UGONDU WA ATUMWA 2

Tizhajɛ tu Mpiala mi Tijilo

1Aka na tu ụjita Pɛntɛkost#2:1 ụjita Pɛntɛkost: Eju a nda isene gɛ, ee teyinje aka na te e peni aŋ la undwa Moses. Aa njɛ isene Tɛkashɛka yaa namɛ ijitɛ dupu, asha Pɛntɛkost i ci. ci, atɛtanɛ-rishe ụlwatagwụ kpaaŋ aba no ofwo oko.#Liv 23:15-21; Undwa 16:9-11 2Eshigiri rundu ru banɛ na azuba gana uvwugo ụ'wụtụ na wo vwungo ofwo, wee shini umwono ata aa jɛjɛ hwɛɛ. 3Aa kwụbɛ iyi ike nɛ sụbɛ irɛtu ulwa, yoo mburusonu geri geri, yaa patanɛ bụtụ bụtụ na ashashɛ aba hwɛɛ.

4Ibɛ po Mpiala mi Tijilo mi shini shɛmɛ sha aba kpaaŋ, ee kwuni n-ndumwa tụdụma na rɛjɛmɛ ru tuswoswoswo#2:4 rɛjɛmɛ ru tuswoswoswo: Tɛjɛshɛrɛga tu ufwugwo ti hiɛŋ irɛtu. Yaa shɛ shɛ ni Iwɛ ya Agwatana ga, Bubassa eshiciji shi la iyi nɛ ɛɛ hiɛŋ irɛtu ti yaa shɛ bụtụ ba duma n-ndumwa na rɛjɛmɛ ri nya ru na bụtụ eshiciji shi o. gana na tu Mpiala ma ata mi peni aŋ maa a jɛmɛ.

5Na aka ata Eju na namɛ nu Jɛrusalɛm, keeni atwa elele na bananjɛ na cɛnjɛ ti nya te elele nu unyizo a na kaa a zhɛba Agwatana gom a namba apata. 6Aka na ta a hwụjɛ rundu ra ata, aa ụlwatagwụ, e eshiciji shi kaa iyi nɛ teni o, iwɛnɛ ta bụtụ bụtụ na ashashɛ aba hwụjɛ ta a duma rɛjɛmɛ ru bwa. 7Yaa dama aŋ kpaaŋ aba, ɛɛ hiɛŋ, Atwa Galili na kaa a dumanga n-ndumwa mu ga kpaaŋ aba. 8Gana naa yee cimi ya maa bụtụ bụtụ tu ba hwuga ya rɛjɛmɛ ru tuu? 9Ta atwa Patia, ta atwa Mɛdia, ta atwa Ilam, ta atwa na namɛ nu Mɛsopotemia, ta atwa Judia, ta atwa Kapadosia, ta atwa Pontus, na atwa Esia, 10ta atwa Firigia, ta atwa Pamfilia, ta atwa Ijipti, keeni atwa na namɛ geri bi Libia na gwumwongonu nu Saireni, keeni agaiŋ na banɛ nu Rom, 11te Eju keeni atwa na shɛ shɛ Eju, a na teni Tiju, ta atwa Krete keeni atwa Arabia, tụ hwụjɛ ta a duma rɛjɛmɛ ru tu iwɛ ugondu ukpahiŋ na Agwatana njɛ. 12Ibɛ po yaa dama aŋ kpaaŋ aba, oo momo hoŋtongonu, ɛɛ hiɛŋ, Imbe shɛ gana ga yaa?

13Ama atwa oko a nda atɛtanɛ ata rishe asada, ɛɛ hiɛŋ, Mayaga ma ngba aŋ.

N-ndumwa mu na ga Pita Enenji

14Ama ga Pita ishijɛ bee shikeni medenji eseshi-iyi ata umpwa-nu-boo-ko, bee shepi rụhwụŋ na azuba, bɛɛ hiɛŋ aŋ, Ahiɛba atwa Judia keeni atwa elele na namɛ nu Jɛrusalɛm, shɛlaga ma n-ndumwa mi mi, maa hi mepi ecilo ijɛ. 15Shɛ mayaga atwa ga swe gana na ehi heŋshi o, hwuwayɛ go ta shɛ ogogo ecinjishi nu uvwungwa go. 16Ama inɛ gɛ i shɛ tisɛ te tigesere tu na go Joɛl jɛmɛ la, bɛɛ hiɛŋ,

17Gana yɛɛ zhɛ ya sha hwuŋ nụ ụjita umɛwɛɛ na,

maa N zhɛ mo dudugono bụtụ be elele Mpiala mi mi,

nazhɛ miaụŋ mi hiŋ me eyi, na miaụŋ mi hiŋ mo o mi zhɛ ma duma tigesere,

esemberi hiŋ zhɛ na kwụba shizobu,

atwa hiŋ na inganjɛ zhɛ no wotogono awalabụ.#Joɛl 2:28-32

18Iiŋ, N zhɛ mo dudugono miaụŋ-mu-ugondu mu me eyi keeni

mu na mo o Mpiala mi mi, nazhɛ ɛɛ zhɛ a duma tigesere.

19Nazhɛ Ngɛɛ zhɛ Ma nda arụhwajɛ na azuba,

keeni iyi tudama nu unyizo ga.

Hi zhɛ hia kwụba mehieŋ, nu ulwa,

keeni uzhikwozhikwo nshikwo.

20Uwaŋna zha shɛ wa ta o,

upiana zhɛ wa sha gana mehieŋ,

nazhɛ ụjita ata wa Agwangwama u ci.

Ụjita ata kaa zhɛ wa sha ụjita ụrụhwajɛ ụ'wụtụ.

21Bụtụ be elele na kaa ba suyana izeci ya Agwangwama,

ubwa zhɛ bo bino.#Joɛl 2:28-32

22Ahiɛba atwa Isrɛl, shɛlaga ma iwɛ gɛ! Ge Jisus bụtụ ata bu Nazarɛt, na Agwatana menji baa kwụbɛ maa ubwa teni cɛŋ, maa nda ugondu ukpahiŋ, keeni arụhwajɛ keeni iyi tudama, inɛɛ nɛ Agwatana njɛ na ashashɛ hiŋ tedure nu bwa, gana na du te ehi mepi. 23Bụtụ gatata ehi shepi ehi peni atwa, gana na ta Agwatana imwangwa iŋ, bee mepi iŋ cala, ubwa ehi shepi ehi peni ogworozwo#2:23 ogworozwo: Kwo kaa atwa na zasa undwa kwo kaa atwa na untanganɛ shɛ undwa. Aba shɛ atwa na shɛ shɛ Eju. oo to bu nrɛ nụ ụ'wụ'wụ-ubatanɛ aa kwụnɛ.#Mat 27:35; Mak 15:24; Luk 23:33; Jon 19:18 24Ama Agwatana kaa hicinjɛ bụ, bɛɛ vwɛ bu no tu'wo ta ata tụ ụngwụ ụ'wụtụ tuhwuga, iwɛnɛ tu ukpahiŋ tu'wo eri shi wa untangana bụ.#Mat 28:5,6; Mak 16:6; Luk 24:5 25Ge Devid dumwa la iwɛ ubwa, bɛɛ hiɛŋ,

Ma kwụba Agwangwama nu umbe mu aka elele,

Iwɛnɛ tu baa namɛ ne mi, i zasa iyi zhɛ mo n horukono ohwulu o.#Shɛzu 16:8-11

26Iwɛbɛ po amɛ mi lemi tebiye, Ama bwada kaa unyasa nu n-ndumwa; Ama nda ya ashɛlatụ.

27Iwɛnɛ ta abu zha shɛ bu ma n ganga ne e'uye,

bi zha shɛ kaa bo lono maa bụtụ bụ bi tijilo fwoshi o.

28Gabụ bɛ njɛ maa Ma mapa ihwɛŋnɛ

nɛ ya zarɛga bụtụ nu uraiŋ,

tunama na agba bụ, ti zhɛ tu mo n shidingo nu unyasa.

29A-miaụŋ-mo-bino mi, N zhɛ mo hi mbiso iwɛ ugwunukwoshi tu ge Devid kpataa, maa bu 'wi, ee ni bu, u'uye ubwa te shikeni ba pu tu taa hwayɛ. 30Iwɛnɛ ti ge Devid shɛ la bigesere, ibɛ po bee mepi maa Agwatana shileni bu unu tebiye maa, Agwatana zhɛ a pana hwuŋ bụtụ bu ko tugwama na amɛ umwamwa ubwa.#2 Sam 7:12,13; Shɛzu 132:11 31Aka na ti ge Devid kwụbɛ iŋ, baa jɛmɛ iwɛ tihiɛ tu Krast, bɛɛ hiɛŋ,

E genji shi bu ne e'uye o,

tu'waba tu bwa kaa tu fwoshi shi o.

32Ge Jisus gatata Agwatana hicinjɛ gom, atuba kaa tɛ shɛ eseyida tihiɛ tu bwa. 33Ibɛ po Agwatana shepi bu, bee shikicinji geri bu u'ala ubiye ubwa. Ge Jisus leshiji Mpiala mi Tijilo mu na Bishi bwa shilwo la unu muba. Ge Jisus kaa du utu dudugeni Mpiala ma ata, ibɛ po ijɛ ahia kwụba keeni inɛɛ nɛ ahia hwuga hwayɛ ga. 34Ama okwo ti ge Devid munji shi na azuba, bɛ jɛmɛ kaa bɛɛ hiɛŋ,

Agwangwama, mbishi Agwangwama mi, bɛɛ hiɛŋ,

Gɛga geri bu u'ala ubiye mu, #Shɛzu 110:1 35uuwa i ci aka na Ngaa njɛ atwa i'ime bu ụdụsa wɛ ɛvwɛvwɛjɛ mi tupatangana.

36Ibɛ po ahiɛba atwa Isrɛl hwɛɛ, mapa ma maa Agwatana shopwo Jisus ata ehi to la nu ubatanɛ, baa nduwa bu Agwangwama keeni Krast.

37Aka na ta atwa ata hwụjɛ iwɛ ɛtɛ, yee vwunji shɛmɛ sha aba tebiye, ee heŋteni Pita keeni atumwa vwɛ, ɛɛ hiɛŋ, A-miaụŋ-mo-bino tu, Imbe atɛ shɛ ta ndaa?

38Nazhɛ ga Pita jishijɛ aŋ, bɛɛ hiɛŋ, Jɛshɛrɛga ma shihaŋsa shi hiŋ, maa a njɛ bụtụ bụtụ hiŋ ubaptizim ni izeci Jisus Krast, maa e hi gengeni iwɛwɛ hiŋ. Nazhɛ Agwatana zhɛ ma hi pana Mpiala mi Tijilo upwaŋ. 39Ahiɛba kaa ee shileni la unu ga, ta miaụŋ mi hiŋ, ta atwa elele na dụlụmanjɛ, keeni atwa elele na Agwangwama na shɛ Agwatana tu ba suyana no ofwo ubwa.

40Ga Pita tɛtaganɛ aŋ unu nu n-ndumwa mi nya mu ufwugwo, baa uranjɛ aŋ, bɛɛ hiɛŋ, Meme bicinji ma nu ulwapɛ na we teni atwa ga awɛ. 41Nazhɛ aa njɛ atwa na le n-ndumwa mu bwa ubaptizim, ibɛ po ee gwushiji atwa na keeni aŋ ufwugwo jita ata gana atwa ugbaa-uko-na-akpakwụ-a-ta. 42Nazhɛ atwa ata untanganɛ iyi nɛ atumwa o mbisogono aŋ kpekee, keeni ikpɛngwu-tutwa, ni iyimɛyɛ tiya zhiaaŋ#2:42 iyimɛyɛ tiya zhiaaŋ: Kwo kaa a yɛ iyimɛyɛ zhiaaŋ, aa njɛ titeyinje ta Agwangwama. keeni adua tɛnda.

Gana na Araiŋ Atwa na Tɛtanɛ-rishe Namɛ La

43Atumwa njɛ iyi ya arụhwajɛ keeni iyi tudama ifwugwo, ibɛ po inyɛsɛ shɛ atwa elele. 44Atwa elele na tɛtanɛ-rishe namɛ urubwo uko hwɛɛ aba, oo gbodongonu iyi elele nɛ bụtụ bụtụ 'yajɛ hwɛɛ aba.#Ugo 4:32-35 45E senji iyi elele nɛ aa 'yajɛ, ti i'wɛŋnɛ ya aba, nazhɛ aa pana bụtụ bụtụ iyi gana na tu ukekeshi ibɛ wa nda bụ. 46A uranjɛ tu'ụlwatagwụ nu Umwono wa Agwatana iyi-heri iyi-heri, aa ya iyimɛyɛ nu nhwaŋ ma aba, a ya iŋ nu unyasa keeni amɛ tụrụmbɛɛ. 47A shɛtana Agwatana, atwa elele o lubo aŋ. Agwangwama a kaana aŋ atwa na o bino iyi-heri iyi-heri.

Currently Selected:

UGONDU WA ATUMWA 2: RBT

Highlight

Copy