MATIU 22

N-ndumwa Tumanganjɛ iwɛ Iyimɛyɛ Isene Towo Tiya

(Luk 14:15-24)

1Ge Jisus jishɛgananɛ aŋ, nu n-ndudmwa tumanganjɛ, bɛɛ hiɛŋ, 2Cɛnjɛ-ta-tugwama ta azuba tɛ shɛ gana agwuma oko na ndanɛ yɛu ibwɛ ye eyi towo. 3Baa tumwanɛ miaụŋ-mu-ugondu ubwa, mee zhe maa suyaganɛ atwa ata boo go mbiswogwo, maa a zhajɛ towo, ama i kwụlanɛ shɛ aŋ maa a zhajɛ o. 4Baa tumwananɛ miaụŋ-mu-ugondu mi nya, bɛɛ hiɛŋ. Zhaga mbishe ma atwa ata Ngaa nga suywanua, Hioko ma, N imwangwa iyimɛyɛ mi i tiya, aa shɛlwa inɛ mi keeni iyimabiga mi nɛ nyemenji. Zhajɛ ma ya maa hiɛ yɛ iyimɛyɛ towo! 5Ama i tatụlanụ sụ aŋ o, bu na bu ko hwuri ni itimɛ ibwɛ, binya bụtụ zhe no ofwo ugondu tihinya tu bwa. 6Atwa vwɛ aba 'imɛ miaụŋ ma ata mu ugondu, aa njɛ aŋ ụpụrụsa, aa kwụnɛ aŋ. 7Aka na ta agwuma hwụjɛ iwɛ ɛtɛ, baa njɛ isɛbwɛ, baa tumwanɛ asaza ubwa, ee iricinji atwa ata, bee hwoŋzhinji ụshɛpwụ wa aba.

8Nazhɛ bɛɛ hiɛŋ miaụŋ mu bwa mu ugondu, Iyimɛyɛ towo i ci ya tiya, atwa na Ngaa nga suyanɛ a lanɛ shɛ o. 9Zhaga ma ya ne ekpekiti, atwa elele na ɛhi kwubɛ hwayɛ, suyanɛ aŋ ma no ofwo iyimɛyɛ towo tiya. 10Miaụŋ ata mu ugondu mi beni ga mee zhe ni ihwɛŋnɛ, mee suje atwa elele na ɛɛ kwubɛ, ta atwa awɛ, ta atwa ebiye. Nazhɛ agaiŋ shini ya umwono ata towo pwomuu.#Mat 13:47

11Aka na ta agwuma teni maa kwụba agaiŋ ata, baa kwụbɛ ya apata bụtụ bu ko na urigeni shi utogwo towo. 12Agwuma heŋteni bu, bɛɛ hiɛŋ, E-biyejilo mi, gana na bwa ya ebi teni epe ebu urigeni shi utogwo towoo? Ama bụtụ ata dumanɛ shɛ iwɛ ye elele o.

13Nazhɛ agwuma hiɛŋ miaụŋ mu bwa mu ugondu, umpo bu ma i'ɛlɛ, ti ivwunɛ, maa hi keri bu ne tishi to tupohondo. Apata u'wo-tutwa keeni ene tiya namɛ.#Mat 8:12; 13:42,50; 24:51; 25:30; Luk 13:28 14Atwa ofwugwo aa ga suyanɛ, ama atwa na ee teri twa sụ ufwugwo.

Ushaura iwɛ Ukwuribi Ụdalụ

(Mak 12:13-17; Luk 20:20-26)

15Nazhɛ Afarisi zhe aa njɛ ushaura maa a 'imɛ Jisus nu n-ndumwa mu na baa duma.#Mak 3:6 16Aa tumwanɛ eseshi-iyi aba, na atwa Hɛrod, ɛɛ hiɛŋ bụ, E-Bimbisegeni, ti mepi maa gabụ bɛ shɛ bụtụ bɛ tɛkana, na tɛkana kaa du obo mbisogono atwa uhwaŋna wa Agwatana, bu 'wa sụ kaa du iwɛ tuswoswoswo tu gana na atwa namanjɛ o. Bɛ njɛ shɛ kaa du iwɛ bu na atwa tuzanga o. 17Iti mbishi kaa, Undwa leni suu maa tu na tụpa Sisa ukwuribi ụdalụ, okwo u leni shi?

18Ama ge Jisus mepi kaa tuhaŋsa ta aba tụ wɛ, bɛɛ hiɛŋ aŋ, Ahiɛba atwa na a nda iyi tɛnda-te-eshe, iwɛmbe po ahi ma mangaa? 19M mbiseni ma ukwuribi ata ụdalụ! Aa panɛ bụ urinya uko. 20Bɛɛ hiɛŋ aŋ, Ụsụbwa aba na kwuŋ swanɛ nu ukwuribi ga, keeni ti'nyeci tɛ gaa?

21Ɛɛ hiɛŋ bụ, Ga Sisa.

Nazhɛ ge Jisus hiɛŋ aŋ, Iyi elele nɛ i shɛ inɛ Sisa, na pana ma Sisa, inɛ ye elele nɛ kaa i shɛ inɛ ya Agwatana, na pana ma Agwatana.#Rom 13:7

22Aka na ta a hwụjɛ iwɛ ɛtɛ, yaa dama aŋ duwa, ee genji bu, ee hwuri.

Ushaura iwɛ Tihiɛ

(Mak 12:18-27; Luk 20:27-40)

23Nụ ụjita ata uko uko, Asadusi a na hiɛŋ maa tihiɛ tu zasaba o, zhajɛ pi Jisus, ee unseni bu, #Ugo 4:1,2; 23:6-10 24ɛɛ hiɛŋ, E-Bimbisegeni, go Moses hiɛŋ, Yaa shɛ bụtụ be elele zeni biyikwo, bee 'wi, bee meci shi kaa miaụŋ, asha gɛ yɛu-bino bwa zeni biyikwo ata tizhaada, iwɛ ma matanga yɛu-bino bwa miaụŋ.#Undwa 25:5 25Miaụŋ-me-eyi mi cenje mu namba na ashashɛ tu. Bu na bi hiiŋ zeni biyikwo, bee 'wi, bi meci shi yɛu o, yɛu-bino bwa zeni biyikwo ata tizhaada. 26Gobwonu du yaa shaananɛ, ta bụtụ bụ tatụ, gana go yaa shanɛ aŋ hwɛɛ aba ebe cenje. 27Nu umɛwɛɛ ibɛ, biyikwo ata du 'wi. 28Biyikwo aba tuba bɛɛ zhɛ ba sha hwuŋ na ashashɛ atwa ata ecenje nɛ tihiɛɛ? Iwɛnɛ po kpaaŋ aba kaa zwonuo bu la.

29Ge Jisus jishijɛ aŋ, bɛɛ hiɛŋ, Iwɛnɛ ehi mepi shi Utakada Iwɛ ya Agwatana kwo kaa ukpahiŋ wa Agwatana, ibɛ po ahiɛ 'inɛ. 30Iwɛnɛ po nɛ tihiɛ, a zha shɛ a zana hwuŋ eyikwo, okwo tụmbụla, a zha shɛ a pana du o, ɛ zhɛ a sha hwuŋ gana atumwa na namɛ na azuba.#22:30 atumwa…Na azuba: Tɛjɛshɛrɛga tu ko ti hiɛŋ, atumwa Agwatana…Na azuba. 31Hi ta rɛcɛ shɛ suu iwɛ nɛ Agwatana ihi mbishi, iwɛ tihiɛ ta atwa na 'wi? Bi hiɛŋ, 32Gamba n shɛ Agwatana Abraham, na Agwatana Azik, keeni Agwatana Jekob. Bɛ shɛ shɛ Agwatana atwa na 'wi o, semi Agwatana atwa na shɛ buumwa.#Ụban 3:6 33Aka na ta atwa ofwugwo ata hwụjɛ iwɛ gɛ, nazhɛ imbisegeni ibwɛ dama aŋ duwa.#Mat 7:28

Unu Ụ'wụtụ Tụpana

(Mak 12:28-34; Luk 10:25-28)

34Aka na ta Afarisi hwụjɛ maa ge Jisus lasụ Asadusi nu n-ndumwa, aa ụlwatagwụ. 35Nazhɛ bụtụ aba bu ko na shɛ Bụtụ-bu-undwa menji Jisus ni iheŋtene, bɛɛ hiɛŋ bụ, 36E-Bimbisegeni, unu-tupana naa kwuŋ ụ shɛ una ụ'wụtụ nu Undwaa?

37Ge Jisus jishijɛ bụ, bɛɛ hiɛŋ, Bɛ shɛ bo lubo Agwangwama na shɛ Agwatana bụ, na amɛ bụ kpaaŋ, to ohwulu bu kpaaŋ, ta ahaŋsa bụ kpaaŋ, #Undwa 6:5 38Inɛ ɛtɛ ibɛ shɛ unu-tupana ụ'wụtụ, ubwa du kaa shɛ una uhiiŋ. 39Una uyebi ụ shɛ du gana bwa, una ata hiɛŋ, No lubo uyebi bu gana na obu momo lubo.#Liv 19:18; Mat 19:19; Rom 13:9; Gala 5:14; Jem 2:8 40Andwa Moses kpaaŋ, keeni iyi nɛ ee 'nyeci na atakada egesere, a datanɛ onu-tupana ga eyebi.

Ge Jisus heŋteni Aŋ iwɛ Krast

(Mak 12:35-37; Luk 20:41-44)

41Aka na ta Afarisi ụlwatagwụ, ge Jisus heŋteni aŋ, 42bɛɛ hiɛŋ, Imbe kwuŋ ehi heŋshi iwɛ Krast ataa? Yɛu aba kwuŋ baa shɛɛ? Ɛɛ jishijɛ bụ, ɛɛ hiɛŋ, Yɛu Devid.

43Ge Jisus jishijɛ aŋ, bɛɛ hiɛŋ, Asha gana na ya Mpiala mi zeriji la Devid bɛɛ hiɛŋ bụ, Agwangwamaa? Ge Devid kaa hiɛŋ bụ,

44Agwangwama, hiɛŋ Agwangwama mi,

Gɛga nu u'ala ubiye mu

uuwa i ci aka na Ngee tileni atwa-i'ime bu tuta tɛ ɛvwɛvwɛjɛ mi.#Shɛzu 110:1; Ugo 2:34,35; Ehib 1:13; 10:13

45Yaa shɛ ge Devid hiɛŋ bụ, Agwangwama, asha gana na baa shɛ ya yɛu ibwɛɛ?

46I zasa bụtụ be elele eri bɛ jishijɛ bụ ya iheŋtene ɛtɛ o. Te kwuni na aka ata, i zasa ya bụtụ be elele 'yajɛ eshe-hwoo maa unsono bu i'unsene elele kwukwuŋ.

Currently Selected:

MATIU 22: RBT

Highlight

Copy