Mélékusu 16
16
Yésusu a á húmé naá gɛbɛ́lá
(Mot 28.1-8; Lók 24.1-11; Sáŋ 20.1)
1Aŋa buisí bá sábadɛ bó mbaá dómbá, Malɛ́a ba Magadaláa, Malɛ́a nnyeedíi ba Sáakɛ, tɔ́nɔ na Salóma, gáábɔ́ go ɔ́ndɔ megúdé má go fofa go go ɛ́da fúenene gigúe gá Yésusu na má. 2Na gɛyɛ́nɛ́ gá buisí bá busío bá gɛanyɛ, hɔ́ɔlɔ́ buisí bó báa go bála, gáábɔ́ go ɛ́da naá gɛbɛ́lá. 3Bá mba lɛ́ bá bágálɛnagalɛna bá amɔ́: «Ánɛ́ɛ a gaá ná có tíŋgílídínyée ɛdánɛ́ nɛ́ɛnɛ naá nyuudé ná gɛbɛ́lá o?» 4Kanɛ́ aŋa bá mbaá yíkéné, gáábɔ́ go ɛ́na goŋaá gɛantá gá ɛdánɛ́ moánɛ gɛ́ mba lɛ́ tíŋgílídíelú go boayá. 5Gɔ́ɔ bí íŋenemú naá gɛbɛ́lá, go huenye ohaŋa ba mɔtɔ na gɛla gimmúmpúu ndukíi naá boayá bá ombɔ́gɔ onɔ́mɛ bá gɛbɛ́lá, bá báa lɛ gó bɛa bofoá. 6Ohaŋa ba mɔtɔ mɔ́ɔyɔ go bó oyana a amɔ́: «No do bɛáa bofoá; no fúmbemú Yésusu ba Násalɛdɛ, mɔ́ɔnyɔ bá mbaá giléné naá kolósi; a á fúfúgé, a dɛ báá háalá. Ɛ́ná nɔnɔ, hoóma háaha bá mbaá mo bídígínyée háháa. 7Ɛ́dá nɔnɔ godɔ́ɔdɔ no oyana behúúní bɛ́hɛ́ na Píele no amɔ́: “A á dóánáná go go ɛ́da nyó gɛ́gana naá Gelilée; hɔ́ɔ háa no ná mo ɛ́namɔ́, aŋa a mbaá nyó oyáná”.» 8Bakɔ́dɔ go húme na odɛ́dá bá bɛ́ɛ́ ɛ́dá halaháláa na gɛbɛ́lá, goakɛ́ bá mba lɛ́ bá dagadana, nciŋí ɛ báá bó yíméné. Kanɛ́ bá dɛ mbó oyana mɔtɔ boóma goakɛ́ bá mba lɛ́ na bofoá.
Yésusu ɛ ɛ́ ɛ́nɛ́gɛ́ná Malɛ́a ba Magadaláa
[9Aŋa Yésusu a mbaá fufúgé na gɛyɛ́nɛ́ gá buisí bá busío bá gɛanyɛ, gɛ́hɛ́ go dóana go bédúfie gá Malɛ́a ba Magadaláa mɔ́ɔnyɔ Yésusu a mbaá gúné bɛgáda bá biliíli bɛ́táanɔ na bɛ́andɛ́ naá nnyɔ́dɔ yɛhɛ́. 10Malɛ́a go ɛ́da go oyana batɔ báaba bá mbaá lɛ na Yésusu. Bɔ́ɔbɔ moánɛ bá mba lɛ́ go nigúe, bá baŋa. 11Kanɛ́ aŋa bá mbɔɔ́ ɔ́bɔ́ okɔ́dɔ o oya a amɔ́ Yésusu a lɛ́ ogɔ́sɔ, mɔ́ɔ a báa mo ɛ́na, bá báá lɛ gó inye go mo oliminyo.
Yésusu ɛ ɛ́ ɛ́nɛ́gɛ́ná behúúní bɛ́hɛ́
12Naá nnyimé hɔ́ɔlɔ́ Yésusu go bédúfie go behúúní báandɛ́ báaba bá mbaá lɛ bɛ́ ɛ́dana naá nnyimé ya gɛdɔŋɔ. A mbaá ŋá a báa go núgie maloŋa mɛ́hɛ́. 13Behúúní báandɛ́ bɔ́ɔbɔ bá nco gundene na nnyimé, bá báa lɛ gó oyana báaba bóntió goŋaá bɔ́ɔ bá bɛ́ɛ ɛ́na Yésusu. Akɛ́ nɔ́ɔnɔ moánɛ, bɔ́ɔbɔ bá báá gɔnɔ́ go inye go oliminyo.
14Naá gosúgudinye, Yésusu go bédúfie naá Bɛɔdɔ́ɔ na gímmue bá behúúní bɛ́hɛ́ gɛcamɛna gɛ́ɛgɛ bá mbaá lɛ bá nyáanya. Gɛ́hɛ́ go ɛ́da go bó áncana goŋaá bá dɛ mbáa lɛ bá ágana odɛ́má yábɔ́ naá Asaŋa, a bó áncana gɔnɔ́ go gɛlalaga gábɔ́ gá odɛ́má gɔ́ɔgɔ bá mbaá lɛ bá dɛ olímínyóo batɔ báaba bá mbaá mo ɛ́ná a báá go fúfuge. 15Gɔ́ɔ Yésusu o oyanamɔ́ behúúní bɛ́hɛ́ a amɔ́: «Ɛ́dánáa nɔnɔ naá cí iŋkimée, no dúmenye Gɛnɔ́gɔ́ gá Cɔ́mɔ gá Asaŋa go batɔ biimée#16.15 O bana, go eninye na Meŋ 1.8.. 16Mɔtɔ uŋkimée mɔ́ɔnyɔ a ŋgo olímínyóo Gɛnɔ́gɔ́ gá Cɔ́mɔ gɛ́ɛgɛ a gunde a béyuminye, a ŋga bɛáa gisódio. Kanɛ́ mɔ́ɔnyɔ a ŋgi inyé go gɛ́ oliminyo, a ŋgá bɛáa noséésényée. 17Bɛsɛɔ bɛ́ɛbɛ batɔ báaba bá ŋgoó olímínyóo bá ŋgaá ŋánánáa go ufíno yámɛ bɛ́bɛ́ɛ: bá ŋga gúnée bɛgáda bá biliíli; bá ŋga gálágáláa bɛpáa bá dogálɔ bɛ́ɛbɛ bá mbaá lɔmɔ́ bá dɛ íyíménée cóá; 18bá ŋga gumbénénée nnyɔ́gɔ kɔ́sɔ; bá amɔ́ bá bónyo ɛlɔgɔ, hɛ́ dɛ ŋgá bó ŋa boóma; bá ŋga dálánáa bɔgɔnɔ́gɔnɔ ɛmbɔ́gɔ bé éŋugene.»
Yésusu a á gundé naá boayá bá Isée
19Naá nnyimé ya Daadáa Yésusu go gálagala nɔ́ɔnɔ, Asaŋa go mo gɔ́lɔ naá mmoɛná, a báá mo lukúményée naá undukí yá bugúmigumi naá boayá bá ombɔ́gɔ onɔ́mɛ yɛ́hɛ́#16.19 Meŋ 1.9-11.. 20Gɔ́ɔ behúúní bɛ́hɛ́ bɛ́ ɛ́damɔ́ go dúmenye Gɛnɔ́gɔ́ gá Cɔ́mɔ go bɛdɔŋɔ biimée. Daadáa a mba lɛ́ a bó óhigonyo naá buelí bábɔ́, a gɔnɔ gíndenye Nogálɔ na bɛsɛɔ bɛ́ɛbɛ bá mbaá lɛ́ bá ŋanana go go dúfie goŋaá nó lɛ́ mammana.]
Currently Selected:
Mélékusu 16: YAS
Highlight
Share
Copy
Want to have your highlights saved across all your devices? Sign up or sign in
