LUK 7

Ge Jisus Nɛnjɛ Yɛu-ugondu Uhiu wa Asaza Dipi-yebi

(Mat 8:5-13)

1Aka na ti ge Jisus hwuweni atwa ata hwulajɛ n-ndumwa mu bwa iwɛ timbiso kpaaŋ, nazhɛ bee zhe bee teni Kapanaum. 2Yɛu-ugondu uhiu wa asaza dipi-yebi nɛ 'yaganɛ bu uhwara tebiye tebiye ya gwuma, i vwɛ cwɛŋ i shɛ i 'wi ga. 3Aka na tu uhiu ata hwụjɛ unabarɛ Jisus, baa tumwanɛ n-nyarɛ me Eju pi Jisus maa a tabwa bụ maa zhajɛ nɛnganga bụ yɛu ibwɛ ugondu. 4Aka na tu n-nyarɛ ma ata mi zhɛ pi Jisus, aa tabwa bụ, ɛɛ hiɛŋ, Uhiu ata wa asaza teni cɛŋ maa ndanɛ bụ ijɛ. 5Iwɛnɛ tu boo lubo udenji tu, ubwa ni ikɛnyi ibwɛ du iti meni umwono tu Tụ'ụlwatagwụ.#Ugo 10:2

6Ge Jisus sanɛ na aba. Aka na ti ge Jisus te zhe shi taa dụlụ ti bee beni ni ihwɛ, ibɛ uhiu ata wa asaza dipi-yebi tumwanɛ eyejilo ubwa pi Jisus maa ɛ hiɛŋ bụ, Iyɛri, ta mama pana ụbaụta o, iwɛnɛ tu Ngaa lanɛ shɛ maa teni ni ihwɛ mi. 7N heŋshi shi kaa du maa N lanɛ maa ma zhajɛ pụ bụ o, ama dumana iwɛ kiri, i zhɛ ya nɛnga yɛu mi. 8Gamba ni ikɛnyi mi du, N namɛ nu ụhwada, Ngaa untanganɛ du asaza nu ụhwada mu. Ngɛɛ hiɛŋ bụtụ ga, Zhaga peye, bi zhɛ ba zha; Ngɛɛ hiɛŋ bụtụ na, Zhajɛ, bi zhɛ ba zhajɛ, Ngɛɛ hiɛŋ bijama mi, Nda ijɛ, bi zhɛ ba nda iŋ.

9Aka na ti ge Jisus hwụjɛ iwɛ ubwa, yaa dama bu, baa mbiyanganɛ atwa ofwugwo a na 'wa bụ, bɛɛ hiɛŋ aŋ, Mo hi mbiso maa, N ta kwụbɛ shɛ rishe-tɛtɛtana rụ 'wụtụ gana ga okwo ni Isrɛl o.

10Aka na ta atwa ebe baa tumwanɛ gwure ni ihwɛ, ee jiteni yɛu ɛtɛ tobwolo i namwawaŋ fwaaŋ.

Ge Jisus Hicinjɛ Yɛu-ye-eyi Bululo

11Na aba inɛ gɛ,#7:11 Na aba inɛ gɛ: Tɛjɛshɛrɛga tu ko ti hiɛŋ, Ti iyi heri, kwo kaa tɛ ɛ hiɛŋ, wenebe. ge Jisus teni nu ụshɛpwụ uko na ɛɛ hiɛŋ Nain, eseshi-iyi ubwa ofwugwo keeni anya atwa ofwugwo ụ'wụtụ zhagajɛ nu bwa. 12Aka na tu boo gwumwongonu no odubo ụshɛpwụ ata, baa kwụbɛ ta a 'waŋnɛ ru'wo aa banɛ nu ụshɛpwụ ata. Bụtụ ata u 'wi kaa shɛ yɛu mokondo nɛ bino bwa meci, bino ata bwa kaa du shaananɛ bululo. Atwa ofwugwo ụ'wụtụ banɛ nu ụshɛpwụ ata, aa zhagajɛ ne biyikwo ata. 13Aka na ta Agwangwama kwụbɛ bụ, inyɛmɛnyɛmɛ ibwɛ shɛ bụ, bɛɛ hiɛŋ bụ, Ta twa-u'wo. 14Ge Jisus keeni izhɛ bee timengeni akwakwa ata aa 'waŋnɛ ru'wo ra ata, nazhɛ atwa ata 'waŋnɛ rụ shikeni. Ge Jisus hiɛŋ ru'wo ra ata, E-semberi ga! M bi hiɛŋ, Ishijɛ! 15Nazhɛ bụtụ ata ge 'wi ishijɛ baa jɛjɛ, bee kwuni n-ndumwa tụdụmanga. Nazhɛ ge Jisus shepi bu bee peni bino bwa.

16Ibɛ po inyɛsɛ shɛ atwa ata kpaaŋ, ee peni Agwatana ụjɛrụma, ɛɛ hiɛŋ, Ti 'yajɛ ma bigesere bụ 'wụtụ na ashashɛ tu! Ɛɛ hiɛŋ sasana, Agwatana zhajɛ maa mbiyono atwa ubwa! 17Ibɛ po unabarɛ ijɛ baa njɛ mburusonu nu Judia kpaaŋ#7:17 Judia kpaaŋ: Kwo kaa na cɛnjɛ te Eju kpaaŋ. keeni cɛnjɛ te elele tu na tu rungwutwonu aŋ.#1 Shɛgwu 17:17-24; 2 Shɛgwu 4:32-37; Mak 5:21-24,35-43; Jon 11:1-44

Ga Jon Ubaptizim Tumwanɛ Eseshi-iyi Ubwa Pi Jisus

(Mat 11:2-19)

18Aka na te eseshi-iyi Jon mbishi bu iwɛ ijɛ kpaaŋ, 19Ga Jon suyanɛ eseshi-iyi ubwa eyebi baa tumwanɛ aŋ pa Agwangwama, bɛɛ hiɛŋ aŋ, hoŋtono bu ma maa, Ubwa suu shɛ bụtụ ata be ci, okwo ta 'yaka binya bụtụ?

20Aka na ta atwa ata ci Jisus, ɛɛ hiɛŋ bụ, Ga Jon bɛnjɛ-bu-ubaptizim utu tumwanɛ utumwa no ofwo bu, bi hiɛŋ, Gabụ suu bɛ shɛ bụtụ ata be ci, okwo ta 'yaka binya bụtụ?

21Gunu ata ge Jisus nɛnjɛ atwa ofwugwo a na igwumɛgwumɛ gɛnɛgɛnɛ, keeni mpiala mụ wɛ ma pana ụbaụta, bee usheji sholubo shu ofwugwo shishe arahaŋ.#Mat 4:23; Mak 3:10 22Ge Jisus mbishi atumwa ata, bɛɛ hiɛŋ aŋ, Zhaga mbiso ma Jon iyi nɛ ahiɛ kwụbɛ keeni iyi nɛ ahiɛ hwụjɛ. Sholubo sho ushogwu shishe, atwa na ivwunɛ ya aba ge 'wegeni a zha tahaŋnụ, aa nɛnga atwa ụngwụ-uwaŋna, shụkwụrụ sha hwuga iwɛ, aa hicanjɛ atwa na ge 'wi, aa anangana okofwo Anabarɛ Ebiye.#Ayiz 29:18,19; 35:5,6; 61:1; Luk 4:18,19 23Bụtụ na zasa ahaŋsa eyeyebi iwe mi gwoje.

24Aka na ta atumwa Jon hwuri, ge Jisus kwuni atwa ata ofwugwo iwɛ Jon timbiso, bɛɛ hiɛŋ, Iwembe po ehi beni la ehi zhe nụ ụshɛkaa? Maa hi kwubɛ suu bininjidegbe ata uvwugo wo zhingoto? 25Shibwonu iwembe po ehi beni ehi zhe laa? Asha iwɛ maa hi kwubɛ suu bụtụ ata urigeni tugwuno tu tusunɛ sunɛ? Hioko ma, atwa na o urogono tugwuno tu ụjɛrụma, a na kaa a ya uraiŋ ubiye, a namba kaa nu nhwaŋ mɛ shɛgwuma. 26Asha iwembe po ehi beni ehi zhe laa? Maa hi kwubɛ suu bigesere? Iiŋ, Mo hi mbiso, bụtụ ata hwuri bigesere. 27Bụtụ ata ubwa shɛ bụtụ na oo 'nywotwo la iwɛ ubwa, ɛɛ hiɛŋ, Hioko ma, Ma tumwana butumwa mi nu umbe bu, ubwa zhɛ na bu hangana uhwaŋna.#Mala 3:1; Mak 1:2 28Mo hi mbiso maa i zasa bụtụ na hwuri Jon na ashashɛ atwa na eyikwo meci o. Ama bụtụ na 'nyanɛ nu ụjɛrụma na Cɛnjɛ-ta-tugwama ta Agwatana tuba hwuri bu. 29Aka na ta atwa ata kpaaŋ keeni ele-ụdalụ hwụjɛ iwɛ ɛtɛ, ee leni nu unu wa aba, maa Agwatana ubwa shɛ bụtụ bi tiririri, iwɛnɛ tu ga Jon njɛ aŋ la ubaptizim.#Mat 21:32; Luk 3:12 30Ama Afarisi na atwa Undwa a na lacɛ la maa ga Jon njɛ aŋ ubaptizim, o jinokwo iyi nɛ Agwatana ga jala maa ndana aŋ. 31Ge Jisus hiɛŋ, Imbe Ngɛɛ zhɛ mɛ hiɛŋ maa atwa aka ga sụbɛɛ? Ni imbe kwuŋ Ngɛɛ zhɛ ma manga aaŋ? 32A sụbɛ miaụŋ mu na mɛ jɛjɛ nu ugba udukwo, a na mama suyaganụ, ɛɛ hiɛŋ:

Ti hi hwulegeni akpasana, hiɛ hiɛbɛ shɛ kaa tɛhiɛba o; ati hiɛ zunganganɛ azunga tiriri, hiɛ cwɛ shɛ kaa u'wo! 33Ga Jon bɛnjɛ-bu-ubaptizim zhajɛ la, bɛ yɛ shɛ iyimɛyɛ, bu swe shi meni mụ tụ'walụ ta afwafwa o, ɛhi hiɛŋ, Butumwa-bi-Ibiri namɛ na amɛ ubwa.#Luk 1:15 34Yɛu Bụtụ zhajɛ baa ya yibwa, baa swa meni mụ tụ'walụ ta afwafwa, ɛhi hiɛŋ, Bi 'yajɛ rishe ri iyimɛyɛ, buswe be meni mụ tụ'walụ ta afwafwa, biyejilo be ele-ụdalụ keeni atwa-iwɛwɛ. 35Miaụŋ mi ti'inta me elele mi menji ti'inta aa kwụbɛ maa ti teni cɛn.

Ge Jisus Namɛ nu Umwono Saimon Bufarisi

36Bụtụ bu ko na ashashɛ Afarisi lụpɛ Jisus maa zhajɛ nu umwono ubwa maa ya iyimɛyɛ. Ge Jisus teni nu umwono Bufarisi ata, baa jɛjɛ baa ya iyimɛyɛ nu uteburu.#Luk 11:37; 14:1 37Biyikwo bu ko namba nu ụshɛpwụ ata na shɛ bụtụ-bi-iwɛwɛ. Aka na ti bee mepi maa ge Jisus jɛjɛ nu umwono Bufarisi ata baa ya iyimɛyɛ, biyikwo ata 'waŋnɛ manɛbɛ mụ ụhiuŋ ubiye ni iyi ike uhwugwa nɛ ɛɛ hiɛŋ, alabasta, baa zhajɛ.#Mat 26:7; Mak 14:3; Jon 12:3 38Ibɛ biyikwo ata shikeni na aba Jisus to dongonu ɛvwɛvwɛjɛ ubwa, baa twa-u'wo, bee kwuni ɛvwɛvwɛjɛ Jisus tinyashɛnga na malaba mu bwa, bee wofwoji ɛvwɛvwɛjɛ ata ne tihiŋzhe ti ikɛnyi ibwɛ, bee kwutenji unu ubwa nɛ ɛvwɛvwɛjɛ Jisus, baa sụkwụtwa ɛvwɛvwɛjɛ ata manɛbɛ ma ata mụ ụhiụŋ ubiye. 39Aka na ta Bufarisi ata ga suyanɛ Jisus kwụbɛ iŋ, bɛɛ hiɛŋ na amɛ na amɛ ubwa, Yaa shɛ bụtụ ga ga shɛ bigesere gom, bi gɛ zhɛ ba mapa maa biyikwo ga bo tumongono bu bɛ shɛ bụtụ-bi-iwɛwɛ.#Mat 21:11; Luk 7:16; 24:19; Jon 6:14

40Ge Jisus jishijɛ bụ, bɛɛ hiɛŋ, A-Saimon, N 'yajɛ iwɛ ike Ngɛɛ zhɛ mo bu mbiso.

Ga Saimon jishijɛ bụ, bɛɛ hiɛŋ, E-Bimbisegeni, duma.

41Ge Jisus hiɛŋ bụ, Atwa oko eyebi a yɛ bụtụ bu ko na ba unanga atwa ukwuribi utashɛ. Bụtụ bu ko yɛ bụ azụrụfa arinya akpakwụ-eyebi-ni-dipi-yebi, bụtụ bi yebi yɛ bụ, azụrụfa arinya dupu. 42Aka na ta a zasa iyi elele maa a cɛpɛ bụ, baa njɛ aŋ ụjɛrụma kwakwa. Hwuwayɛ go, buna naa zhɛ bo lubo bụtụ ata uhwuri binya? #Mat 18:25

43Ga Saimon jishijɛ bụ, bɛɛ hiɛŋ, ɛɛ hiɛŋ na ahaŋsa mi, N heŋshi maa bụtụ ata utashɛ ubwa ge gembi duwa.

Ge Jisus hiɛŋ bụ, Bi teni cɛŋ.

44Nazhɛ ge Jisus mbiyanɛ biyikwo ata, bɛɛ hiɛŋ Saimon, Bu kwụbɛ shɛ biyikwo ga hŋ? Taa ti Ngee nge teni hwayɛ ni ihwɛ bu, bu m peni shi meni maa ma nyashɛnga ɛvwɛvwɛjɛ mi o. Ama biyikwo ga zwogwonuo ɛvwɛvwɛjɛ mi malaba mu bwa, harɛ boo wofwogwo aŋ ne tihiŋzhe tu bwa. 45Bu n ruwanɛ shɛ o, ama taa ti Ngee nge teni hwayɛ epe, biyikwo ga genji shi unu ubwa tukwutongo nɛ ɛvwɛvwɛjɛ mi o. 46Bụ sụkwụtwa sụ uhiuhiu mu manɛbɛ ma buta o; ama biyikwo ga sụkwụtwa ɛvwɛvwɛjɛ mi manɛbɛ mụ ụhiŋ ubiye. 47Iwɛbɛ po Ngɛɛ zhɛ mo bu mbiso maa, o gongwonuo bu iwɛwɛ ibwɛ nɛ ge gembi ufwugwo, iwɛnɛ tu baa 'yajɛ tulubo duwa. Ama bụtụ na ee gengeni cwɛŋ, bi zhɛ bo lubo du cwɛŋ.

48Nazhɛ ge Jisus hiɛŋ biyikwo ata, E bi gengeni iwɛwɛ bu.#Mat 9:2; Mak 2:5; Luk 5:20

49Nazhɛ atwa na gɛgajɛ nu bwa nu uteburu ata kwuni iwɛ tụdụma abaaba, ɛɛ hiɛŋ, Bụtụ bi ce naa, ba gangana bụtụ okwo iwɛwɛɛ?

50Ge Jisus hiɛŋ biyikwo ata, Rishe rụ bụ tɛtɛtana ri bi bicinji, zhaga na amɛ-olom.#Mat 9:22; Mak 5:34; Luk 8:48

Currently Selected:

LUK 7: RBT

Highlight

Copy