LUK 12

Unu-tɛtɛtagana iwɛ Tɛnda-te-eshe

(Mat 10:26,27)

1Aka na ta atwa igbɛɛ ifwugwo ụlwatagwụ, oo momo rikitogonu, ge Jisus kwuni eseshi-iyi ubwa timbiso, bɛɛ hiɛŋ, Na nda ma pece iwɛ tɛnda-te-eshe#12:1 tɛnda-te-eshe: Kwo kaa, Ifucingɛ. ta Afarisi.#Mat 16:6; Mak 8:15 2Iwɛnɛ ti yaa zasa iyi elele nɛ ee urigeni, aa zha shɛ o ushigo, i zasa kaa iyi nɛ ee sweci, aa zha shɛ ɛ vwɛ maa e mepi iŋ.#Mak 4:22; Luk 8:17 3Iwɛbɛ po iyi elele nɛ ahia duma ne tishi, ɛ zhɛ a hwuga iŋ nu uhioko-uhwaŋna, iyi elele nɛ kaa ahiɛ jɛmɛ na tuzwamɛ taa na amɛ umwono, ɛ zhɛ a ananga iŋ no shisokwu sho shimwono.

Bụtụ na Shɛ maa a na Nda Inyɛsɛ Ibwɛ

(Mat 10:28-31)

4Mo hi mbiso ahiɛba eyejilo mi, ta na nda ma inyɛsɛ ya atwa na eri a kwụna tu'waba, a na eri shi a nda ya iyi elele na aba ibɛ o.#Jon 15:14,15 5Ama N zhɛ Mo hi mbiso bụtụ na shɛ maa hi na nda inyɛsɛ ibwɛ. Na nda ma inyɛsɛ bụtụ ata i shɛ maa baa kwụnɛ tu'waba, i shɛ bu ta 'yajɛ ụhwada maa kala ohwulu nu ukwokwo ulwa. Iiŋ, Mo hi mbiso maa, Ga shɛ bụtụ ata ahia nda inyɛsɛ ibwɛ.#Ehib 10:31

6Shɛ okpobwo eyebi suu aa sanga esunyisunyi a ta? I zasa kaa okwo bu ko na ashashɛ aba isɛbwɛ ibwɛ 'wi Agwatana o. 7Ama e mepi okwo ofwugwo tihiŋzhe tu uhiuhiu hiŋ hwɛɛ. Ta nda ma inyɛsɛ o, hi 'yajɛ ule ehi hwuri esunyisunyi ofwugwo.#Luk 21:18; Ugo 27:34

Atwa na Le Krast Tiseyida, na Atwa na Teri Ashamanjɛ Ubwa

(Mat 10:32,33; 12:32; 10:19,20)

8Mo hi mbiso maa, bụtụ be elele na ma n la tiseyida ne eshe atwa, Yɛu Bụtụ zhɛ ya la bu hwuŋ du tiseyida ne eshe atumwa Agwatana a na namɛ na azuba. 9Ama bụtụ na ba tala ashamanjɛ mi ne eshe atwa, N zhɛ du ma tala hwuŋ ashamanjɛ ubwa ne eshe atumwa Agwatana a na namɛ na azuba.#Mak 8:38; Luk 9:26; 2 Timo 2:12 10Bụtụ be elele na ba dumangana Yɛu Bụtụ n-ndumwa mụ wɛ, ɛ zhɛ a gangana bu, ama bụtụ be elele na ba dumangana Mpiala mi Tijilo n-ndumwa mụ wɛ, a zha shɛ a gangana bu o.#Mat 12:31,32; Mak 3:28,29

11Aka na ee hi suji hwuŋ no ofwo atwa shimwono shɛ Tụ'ụlwatagwụ, to ofwo ehiu keeni atwa ụhwada, kede iwɛ iyi nɛ ɛhi zhɛ hiɛ jishijɛ aŋ keeni iyi nɛ ɛhi zhɛ hia duma ihi to.#Mat 10:19,20; Mak 13:11; Luk 21:14,15 12Iwɛnɛ po Mpiala mi Tijilo muba mi zhɛ mo hi mbisogono iyi nɛ ɛhi zhɛ hia duma na auwa ata.

N-ndumwa Tumanganjɛ iwɛ Alagwụ na 'Yajɛ Uduciya

13Nazhɛ bụtụ bu ko na ashashɛ atwa ata ofwugwo, hiɛŋ Jisus, E-Bimbisegeni, mbiso yɛu-bino mi maa to dwotwogonu shigwu atubana nu bwa.

14Ge Jisus jishijɛ bụ, bɛɛ hiɛŋ, A-bụtụ ga, gaaba bwa n njɛ bɛjɛmɛ-bụ-ụshɛrɛya kwo kaa budwotwogonu bi i'wɛŋnɛ hiiŋ? 15Ge Jisus hiɛŋ aŋ, Na nda ma pece maa hi no shiyono eshe iwɛ ukwedeyi iyi elele ti'yaga, iwɛnɛ ti yaa shɛ shɛ ni iyi nɛ bụtụ 'yajɛ uraiŋ tugom namɛ.#1 Timo 6:6-10

16Ge Jisus manganganɛ aŋ n-ndumwa mu ko, bɛɛ hiɛŋ, Bɛzhɛgba bu ko namba la cɛnjɛ tɛ zhɛmanɛ, bee jwe iyimɛyɛ i'wɛtwɛ. 17Bee meme heŋteni, bɛɛ hiɛŋ, Gana naa Ngɛɛ zhɛ ma ndaa? Iwɛnɛ tu Ngaa zasa ofwo na maa mo zwono iyimɛyɛ mi.

18Nazhɛ bɛɛ hiɛŋ, Iyi nɛ Ngɛɛ zhɛ ma nda na, N zhɛ ma bwada orubwu mi, maa Ma nda anaa na gembenji maa Mo zwono ohiu mi keeni iyimɛyɛ ye elele nɛ Ngaa 'yajɛ. 19Nazhɛ Ngɛɛ zhɛ m mɛmɛ hiɛŋ, N 'yajɛ ya iyimɛyɛ i'wɛtwɛ nɛ Ngee zweni nu urubwu iwɛ shiywa shu ofwugwo. N zhɛ ma 'waŋ ya ihwungwɛ, mu na ya, mu na swa, mu na gbangada.

20Ama Agwatana hiɛŋ bụ, Gabụ alagwụ ga, yaa shɛ ebu 'wi nụ ụjita go, gaaba zhɛ ba 'yaga ya ijɛ ɛtɛ ebu suteni hwɛɛɛ? #Luk 12:33,34 21Gabata du yɛɛ zhɛ ya shana bụtụ na momo sutonono uduciya nu unyizo ga, na zha shɛ kaa ba sha hwuŋ bɛzhɛgba na agba Agwatana.

Tɛtana ma Agwatana Rishe

(Mat 6:25-34)

22Nazhɛ ge Jisus hiɛŋ eseshi-iyi ubwa, Mo hi mbiso maa, Kede iwɛ ikɛnyi hiŋ ihi to, iwɛ iyi nɛ ɛhi zhɛ hia ya, kwo kaa iwɛ iyi nɛ ɛhi zhɛ hio urugono. 23Iwɛnɛ tu uraiŋ uhwuri iyimɛyɛ, tu'waba kaa tu hwuri tugwuno. 24Ama na haŋsa ma tebiye iwɛ agwaagwaa, a na bɛrɛ shɛ, a na gwubi shi, a na zasa umwono i'wɛŋnɛ tuzwono kwo kaa urubwu. Ama hiɛ 'yajɛ ule ehi hwuri shanụnụ sha ata duwa! #Luk 12:6,7 25Gaaba eri baa kaana ụnjɛswa ubwa#12:25 ụnjɛswa ubwa: Kwo kaa uraiŋ ubwa, kwo kaa auwa ubwa, kwo kaa uzoto ubwa. okwo uvwuna uko, okwo yaa kwụlanɛ bụụ? 26Yaa shɛ ehi eri shi hia nda okwo iyi ticwɛŋ gɛnɛ ɛtɛ, asha iwembe po iwɛ iyi nɛ vwɛ zhɛ ma hi ta yaa? 27Na haŋsa ma du tebiye iwɛ modwodwo, mɛ hiɛŋshɛ shɛ ihiɛŋshɛ, mɛ nɛ shɛ kaa tugwuno, ama Mo hi mbiso maa, okwo gụ Sụlụmụn tụ ụjɛrụma ubwa hwɛɛ, bu urigeni shi iyi nɛ ci modwodwo mu ga okwo mu ko.#1 Shɛgwu 10:1-10; 2 Shɛrụ 9:3-6 28Yaa shɛ Agwatana a ndana ambɛ na namɛ hwayɛ ga ne ehilo a na kaa zhɛ o hwoŋno beyi iyi gɛnɛ ɛtɛ, asha ahiɛba tubaa? Bi zha shɛ suu mo hi urugono tugwuno, ahiɛba atwa rishe-tɛtɛtana ri ticwɛŋ?

29Kede iwɛ iyi nɛ ɛhi zhɛ hia ya ni iyi nɛ ɛhi zhɛ hia swa ihi to, maa hi na jalakaka iŋ o. 30Iyi nɛ atwa na tɛtanɛ shɛ rishe nu unyizo ga kpaaŋ a jalakaka ta. Ama Bishi hiŋ mepi maa ukekeshi ijɛ ɛtɛ ma hi nda.#Mat 6:8 31Ama ga shɛ Cɛnjɛ-ta-tugwama tu bwa#12:31 njɛ-ta-tugwama tu bwa: Tɛjɛshɛrɛga tu ko ti cala ti hiɛŋ Cɛnjɛ-ta-tugwama ta Agwatana. Motu ko ti hiɛŋ, hwuricingo ma ugondu wa Agwatana umbe. ahia jalakaka maa kede i shɛ inɛ ɛtɛ o, nazhɛ bɛɛ zhɛ ma hi kaana ijɛ ɛtɛ kpaaŋ.

Uduciya Ti'yaga na Azuba

(Mat 6:19-21)

32Ta nda ma inyɛsɛ ahiɛba unyama wa agwụdụ ga tidice o, iwɛnɛ ti yaa kwụlanɛ Bishi hiŋ maa ma hi pana Cɛnjɛ-ta-tugwama. 33Sanga ma iyi elele nɛ ahiɛ 'yajɛ maa hi peni okofwo ukwuribi. Mama ndanɛ ma shɛrɛta shu ukwuribi shɛ na shɛ zha shɛ sha inga, uduciya na namba na zuba hwuwowu su o, buzundo kaa eri shi bo to apata, a'nyasụ kaa eri shi a nda uŋ ufwu o. 34Ofwo na kaa uduciya hiŋ namɛ, apata du shihaŋsa shi hiŋ shi zhɛ sha nama.

Ajama na A'iywa

35Mama 'imɛ ma ni i'wɛŋnɛ tu'urugono, ga asụtụla hiŋ 'yaga ulwa.#Mat 25:1-13; Mak 13:33-37; Ɛfɛ 6:14 36Sha ma gana atwa na a 'yaka tugwure ta agwuma-ihwɛ ya aba na ge zhe iyimɛyɛ towo tiya, iwɛ maa aka na bee gwure, boo po ukpa iyi, maa hi kepishingeni bu gunu ata.#Mak 13:34-36 37Miaụŋ-mu-ugondu ma ata na agwuma-ihwɛ ya aba zhɛ o jitono ta a 'yaka gwoje. Iwɛ-tɛkana Omo hi mbiso maa, bi zhɛ ba nangana tugwuno tu bwa hwungbɛ, maa gɛgɛcɛnga aŋ maa a yɛ iyimɛyɛ. Bi zhɛ ba zhajɛ ni ikɛnyi ibwɛ maa ndana aŋ iyi.#Mat 24:42 38Miaụŋ-mu-ugondu mu na agwuma-ihwɛ ya aba zhɛ ba zhajɛ, bɛɛ zhɛ bo jitono aŋ ta a ta 'yaka okwo nụ ụjita tudwonu kwo kaa na aasavwungwa, ɛ zhɛ e gwoje. 39Hi mepi du inɛ gɛ maa, yaa shɛ agwuma-ihwɛ ge mepi auwa na buzundo gɛ zhɛ ba zhajɛ, bu ga zha shɛ#12:39 bu ga zha shɛ: Tɛjɛshɛrɛga tu ko ti keeni tɛɛ hiɛŋ, bi gɛ zhɛ no shiyono eshe. Bo lono maa buzundo ata bweji umwono ubwa maa tono. 40Asha mama 'imɛ ma ya, iwɛnɛ ti Yɛu Bụtụ ye ci na auwa na ehi heŋshi shi.#Mat 24:43,44

Yɛu-ugondu Tɛcara ni Yɛu-ugondu Iwɛ

(Mat 24:45-51)

41Ga Pita heŋteni Agwangwama, bɛɛ hiɛŋ, Atuba maa abu manganganɛ n-ndumwa mu ga, okwo iwɛ atwa kpaaŋ du?

42Agwangwama jishijɛ Pita, bɛɛ hiɛŋ, Gaaba shɛ uhiu-ihwɛ tɛcara na incɛ, na agwuma-ihwɛ ibwɛ zhɛ ba nda bu uhiu-ihwɛ ya atwa ubwa hwɛɛ, maa bu na pana aŋ iyimɛyɛ nɛ i shɛ urobwo wa aba na aka na teni cɛɛŋ? 43Yɛu-ugondu nɛ agwuma-ihwɛ ibwɛ zhɛ o jitono tu baa nda gana ata gwoje. 44Iwɛ-tɛkana Omo hi mbiso maa, bi zhɛ bo sugo i'wɛŋnɛ ibwɛ kpaaŋ bo utogono bu. 45Ama yaa shɛ yɛu-ugondu ɛtɛ mɛmɛ hiɛŋ, Agwuma-ihwɛ mi ta kpayawụ sụ ujiyo, nazhɛ bee kwuni miaụŋ-mu-ugondu mụ vwɛ ijibi, ta mu na me eyi, ta mu na mo o, baa ya, baa swa, iyimɛyɛ ya ngba bụ. 46Agwuma-ihwɛ yɛu-ugondu ɛtɛ zhɛ be jiye jita na bee ge heŋshi shi, keeni auwa na bee mepi shi. Bi zhɛ ba bacɛnga bụ,#12:46 ba bacɛnga bụ: Kwo kaa ba jaja bụ na ashashɛ, kwo kaa ba pana bụ ulwapɛ. bo shilo bu na ashashɛ atwa na shɛ shɛ atwa tɛcara.

47Yɛu-ugondu nɛ mepi ukwulana wa agwuma-ihwɛ ibwɛ, na kaa mama 'imɛ shɛ kwo kaa na mekeni shi maa nda gana na kwụlanɛ agwuma-ihwɛ ibwɛ, ɛ zhɛ o dubo bu tebiye tebiye. 48Ama bụtụ na ge mepi shi uŋ, yaa shɛ baa njɛ iyi nɛ teni cɛŋ ijibi, ɛ zhɛ o dubo bu cwɛŋ. Bụtụ na ee peni iyi duwa, no olugwo ubwa du ɛɛ zhɛ a jalakaka duwa, bụtụ na kaa ee zweneni kaamụ, ɛ zhɛ du o hoŋtono bu iwɛ inɛ tụkamụ.

Tubogwu iwɛ Jisus

(Mat 10:34-36)

49[Ge Jisus hiɛŋ,] N zhajɛ maa ma sapa unyizo ulwa, i ga ma kwụlanɛ maa u tonu cebe! 50Ama N ta 'yajɛ ubaptizim uko ɛɛ tɛ zhɛ ma n nda, u n tɛtajɛ uuwa i ci aka na waa njɛ! #Mak 10:38,39 51Hia haŋsa suu maa N zhajɛ maa ma karɛ amɛ-olom nu unyizo? Mo hi mbso maa, Awo, semi tubogwu! 52Te kwuni na aka ga, atwa na ga namɛ aba ta ni ihwɛ ike, ɛ zhɛ o bogwu, atwa atatụ zhɛ a sukakana atwa eyebi, atwa eyebi du zhɛ a sukakana atwa atatụ. 53Tubogwu ti zhɛ ta nama, bishi bi yɛu zhɛ ba sukakana yɛu ibwɛ ye eyi, yɛu-ye-eyi zhɛ ya sukakana bishi bwa. Bino zhɛ ba sukakana yɛu ibwɛ yo o, yɛu-yo-o zhɛ ya sukakana bino bwa. Bino-bwolo zhɛ ba sukakana utashɛ ubwa, utashɛ du zhɛ wa sukakana bino-bwolo bwa.#Maik 7:6

Ti'eshicigo ti Iyi nɛ Zhɛ ya Ndangana

(Mat 16:2,3)

54Ge Jisus hiɛŋ du ufwugwo wa atwa ata, Aka na ahiɛ kwụbɛ tu udomu banɛ geri bu uwaŋna-twonuo, gunu ata hiɛ hiɛŋ, Eshilo zhɛ o ngbo hwayɛ, ya sha ga kaa gana ata. 55Aka na ahiɛ kwụbɛ tu mpiala ma banɛ tuta, hiɛ hiɛŋ, Uwaŋna zhɛ wo vwo hwayɛ, ya sha ga kaa gana ata. 56Ahiɛba atwa tɛnda-te-eshe! Hi eri hia manganga unyizo keeni tụla, iwɛmbe po tuba ehi eri shi hia manganga aka gaa?

Bụtụ na ma Bu Sukakana

(Mat 5:25,26)

57[Ge Jisus heŋteni aŋ, bɛɛ hiɛŋ,] Iwembe po ehi eri shi hia duma iwɛ iyi nɛ teni cɛŋ ni ikɛnyi hiiŋ? 58Aka na ta bụtụ na ma bu sukakana zhɛ mo bu sugo ụshɛrɛya, nda gana na ebi eri maa n-ndumwa ma ata mu bu hwuwonowuŋ nu bwa tobwolo hi te ci shi agba ụshɛrɛya o, iwɛ maa kede ma bu mbata pa bɛjɛmɛ-bụ-ụshɛrɛya, maa bɛjɛmɛ ata bụ ụshɛrɛya ubi shepi pe bidegeri, maa bidegeri ubi keri nu umwono-tishi o. 59Mo bu mbiso maa, bi zha shɛ ba banɛ apata o, semi aka na abɛ cɛpɛ ukwuribi we elele na aa bụ mụnɛ kpaaŋ.

Currently Selected:

LUK 12: RBT

Highlight

Copy