UGONDU WA ATUMWA 8

1Go Soul leni na tụkwụna tu na aa kwụnɛ Stivin.

Te kwuni nụ ụjita ata ibɛ tɛshɛka tụ 'wụtụ ti ishɛganɛ tụ'ụlwa-tụ-ụhiɛŋshɛ-Agwangwama tu na tu namɛ nu Jɛrusalɛm. Ibɛ po atɛtanɛ-rishe garatagwụ hwɛɛ aba, ee zhe na cɛnjɛ tu Judia keeni Samaria, semi atumwa kiri vwɛ. 2Nazhɛ etwenyi na meme tileni swooŋ e ni Stivin, a twanɛ bụ u'wo duwa, oo to-ụkwụla iwɛ ubwa.

3Ama go Soul mekeni maa iricingo tụ'ụlwa-tụ-ụhiɛŋshɛ-Agwangwama, boo tonongo shimwono, baa mbata etwenyi ne eyikwo, boo zwono aŋ nu umwono-tishi.#Ugo 22:4,5; 26:9-11

Ge Filip Zhe Samaria, Bee enengeni Aŋ Krast

4Ibɛ po atwa na garatagwụ rinji, ee enenji n-ndumwa ma Agwatana no ofwo elele na ee teni. 5Ge Filip zhe Samaria#8:5 zhe Samaria: Samaria ụ shɛ ụshɛpwu ụ'wụtụ na namɛ na ashashɛ Judia nu Galili, ubwa shɛ uhiu wa ashɛpwụ na cɛnjɛ ta ata. bee enengeni aŋ Krast. 6Aka na ta atwa ofwugwo hwụjɛ n-ndumwa mu na ge Filip ba duma, aa kwụbɛ kaa du arụhwajɛ na baa nda, ibɛ po ee shiyeni shihaŋsa sha aba ni iwɛ nɛ baa duma. 7Iwɛnɛ po mpiala mụ wɛ#8:7 mpiala mụ wɛ: Kwụba ti'eshicigono tu 5:16. ma ugaga duwa, maa bananjɛ na shɛmɛ sha atwa ofwugwo, baa nɛnjɛ du atwa ofwugwo a na tu'waba ta aba tu 'wogeni keeni shigwurukwu shu ofwugwo. 8Ibɛ po atwa ụshɛpwụ ata njɛ unyasa ụ'wụtụ.

Iwɛ Saimon Bɛnjɛ-bi-tishino

9Ama butubwenyi bu ko namba nụ ụshɛpwụ ata, ɛɛ hiɛŋ ga Saimon bɛnjɛ-bi-tishino, na ba dama atwa Samaria, iwɛnɛ tu baa mama njɛ gana bụtụ bu ko bụ 'wụtụ. 10Atwa elele tɛtanɛ iwɛ ubwa rishe, ta miaụŋ, ta atwa a'wụtụ, ɛɛ hiɛŋ, Bụtụ ga ubwa shɛ ukpahiŋ wa Agwatana na ɛɛ hiɛŋ, Una ụ'wụtụ. 11Iwɛnɛ ti yee ilegeji ya tu baa ndana aŋ tishino ta ata, ibɛ po aa tɛtanɛ iwɛ ubwa rishe. 12Ama aka na ta atwa tɛtanɛ i'enenji ya Anabarɛ Ebiye Cɛnjɛ-ta-tugwama ta Agwatana keeni izeci Jisus Krast nɛ ge Filipi ba ananga rishe, aa njɛ aŋ ubaptizim, te etwenyi te eyikwo. 13Ga Saimon du tɛtanɛ-rishe ni ikɛnyi ibwɛ, aa njɛ bu du ubaptizim, baa 'wa ya Filip no ofwo elele. Ama aka na tu baa kwụbɛ iyi tudama keeni arụhwajɛ na ge Filip ba nda, yaa dama bụ.

14Aka na ta atumwa na namɛ nu Jɛrusalɛm hwụjɛ maa Asamaria leshiji n-ndumwa ma Agwatana, aa tumwananɛ aŋ Pita keeni Jon. 15Aka na te e ci apata, aa ndanɛ aŋ adua maa e leshiji Mpiala mi Tijilo. 16Iwɛnɛ po bi ge te zhegeni shi bụtụ be elele na ashashɛ aba o, semi ubaptizim kiri aa njɛ aŋ ni izeci ya Agwangwama Jisus. 17Ibɛ po ee petengeni aŋ i'ɛlɛ ya aba, nazhɛ ee leshiji Mpiala mi Tijilo.

18Aka na tu ga Saimon kwụbɛ maa tedure ni i'ɛlɛ nɛ atumwa petengeni aŋ, ee leshiji Mpiala mi Tijilo, baa shɛkanɛ aŋ ukwuribi, bɛɛ hiɛŋ, 19M peni ma du ụhwada ga, iwɛ maa bụtụ be elele na Ngee peteni i'ɛlɛ mi, maa lashɛga du Mpiala mi Tijilo.

20Ama ga Pita jishijɛ bụ, bɛɛ hiɛŋ, Ga azụrụfa ata bụ njɛ ufwu tu gabụ, iwɛnɛ te ebi heŋshi maa nu ukwuribi aa lashɛga upwaŋ wa Agwatana! 21Bu zasa urobwo we elele ni iwɛ gɛ o, iwɛnɛ ta ahaŋsa bụ zasa kpororo ne eshe Agwatana. 22Jɛshɛrɛga-ahaŋsa maa genji iyi iwɛ ɛtɛ ebi heŋshi, maa tabwa Agwatana, nekeshi ba bu gangana ahaŋsa ga ebi heŋshi. 23N kwụbɛ maa bu ta namɛ na mangayɛ mụ ụgagwụ keeni tijama ti iwɛwɛ. 24Ga Saimon jishijɛ bụ, bɛɛ hiɛŋ, Tabwa ma Agwangwama iwe mi, iwɛ maa kede ijɛ ahiɛ jɛmɛ kezhe nu uhiuhiu mu o.

25Aka na te e le tiseyida, aa jɛmɛ n-ndumwa ma Agwangwama, ee hwuri ujiyo nu Jɛrusalɛm, aa ananga Anabarɛ Ebiye na ashɛpwụ Samaria ofwugwo tɛ ɛ zhɛ.

Ge Filip ni Ivwɛlɛ Itiopia

26Ama butumwa ba Agwangwama ba azuba hiɛŋ Filip, Ishijɛ maa zhe geri bu tuta#8:26 geri bu tuta: Kwo kaa nu uwaŋna tishikoko. tu uhwaŋna ata banɛ nu Jɛrusalɛm zhɛ Gaza. Ugata shɛ uhwaŋna ụshɛka. 27Ge Filip ishijɛ ga bee zhe. Baa kwụbɛ bụtụ ata bi Itiopia na shɛ ivwɛlɛ, na 'yajɛ ụhwada ụ'wụtụ nu ugondu wa Agwuma-o-o Itiopia. Uduciya wa Agwuma ata o o hwɛɛ zweni ni i'ɛlɛ ivwɛlɛ ɛtɛ. Bụtụ ata ge zhe Jɛrusalɛm maa zhɛba Agwatana. 28Ti bee ci ya ujiyo, baa jɛjɛ nụ ụhaŋtụ ubwa ụ cɛnjɛ, baa rɛta utakada bigesere ga Ayizaya. 29Ibɛ po Mpiala mi Tijilo mi hiɛŋ Filip, Zhaga dongonu ụhaŋtụ ata maa zhagaga nu bwa.

30Ge Filip gezhiji ga, bee zhe apata, baa hwụjɛ tu baa rɛta utakada bigesere ga Ayizaya. Ge Filip heŋteni bu, bɛɛ hiɛŋ, Bi eshiciji hŋ ijɛ aba rɛta?

31Nazhɛ bụtụ ata bu ụhwada jishijɛ Filip, bɛɛ hiɛŋ, Gana naa Nge eri mo eshicigo ti yaa shɛ bụtụ be elele n eshicigeni shii? Ibɛ po baa lụpɛ Filip maa ge munje maa gɛga nu bwa. 32Upada Utakada Iwɛ ya Agwatana na baa rɛta hiɛŋ,

E zeriji bu gana na aa zarɛga yɛu-ụgwụdụ no ofwo na

ɛɛ zhɛ a shɛla bụ,

gana na ti yɛu-ụgwụdụ ya sha igwureni ni i'ɛlɛ bụtụ na ba

hwaga tihiŋzhe tu bwa,

bu dumanɛ shɛ iwɛ ye elele o.#Ayiz 53:7,8

33A lacɛ maa a jɛmɛ ụshɛrɛya ubwa ne tishiriri, iwɛnɛ

ti bee meme zucinje.

Gaaba zhɛ ba imanjɛ ajalalo ubwaa?

Iwɛnɛ te e becinji uraiŋ ubwa nu unyizo.#Ayiz 53:7,8

34Nazhɛ ivwɛlɛ ɛtɛ heŋteni Filip, bɛɛ hiɛŋ, M mbishi ka iwɛ bụtụ na bigesere ga ba duma. Iwɛ ikɛnyi ibwɛ suu, okwo iwɛ binya bụtụ?

35Nazhɛ ge Filip kwuni n-ndumwa mu bwa tụdụma te kwune na shɛwala shi Iwɛ ya Agwatana ata, bee enengeni bu iwɛ Jisus.

36Gana na ta a zha tahaŋnụ ta aba, ee ci meni mu ko, ibɛ ivwɛlɛ ɛtɛ hiɛŋ Filip, kwụba, meni na. Imbe kwuŋ zhɛ ma n kapana ubaptizim tɛndaa?

37[Ge Filip jishijɛ bụ, bɛɛ hiɛŋ, Yaa shɛ abu tɛtanɛ-rishe na amɛ bu hwɛɛ, ɛ zhɛ ma bu nda. Ivwɛlɛ ɛtɛ jishijɛ bụ, bɛɛ hiɛŋ, N tɛtanɛ kaa rishe maa ge Jisus Krast ubwa shɛ Yɛu ya Agwatana.]#8:37 Ge Jisus Krast ubwa shɛ Yɛu ya Agwatana: Tɛhɛshɛrɛga tu ufwugwo tu zasa bwala ga bu 37.

38Ibɛ po ivwɛlɛ ɛtɛ peni-unu maa ge shikicinji ụhaŋtụ ata. Ee zwi ne meni ebeyebi, ti ge Filip, ti ivwɛlɛ ɛtɛ, ge Filip njɛ bụ ubaptizim. 39Aka na ta a banɛ ne meni, Mpiala ma Agwangwama mi shepi Filip, ivwɛlɛ ɛtɛ kwụbɛ shɛ bụ ya kwukwuŋ. Ama ivwɛlɛ ɛtɛ tuba to tuhwulo ta tahaŋnụ tu bwa nu unyasa. 40Ama a kwụbɛ Filip na Azotos, tu boo dulogo ashɛpwụ elele baa ananga Anabarɛ Ebiye tutu bee ci Sɛsɛria.

Currently Selected:

UGONDU WA ATUMWA 8: RBT

Highlight

Copy