JON 7

Ge Jisus no Ohongwu Ubwa

1Na aba inɛ gɛ, ge Jisus tenenji ofwo elele nu Galili, ama bi jeri shi maa tonongo Judia o, iwɛnɛ te Eju a jala bụ tụkwụna. 2Na aka ga ibɛ Isene Shidulo ye Eju gwumwonu.#Liv 23:34; Undwa 16:13 3Ibɛ po ohongwu Jisus hiɛŋ bụ, Ishijɛ maa zhe Judia, iwɛ maa eseshi-iyi bu kwụbɛ du ugondu na aba nda. 4I zasa bụtụ be elele na zhɛ na nda iyi ne tusweci tu baa jala maa atwa kpaaŋ mepi bu o. Ama gana na aba ndangana ijɛ kpaaŋ, asha meme mbiseni atwa unyizo. 5Okwo ohongwu ata ubwa tɛtanɛ shɛ bụ du rishe o.

6Ge Jisus jishijɛ aŋ, bɛɛ hiɛŋ, Aka mi te ci shi o, ama aka hiŋ ihi namanɛ tutu. 7Atwa unyizo eri shi ma hi ta ni i'ime o, ama Gamba oo to ni i'ime, iwɛnɛ ti Ngee le tiseyida ta aba maa ugondu wa aba ụ shɛ ugondu ụwɛ. 8No hwulo ma Isene gɛ ahiɛba hiɛba, N ta zha shɛ#7:8 N ta zha shɛ: Tɛjɛshɛrɛga tu ko tu zasa N ta, ama ɛ hiɛŋ, N zha shɛ o. Isene gɛ o, iwɛnɛ ta aka mi te ci shi. 9Aka na ti bee mbishi aŋ iwɛ gɛ, Baa jɛjɛ waa nu Galili.

Ge Jisus Zhe Isene Ɛtɛ i Shidulo

10Ama aka na to ohongwu Jisus hwuri ee zhe Isene ɛtɛ, ubwa du zhe Isene ɛtɛ, bi zhe shi tuba caakwụ o, ama ne tusweci. 11Eju jelekeci bu ni Isene ɛtɛ, ɛɛ hiɛŋ, Cee baa namɛɛ?

12Atwamwa o ngwulongongo duwa iwɛ ubwa. Atwa oko hiɛŋ, Bɛ shɛ bụtụ bi biye.

Ama atwa oko hiɛŋ, Awo, ba inzhanga atwa ofwugwo. 13Okwo ti yaa shɛ gana ata, i zasa bụtụ na jɛmɛ iwɛ ubwa caakwụ nu ukpogwu o, iwɛnɛ ta a nda inyɛsɛ ye Eju.

14Aka na ti Isene ɛtɛ ci ashashɛ, nazhɛ ge Jisus zhe bee teni nu Umwono wa Agwatana bee kwuni atwa iyi timbisogono. 15Iwɛ ubwa dama Eju tebiye, ɛɛ hiɛŋ, Gana naa bụtụ ga njɛ bee mepi iyi gana ga, ti bee seshi shi kaaa?

16Ge Jisus jishijɛ aŋ, bɛɛ hiɛŋ, Shɛ Gamba n 'yajɛ imbisegeni gɛ Ama nda o, ama bụtụ ata n tumwanɛ ubwa 'yajɛ iŋ. 17Bụtụ be elele na ba jala maa nda ukwulana wa Agwatana, ubwa zhɛ ba mapa iwɛ imbisegeni gɛ okwo inɛ ya Agwatana yaa shɛ kwo kaa nụ ụhwada mu Ama duma iwɛ gɛ. 18Bụtụ na ba duma iwɛ nụ ụhwada ubwa, asha ba jala ụjɛrụma uhiuhiu ubwa. Ama bụtụ na ba jala ụjɛrụma bụtụ na tumwanɛ bụ, ubwa shɛ bụtụ tɛkana, orugwusu zasaba na amɛ ubwa o. 19Go Moses ihi peni shi la Undwa suu? I zasa kaa bụtụ be elele ba nda Undwa ata na ashashɛ hiŋ o. Iwembe po ahi ma jala tụkwụnaa?

20Ibɛ po unyama ata jishijɛ bụ, ɛɛ hiɛŋ, Butumwa-bi-ibiri namɛ na amɛ bụ. Gaaba ma bu jala tụkwụnaa?

21Ge Jisus jishijɛ aŋ, bɛɛ hiɛŋ, N nduwa ugondu uko na u hi dama kpaaŋ hiŋ. 22Go Moses ihi eni maa hi na jaja teleyi ta miaụŋ mi hiŋ, (okwo ti yaa shɛ shɛ go Moses ihi eni iŋ, ama i banɛ taa no ogwunukwoshi hiŋ a na namba la cala) ahia jaja kaa teleyi ta miaụŋ mi hiŋ nụ Ụjita-ụhinjanụ.#Liv 12:3; Umoz 17:10 23Yaa shɛ teleyi tijaja nụ Ụjita-ụhinjanụ ti heshigeni shi Undwa Moses, asha iwembe po ahia nda ya isɛbwɛ ne mi iwɛnɛ tu Ngaa nɛnjɛ bụtụ nụ Ụjita-ụhinjanụụ? #Jon 5:9 24Ta na duma ma ụshɛrɛya gana na ta ahiɛ kwụbɛ iyi no tupohondo, ama na duma ma ụshɛrɛya u tishiriri.

Ga Krast ata na Hŋ?

25Nazhɛ atwa Jɛrusalɛm oko hiɛŋ, Shɛ bụtụ ganana hŋ aa jala tụkwụna? 26Hioko ma ba duma kaa n-ndumwa caakwụ, a hiaŋ shɛ bụ kaa iwɛ ye elele o! Ehiu eshiciji suu maa ga Krast ata na? 27Ti mepi olugwo na bụtụ ga banɛ, ama aka na ga Krast zhɛ ba zhajɛ, i zasa bụtụ zhɛ ba mapa olugwo na bɛɛ zhɛ ba banɛ o.

28Nazhɛ ge Jisus uganɛ tu boo mbisogono aŋ iyi nu Umwono wa Agwatana, bɛɛ hiɛŋ, Hi m mepi, ehi mepi kaa du olugwo na Ngaa banɛ. Ama shɛ nu ukpahiŋ mu Ngaa zhajɛ o, ama bụtụ na n tumwanɛ ubwa shɛ bụtụ tɛkana; hi mepi shi bu kaa, 29ama ɛɛ hiɛŋ Gamba M mepi bu, no olugwo ubwa Ngaa banɛ, ubwa du kaa n tumwanɛ utumwa.

30Iwɛbɛ po Eju#7:30 Iwɛbɛ po Eju: Tɛjɛshɛrɛga tu ko ti hiɛŋ, atwa ata oko, mo tu ko ti hiɛŋ, aa jala. a jala maa a 'imɛ Jisus, ama i zasa bụtụ na timengeni bu, iwɛnɛ ta aka ubwa te ci shi.

31Ama atwa ofwugwo na ashashɛ atwa ata tɛtanɛ Jisus rishe, ɛɛ hiɛŋ, Aka na ga Krast ata zhajɛ, bi zhɛ suu ba nda arụhwajɛ uhwuri a na ga bụtụ ga ba nda?

Afarisi Tumwanɛ Edegeri Umwono Tu'ulwa maa Ɛ Imɛ Jisus

32Afarisi hwụjɛ ta atwa ofwugwo o ngwulongongo iwɛ Jisus, ibɛ po ehiu onongbo keeni Afarisi tumwanɛ edegeri umwono tu'ulwa maa ɛ imɛ Jisus.

33Ama ge Jisus hiɛŋ aŋ, N tɛ zhɛ ma nama ne hŋ tugwo na aka fwalaa, nazhɛ Mo hwulo no ofwo bụtụ ata n tumwanɛ. 34Hi zhɛ hi na ma jalakaka, hi zha shɛ kaa hi ma n ta ugbe, hi eri shi kaa hio to ofwo na Ngɛɛ zhɛ ma nama.

35Ibɛ po Eju momo hoŋtongonu, ɛɛ hiɛŋ, Cee bwa bɛɛ zhɛ ati zha shɛ ta ta bu ugbee? Bi zhaganɛ suu Eju ata ee gereteji a na zweni na ashashɛ Egrik maa mbisogono Egrik iyi? 36Shibwonu asha imbe shɛ ecilo iwɛ ɛtɛ baa jɛmɛ maa, Hi zhɛ hi ma jalakaka, hi zha shɛ kaa hi ma n ta ugbee, hi eri shi kaa du hio to ofwo na Ngɛɛ zhɛ ma namaa?

Meni me Erefu Uraiŋ

37Ge Jisus ishijɛ nụ ụjita na shɛ ụjita umɛwɛɛ Isene na kaa shɛ ụjita ụ'wụtụ, baa uganɛ, bɛɛ hiɛŋ, Yaa shɛ i'uyɛ gwụmɛ bụtụ be elele, ga zhajɛ pi mi maa swa meni.#7:37 swa meni: Tɛjɛshɛrɛga tu ufwugwo tu zasa meni o. #Liv 23:36 38Gana na ti Iwɛ ya Agwatana jɛmɛ, yɛɛ hiɛŋ, Bụtụ na n tɛtanɛ-rishe, meni me erefu uraiŋ mi zhɛ mu na banɛ na amɛ ubwa mɛɛ zhɛ mu na fwunga.#Izik 47:1; Zɛka 14:8 39Ama ba duma iwɛ Mpiala mu na atwa na tɛtanɛ bụ rishe zhɛ a la, iwɛnɛ po e ge te peni shi aŋ Mpiala mi Tijilo, iwɛnɛ ee ge te peni shi Jisus ụjɛrụma.#7:39 peni shi Jisus ụjɛrụma: Ụjɛrụma Jisus tụpana i shɛ na ka na oo to bu nu ubatanɛ, keeni aka na ti bɛɛ hiɛ bee gwuri na azuba baa jɛjɛ nu u'ala ubiye Bishi bwa.

Tubogwu ti Zhajɛ na Ashashɛ Atwa ata iwɛ Jisus

40Aka na ta atwa oko na ashashɛ ufwugwo ata hwụjɛ iwɛ gɛ, ɛɛ hiɛŋ, Iwɛ-tɛkana, Bụtụ ga ubwa ga shɛ bigesere ata! 41Atwa oko hiɛŋ, Bụtụ ga ubwa shɛ ga Krast ata.

Ama atwa oko hiɛŋ, Ga Krast suu zhɛ ba banɛ nu Galili? 42Iwɛ ya Agwatana ta jɛmɛ shɛ la suu maa ga Krast zhɛ ba banɛ nu umwamwa Devid,#7:42 nu umwamwa Devid: Tɛjɛshɛrɛga tu ko ti hiɛŋ, na bụzagwụ Devid. nụ ụshɛpwụ ata ɛɛ hiɛŋ, Betlɛhɛm na shɛ ụshɛpwụ ata ge Devid jɛjɛ la? #2 Sam 7:12; Maik 5:2 43Ibɛ po tubogwu tu zhaganɛ atwa ata iwɛ Jisus. 44Nazhɛ atwa oko na ashashɛ aba a jala maa a 'imɛ Jisus, ama i zasa kaa bụtụ timengeni bu o.

Ehiu Eju Tɛtanɛ Shɛ Jisus Rishe o

45Aka na te edegeri umwono tụ'ụlwatagwụ gwure no ofwo ehiu onongbo keeni Afarisi, ibɛ ehiu ata onongbo na Afarisi#7:45 ibɛ ehiu ata onongbo na Afarisi: Tɛjɛshɛrɛga tu ufwugwo tu zasa n-ndumwa ma ata o. heŋteni aŋ, ɛɛ hiɛŋ, Imbe po ehi shepi shi buu?

46Nazhɛ edegeri ata umwono tụ'ụlwatagwụ jishijɛ aŋ, ɛɛ hiɛŋ, I ta zasa kwukwuŋ bụtụ na dumwa iwɛ gana na bụtụ ga ba duma o.

47Afarisi heŋteni aŋ, ɛɛ hiɛŋ, E hi holokwokwo du suu? 48I 'yajɛ suu bụtụ be elele na ashashɛ ehiu keeni Afarisi na tɛtanawaŋ bụ rishe? 49Ama unu-tukalana wa Agwatana patanɛ atwa ga ofwugwo a na mepi shi Undwa Moses.

50Nazhɛ ge Nikodimos na shɛ du Bufarisi, na du zhe la pi Jisus nụ ụjita, bee heŋteni aŋ, bɛɛ hiɛŋ:#Jon 3:1,2

51Undwa tu suu wa pana bụtụ n-ndumwa-tụwụma tobwolo a ta hwụjɛ shɛ unu ubwa maa e mepi iyi nɛ baa njɛ?

52Ɛɛ jishijɛ bụ, ɛɛ hiɛŋ, Nu Galili du suu abu banɛ? Yalaga, bi zhɛ ba kwụba maa, i zasa bigesere be elele na zhɛ ba banɛ nu Galili o.

53[Nazhɛ aa garatagwụ jita ata, bụtụ bụtụ ji ni ihwɛ ibwɛ.

Currently Selected:

JON 7: RBT

Highlight

Copy