aka na ta atwa ofwugwo a na bananjɛ na ashɛpwụ swoswoswo kwụbɛ aŋ tɛ ɛ zhɛ, ee mepi aŋ. Ibɛ po atwa ata mbo tahaŋnụ ni ivwunɛ aa jɛrɛ aŋ apata tuto. 34Aka na ti ge Jisus banɛ nụ ụhaŋtụ, baa kwụbɛ atwa ofwugwo ata ụ'wụtụ, inyɛmɛnyɛmɛ ya aba kaa shɛ bụ, iwɛnɛ te e tileni gana agwụdụ na zasa bi'iywa. Bee mbisegeni aŋ iyi ifwugwo.#Tɛrɛ 27:17; 1 Shɛgwu 22:17; 2 Shɛrụ 18:16; Izik 34:5; Mat 9:36

35Aka na tu uwaŋna zhɛ utwonuo, eseshi-iyi ubwa zhaganɛ bụ, ɛɛ hiɛŋ bụ, Epe shɛ ofwo na bụtụ zasaba, hwuwayɛ go uwaŋna kaa zhɛ utwonuo. 36Hiɛŋ atwa ga maa ge zhe na ashɛpwụ shihilo a na gwumwongonu epe maa ɛ sɛ iyimɛyɛ maa a yɛ.

37Ge Jisus jishijɛ aŋ, bɛɛ hiɛŋ, Pana aŋ ma iyimɛyɛ maa a yɛ.

Eseshi-iyi ubwa heŋteni bu, ɛɛ hiɛŋ, Ta zha suu maa tɛ sɛnjɛ aŋ mbrad apamu woshi maa a yɛ? #2 Shɛgwu 4:42-44

38Ge Jisus heŋteni aŋ, bɛɛ hiɛŋ, mbrad mu mba ahiɛ 'yajɛɛ? Zhaga hikeni ma. Aka na te e hikeni, ɛɛ hiɛŋ bụ, Mbrad mu ta keeni ijɛnɛ iyebi.

39Nazhɛ ge Jisus hiɛŋ aŋ, Mbiso ma atwa ga maa ga a gɛgaga shɛwala shɛwala na ambɛ ga olom. 40Ibɛ atwa ata gɛgajɛ ga shɛwala orubwo dipi-yebi keeni shɛwala shi nya orubwo dupu. 41Ge Jisus suji mbrad ma ata mu ta keeni ijɛnɛ ɛtɛ iyebi, bee shepi eshe ubwa na azuba, baa tabwa Agwatana maa pana mu uwebiye ubwa, nazhɛ boo dwonu mu, bee peni eseshi-iyi ubwa maa e sheji mu na agba atwa ata. Bee hweŋshi aŋ du ti ijɛnɛ ɛtɛ iyebi.

42Aa yɛ mu hwɛɛ aba, ee shigeji. 43Nazhɛ eseshi-iyi ubwa suji owunzu mbrad mu na mu vwanɛ aŋ, ee shidinji shɛrɛgada umpwa-na-shɛba-shi-yebi keeni ijɛnɛ ɛtɛ du. 44Atwa na yɛ mbrad ma ata namɛ atwa igbɛɛ-iyebi-na Akpakwụ A-ta (5,000).

Ge Jisus Zhe Tahaŋnụ na Azuba Meni

(Mat 14:22-33; Jon 6:13-21)

45Gunu ata ge Jisus tɛtajɛ eseshi-iyi ubwa maa ge e teni nụ ụhaŋtụ maa a 'yagana bu umbe e zhe hileniye Bɛtɛsaida, bɛɛ hiɛŋ atwa ata ofwugwo, Zhaga hwulo ma ya. 46Na aba na ti ge Jisus hiɛŋ atwa ata, Tugwo ma oo, bee beni apata bee zhe ni ishɛmɛ maa nda adua. 47Aka na tu ụrụmɛ shɛ, ụhaŋtụ ata namɛ na ashashɛ itekwu ɛtɛ, ge Jisus tuba ta namɛ na cɛnjɛ bwooko. 48Baa kwụbɛ aŋ ta a nda ụbaụta ụ'wụtụ nụ ụhaŋtụ tuhaŋtana, iwɛnɛ ta a twa nu uvwugo, aka ata shɛ geri ba aasavwungwa a'wụtụ. Ge Jisus tuba ba zha tahaŋnụ na azuba meni, i namɛ na amɛ ubwa maa kashɛka aŋ. 49Ama aka na ta a kwụbɛ Jisus tu baa zha tahaŋnụ na azuba meni, yaa shanɛ aŋ okwo ụbaratụ, ibɛ po ee kwuni n'ungwa. 50Iwɛnɛ po hwɛɛ aba na kwụbɛ bụ, uriri 'imɛ aŋ.

Ge Jisus dumanɛ iwɛ na aba, bɛɛ hiɛŋ aŋ, Gamba, ta nda ma inyɛsɛ o! Ga shɛmɛ shi hiŋ shi lemi. 51Nazhɛ ge Jisus teni nụ ụhaŋtụ no ofwo aba, nazhɛ uvwugo ata du genji ya. Yaa dama aŋ duwa na shɛmɛ sha aba, 52iwɛnɛ te e eshiciji shi iwɛ mbrad ma ata, iwɛnɛ ta shɛmɛ sha aba shi eri shi she eshicigo iŋ.#Mak 8:17-21

Ge Jisus Nɛnjɛ Agwumashɛ ni Gɛnɛsarɛt

(Mat 14:34-36)

53Aka na te e keshi ee ci cɛnjɛ ti Gɛnɛsarɛt, ɛɛ zɛtɛ ụhaŋtụ wa aba. 54Gunu na ti ge Jisus beni nụ ụhaŋtụ, atwa ata kaa mepi bu. 55Atwamwa gezheji ee zhe na cɛnjɛ ta ata kpaaŋ, aa 'wananjɛ agwumashɛ aba na shɛkpa, aa zhajɛ; no ofwo na ge Jisus namɛ. 56Ofwo elele na ge Jisus teni, okwo nụ ụshɛpwụ na gwumwa, kwo kaa nụ ụshɛpwụ ụ'wụtụ, kwo kaa ne shihilo, atwamwa e suje agwumashɛ o tulono aŋ no ofwo udukwo, a tabwa Jisus maa e timengeni okwo tukwushɛ tu utogwo ubwa. Atwa elele na kaa timengeni bu, ụngwụ wa aba wo hwuwowu.#Mat 9:20; Mak 3:10

Currently Selected:

MAK 6: RBT

Highlight

Copy