LUK 3

I'enenji nɛ ga Jon Bɛnjɛ-bu-ubaptizm Enenji

(Mat 3:1-12; Mak 1:1-8; Jon 1:19-28)

1Tu ga Taibirios Sisa yɛ tugwama, go Pontius Pɛilat shɛ ugwomina Juda, gɛ Hɛrod tuba shɛ uhiu cɛnjɛ tu Galili, yɛu-bino bwa ge Filipi shɛ du uhiu cɛnjɛ ti Ituria keeni Tirakonit, go Lusanios shɛ uhiu cɛnjɛ tu Abilene, yaa namɛ shiywa umpwa-na-shɛba-shɛ-ta. 2Aka gatata ga Anas keeni Kayafas shɛ ehiu onongbo, aka ata ta du Agwatana jɛmɛ n-ndumwa na Jon yɛu Zɛkaria nụ ụshɛka.#Mat 26:3; Jon 11:49; 18:13; Ugo 4:6 3Ga Jon zhe na cɛnjɛ te elele tu na tu rungwutwonu Urefu Jodan, bee enengeni aŋ, bɛɛ hiɛŋ, Jɛshɛrɛga ma shihaŋsa, maa e hi gengeni iwɛwɛ hiŋ maa a hiɛ njɛ ubaptizim.#Ayiz 40:3-5 4Gana na ti yoo 'nywotwo nu utakada bigesere ga Ayizaya, yɛɛ hiɛŋ,

Rụŋhwụŋ ra bụtụ bu ko ra ugaga nụ ụshɛka, rɛɛ hiɛŋ,

Hangana ma Agwangwama uhwaŋna,

Ndana bu ma ihwɛŋnɛ i tukpororo.#Mat 12:34; 23:33

5Supacanga ma olomu elele kpaaŋ,

Hwuŋzotongo ma nshama keeni tikpekwu te elele kpaaŋ,

ofwo elele ontongonu, ndarashanga ma maa a nama shiriri,

ofwo elele na namɛ kporokporo,

nda ma maa a nama gbelee.

6Iwɛ maa atwa elele kwụbɛ Ubino wa Agwatana.

7Ga Jon mbishi atwa ofwugwo a na zhajɛ pu bwa maa nda aŋ ubaptizim, bɛɛ hiɛŋ, Ahiɛba umata we egbezhi! Gaaba ihiɛ tɛtaganɛ-unu maa gozhigono ma isɛbwɛ ya Agwatana nɛ yee cii? 8Na nda ma iyi nɛ zhɛ yo mbisono maa hiɛ jɛshɛrɛgwa-shihaŋsa, ehi genji iwɛwɛ hiŋ. To kwuno ma tumama hiaŋnụ maa, Ga Abraham ubwa shɛ bishi tu o, Mo hi mbiso maa Agwatana eri a bacɛnganɛ Abraham miaụŋ okwo na atayɛ ga! #Jon 8:33,39 9O shilwo ogwubo ne tini ti i'wɛ'wɛ cebe. Ụ'wụ'wụ we elele na kaa 'weri shi tụ'walụ ti biye, ɛ zhɛ o lo uŋ a kala nu ulwa.#Mat 7:19; Ehib 6:7,8

10Ibɛ po atwa ofwugwo ata heŋteni Jon, ɛɛ hiɛŋ, Asha imbe tuba ɛti zhɛ ta nda yaa?

11Ga Jon jishijɛ aŋ, bɛɛ hiɛŋ, Bụtụ na 'yajɛ n-nduka mi yebi, ga pana bụtụ na zasa ungbulu ike, bụtụ na kaa 'yajɛ iyimɛyɛ, ga nda du gana ata.

12Nazhɛ ele-ụdalụ zhajɛ maa nda aŋ du ubaptizim. Ee heŋteni bu, ɛɛ hiɛŋ, E-Bimbisegeni, imbe tuba shɛ inee tu maa ta ndaa? #Luk 7:29

13Ga Jon jishijɛ aŋ, bɛɛ hiɛŋ, Ta na lashɛga ma ukwuribi te hwuri gana na undwa jɛmɛ o.

14Asaza zhajɛ du ee unseni bu, ɛɛ hiɛŋ, Atuba tubaa, imbe shɛ maa ta ndaa?

Ga Jon jishijɛ aŋ, bɛɛ hiɛŋ, Ta na nda ma bụtụ be elele tuhwulo, ta na suyana ma kaa atwamwa ụshɛrɛya o. Ama ga alubashɛ hiŋ na hi gwumwa.

15Gana na ta atwamwa ga nda ashɛlatụ Krast, ibɛ po ee kwuni ya tuhaŋsa na shɛmɛ sha aba maa okwo ga Jon ubwa shɛ ga Krast.#Jon 1:19-22

16Ama ga Jon jishijɛ aŋ hwɛɛ aba, bɛɛ hiɛŋ, Ma hi nda ubaptizim ne meni, ama bụtụ bu ko na n hwuri ikɛnyi be ci ba, N teni shi cɛŋ maa mo tufwurungo okwo ihwehwe ya abida ubwa o. Ubwa zhɛ ma hi nda hwuŋ ubaptizim na Mpiala mi Tijilo keeni nu ulwa. 17Bu 'waŋnɛ ba abula ubwa, maa piasa ohiu ubwa tebiye tebiye, maa zwono ohiu ubwa nu urubwu ubwa maa tuba hwoŋzhingo afụrɛkɛcɛ nu ulwa na 'weji shi.

18Ga Jon enengeni atwa ata Anabarɛ Ebiye nu n-ndumwa mi nya mu ufwugwo mu na mi keeni aŋ ikɛnyi maa e genji iwɛwɛ ya aba. 19Ama bu vwɛ Hɛrod na shɛ uhiu cɛnjɛ ta ata uvwi iwɛ Hɛrodias biyikwo bi yɛu-bino bwa na bee zeni, keeni iwɛ iyi iwɛ inyɛ ifwugwo nɛ gɛ Hɛrod ba shana baa ndangana.#Mat 14:3,4; Mak 6:17,18 20Nazhɛ gɛ Hɛrod keeni ya inɛɛ nɛ wumanjɛ tɛnda, ibɛ shɛ inɛɛ nɛ bee kepi Jon nu umwono-tishi.

Ubaptizim na ga Jon Njɛ Jisus

(Mat 3:13-17; Mak 1:9-11)

21Aka na tu ga Jon njɛ atwa ata ubaptizim kpaaŋ, nazhɛ baa njɛ du Jisus ubaptizim. Aka na ti ge Jisus ba nda adua na aba na ta a njɛ bu ubaptizim, nazhɛ azuba bagwụ. 22Mpiala mi Tijilo mu zwe nu uhiuhiu ubwa gana ikwucime, rụŋhwụŋ ru banɛ du na azuba, rɛɛ hiɛŋ, Gabụ bɛ shɛ Yɛu mi nɛ Omo lubo duwa, amɛ mi kaa lemi na bu tebiye.

Atwa na shɛ Eshishi Jisus

(Mat 1:1-7)

23Ge Jisus ni ikɛnyi ibwɛ namɛ gana shiywa talacɛ te e meci bu nazhɛ bee kwuni ugondu ubwa tɛnda. Atwamwa heŋshi maa yɛu Josɛf, na shɛ yɛu Hɛli, baa shɛ, 24na shɛ yɛu

Matat, na shɛ yɛu Livai, na shɛ yɛu Mɛki; na shɛ yɛu Janai, na shɛ yɛu Josɛf,

25na shɛ yɛu Matatias, na shɛ yɛu Emos, na shɛ yɛu Nahum, na shɛ yɛu Esli, na shɛ yɛu Nagai,

26na shɛ yɛu Mati, na shɛ yɛu Matatias, na shɛ yɛu Semei, na shɛ yɛu Josɛk, na shɛ yɛu Joda,

27na shɛ yɛu Joanan, na shɛ yɛu Rɛsa, na shɛ yɛu Zɛrubabɛl, na shɛ yɛu Shiɛltiɛl,#3:27 amɛ mi kaa lemi na bu tebiye: Tɛjɛshɛrɛga tu ko tụ ngwụshɛ ti hiɛŋ, hwayɛ ga Ngee bi meci. na shɛ yɛu Nɛri,#3:27 Shiɛltiɛl: Kwo kaa, Salatiɛl.

28na shɛ yɛu Mɛlik, na shɛ yɛu Adi; na shɛ yɛu Kosam, na shɛ yɛu Alimadam, na shɛ yɛu Ɛri,

29na shɛ yɛu Joshua, na shɛ yɛu Eliezɛ, na shɛ yɛu Jorim, na shɛ yɛu Matat, na shɛ yɛu Livai,

30na shɛ yɛu Simion, na shɛ yɛu Judas, na shɛ yɛu Josɛf, na shɛ yɛu Jonam, na shɛ yɛu Elaikim,

31na shɛ yɛu Mɛlik, na shɛ yɛu Mena, na shɛ yɛu Matata, na shɛ yɛu Natan, na shɛ yɛu Devid,

32na shɛ yɛu Jɛsi, na shɛ yɛu obɛd, na shɛ yɛu Boaz, na shɛ yɛu Shela,#3:32 Shela: Tɛjɛshɛrɛga tu ko ti hiɛŋ, Sala, kwo kaa Salmon. na shɛ yɛu Nashon,

33na shɛ yɛu Aminadab,#3:33 Aminadab: Tɛjɛshɛrɛga tu ko ti hiɛŋ, Ram. na shɛ yɛu Adimin, na shɛ yɛu Ani, na shɛ yɛu Hɛsron, na shɛ yɛu Pɛrɛz, na shɛ yɛu Juda,

34na shɛ yɛu Jekob, na shɛ yɛu Azik, na shɛ yɛu Abraham, na shɛ yɛu Tera, na shɛ yɛu Naho,

35na shɛ yɛu Serug, na shɛ yɛu Reu, na shɛ yɛu Pɛlɛg, na shɛ yɛu Ibɛ, na shɛ yɛu Shila,

36na shɛ yɛu Kainan, na shɛ yɛu Apakazad, na shɛ yɛu Shɛm, na shɛ yɛu Noa, na shɛ yɛu Lamɛk,

37na shɛ yɛu Mɛtusɛla, na shɛ yɛu Inok, na shɛ yɛu Jarɛd, na shɛ yɛu Mahalal, na shɛ yɛu Kenan,

38na shɛ yɛu Inos, na shɛ yɛu Sɛt, na shɛ yɛu Adam, na shɛ yɛu ya Agwatana.#Umoz 5:3-32; 11:10; Rut 4:18-22; 1 Shɛrụ 1:1-4,24-28; 2:1-15

Currently Selected:

LUK 3: RBT

Highlight

Copy