LUK 14

Ge Jisus Nɛnjɛ Bụtụ bụ Ụngwụ Tishanjɛ

1Tu Ụjita-ụhinjanụ uko ci, ge Jisus zhe maa ya iyimɛyɛ nu umwono uhiu wa Afarisi uko, ee zweni bu igbɛtɛtɛ.#Luk 7:36; Mak 3:2 2Bụtụ bu ko namba apata ba gwuma ụngwụ tishanjɛ. 3Ge Jisus heŋteni embisegeni Undwa, bɛɛ hiɛŋ, Undwa leni suu maa a nɛnjɛ bụtụ nu Ụjita-ụhinjanụ okwo u leni shi? #Mat 12:10; Mak 3:4; Luk 6:9

4Ama e sumenji bu. Bee shepi bụtụ ata baa nɛnjɛ bụ, bɛɛ hiɛŋ bụ, Zhaga jiyo ni ihwɛ bu.

5Bee heŋteni aŋ, bɛɛ hiɛŋ, Gaaba na ashashɛ hiŋ i shɛ maa yɛu ibwɛ ye eyi#14:5 Yɛu ibwɛ ye eyi: Tɛjɛshɛrɛga tu ko ti hiɛŋ, izhinyɛci ibwɛ. okwo buna bu bwa leyi nu u'ibwa meni, i shɛ bi zha shɛ bɛ vwɛ bu nụ Ụjita-ụhinjanụụ? #Mat 12:11; Luk 13:15

6Ama ikɛnyi ya aba ci shi maa ɛ jishijɛ bu iwɛ ɛtɛ.

Aka na Aba Pana Atwa Iyimɛyɛ Uwaŋna Kwo kaa Inɛ Ụrụmɛ

7Ge Jisus ngbaracɛ ta atwa na aa suyanɛ no ofwo iyimɛyɛ a tala ajɛjɛ ụjɛrụma, baa manganganɛ aŋ n-ndumwa, bɛɛ hiɛŋ, 8Yaa shɛ bụtụ be elele ubu suyanɛ no ofwo iyimɛyɛ towo, ta gɛga na ajɛjɛ ụjɛrụma o. Nekeshi bu ga suywanua fweye bụtụ bu ko na ubu hwuri nu ụjɛrụma.#Eshi 25:6,7; Luk 11:43; 20:46 9Nazhɛ bụtụ ebe ga hi suyanɛ pushe hwayɛ, ta bụtụ ebe baa ga suyanɛ. Bi zhɛ mɛ bi hiɛŋ, Ishijɛ peni bụtụ ga ohwolu. Nazhɛ bo kwuno ya ti'ishijɛ ne ezuye maa gɛga na ajɛjɛ ɛmɛwɛɛ. 10Ama aka na aa bu suyanɛ, gɛga na ajɛjɛ ɛmɛwɛɛ, iwɛ maa aka na bụtụ na ga bu suyanɛ zhajɛ hwayɛ, maa mɛ bi hiɛŋ, E-biyejilo mi, kaanɛ mungeni. Nazhɛ ɛbi zhɛ ba 'yaga ụjɛrụma ne eshe atwa elele na gɛgajɛ apata na bụ. 11Bụtụ be elele na meme mungicinji, ɛ zhɛ e zucinje bu, ama bụtụ be elele na meme zucinje, ɛ zhɛ o mungicingo bu.#Mat 23:12; 18:4; Luk 18:14; 1 Pita 5:6

12Nazhɛ ge Jisus hiɛŋ bụtụ ata ga suyanɛ bụ, Aka na aba jala maa peni atwa iyimɛyɛ uwaŋna kwo kaa iyimɛyɛ ụrụmɛ, ta suyana eyejilo bu, kwo kaa miaụŋ-mo-bino bu, kwo kaa atwa na abu 'yajɛ ụmatụ na aba o, kwo kaa eyebi bu a na shɛ azhɛgba o; iwɛ aka na ɛɛ zhɛ ma bu suyana hwuŋ du gana ata maa a bu tụpanɛ. 13Ama aka na ɛbi zhɛ ba ima atwa ugaiŋ, ga shɛ okofwo, no okwuturu, na atwa na o shikoto keeni sholubo abu suyanɛ.#Luk 14:21 14Iwɛnɛ te e eri shi ma bu tụpana, ama Agwatana ubwa zhɛ ma bu tụpana hwuŋ nụ ụjita tihiɛ ta atwa tiririri, nazhɛ ɛbi zhɛ be gwoje.

N-ndumwa Tumanganjɛ iwɛ iyimɛyɛ Ụrụmɛ I'wɛtwɛ

(Mat 22:1-10)

15Aka na bụtụ bu ko na ashashɛ atwa na jɛjɛ nu bwa hwụjɛ iwɛ ɛtɛ, bɛɛ hiɛŋ bụ, Atwa na zhɛ a ya hwuŋ iyimɛyɛ na Cɛnjɛ-ta-tugwama ta Agwatana gwoje.#N-ndu 19:9

16Ama ge Jisus hiɛŋ bụ, Bụtụ bu ko njɛ iyimɛyɛ ụrụmɛ i'wɛtwɛ, baa suyanɛ atwa ofwugwo. 17Aka na ta aka iyimɛyɛ ɛtɛ ụrụmɛ ci ya, baa tumwanɛ yɛu-ugondu ubwa maa suyanɛ atwa na boo go mbiswogwo, maa hiɛŋ aŋ, Zhajɛ ma ya, iwɛnɛ to o hwuwo iyi elele ti'imanga hwɛɛ. Ama kpaaŋ aba kwuni udwonu tụdụmanga.

18Bụtụ bi hiiŋ hiɛŋ, N so itimɛ, i shɛ tilɛɛ maa Ma zha mɛ kwụbɛ iŋ. Ma bu tabwa maa go lono udwonu mu.

19Bụtụ bi yebi hiɛŋ bụ, N so inɛ umpwa iwɛ ugondu, ibɛ po gɛ Ngɛɛ zhɛ maa ma manjɛ iŋ. Ma bu tabwa maa go lono udwonu mu.

20Binya bụtụ hiɛŋ, N zeni biyikwo bu ufwo, iwɛbɛ po Ngee eri shi ma zhajɛ.#Undwa 24:5; 1 Kor 7:33

21Aka na ti yɛu-ugondu ɛtɛ gwure bee mbishi agwuma-ihwɛ ibwɛ iwɛ gɛ. Ibɛ po agwuma-ihwɛ ɛtɛ njɛ isɛbwɛ, bɛɛ hiɛŋ yɛu-ugondu ubwa, Zhaga ne ekpekiti keeni ihwɛŋnɛ timwee mwee nɛ namɛ nu ụshɛpwụ, suje okofwo, no okwuturu, no sholubo keeni atwa na o shikoto.

22Yɛu-Ugondu ubwa hiɛŋ bụ, Iyɛri, N nduwa iyi nɛ ebi m peni-unu ibɛ, ama okwo ti yaa shɛ gana ata ohwolu ta vwɛ ba waa iwɛ anya atwa.

23Nazhɛ agwuma-ihwɛ yɛu-ugondu ata hiɛŋ bụ, Zhaga ni ihwɛnnɛ, uranga atwa maa e teni maa ihwɛ mi shini pwomuu. 24Mo hi mbiso maa, i zasa bụtụ be elele na ashashɛ atwa na Ngaa suyanɛ zhɛ ba hungana iyimɛyɛ mi o.

'Waŋna Ụ'wụ'wụ-ubatanɛ Bụ

(Mat 10:37,38)

25Ti ge Jisus kwụbɛ tu ufwugwo ụ'wụtụ zhagajɛ nu bwa, baa mbiyanɛ aŋ, bɛɛ hiɛŋ aŋ, 26Yaa shɛ bụtụ be elele be ci pi mi, bee imi shi bishi bwa, to bino bwa, te biyikwo bwa, ta miaụŋ mu bwa, ta miaụŋ-mo-bino mu bwa, ta angwụfwụ ubwa, tu uraiŋ ubwa ukɛnyi ibwɛ du, asha bi eri shi ba sha biseshi-bi-iyi mi o.#Mat 10:37 27Bụtụ be elele na 'waŋnɛ shɛ ụ'wụ'wụ-ubatanɛ ubwa maa ma n 'wa, asha bi eri shi ba sha biseshi-bi-iyi mi o.#Mat 10:38; 16:24; Mak 8:34; Luk 9:23

28Gaaba na ashashɛ hiŋ na ba jala maa ma tuma tụ 'wụtụ, na zha shɛ ba gɛga tugwo maa imanga ulumo tuba maa kwụba okwo iyi nɛ baa 'yajɛ zhɛ yo hwuwo tuma ta ataa? 29Shibwonu boo shilwo hwuŋ ukoshilo, yaa shɛ ikɛnyi ibwɛ ci shi maa hwuwo uŋ tuma, atwa elele na kwụbɛ uŋ zhɛ na nda bu asada, ɛ hiɛŋ, 30Bụtụ ga kwuni tuma, ama ikɛnyi ibwɛ ci shi maa hwuwo tu o.

31Okwo agwuma naa zhɛ a sukakana agwuma anya nu ujasa, tu baa 'yajɛ asaza igbɛɛ-itɛ (10,000), i shɛ bi zha shɛ ba gɛga tugwo maa haŋsa okwo bi zhɛ ba ala hwayɛ bụtụ na 'yajɛ asaza igbɛɛ-umpwaa (20,000) 32Yaa shɛ bee mepi maa bi zha shɛ ba ala bu o, bi zhɛ ba tumwana eseci-i'ɛlɛ ta bụtụ bwa bi i'ime ta dụlụmɛ maa a lụpɛ gana na maa amɛ-olom nama. 33Gobwonu du, yaa shɛ bụtụ be elele na ashashɛ hiŋ genji shi iyi elele nɛ baa 'yajɛ, bi eri shi ba sha biseshi-bi-iyi mi o.#Luk 18:29,30; Fili 3:7

Manɛ mu na Mu Lacɛmɛ Shɛ

(Mat 5:13; Mak 9:50)

34Manɛ mɛ shɛ iyi biye, ama yaa shɛ manɛ mu lacɛmɛ shɛ, imbe ɛɛ tɛ zhɛ a nda mu maa mu lacɛmɛɛ? 35Mu zasa ule na cɛnjɛ kwo kaa nu ubizo, semi tu'waŋ kiri ɛɛ zhɛ a 'waŋ mu no tupohondo. Bụtụ na 'yajɛ acɛbɛ, ga hwuga.

Currently Selected:

LUK 14: RBT

Highlight

Copy