MAK 11

Ge Jisus Teni Jɛrusalɛm

(Mat 21:1-11; Luk 19:28-40; Jon 12:12-19)

1[Aka na ti ge Jisus ne eseshi-iyi ubwa] gwumwonu nu Jɛrusalɛm, ti Bɛtifagi keeni Bɛtani, ee ci Ishɛmɛ Buta. Ge Jisus tumwanɛ eseshi-iyi ubwa eyebi utumwa. 2Bɛɛ hiɛŋ aŋ, Zhaga ma nu ụshɛpwụ ga namɛ geri-be-eshe hiŋ, gunu na to ohio tono uŋ, hi zhɛ hia kwụba biywoywo bi izhinyɛci bu ko na ee umpi, bu naa na bụtụ be elele ta sụcɛ shɛ kwukwuŋ. Tufwurinje bu ma, hi zhajɛ nu bwa. 3Yaa shɛ bụtụ be elele ihi heŋteni maa, Iwembe po ohio tufwurungo buu? Hiɛŋ bu ma, Agwangwama#11:3 Agwangwama: Kwo kaa Agwuma iyi. ubwa 'yajɛ uhwugwa nu bwa, gunu ata ɛ zhɛ ma hi ganganɛ bu maa hi shapɛ bu epe.

4Eseshi-iyi ubwa sanɛ ga, ee jiteni biywoywo ata bi izhinyɛci na ee umpi no tupohondo to odubo nu uhwaŋna, ee kwuni bu tutufwurungo.#Mak 14:16

5Atwa oko na shikekeni apata heŋteni aŋ, ɛɛ hiɛŋ, Imbe bwa ɛhi zhɛ hia nda no biywoywo ga bi izhinyɛci ohio tufwurungo buu?

6Ɛɛ jishijɛ atwa ata gana ebe ge Jisus ge mbishi aŋ, nazhɛ aa ganganɛ aŋ. 7Aa shapɛ biywoywo ata bi izhinyɛci no ofwo Jisus, ee petengeni tugwuno ta aba na aba izhinyɛci ɛtɛ, nazhɛ ge Jisus munji bu baa patanɛ. 8Nazhɛ atwa ofwugwo beri otogwo aba nu uhwaŋna. Atwa oko jwɛ tububa#11:8 beri otogwo…tububa: Inɛ gɛ i shɛ uhwaŋna uko na Eju a ta bụtụ bụ ụjɛrụma amuraba. Ti i'wɛ'wɛ ee beri tu nu uhwaŋna. 9Nazhɛ atwa na hwuri umbe na atwa na lɛ ekwunyi a ugaga, ɛɛ hiɛŋ,

Shɛtana ma Agwatana!

Zhemonjino ma bụtụ ata be ci ni izeci ya Agwangwama.#11:9 Shɛtana: Tɛjɛshɛrɛga tu ufwugwo ti hiɛŋ, Hosana, inɛɛ nɛ egini ibɛ oko a shɛ, sukwu iti bicinji, egini anya a shɛ ashɛtwa kwo kaa tizhemonjino Agwatana. 11:10 #Shɛzu 118:26; Mat 21:15; 23:39

10Zhemonjino ma Cɛnjɛ-ta-tugwama te bishi tu

ge Devid tu na te ci.

Zhemonjino ma azuba na hwuri kpaaŋ!

11Ti ge Jisus teni Jɛrusalɛm, bee hwuri bee teni nu Umwono wa Agwatana. Baa mbiyanganɛ iyi elele kpaaŋ, aka na tu ụrụmɛ shɛ, bee beni bee zhe Bɛtani ne eseshi-iyi ubwa umpwa-na-ba-eyebi.#Mat 21:10,11,17

Ge Jisus Keleni Ụ'wụ'wụ Uwowo Unu

(Mat 21:18-19)

12Aka na ti iyi heri ta a banɛ ni Bɛtani, imunɛ kaa gwụmɛ Jisus. 13Aka na tu baa kwụbɛ ụ'wụ'wụ uwowo uko na 'yajɛ ambɛ tu wee shikeni taa dụlụ, bee heŋshi maa okwo bi zhɛ ba kwụbɛtana uŋ tụ'walụ, bee zhe. Aka na ti bee ci ucilo ubwa, bu kwụbɛ shɛ iyi elele o, semi ambɛ ubwa kiri, iwɛnɛ ta aka tụ'walụ to owowo te ci shi. 14Nazhɛ ge Jisus hiɛŋ uwowo ata, Te kwuni nu hwayɛ ga pushi geri-be-eshe, kede bụtụ be elele yɛ ya tụ'walụ tụ bụ kwukwuŋ. Eseshi-iyi ubwa kaa hwụjɛ iwɛ ɛtɛ.

Ge Jisus Teni nu Umwono wa Agwatana

(Mat 21:12-17; Luk 19:45-48; Jon 12:13-22)

15Aka na te e ci Jɛrusalɛm, ge Jisus teni nu Umwono wa Agwatana, bee kwuni atwa na a sanga iyi, ta atwa na a sa iyi tu'unzo maa e beni nu Umwono ata. Baa 'waŋtatanjɛ eteburu atwa na o shoyingo ukwuribi, ti iyi ya ajɛjɛ ya atwa na a sanga olukwukwu. 16Bi leneni shi bụtụ be elele maa 'waŋna i'wɛŋnɛ maa dulo ukpogwu Umwono ata wa Agwatana o. 17Ge Jisus mbisegeni atwa ata, bɛɛ hiɛŋ, I 'nywotwo, yɛɛ hiɛŋ. Ɛ zhɛ ɛ hiɛŋ umwono mu maa umwono wa adua iwɛ edenji elele kpaaŋ. Ama hiɛ njɛ uŋ tuba ụpangwụ wa ashɛrɛ.#Ayiz 56:7; Jɛrɛ 7:11 18Aka na te ehiu onongbo ne embisegeni Undwa hwụjɛ iwɛ ɛtɛ, nazhɛ aa jalakaka gana na i shɛ maa a kwụnɛ Jisus. Ama a nda kaa inyɛsɛ ibwɛ. Iwɛnɛ ti iyi nɛ bee mbisegeni atwa ata ofwugwo dama aŋ kpaaŋ.

19Aka na tu ụrụmɛ shɛ, ge Jisus beni nụ ụshɛpwụ ata te eseshi-iyi ubwa.

Ụ'wụ'wụ Uwowo Hweteni

(Mat 21:20-22)

20Aka na ata Jisus zhɛ tɛkashɛka nu uvwungwa dididi, aa kwụbɛ tu ụ'wụ'wụ ata uwowo hweteni te kwune taa ne tini tu bwa.

21Ga Pita teyinje, bɛɛ hiɛŋ Jisus, E-Bimbisegeni, hioko uwowo ga ebi ge keleni-unu, u hwotwonuo.

22Ge Jisus jishijɛ aŋ, bɛɛ hiɛŋ, Tɛtana ma Agwatana rishe. 23Iwɛ-tɛkana Omo hi mbiso maa, yaa shɛ bụtụ be elele zasa oruwo na amɛ ubwa, yaa shɛ bɛɛ hiɛŋ ishɛmɛ gɛ, Mushingwo maa leyi ni itekwu, baa tɛtanɛ kaa rishe maa iwɛ ɛtɛ baa jɛmɛ zhɛ ya 'yagana bu eshe, ijɛ ɛtɛ zhɛ ya shana bu ga gana ata.#Mat 17:20; 1 Kor 13:2 24Ibɛ po Ngɛɛ hi hiɛŋ, Iyi elele nɛ ahia lụpa na adua, tɛtana ma rishe maa hi loshigwo iŋ, ijɛ ɛtɛ kaa zhɛ ma hi shana gana ata.#Mat 7:7-11; Jon 14:13,14 25Aka elele na ehi shikeni ahia nda adua, yaa shɛ ahi ga 'yajɛ uwuru na bụtụ, gangana bu ma, iwɛ maa Bishi hiŋ na namɛ na azuba ihi gengeni du tu'wanganga ti hiŋ.#Mat 6:14,15; 18:35 26[Ama yaa shɛ ehi gengeni shi bụtụ,#11:26 Ama yaa shɛ ehi gengeni shi bụtụ: Tɛjɛshɛrɛga tu ufwugwo tu zasa buwala ga bu 26. asha bishi hiŋ na namɛ na azuba zha shɛ ma hi gangana du tu'wanganga ti hiŋ o].

E Heŋteni Jisus iwɛ Ụhwada Ubwa

(Mat 21:23-27; Luk 20:1-8)

27Aka na ata Jisus gwuleneni nu Jɛrusalɛm, boo rungo nu Umwono wa Agwatana. Ibɛ ehiu onongbo, ne embisegeni Undwa keeni n-nyarɛ, zhajɛ pu bwa. 28Ee heŋteni bu, ɛɛ hiɛŋ, Nu ụhwada naa kwuŋ aba ndangana ijɛ kpaaaŋ? Okwo gaaba kwuŋ ibi peni ụhwada ga aba ndangana ijɛ kpaaaŋ?

29Ge Jisus jishijɛ aŋ, bɛɛ hiɛŋ, Me ci ba mo hi hoŋtono iheŋtene ike du, ɛhi n jishijɛ iŋ hwayɛ, asha nazhɛ Ngɛɛ zhɛ mo hi mbiso ụhwada na Ama ndangana ijɛ kpaaŋ. 30Na azuba suu ubaptizim ata ga Jon njɛ la atwa banɛ, okwo no olugwo atwa waa banɛ? N jishijɛ ma.

31Aa njɛ ushaura abaaba, ɛɛ hiɛŋ, Yaa shɛ ɛti hiɛŋ hwayɛ, U banɛ na azuba, bi zhɛ mo tu hoŋtono, bɛɛ hiɛŋ, Iwembe po tuba ahiɛ tɛtanɛ shɛ la iwɛ ubwa rishee? 32Yaa shɛ kaa ɛti hiɛŋ hwayɛ u banɛ no olugwo atwa, a nda kaa inyɛsɛ ya atwa ofwugwo ata. Iwɛnɛ ta atwa ata kpaaŋ tɛtanɛ la rishe maa ga Jon shɛ bigesere gom. 33Ɛɛ jishijɛ Jisus, ɛɛ hiɛŋ, Ti mepi shi ijiji o.

Ge Jisus hiɛŋ aŋ, Asha N zha shɛ du mo hi mbiso ụhwada na Ama ndangana ijɛ kpaaŋ o.

Currently Selected:

MAK 11: RBT

Highlight

Copy