LUK 24

Tihiɛ ti Jisus

(Mat 27:57-61; Mak 15:42-47; Jon 19:38-42)

1Ti iyi heri ji ta bu ulade nu uvwungwa dididi, ibɛ eyikwo ata imanjɛ iyi nɛ 'yajɛ ụhiụŋ ubiye, ee zhe nu u'uye ata. 2Aa kwụbɛ maa utayɛ ata ushigwowo nu u'uye ata, 3ama aka na te e teni nu bwa, a kwụbɛ shɛ ru'wo ra Agwangwama Jisus o.#24:3 ra Agwangwama Jisus o: Tɛjɛshɛrɛga tu ko tu zasa n-ndumwa ma ata o. 4Gana na ti iwɛ ɛtɛ dama aŋ, eshigiri, aa kwụbɛ ta atwa eyebi a na uregeni tugwuno tu na ta ta paawụụ, shikekeni to dongonu aŋ. 5Ibɛ po inyɛsɛ shɛ aŋ, oo to bizhiri. Nazhɛ atwa ata hiɛŋ aŋ, Iwembe po ahia jalakaka bụtụ na shɛ buumwa na ashashɛ atwa na 'wii?#24:5 atwa na 'wii? Tɛjɛshɛrɛga tu ko ti keeni tɛɛ hiɛŋ, bu zasaba epe o, bi hiwa. 6Bu zaba ya epe o, bi hiwa. Teyinje ma gana na bee hi mbishi la tu baa ta namɛ ne hiŋ nu Galili, maa: 7I shɛ tilɛɛ maa e shepi Yɛu Bụtụ e peni atwa-iwɛwɛ, maa o to bu nu ubatanɛ, nazhɛ bɛɛ zhɛ bɛ hiɛ nụ ụjita ụtatụ.#Mat 16:21; 17:22,23; 20:18,19; Mak 8:31; 9:31; 10:33,34; Luk 9:22; 18:31-33

8Nazhɛ ee teyinje ga maa bɛ jɛmɛ la iwɛ ɛtɛ. 9Nazhɛ ee genji u'uye ata, ee gwuri ee mbishi eseshi-iyi ubwa umpwa-nu-boo-ko, keeni atwa vwɛ iwɛ ɛtɛ kpaaŋ. 10Eyikwo ata shɛ ge Meri Magdala, no Joana, ne Meri bino Jemis, na anya eyikwo a na vwɛ, aba mbishi atumwa iwɛ ɛtɛ.#Mak 16:1; Luk 8:2,3 11Ama n-ndumwa ma aba mu shanɛ atumwa ata gana iwɛ tisashɛ, a tɛtanɛ shɛ mu rishe o. 12Ama ga Pita gezhiji bee zhe nu u'uye ata. Bee hikeni, baa kwụbɛ maa tugwuno ta ata ti ilinɛn kiri ti tileni, bee hwuri ujiyo ni ihwɛ ibwɛ, iwɛ ɛtɛ kaa dama bụ.#24:12 Ama ga Pita, iwɛ ɛtɛ kaa dama bụ: Tɛjɛshɛrɛga tu ko tu zasa buwala ga bu 12.

Eseshi-iyi eyebi Zhɛ nu Ụshɛpwụ ata. Ɛɛ Hiɛŋ, Ɛmɛus

(Mak 16:12,13)

13Jita ata gbaa ibɛ eseshi-iyi Jisus eyebi zhɛ nu ụshɛpwụ uko na ɛɛ hiɛŋ, Ɛmɛus na ụdụlụ ubwa nu Jɛrusalɛm namɛ gana imɛle icenje na ashashɛ. 14Aa dumanga iwɛ ijɛ teni kpaaŋ. 15Ta a dumanga n-ndumwa, aa nda ushaura ata, ge Jisus kaanɛ izhɛ baa zhagajɛ na aba. 16Ama iyi ike urigeni shishe sha aba maa kede e mepi bu o.#Jon 20:14; 21:4

17Ge Jisus heŋteni aŋ, bɛɛ hiɛŋ, N-ndumwa mi imbe nu kwuŋ ahia dumanga ta hia zha tahaŋnụ tu gaa?

Ee shikeni, ee kwuji shishe sha aba, oo to usumbu. 18Nazhɛ bụtụ bu ko na ashashɛ aba na ɛɛ hiɛŋ izeci ibwɛ ge Kilopas, heŋteni bu, bɛɛ hiɛŋ, Gobuko kiri suu bɛ shɛ bugaiŋ nu Jɛrusalɛm ga, na te mepi shi iwɛ gɛ teni apata ijitɛ imbɛ nɛ hwayɛ?

19Ge Jisus heŋteni aŋ, bɛɛ hiɛŋ, n-ndumwa mi imbe nuu? Ɛɛ jishijɛ bụ, ɛɛ hiɛŋ, n-ndumwa mi Jisus bụtụ ata bu Nazarɛt, na shɛ bigesere ata njɛ ugondu ukpahiŋ tu n-ndumwa mu bwa ne eshe Agwatana, keeni eshe atwa kpaaŋ.#Mat 21:11; Luk 7:16; 13:33; Ugo 3:22 20Gana na ehiu onongbo tu, ne ehwurembe tu, peni bu n-ndumwa-tụwụma maa ga kwụnɛ bụ, ibɛ po oo to bu nu ubatanɛ. 21Tu ga ngbaracɛ uhwaŋna maa ubwa zhɛ be gwube atwa Isrɛl. Inɛɛ nɛ hwuri inɛ ɛtɛ hwɛɛ, i shɛ taa jitaala ti ijɛ teni ya. 22Sasana eyikwo oko na namɛ na ashashɛ tu zhe nu u'uye ata nu uvwungwa go dididi, aa njɛ maa igɛhi iti 'imɛ. 23Aka na ta a kwụbɛ shɛ ru'wo ru bwa, aa zhajɛ ɛɛ hiɛŋ maa ɛ kwụbɛ atumwa-azuba no ozobu a na mbishi aŋ maa, bi hiwa. 24Ibɛ po atwa tu oko zhe ga nu u'uye ata, ɛɛ kwubɛ ga iyi gana na te eyikwo ata ga jɛmɛ, ama a kwụbɛ shɛ bu kaa ni ikɛnyi ibwɛ o.#Jon 20:3-10

25Nazhɛ ge Jisus jishijɛ aŋ, bɛɛ hiɛŋ, Ahiɛba atwa ga eshiciji shi iyi, a na kaa lemi ne rishe-tɛtɛtana ni iwɛ nɛ egesere jɛmɛ! 26I shɛ shɛ suu tilɛɛ maa ga Krast njɛ ụbaụta tugwo nazhɛ bo tono nụ ụjɛrụma ubwa? 27Nazhɛ bee eshicigeni aŋ iyi elele nɛ 'nywotwo nu Utakada Iwɛ ya Agwatana iwɛ ikɛnyi ibwɛ, bee kwune ni iyi nɛ 'nywotwo la nu Undwa Moses tutu iyi nɛ egesere 'nywotwo du.#Luk 24:44,45; Ugo 28:23

28To o gwumwongonu nu ụshɛpwụ ata ɛɛ gɛ zhɛ, ge Jisus njɛ gana maa ba jala maa kashɛka geri-be-eshe. 29Ama a uranjɛ bụ, ɛɛ hiɛŋ bụ, Nama no tu, iwɛnɛ tu ụrụmɛ shɛ ya, uwaŋna kaa du zhɛ utwonuo. Ibɛ po bee teni na aba ni ihwɛ.

30Aka na tu baa jɛjɛ maa ya iyimɛyɛ na aba, bee shepi ibrɛd baa njɛ ugwoje na Agwatana, boo dwonu iŋ, nazhɛ bee peni aŋ.#Luk 9:16; 22:19 31Nazhɛ shishe sha aba shi ushigwo, ee mepi bu, nazhɛ baa inanjɛ aŋ. 32Ibɛ po oo momo hoŋtongonu, ɛɛ hiɛŋ, Shihaŋsa shi tu shɛ ga tu zuga sụ nu uhwaŋna hŋ na aka na baa dumanga n-ndumwa no tu, boo mo tu eshicigono Iwɛ ya Agwatana?

33Ɛɛ ishijɛ gunu ata, ee gwuri nu Jɛrusalɛm. Aa kwụbɛ eseshi-iyi umpwa-nu-boo-ko keeni atwa vwɛ ta a ụlwatagwụ apata, 34ɛɛ hiɛŋ aŋ, Iwɛ-tɛkana Agwangwama hiɛ ga gom! Ga Saimon du kwụbwa bụ.#1 Kor 15:5

35Nazhɛ ee swegeni aŋ unabarɛ tahaŋnụ ta aba, keeni gana na te e mepi bu na aka na tu boo dwonu ibrɛd ɛtɛ.

Eseshi-iyi Umpwa Kwụbɛ Jisus

(Mat 28:16-20; Mak 16:14-18; Jon 20:19-21; Ugo 1:6-8)

36Aka na ta atwa ata eyebi te swegeni atwa vwɛ iwɛ ɛtɛ, mashaka ge Jisus ta shikeni na ashashɛ aba. Bɛɛ hiɛŋ aŋ, Ga amɛ-olom nama ne hiŋ.#24:36 bɛɛ hiɛŋ aŋ, Ga amɛ-olom nama ne hiŋ: Tɛjɛshɛrɛga tu ko tu zasa n-ndumwa ma ata o.

37Aa zhɛgɛdanɛ, iwɛnɛ ti inyɛsɛ shɛ aŋ duwa, ɛɛ hiɛŋ kwo mpiala mu ko aa kwụbɛ. 38Ge Jisus hiɛŋ aŋ, Iwembe po ahiɛ zhɛgɛdanɛ gana gaa? Iwembe po oruwo teni na shihaŋsa shi hiiŋ? 39Gamba ni ikɛnyi mi na kaa, kwụba ma i'ɛlɛ mi, nɛ ɛvwɛvwɛjɛ mi. N timengeni ma hiɛ kwụbɛ, iwɛnɛ tu mpiala mu zasa tu'waba keeni o'umpwo gana na ehi eri hia kwụba tu Ngaa 'yajɛ.#1 Jon 1:1

40Aka na tu baa jɛmɛ iwɛ ɛtɛ, bee mbiseni aŋ i'ɛlɛ ibwɛ keeni ɛvwɛvwɛjɛ#24:40 Aka na, ɛvwɛvwɛjɛ: Tɛjɛshɛrɛga tu ko tu zasa buwala ga bu 40. ubwa. 41Ama gana na ta a ta tɛtanɛ shɛ rishe iwɛ unyasa na shini na shɛmɛ sha aba keeni tudama tu na yaa dama aŋ. Ge Jisus heŋteni aŋ, bɛɛ hiɛŋ, Hi 'yajɛ suu iyi tiya ye elele epe? 42Ee peni bu usunda ijɛnɛ nɛ ee ge shiteji. 43Bee shepi uŋ baa yɛ ne eshe aba.

44Ge Jisus hiɛŋ aŋ, N hi mbiswo la iwɛ gɛ na aka na Ngaa ta namɛ ne hiŋ, maa iwe mi elele nɛ oo 'nywotwo la nu Undwa Moses, keeni Atakada Egesere keeni Shɛzunga shɛ na aa zunganganɛ Agwangwama zhɛ yɛ sɛ.#Luk 24:26,27; Ugo 28:23

45Nazhɛ bee kepishinji shihaŋsa sha aba maa e eshiciji Utakada Iwɛ ya Agwatana. 46Bɛɛ hiɛŋ aŋ, Gana yoo 'nywotwo ta maa, ga Krast zhɛ ba nda ụbaụta tilɛɛ, nazhɛ bɛɛ zhɛ bɛ hiɛ nụ ụjita ụtatụ, #Hos 6:2; 1 Kor 15:3,4 47maa ɛ zhɛ a anangana edenji elele iwɛ ahaŋsa-tɛjɛshɛrɛga keeni iwɛwɛ tugangana ni izeci ibwɛ, te kwuni nu Jɛrusalɛm.#24:47 te kwuni nu Jɛrusalɛm: Tɛjɛshɛrɛga tu ko ti keeni tɛɛ hiɛŋ, ahiɛba hiɛ shɛ eseyida. #Mat 28:19; Mak 15:15; Ugo 1:4-8 48Ahiɛba kaa hiɛ shɛ eseyida ijɛ kpaaŋ. 49Nama ma nu ụshɛpwụ ga uuwa i ci aka na Ngaa hi tumwananɛ unu na Bishi mi shiri la, maa e hi urigeni ukpahiŋ na zhɛ wa banɛ na azuba.#Jon 14:26; Ugo 2:1-4

E Shepi Jisus na Azuba

(Mat 16:19,20; Ugo 1:9-11)

50Nazhɛ ge Jisus zeriji aŋ tutu oo gwumwongonu ni Bɛtani, bee suji i'ɛlɛ ibwɛ na azuba, bee peni aŋ uwebiye. 51Ti bee peni aŋ uwebiye ata, boo bogwu na aba, ee shepi bu na azuba.#24:51 ee shepi bu na azuba: Tɛjɛshɛrɛga tu ko tu zasa n-ndumwa ma ata o. #Ugo 1:9-11 52Ibɛ po aa zhɛbɛ bu apata,#24:52 aa zhɛbɛ bụ apata: Tɛjɛshɛrɛga tu ko tu zasa n-ndumwa ma ata o. nazhɛ ee gwure nu Jɛrusalɛm nu unyasa ụ'wụtụ. 53Ibɛ po aa nama nu Umwono wa Agwatana, aa shɛtana Agwatana aka elele.

Currently Selected:

LUK 24: RBT

Highlight

Copy