Lókasɛ 4
4
Ohándá a gogona Yésusu
(Mot 4.1-11; Mél 1.12-13)
1Gɔ́ɔ Yésusu, dácɛ na Gimmúmpúu gá Giliíli, u úlukiemú naá máŋɛ́ má Yɔlɔdɛ́ŋɛ. Giliíli go mo gɔ́gɛdɔ naá giolóo gá bodɛ́agadɛ́. 2Kɔ́ɔ a ŋamɔ́ hɔ́ɔ medúgú otíno áhandɛ́, ohándá a mo gogona.
Medúgú mɔ́ɔmɔ miimée a dɛ mbáa lɛ a nyáanya. Kanɛ́ aŋa má mbaá maná, gɛ́hɛ́ go bɛa ncaná. 3Ohándá go mo oyana a amɔ́: «Aáŋa#4.3 Aáŋa : gokikilidie gúncoó gó lɔ́mɔ́ (háalá tɔ́nɔ na naá gig 9.) Aŋa o lɔ́mɔ́ moɔnɔ́… ba Asaŋa o lɛ́ Moɔnɔ́ ba Asaŋa, gálɛ́da ɛdánɛ́ nɛ́ɛnɛ, nɛ́ ɛ́ya boóma bá go nyáa.» 4Yésusu go mo gundie a amɔ́: «Bó lɛ́ ɔ́ŋɔ́ɔlú goŋaá: “Caá goana go manyáanya gɔ́ɔ mɔtɔ ɔ ɔyɔmɔ́#4.4 Bicele 8.3.”.» 5Gɔ́ɔ ohándá a bólɛgamɔ́ nɛhɛ́ naá mmoɛná gúunú, go mo dúfie mefuŋe má cí miimée go moɔnɔ́ ba gɛcamɛna, 6gɛ́hɛ́ go mo oyana a amɔ́: «Kaá go íŋéné nɛgaŋa niimée nɛ́ɛnɛ na nigúmi ná mefuŋe máama; muimée mó ɔ́bɔnɛnɔmɔ́ námɛ, ndɛ́ ba go fáá akɛ́ ánɛ́ɛ mɔ́ɔnyɔ ndɛ́galɛgamɔ́. 7Go amɔ́ o mbúlugie, o gaá bɛáa muimée.» 8Yésusu go mo gundie a amɔ́: «Bó lɛ́ ɔ́ŋɔ́ɔlú goŋaá: “Búlúgényée Daadáa Asaŋa bahɔ, o mo yɔgɔnɛnɔ mɔ́ɔ mokáa#4.8 Bicele 8.3.”.» 9Gɔ́ɔ ohándá ɛ ɛ́damɔ́ nɛhɛ́ naá Yolósalɛmɛ, go mo búlugie naá tóndi ya Nnyaŋá ya Asaŋa, a amɔ́ gɛ́hɛ́ a amɔ́: «Aáŋa o lɛ́ Moɔnɔ́ ba Asaŋa mammana, bécuméemú go cí, goakɛ́ bó lɛ́ ɔ́ŋɔ́ɔlú goŋaá: 10“A ŋgi íŋéné bɛɛ́ŋgɛlɛsɛ bɛ́hɛ́ bogaaga, bá go beŋebeŋe”; 11gɔnɔ́ “bá go nɛ́hanɛha na ɛmbɔ́gɔ yabɔ́, gɛgɔ́ndɔ́ gáhɔ gɛ́ dɛ kúkéné ɛdánɛ́#4.11 go gig 10-11: Ɛsagɔ 91.11-12.”.» 12Yésusu go mo gundie a amɔ́: «Bó lɛ́ ɔ́ŋɔ́ɔlú goŋaá: “O do ná gogona Daadáa Asaŋa bahɔ#4.12 Bicele 6.16.”.» 13Aŋa ohándá a mbaá ŋá a báa go gogona Yésusu pɛ́ iŋkimée nɔ́ɔnɔ a dɛ mo bɛáa, gɛ́hɛ́ go mo síe, a báá dómbá go go gɛ́gana oŋɛndɔ yúncodío#4.13 oŋɛndɔ yúncodío : gokikilidie gúncoó gɔ́ lɔ́mɔ́ gɛcamɛna gɛ́ɛgɛ gɛ́ mbaá lɛ dílímínyéelú..
Yésusu a á bayɛ́gá buelí naá Gelilée
(Mot 4.12-17; Mél 1.14-15)
14Gɔ́ɔ Yésusu a gundemú naá Gelilée dácɛ na bogaaga bá Gimmúmpúu gá Giliíli. Ufíno yɛ́hɛ́ go saa naá gigísi ga cí moánɛ giimée. 15A mba lɛ́ a húunenye naá nnyaŋá sá mbósógólí, batɔ biimée bó oya nigúmi nɛ́hɛ́.
Batɔ bí í inyé go oliminyo gohúunenye gá Yésusu naá Násalɛdɛ
(Mot 13.54-58; Mél 6.1-6)
16Yésusu ɛ ɛ́ ɛ́dá naá Násalɛdɛ anáa a mbaá gomá, gɛ́hɛ́ go íŋene naá nnyaŋá ya mbósógólí go buisí bá sábadɛ, bó mbaá lɛ naá caŋa yɛ́hɛ́. Gɔ́ɔ a fadɛgɛnamɔ́ go go bana. 17Gáábɔ́ go mo íŋene kálata ya mbúsí ya Asaŋa Iseyíi, go yɛ fulune, go ɛ́na hoóma háaha há mbaá lɔ́mɔ́ ɔ́ŋɔ́ɔlú goŋaá:
18«Giliíli ba Daadáa a lɛ́ naá yɔmɔ́ɔ,
goakɛ́ a mba ŋgiyídé
goŋaá mbóó oyánɛ́náa basógasoga Gɛnɔ́gɔ́ gá Cɔ́mɔ.
A mba tómá goŋaá ŋgoyanɛna ŋkólío gosúduge gáábɔ́,
begélígeli bɛ́ ɛ́nanɛna,
báaba bá lɔ́mɔ́ naá noséésényée bá súdugene,
19kunde tóogonyo nnyómá yɛ́ɛyɛ Daadáa a ná dúfiemú niibo nɛ́hɛ́#4.19 Iseyíi 61.1-2..»
20Gɛ́hɛ́ go máŋa kálata, a báá gundínyée uyogóní, mɔ́ɔ go lukumene; batɔ biimée báaba bá mbaá lɔmɔ́ naá nnyaŋá ya mbósógólí go mo ágɛna oŋgíso. 21Gɔ́ɔ ɛ ɛ́damɔ́ go bó oyanɛna a amɔ́: «Nogálɔ ná Ŋgɔ́ŋɛ́ nɔ́ɔnɔ nó ɔ́bɔmɔ́ nɔ́ɔnɔ nó á bóhóógío ínoni yɛ́ɛyɛ.» 22Batɔ biimée bá mba lɛ́ bá mo lɛ́ɛma, bá békúke biseyi bá dogálɔ#4.22 biseyi bá dogálɔ gokikilidie gúncoó gó lɔ́mɔ́ cɔ́mɔ ya niibo. bɛ́ɛbɛ a mbaá lɔmɔ́ a gálagala. Gáábɔ́ go ɛ́da go búúhene bá amɔ́: «Ábɔ caá ohaŋa ba Yósɛbɛ mɔ́nyɔ́ɔ o?» 23Yésusu go bó oyana a amɔ́: «Mammana, nó gaá ŋgágɛ́ná ncaba yá ŋaá: “Ugóódíníní, bééŋúgíemú maamɔ́ɔ moatɛ́ moatɛ”. Dɛ lɛ́ ɔ́bɔ́nɔ́ ɔ́bɔ́nɔ́ buimée bɔ́ɔbɔ go á ná ŋanánáa naá Kapɛlɛnahɔ́mɛ, ŋaáa ɔbɔ moánɛ tɔ́nɔ naá gɛdɔŋɔ gáhɔ háalá.» 24Gɛ́hɛ́ go ɛ́da na dogálɔ naá busío a amɔ́: «Ŋgaá nyó oyáná mammana caá, bá dɛ gɔ́lɔ́nɔ́ɔ mbúsí ya Asaŋa bese naá gɛdɔŋɔ gɛ́hɛ́ gá mbíényée.
25Mammana, ŋgaá nyó oyáná goŋaá,
naá medúgú má Elíi, mbúsí ya Asaŋa, bisí bá bakɔ́dɔ bɛ́ mba lɛ́ makɔ́nɔ́ naá cí yá Ɛ́sɛlahɛ́ɛlɛ,
aŋa dobólá dó mbaá ŋaáa nnyómá ɛ́dadɔ́ na gigísi dó do naáa,
gó báá ŋaáa goŋaá gɛantá gá uncíli gɛ́ oba naá gɛdɔŋɔ giimée#4.25 Go ɛ́na naá 1 Mefuŋe 17.1.;
26kanɛ́ akɛ́ nɔ́ɔnɔ, Asaŋa a dɛ mbá bóso go dóma Elíi naá gisí gá okɔ́dɔ gímmue gɛ́ɛgɛ naá Ɛ́sɛlahɛ́ɛlɛ,
kanɛ́ goana naá gisí gá okɔ́dɔ gɛ́ɛgɛ naá Salabɛ́ta,
naá gɛdɔŋɔ gá Sídono#4.26 Go ɛ́na tɔ́nɔ naá 1 Mefuŋe 17.8-16..
27Bekúnúkunu makɔ́nɔ́ bá mba lɛ́ naá Ɛ́sɛlahɛ́ɛlɛ naá gɛcamɛna gá mbúsí ya Asaŋa Elisée;
kanɛ́ akɛ́ ummue naá bɔ́ɔ a dɛ mbé éŋuge,
gó do dómbáa goana Naamáana ba gɛdɔŋɔ gá Silíi#4.27 Go ɛ́na 2 Mefuŋe 5.1-14..»
28Batɔ biimée báaba bá mbaá lɛ naá nnyaŋá ya mbósógólí gáábɔ́ go ɔ́bɔ mpímí makɔ́nɔ́ aŋa bá mbɔɔ́ ɔ́bɔ́ boóma moánɛ. 29Gɔ́ɔ bá dúmbiemú go fadɛgana, bá báá mo hémíe naá tɛ́sɔnɔ. Go ɛ́da nɛhɛ́ naá hoóma háaha há mbaá lɛ há yóŋkimidono, anáa tɛ́sɔnɔ yabɔ́ ɛ mbaá lɛ fóágáalú, goŋaá bá mo dídige a nco go oba gɛmbádáa. 30Kanɛ́ mɔ́ɔ, go bó sɔlɔmɛdɛnɔ, a báá dómbá.
Yésusu a húunenye na nɛgaŋa niimée naá Kapɛlɛnahɔ́mɛ
(Mot 7.28-29; Mél 1.21-28)
31Yésusu go ɛ́da naá Kapɛlɛnahɔ́mɛ, tɛ́sɔnɔ ya Gelilée mmue, a mba lɛ́ a húunenye batɔ buisí bá sábadɛ. 32Bá mba lɛ́ na bibékúkí na mbɔ́dɔ yɛhɛ́ ya go húunenye, goakɛ́ dogálɔ dɛ́hɛ́ dó mba lɛ́ na nɛgaŋa niimée. 33Mɔtɔ ba gɛgáda gá giliíli go bɛ́ɛmba hɔ́ɔ naá nnyaŋá ya mbósógólí. Gɛ́hɛ́ go áncɛda ukelú naá mmoɛná a amɔ́: 34«Nɛɛ́nɛ, Yésusu ba Násalɛdɛ, ɛkádɛ o fúmbemú nɛcɔ́ o? O lɔ́mɔ́ úléelú go go nco có fúugie lí? Ŋgíyimene ánɛ́ɛ o lɔ́mɔ́: o lɔ́mɔ́ Gimmúmpúu mɔ́ɔnyɔ Asaŋa a mbaá dómá.» 35Yésusu go áncɛdɛna gɛgáda gá giliíli gɛ́ɛgɔ a báá gɛ́ gálɛ́dá a amɔ́: «Buíge nyuudé, o húme naá mɔtɔ mɔ́ɔnyɔ!» Gɛgáda gá giliíli go dómba go góba mɔtɔ mɔ́ɔnyɔ go cí naá kadɛ́gadɛ́ɛ yabɔ́, gɛ́ báá húmé naá mɔ́ nnyɔ́dɔ kanɛ go mo ŋa boóma bá gɛbɛ́. 36Gɛantá gá bofoá go gɔ́lɔ batɔ biimée báaba bá mbaá lɛ hɔ́ɔ, gáábɔ́ go ɛ́da go bágálɛnagalɛna bá amɔ́: «Mbɔ́dɔ ya nogálɔ ɛhanɛ́ yɛ́yɛ́ɛ náana o? Mɔtɔ mɔ́ɔnyɔ a gálagala na nɛgaŋa gɔnɔ́ na bogaaga, bɛgáda bá biliíli bɛ́ húmene!» 37Ufíno yɛ́hɛ́ go dómba go saa hoóma hiimée naá gigísi gá cí gɛ́ɛgɔ.
Gɛca gá biéŋugie
(Mot 8.14-17; Mél 1.29-34)
38Aŋa Yésusu a mbaá hémé naá nnyaŋá ya mbósógólí, gɛ́hɛ́ go ɛ́da naá nnyaŋá ya Símono. Nnyeedíi ba ogánɛ́ Símono a mbaá ŋa a báá go bólɛga nnyɔ́dɔ makɔ́nɔ́. Gáábɔ́ go mo bósógolidio goŋaá a mo éŋugie. 39Yésusu go mo báyɛkɛna, go áncɛdɛna gobólɛga gá nnyɔ́dɔ na bogaaga, gó báá dómbá go mo dɛ́ɛna. Hɔ́ɔ na hɔ́ɔ, okɔ́dɔ mɔ́ɔnyɔ go fadɛgɛna, go ɛ́da go bó ala. 40Na kɛnca buisí#4.40 Go ɛ́na naá Mél 1.32 na gibélincígínyé gɛ́ɛgɛ hɔ́ɔ., batɔ biimée báaba bá mbaá lɛ na bɔgɔnɔ́gɔnɔ mbɔ́dɔ mbɔ́dɔ go mo úlenine nabɔ́. Gɛ́hɛ́ go bó dálana ɛmbɔ́gɔ ummue go ummue a báá bó éŋúgényée. 41Bɛgáda bá biliíli tɔ́nɔ bɛ́ mba héménée naá batɔ gɛca, bɛ́ ɛ́da bɛ́ ánca bɛ́ amɔ́: «O lɛ́ Moɔnɔ́ ba Asaŋa!» Kanɛ́ mɔ́ɔ a lɛ go ɛ́da go bɛ́ lɔsɛnɔnɔ na bogaaga goŋaá bɛ́ dɛ gálágáláa, goakɛ́ bɛ́ mba lɛ́ bɛ́ íyimene bɛ́ amɔ́ a lɛ́ Mesíi.
Yésusu u ú úlúkíe naá Kapɛlɛnahɔ́mɛ
(Mot 4.23; Mél 1.35-39)
42Aŋa buisí bó mbaá bálá, Yésusu go húme, a bɛ́ɛ́ ɛ́dá naá giolóo gá hoóma. Bitúu bitúu bá batɔ go ɛ́da go mo fúmbe. Kanɛ́ aŋa bá mbɛɛ́ ɛ́dá mo gíde, gáábɔ́ go ɛ́da go fúmbe goŋaá a lukumene nabɔ́, a dɛ bó síé a dɛ dómbá. 43Kanɛ́ Yésusu go bó oyana a amɔ́: «Cɛmɛganana go dúmenye Gɛnɔ́gɔ́ gá Cɔ́mɔ gá Bufuŋe bá Asaŋa naá tɛ́sɔnɔ sɛ́ɛsɛ síncodío tɔ́nɔ: mammana, Asaŋa a lɔ́mɔ́ tómáalú go busío moánɛ.» 44Yésusu go ɛ́da o oya Gɛnɔ́gɔ́ gá Cɔ́mɔ naá nnyaŋá sá mbósógólí sɛ́ɛsɛ naá Yudée.
Currently Selected:
Lókasɛ 4: YAS
Highlight
Share
Copy
Want to have your highlights saved across all your devices? Sign up or sign in
