LUK 6

E Heŋteni Jisus iwɛ Ụjita-ụhinjanụ

(Mat 12:1-8; Mak 2:23-28)

1Aka na ti ge Jisus ba kashɛka itimɛ ike nɛ iyimɛyɛ te shikeni nu Ụjita-ụhinjanụ, eseshi-iyi ubwa kwuni ongbongbozu iyimɛyɛ ɛtɛ ticushanga tɛ ɛ zhɛ, aa shɛcɛma aŋ ni i'ɛlɛ ya aba aa ya.#Undwa 23:25 2Ama Afarisi oko hiɛŋ aŋ, Iwembe po ahia nda iyi nɛ Undwa leni shi maa bụtụ njɛ nu Ụjita-ụhinjanụụ? #Ụban 20:10; 23:12; Undwa 5:14

3Ge Jisus jishijɛ Afarisi ata, bɛɛ hiɛŋ, Hi ta rɛcɛ shɛ suu iyi nɛ ge Devid njɛ la na atwa na namɛ nu bwa na aka na ti imunɛ gwụmɛ bụ? #1 Sam 21:1-6 4Ti bee teni nu umwono wa Agwatana baa yɛ ibrɛd tijilo nɛ Undwa leni shi maa binya bụtụ yɛ semi onongbo kiri, bee peni du atwa na namɛ nu bwa.#Liv 24:9 5Bɛɛ hiɛŋ aŋ, Yɛu Bụtụ ubwa shɛ Agwangwama Ụjita-ụhinjanụ.

Ge Jisus Nɛnjɛ Bụtụ na U'ala Ubwa Hweteni

(Mat 12:9-14; Mak 3:1-6)

6Tụ Ụjita-ụhinjanụ unya u ci, ge Jisus teni nu umwono Tụ'ụlwatagwụ, bee mbisegeni aŋ iyi. Ama bụtụ bu ko namba nu umwono ata u'ala ubwa ubiye hweteni. 7Ibɛ po embisegeni Undwa keeni Afarisi zweni Jisus igbɛtɛtɛ maa a kwụbɛ okwo bi zhɛ ba nɛnga bụtụ ata nu Ụjita-ụhinjanụ iwɛ maa e gwushiji ecilo oko maa a suyanɛ bụ ụshɛrɛya.

8Ti ge Jisus mepi shihaŋsa sha aba, bɛɛ hiɛŋ bụtụ ata u'ala ubwa hweteni, Ishijɛ shikono na ashashɛ. Bɛɛ ishijɛ ga bee shikeni na ashashɛ. 9Ge Jisus hiɛŋ aŋ, N zhɛ mo hi hoŋtono iheŋtene ike, Imbe kwuŋ Undwa leni maa bụtụ na nda nu Ụjita-ụhinjanụụ? Iyi ibiye suu okwo iyi iwɛ, maa e bicinji bụtụ suu okwo maa a kwụnɛ bụ?

10Ti ge Jisus mbiyanganɛ aŋ kpaaŋ aba, bɛɛ hiɛŋ bụtụ ata, Ndarɛshɛnga u'ala bụ. Bee nderishinji ga, ibɛ u'ala ubwa zhɛmananɛ.

11Ama isɛbwɛ shini shɛmɛ sha aba, aa nda ya gana asụumɛ-ụmpɛ, ibɛ po aa njɛ ushaura abaaba iwɛ iyi nɛ i shɛ maa a njɛ Jisus.

Ge Jisus Teri Atumwa Umpwa-na-ba-eyebi

(Mat 12:9-14; Mak 3:1-6)

12Ti ge Jisus beni apata jita ata, bee zhe ni ishɛmɛ maa nda adua, baa uranjɛ adua tɛnda na Agwatana uuwa gi iyi yo holo.#Luk 3:21; 5:16; 9:18,28; 11:1 13Aka na tu uwaŋna cɛ, nazhɛ ge Jisus suyanɛ eseshi-iyi ubwa, bee teri atwa umpwa-na-ba-eyebi na ashashɛ aba, boo po aŋ izeci maa atumwa. 14Na Saimon (na bee keeni izeci ta Pita), na Andru yɛu-bino Pita, ne Jemis, na Jon, ne Filip, na Batolomu, 15na Matiu, na Tomas, ne Jemis yɛu Alifios, na Saimon na ɛɛ hiɛŋ, Bɛzhɛgɛdanɛ-bi-iyi, 16na Judas yɛu Jemis, keeni Judas Iskariot ata senji bu ne tidere.

Ge Jisus Mbisegeni, Baa Nɛnjɛ

(Mat 4:23-25)

17Ge Jisus zwe ishɛmɛ ɛtɛ ne eseshi-iyi ubwa, bee shikeni no ofwo oko tikpese. Eseshi-iyi ubwa ofwugwo ụ'wụtụ namba apata, ta atwa ofwugwo ụ'wụtụ a na bananjɛ nu Judia kpaaŋ keeni Jɛrusalɛm, ta atwa na bananjɛ nu ụpalanụ Itekwu Taya keeni Saidụn, a na zhajɛ maa a hwụjɛ iwɛ ubwa, maa nɛnga ụngwụ wa aba. 18Keeni atwa na mpiala mụ wɛ ma zuga, aa zhɛmananɛ. 19Ufwugwo wa atwa ata kpaaŋ wa jalakaka maa e timengeni Jisus, iwɛ maa ukpahiŋ banɛ no olugwo ubwa maa u nɛnjɛ aŋ kpaaŋ.#Mat 9:21; 14:36; Mak 3:10; Luk 5:17

Unyasa Keeni U'wo-tutwa

(Mat 5:1-12)

20Ti ge Jisus shepi eshe ubwa, baa mbiyanganɛ eseshi-iyi ubwa, bɛɛ hiɛŋ aŋ, Hi gwoje ahiɛba na hiɛ shɛ okofwo, iwɛnɛ ta Cɛnjɛ-ta-tugwama ta Agwatana tɛ shɛ me ti hiŋ.

21Hi gwoje ahiɛba na imunɛ ya kwụna hwuwayɛ, iwɛnɛ tɛ ɛhi zhɛ hio shigogo.

Hi gwoje ahiɛba na hia twa-u'wo hwuwayɛ, iwɛnɛ tɛ ɛhi zhɛ hia hunga hwuŋ ilɛtu.

22Hi gwoje aka na ta atwa zhɛ mo hi imo, ɛɛ zhɛ mo hi jinoko, ɛɛ zhɛ mo hi mbisogo n-ndumwa mụ wɛ ɛɛ zhɛ a kala nzeci mi hiŋ gana iyi iwɛ, iwɛ Yɛu Bụtụ.#Jon 16:2; 1 Pita 4:14 23Na nda ma hwuŋ unyasa maa hi jwe angapa nu unyasa jita ata, iwɛnɛ te titeni ti hiŋ ti zhɛ to gombo hwuŋ tebiye na azuba. Gabata du ogwunukwoshi aba njɛ la egesere.#2 Shɛrụ 36:16; Ugo 7:52

24Ama ahiɛba na hiɛ shɛ azhɛgba, hi zhɛ hia nda hwuŋ adangboo,

iwɛnɛ ta ahia ya tuwebiye ti hiŋ hwuwayɛ.#Jem 5:1-5

25Ahiɛba na hi shigeji hwuwayɛ, hi zhɛ hia nda hwuŋ adangboo,

iwɛnɛ ti imunɛ zhɛ ma hi kwụna hwuŋ.

Ahiɛba na hia hunga ilɛtu hwuwayɛ,

hi zhɛ hia nda hwuŋ adangboo, iwɛnɛ tɛ ɛhi zhɛ hia ta hwuŋ ụkwụla,

hi na twa-u'wo.

26Ahiɛba na atwa kpaaŋ a duma uwebiye hiŋ hwuwayɛ, hi zhɛ hia nda hwuŋ adangboo, iwɛnɛ te eshi aba njɛ la du egesere tukata gana ata.

No Lubo ma Atwa I'ime Hiŋ

(Mat 5:38-48; 7:12)

27Ama Mo hi mbiso ahiɛba na hi hwulajɛ maa: No lubo ma atwa i'ime hiŋ, na nda ma atwa na mo hi imo uwebiye, 28ne zhemonjino ma atwa na ma hi kalana-unu, na nda ma adua iwɛ atwa na ma hi twagaga. 29Bụtụ na ubu po uwaŋpɛ nu upada uko, jɛshɛrɛgana bụ una uyebi, bụtụ na leshiji utogwo bu, ta lakana bụ maa sugo ya idikɛ bu du o. 30Bụtụ na ubu lụpɛ iyi, pana bụ, bụtụ na kaa suji i'wɛŋnɛ bu, to hoŋtono bu ya iwɛ ibɛ o. 31Na nda ma atwa gana na ahia jala maa atwa na hi nda.#Mat 7:12 32Yaa shɛ atwa na mo hi lubo kiri ohio lubo, asha cee tulubo ti hiŋ ti biye tu namɛɛ? Okwo atwa-iwɛwɛ, o lubo du kaa atwa na o lubo aŋ. 33Yaa shɛ atwa na ma hi ndana iyi ibiye kiri ahia ndana du iyi ibiye, asha cee tulubo ti hiŋ ti biye tu namɛɛ? Okwo atwa-iwɛwɛ a nda du kaa gana ata. 34Yaa shɛ atwa na ahia nda ashɛlatụ aba maa hi zhɛ hia lashɛganana iyi no olugwo aba ahia unanga iyi kiri, asha cee tulubo ti hiŋ ti biye tu namɛɛ? Okwo atwa-iwɛwɛ a unanga kaa du atwa aba iwɛwɛ iyi maa e leshigeneni gana ata. 35Ama no lubo ma atwa i'ime hiŋ, na ndana aŋ ma iyi ibiye, na unanga ma atwa iyi, ta nda ma ya ashɛlatụ maa hi tɛ zhɛ hia lashɛganana iyi elele no olugwo aba o. Nazhɛ titeni ti hiŋ ti zhɛ to gombo hwuŋ, ibɛ du ɛhi zhɛ hia sha miaụŋ ma Agwatana na Hwuri Kpaaŋ. Iwɛnɛ tu baa shɛ bụtụ na ba mapana atwa na njɛ shɛ ugwoje ubwa iwɛ, ta atwa awɛ hwɛɛ. 36Na kwụba ma inyɛmɛnyɛmɛ ya atwa, gana na te Bishi hiŋ ba kwụba du inyɛmɛnyɛmɛ ya atwa.

Ta Duma ma Ụshɛrɛya wa Anya Atwa o

(Mat 7:1-5)

37Ta duma ma ụshɛrɛya wa anya atwa o, nazhɛ aa zha shɛ a duma du unee hiŋ. Ta pana ma bụtụ n-ndumwa-tụwụma o, nazhɛ aa zha shɛ ma hi pana du n-ndumwa-tụwụma. Na gangana ma atwa tu'wanganga ta aba, nazhɛ ɛɛ zhɛ ma hi gangana du tu'wanganga ti hiŋ. 38Na pana ma atwa iyi, nazhɛ ɛɛ zhɛ ma hi pana du, ne bimenji bi biye ɛɛ zhɛ ma hi mangana iyi, ɛ zhɛ o indongono iŋ, ɛɛ zhɛ o zhingoto iŋ, yɛɛ zhɛ na 'waŋtatangwụ. Iwɛnɛ po ne bimenji na ahia mangana atwa iyi, nu bwa du ɛɛ zhɛ ma hi mangana.#Mak 4:24; Ugo 20:35

39Ge Jisus manganganɛ aŋ du n-ndumwa mu ko, bɛɛ hiɛŋ, Olubo eri a 'yagaga olubo suu? A zha shɛ a 'waŋ nu ukporo hwɛɛ aba ebeyebi suu? #Mat 15:14 40Biseshi-bi-iyi kaa hwuri shi bimbisegeni bu bwa o. Ama biseshi-bi-iyi be elele na ee mbisegeni iyi, bi zhɛ ba sha gana bụtụ ata mbisegeni bu.#Mat 10:24,25; Jon 13:16; 15:20

41Iwembe po aba ngbaraka bụmbɛrɛ na namɛ ne rishe ri yɛu-bino bu, ebi heŋshi shi tuba iwɛ ugbogolo ata shiyeni ne rishe rụ bụụ? 42Kwo kaa gana naa ɛbi zhɛ bɛ hiɛŋ yɛu-bino bu maa; Me ci ba mɛ bu vwɛ bụmbɛrɛ ata shiyeni ne rishe rụ bụ, ta bu kwụbɛ shɛ ugbogolo ata shiyeni ne rishe rụ bụ ni ikɛnyi bụụ? Gabụ bụtụ bu tɛnda-te-eshe, vwa tugwo ugbogolo ne rishe rụ bụ hiiŋ, nazhɛ ɛbi zhɛ ba kwụba ya uhwaŋna kpataa maa vwɛ bụmbɛrɛ ata shiyeni ne rishe ri yɛu-bino bu.

Ụ'wụ'wụ na Tụ'walụ tu Bwa

(Mat 7:16-20; 12:33-35)

43I zasa ụ'wụ'wụ ubiye we elele na zhɛ na 'wala tụ'walụ tụ wɛ o, i zasa kaa du ụ'wụ'wụ ụwɛ we elele na zhɛ na 'wala tụ'walụ ti biye o. 44Ama a mapa ụ'wụ'wụ we elele na tụ'walụ tu bwa, iwɛnɛ ti yaa shɛ shɛ no okolokwu-shɛngala atwa zhɛ no two tụ'walụ tu uwowo, shɛ no okodongwu kaa ɛɛ zhɛ no two tụ'walụ ta afwafwa o.#Mat 12:33 45Bụtụ bi biye bɛ bɛcinjɛ iyi ibiye na ahaŋsa ebiye a na shini na amɛ ubwa, bụtụ bụ wɛ kaa du bɛ bɛcinjɛ iyi iwɛ na ahaŋsa awɛ a na shini na amɛ ubwa. Iwɛnɛ po iyi nɛ shini na amɛ bụtụ, ibɛ du unu ubwa zhɛ na duma.#Mat 12:34

Omo Tuma eyebi

(Mat 7:24-27)

46Ge Jisus hiɛŋ aŋ, Iwembe po ɛhi mɛ hiɛŋ, Iyɛri, Iyɛri, ahiɛ njɛ shɛ kaa iyi nɛ Ngɛɛ hi hiɛɛŋ? #Mat 7:21

47Bụtụ be elele na zhajɛ pi mi, na kaa ba hwuga iwe mi, na kaa ba nda iŋ, N zhɛ Mo hi mbiso bụtụ na baa sụbɛ. 48Bụ sụbɛ bụtụ ata zhɛ ba ma umwono ubwa, na vwuji tugwo ukoshilo ubwa te iri nu utayɛ-tubala, nazhɛ boo mo uŋ. Aka na te meni mi zhagajɛ, Urefu bwadụ waa fwụrụganɛ umwono ata, mu zasa ukpahiŋ na mee eri mo zhingoto umwono ata o, iwɛnɛ to o mo uŋ tebiye.#6:48 to o mo uŋ tebiye: Tɛjɛshɛrɛga tu ko ti hiɛŋ, e shiri ukoshilo ubwa nu utayɛ-tubala. 49Ama bụtụ na ba hwuga iwe mi, na njɛ shɛ, bụ sụbɛ bụtụ ata ba ma umwono ubwa na ahwayɛ uzawa ukoshilo tihino tugwo. Aka na tu Urefu bwadụ, meni mi zhagajɛ tutu umwono ata, gunu ata woo hwuŋzwo, tuhwuŋzwo tu bwa kaa ti gembi tebiye.

Currently Selected:

LUK 6: RBT

Highlight

Copy