JON 6

Ge Jisus Peni Atwa igbɛɛ-iyebi-na-akpakwụ-a-ta Iyimɛyɛ

(Mat 14:13-21; Mak 6:30-44; Luk 9:10-17)

1Na aba inɛ gɛ, ge Jisus beni apata, bee zhe hileniye Itekwu Galili nɛ shɛ itekwu Taibirias. 2Atwa ofwugwo ụ'wụtụ 'wa bụ, iwɛnɛ ta a kwụbɛ arụhwajɛ na baa nda no ofwo agwumashɛ. 3Ge Jisus munji ne embi ishɛmɛ ike, baa jɛjɛ apata ne eseshi-iyi ubwa. 4Isene Tɛkashɛka ye Eju kaa gwumwonu na aka ata.

5Aka na ti ge Jisus hirinje, baa kwụbɛ unyama ụ'wụtụ tu wee ci pu bwa, bɛɛ hiɛŋ Filip, Cee ɛti zhɛ ti mɛ sɛ iyimɛyɛ nɛ maa atwa ga yɛɛ? 6Ama bɛ jɛmɛ iwɛ gɛ maa manga Filip, shibwonu bu mwopwo iyi nɛ bɛɛ zhɛ ba nda.

7Ge Filip jishijɛ bụ, bɛɛ hiɛŋ, Iyimɛyɛ ya apamụ umpwa#6:7 apamụ umpwa: apamụ ga umpwa a nangwụ na alubashɛ na aa tụpa la anjɛ-ugondu na aka cala na amɛ ipiɛnɛ itɛtu. kaa zha shɛ yo gombo aŋ maa bụtụ bụtụ ya okwo cwɛŋ o.

8Ibɛ po yɛu-bino Pita ga Andru na shɛ bụtụ bu ko na ashashɛ eseshi-iyi ubwa hiɛŋ bụ, 9Yɛu-ye-eyi ike namba nɛ 'waŋnɛ mbrad mu bali mu ta keeni ijɛnɛ iyebi, imbe kaa inɛ ɛtɛ eri ya nda na ashashɛ unyama gaa?

10Ge Jisus hiɛŋ aŋ, Hiɛŋ ma atwa maa ga a gɛgaga. Ambɛ olom kaa namba apata duwa. Ibɛ etwenyi gɛgajɛ, ofwugwo wa aba namɛ gana igbɛɛ-iyebi-na-akpakwụ-a-ta (5,000). 11Ge Jisus suji mbrad ma ata baa njɛ ugwoje na Agwatana, gobwonu du baa njɛ ni ijɛnɛ ɛtɛ, nazhɛ bee peni atwa ata gɛgajɛ gana na eri o gombo aŋ.

12Aka na ta atwa ata shigeji, ge Jisus hiɛŋ eseshi-iyi ubwa, Sutono ma owunzu mbrad ma ata mụ vwɛ urubwo uko, maa kede a na elele njɛ ufwu o. 13Ee suteni aŋ ga urubwo uko, owunzu na vwanɛ atwa ata yɛ mbrad ma ata mu bali mu ta, e shidinji shɛrɛgada umpwa-na-shɛba-shi-yebi.

14Aka na ta atwamwa kwụbɛ ụrụhwajɛ ata ge Jisus njɛ, ɛɛ hiɛŋ, Iwɛ-tɛkana ubwa ga shɛ bigesere ata be ci nu unyizo. 15Ama ti ge Jisus mepi maa ɛ zhɛ a ima bụ maa a njɛ bụ agwuma ni iji, bee beni apata bee gwuri ne embi ishɛmɛ bwooko.

Ge Jisus ba Zha Tahaŋnụ na Azuba Meni

(Mat 14:22-33; Mak 6:45-52)

16Aka na tụ ụrụmɛ shɛ, eseshi-iyi Jisus zwe nụ ụpalanụ itekwu, 17ee teni nụ ụhaŋtụ, maa e keshi hileniye itekwu ɛtɛ maa e zhe Kapanaum. Aka ata ụjita kaa shiwo cebe, ge Jisus kaa te zhe shi no ofwo aba o. 18Uvwugo ụ'wụtụ ta kaa layɛ ni itekwu ɛtɛ, itekwu ya nda adanga. 19Gana na te eseshi-iyi heŋteni ụhaŋtụ ata gana imɛle itɛtu kwo kaa ineshi, aa kwụbɛ ti ge Jisus be ci tahaŋnụ ni itekwu ɛtɛ, bɛɛ zhɛ bo dongonu ụhaŋtụ wa aba, ibɛ po inyɛsɛ shɛ aŋ.

20Ama ge Jisus hiɛŋ aŋ, Gamba na, ta nda ma inyɛshɛ o. 21I ga kwụlanɛ eseshi-iyi ubwa maa e shepi bu nụ ụhaŋtụ ata, gunu ata ụhaŋtụ ci ya ofwo na ɛɛ gɛ zhɛ.

Atwa a Jalakaka Jisus

22Aka na ti iyi heri, ibɛ atwa ata ofwugwo a na ge shikekeni hileniye ukwoswo itekwu ɛtɛ kwụbɛ maa ụhaŋtụ uko ticwɛŋ kiri ga namɛ apata, ge Jisus kaa teni shi uŋ ne eseshi-iyi ubwa o, semi eseshi-iyi ubwa abaaba kiri ge teni uŋ. 23Ama ihɛŋtu ike ticwɛŋ cwɛŋ banɛ ni Taibirias, yɛɛ zhɛ yo dongonu ofwo ata atwa ga yɛ mbrad na aba na ta Agwangwama njɛ ugwoje. 24Gana na ta atwa ata kwụbɛ maa ge Jisus zasaba ya apata te eseshi-iyi ubwa o, ibɛ po atwa ata teni ụhaŋtụ abaaba ee zhe Kapanaum, aa jalakaka bụ.

Ge Jisus Shɛ Ibrɛd Uraiŋ

25Aka na ta atwa ata to Jisus ugbe hileniye itekwu ɛtɛ, ɛɛ hiɛŋ bụ, E-Bimbisegeni, aka naa abi zhajɛ epee?

26Ge Jisus jishijɛ aŋ, bɛɛ hiɛŋ, Iwɛ-tɛkana Omo hi mbiso maa, shɛ iwɛ arụhwajɛ na ahiɛ kwụbɛ upo ahi ma n jalakaka o, ama iwɛnɛ ahi ga yɛ mbrad ma ata ehi shigeji. 27Ta na nda ma ugondu iwɛ iyimɛyɛ nɛ zhɛ ya nda ufwu o, ama ga shɛ iwɛ iyimɛyɛ nɛ zhɛ ya nama tutu uraiŋ unyizo-nom, inɛɛ nɛ Yɛu Bụtụ zhɛ ma hi pana. Iwɛnɛ po ubwa Agwatana Bishi utegeni ụhwada maa bu na duma ụshɛrɛya, iwɛnɛ tu baa shɛ Yɛu Bụtụ.

28Nazhɛ atwa ata heŋteni Jisus, ɛɛ hiɛŋ, Imbe ɛti zhɛ ta nda maa ta nda ugondu wa Agwatanaa?

29Ge Jisus jishijɛ aŋ, bɛɛ hiɛŋ, Iyi nɛ shɛ ugondu wa Agwatana na, tɛtana ma bụtụ ata baa tumwanɛ rishe.

30Ee heŋteni Jisus, ɛɛ hiɛŋ, Imbe shɛ ụrụhwajɛ na aba nda maa ta kwụba maa ta bu tɛtana-rishee? Ugondu imbe kwuŋ aba ndaa? 31Eshi tu yɛ la mana nụ ụshɛka, gana na te e 'nyeci, ɛɛ hiɛŋ, Ubwa peni aŋ iyimɛyɛ ɛtɛ banɛ na azuba aa yɛ.#Ụban 16:4,15; Shɛzu 78:24

32Ge Jisus hiɛŋ aŋ, Iwɛ-tɛkana Omo hi mbiso maa, shɛ go Moses ihi peni la iyimɛyɛ ɛtɛ banɛ na azuba o, ama Bishi mi ubwa ma hi pana iyimɛyɛ i tugom nɛ banɛ na azuba. 33Iwɛnɛ po iyimɛyɛ ya Agwatana nɛ banɛ na azuba, ibɛ ya pana atwa unyizo uraiŋ.

34Ibɛ po atwa ata hiɛŋ Jisus, Asha na tu pana iyimɛyɛ ɛtɛ aka elele.

35Ge Jisus hiɛŋ aŋ, Gamba n shɛ iyimɛyɛ ɛtɛ uraiŋ, bụtụ na zhajɛ pi mi, imunɛ zha shɛ ya gwuma bu ya kwukwuŋ, bụtụ na kaa du n tɛtanɛ-rishe, i'uyɛ zha shɛ yo ilo bu ya kwukwuŋ. 36Ama N hi mbiswo, Ngɛɛ hiɛŋ, Hi n kwụbwa, hi n tɛtanɛ shɛ kaa rishe o. 37Iyi elele keeni atwa elele na Bishi m peni, ɛ zhɛ a zhajɛ pi mi, bụtụ na kaa zhajɛ pi mi, N zha shɛ ma bacɛnga bụ o. 38M beni shi na azuba, maa ma nda ukwulana mu o, semi maa ma nda ukwulana bụtụ na n tumwanɛ. 39Ukwulana bụtụ ata n tumwanɛ ụ shɛ maa kede ma inzhɛnga iyi nɛ bee m peni okwo ike o, semi iwɛ maa mɛ hicinjɛ iŋ hwuŋ nụ ụjita umɛwɛɛ. 40Ukwulana Bishi mi ụ shɛ maa, atwa elele na kwụbɛ Yɛu, a na kaa tɛtanɛ bu rishe, ɛ zhɛ a 'yaga uraiŋ unyizo-nom, N zhɛ mɛ hicinjɛ aŋ hwuŋ nụ ụjita ata umɛwɛɛ.

41Eju ngwulengenji iwɛ Jisus, iwɛnɛ bɛɛ hiɛŋ, Gamba n shɛ iyimɛyɛ ɛtɛ banɛ na azuba. 42Ɛɛ hiɛŋ, Shɛ ubwa maa shɛ ge Jisus yɛu Josɛf ga? Ti mepi kaa bishi bwa, te bino bwa. Gana naa bɛɛ hiɛŋ ya maa na azuba baa banɛɛ?

43Ge Jisus jishijɛ aŋ, bɛɛ hiɛŋ, to ngwulongongo ma ahiɛba hiɛba o. 44I zasa bụtụ be elele na eri bɛ zhɛ pi mi o, semi bụtụ na Bishi na n tumwanɛ mbɛ, nazhɛ Ngɛɛ zhɛ mɛ hicinjɛ bụtụ ata nụ ụjita umɛwɛɛ. 45Egesere 'nywotwo na atakada aba, ɛɛ hiɛŋ, Agwatana zhɛ o mbisogono aŋ iyi kpaaŋ aba. Atwa elele na kaa hwụjɛ iwɛ Bishi, yaa shɛ ee seshi, e ci pi mi.#Ayiz 54:13 46I zasa kaa bụtụ be elele na kwụbwa Bishi o, semi ubwa ata na banɛ no olugwo Agwatana, ubwa kiri kwụbwa Bishi ata. 47Iwɛ-tɛkana Omo hi mbiso maa, Bụtụ be elele na n tɛtanɛ-rishe, asha bi 'yajɛ uraiŋ ata unyizo-nom. 48Gamba n shɛ Iyimɛyɛ ɛtɛ uraiŋ. 49Okwo to ogwunukwoshi hiŋ yɛ la mana ata nụ ụshɛka, ama e 'wi kaa waa. 50Ama iyimɛyɛ gɛ banɛ na azuba i shɛ iwɛ maa bụtụ be elele na yɛ iŋ maa kede 'wo. 51Gamba n shɛ iyimɛyɛ ɛtɛ uumwa, nɛ banɛ na azuba. Yaa shɛ bụtụ be elele yɛ iyimɛyɛ gɛ, bi zhɛ ba ya uraiŋ unyizo-nom. Iyimɛyɛ gɛ Ngɛɛ zhɛ ma pana atwa, ibɛ i shɛ usunda-tu'waba mu, N zhɛ kaa ma pana iŋ iwɛ uraiŋ wa atwa unyizo.

52Eju kwuni ashamanjɛ abaaba, ɛɛ hiɛŋ, Gana naa bụtụ ga eri ma tu pana usunda-tu'waba ubwa maa ta yaa?

53Ge Jisus hiɛŋ aŋ, Iwɛ-tɛkana Omo hi mbiso maa, yaa shɛ ahiɛ yɛ shɛ usunda-tu'waba ti Yɛu Bụtụ, ehi swe shi kaa du mehieŋ mu bwa, asha hi zha shɛ hia 'yaga uraiŋ o. 54Bụtụ na ba ya usunda-tu'waba mu, na kaa ba swa du mehieŋ mi mi, asha bi 'yajɛ uraiŋ unyizo-nom, nazhɛ Ngɛɛ mɛ hicinjɛ bụ nụ ụjita umɛwɛɛ. 55Usunda-tu'waba mu ụ shɛ iyimɛyɛ i tugom, mehieŋ mi mi kaa du mɛ shɛ iyi tuswa i tugom. 56Bụtụ na ba ya usunda-tu'waba mu, na kaa du ba swa mehieŋ mi mi, asha bu namɛ na amɛ mi, Ngaa namɛ kaa du na amɛ ubwa. 57Gana na te Bishi buumwa n tumwanɛ, Ngaa shɛ du buumwa tedure nu ukpahŋ Bishi, gobwonu du bụtụ na n yɛ zhɛ ba sha buumwa tedure nu ukpahiŋ mu. 58Iyimɛyɛ nɛ banɛ na azuba na, shɛ gana na te eshi hiŋ yɛ la mana ee 'wi o, ama bụtụ na ba ya iyimɛyɛ gɛ, bi zhɛ ba nama unyizo-nom. 59Ge Jisus jɛmɛ iwɛ gɛ na aka na tu boo mbisogono atwa iyi nu umwono tu'ulwa nu Kapanaum.

Iwɛ Uraiŋ Unyizo-nom

60Aka na ta atwa ofwugwo na ashashɛ eseshi-iyi Jisus hwụjɛ iwɛ ɛtɛ, ɛɛ hiɛŋ, Iwɛ gɛ 'yajɛ ikɛnyi, gaaba eri ba hwuga iiŋ?

61Ama ti ge Jisus mepi na amɛ ubwa maa eseshi-iyi ubwa o ngwulongongo iwɛ n-ndumwa ma ata, bɛɛ hiɛŋ aŋ, Iwɛ gɛ hŋ ihi gwumanɛ? 62Asha gana naa ɛhi zhɛ hia nda hwuŋ ta ahiɛ kwụbɛ ti Yɛu Bụtụ zhɛ umungwo na azuba no ofwo na baa banɛ laa? 63Mpiala ma Agwatana muba ma pana atwa uraiŋ, ama usunda-tu'waba zasa ule o. N-ndumwa mu ga Ngaa jɛmɛ ne hiŋ mu banɛ na Mpiala ma Agwatana, n-ndumwa ma ata muba kaa ma pana bụtụ uraiŋ. 64Ama atwa oko na ashashɛ hiŋ tɛtanɛ shɛ kaa rishe o. Ge Jisus mepi kaa taa nu umozhigo atwa na tɛtanɛ shɛ bụ rishe, bee mepi kaa du bụtụ na zhɛ ba sangana bu atwa ne tidere. 65Nazhɛ ge Jisus hiɛŋ, Ibɛ po Ngee hi mbishi maa i zasa bụtụ na eri ba zhajɛ pi mi ti yaa shɛ shɛ Bishi kepishingeni bu uhwaŋna o.

66Te kwuni na aka ata atwa ofwugwo na ashashɛ eseshi-iyi Jisus gwuri ne ekwunyi, a 'wa sụ bụ ya o. 67Ge Jisus hiɛŋ eseshi-iyi ubwa umpwa-na-ba-eyebi, Hi zhɛ du hio gwulo ne ekwunyi suu?

68Ga Saimon Pita jishijɛ bụ, bɛɛ hiɛŋ, Agwangwama, no ofwo aba ɛti zhɛ ta zha yaa? Gabụ kaa bi 'yajɛ n-ndumwa mu uraiŋ unyizo-nom.#Mat 16:16; Mak 8:29; Luk 9:20 69Ati tɛtanɛ kaa rishe, eti mepi kaa maa gabụ bɛ shɛ Bụtụ bi Tijilo ba Agwatana.

70Ge Jisus jishijɛ aŋ, bɛɛ hiɛŋ, Shɛ Gamba suu n hi teri ahiɛba eseshi-iyi ga umpwa-na-ba-eyebi? Ama bụtụ bu ko na ashashɛ hŋ kaa shɛ butumwa-bi-ibiri! 71Iwɛ Judas yɛu Saimon Iskariot#6:71 Iskariot: Bụtụ ga eri ba sha bụtụ bu ko na banɛ nụ ụshɛpwụ ata ɛɛ hiɛŋ, Kiriot, geri bu ko nu Judia. Ama egini ibɛ duwa duwa eri a sha bujwe-bu-ụzagwụ, kwo kaa bisenji ba bụtụ ne tidere. kaa baa njɛ, ubwa shɛ bụtụ ata zhɛ ba sanga bu ne tidere, ubwa kaa namɛ na ashashɛ atwa ata umpwa-na-ba-eyebi.

Currently Selected:

JON 6: RBT

Highlight

Copy