Mə́líkusu 16

Nɛhɔŋɔa nɛ́ Yə́susu

(Mat 28.1-8; Lúk 24.1-12; Yɔh 20.1-10)

1Ɛnaka Sábatɛ yɛ́ tɔ́mbá, Malɛ́á wa Mákátala, Malɛ́á á inyə́ yɛ Yákɔbɔ na Salomə́ bá ná mɔfɔfɔ má bunumbə ɔ́ndɔ́kɔ́ ɛlɔ́áyɛ́ umimə wɔ́ Yə́susu ufofiə. 2Ɛsɔ́mbalɛ́ ɔ buɔsɛ́ bɔ́ indílí, bá ná ákáná ɔ munyə́, ɔsanɔ́ wɔ́ nɔ́ fáma. 3Bá bɛ́bataka bá sɛ́á: «Ɛ́yánɛ́ a ndɔ bəsú muɔkɔ nyɛkakɛnɛna ɔwá wɔ́ lɛ́á ɔ nifínínə́ nɛ́ munyə́ əə́?» 4Bá məə́sə bə́líə́, bá ná muɔkɔ yámá ɔwá wɔ́ ná báá mɔŋɛ́ŋa bákɛ́átɔ́ ɔ ɛmɛ́ŋɛ́ yɛ nifínínə́ nɛ́ munyə́. 5Ɛnaka bá fínə́ ɔ munyə́, bá ná ɛnɔ́kɔ́nɔkɔ yɛ́ mɔndɔ yámá tuənə́tɔ́ ɔ bɛnɔ́mɛ, a ka bá lɛŋábákátɔ́ na maŋgɔmba manaŋanaŋa, bɔkɔ́lɔ́ma bɔ́ ná bəə́bu itíə́. 6Mba, a ná bəə́bu lɛ́na a sɛ́á: «Nɔ lɛ kɔ́lɔ́má bɔ́ányɛ! Nɔ́ ndɔ Yə́susu wa Násalɛtɛ siə ɔwá bá ná ɔ́mɔ́kɛ́na ɔ ɔmbásá, a ná hɔŋɔ́á, a lɛ báá háha; nɔ́ ɛbɔ́ka siəlínə ɔyɛ́á bá ná wɛɛ́ya bɛ́lɛ́na. 7Mba, nɔ́ ákáná nɔ́ ká báyɛ́á bɔkɔ́nɛna na Bíə́lə lɛ́na ɔwá, a ndɔ bənú táta ɔ Kalɛ́lɛa ɔmɔ́tɔ́yɛ́ nɔ́ ndɔ wɛɛ́ya siəkinə ɛ́sɛ́á a ná bənú lɛ́na.»#16.7 Nɔ́ siəlínə́ tɔ́na ɔ bɛsalɛ 14.28. 8Bá ná fámá, bá ná tɛbákɛ́ná hata na munyə́ bɔkɔasɛ́á, bá ka báá bá ndɔ ndandɛma na bɔkɔ́lɔ́ma. Bá sa mɔndɔ lɛna ata bɔkɔa bɔkɔasɛ́á bá ka báá na bɔkɔ́lɔ́ma.

Yə́susu a nɔ́ bínə́niə á Malɛ́á Mákátala

(Mat 28.9-10; Yɔh 20.11-18)

9Yə́susu a ka hɔŋɔa ɔ nyɛmbɛ́ siísíə́ yɛ buɔsɛ́ bɔ́ indílí, a ka taŋa ɔ ubínə́niə á Malɛ́á wa Mákátala, ɔwá a ná imbúínyi mɛbɛ́á ɛ́lɛ́ndɔ́lɔ́mɔnɔ bulə́kə. 10Wɔ́ɔwɔ muəndú a ná ákáná ɔ báyɛ́ ɔkalɛ́na ɔbá bá ná báá na wɛɛ́ya ɔ buwə́ə́ na malɛlá. 11Mba, bá sa luminə ikúílí bá ná ɔ́kɔ́ a ndɔ laa a sɛ́á: «Yə́susu a lɛa muɔmɔ́, mɛ ná wɛɛ́ya siəkínə».

Yə́susu a nɔ́ bínə́niə ɔ bɔkɔ́nɛna báfandɛ́

(Lúk 24.13-35)

12Əlimə yɛ nɔ́yɛ́, Yə́susu a ná bínə́níə́ ɔ báfandɛ́ ətíə́ yɛ báyɛ́á bɔkɔ́nɛna ɔ nindínə́ ninə́ninə́. Bátáyɛ́ bɔkɔ́nɛna bá ka báá ɔ ɔwákaka ɔ əlimə yɛ bɔnɔŋɔ. 13Ɛnaka bá kə́tílə́, bá ná bɔsɔ́kɔ́ bɔkɔ́nɛna nɛ́táyɛ́ nibínuəniə bíkə́tə́kíníə́, mba, bá sa luminə ɔ yatɛ́ ɔyɛ́á bá ná bəə́bu lakɛ́na.

Yə́susu a nɔ́ bínə́niə ɔ niómo na ɔmɔtɛ́

14Ɔ nitifə́, Yə́susu a ná bínə́níə́ ɔ niómo na ɔmɔtɛ́, ikúílí bá ná báá ɔ ɔnɛ́á, a ná bəə́bu hɛkɔma lúmə́ ɛlɔ́áyɛ́ yə́búə́ mɛnyɔ́ na yə́búə́ mɛlɛ́má natákátɔ́ bɔkɔasɛ́á, bá sa níə́búə́ nɛkɔmba tálɛ́na ɔ bááyɛ́ ɔbá bá ná wɛɛ́ya siəkínə́ muɔmɔ́. 15A ná bəə́bu lɛ́na a sɛ́á: «Nɔ́ ákáná ɔ misí mikimə ɛlɔ́áyɛ́ Imbə́nú Yɛɛsɛ ɔnɔŋɔnɛna ɔ mɔsá mɔndɔ mukimə. 16Wɛ́ɛ́yɛ́ ɔwá a ŋɔ lumininə, á nɛsɔa kusə́nə, bá ŋɔ wɛɛ́ya nuəkəniə, ɔwá a sɔ́ ŋɔ lumininə, bá ŋɔ wɛɛ́ya hɔkɛna. 17Ɔ́ tubílíndíníə́ tɔ́ɔtɔ tɔ́ ŋɔ bá ɔ baáyɛ́ ɔbá bá ŋɔ lumininə: Ɔwámɛ niínyə, bá ŋɔ imbúínyi mɛbɛ́á buləkə, bá ŋɔ mohókí mɔɔ́sɔ hɔ́ɔ́kɔ, 18bá ŋɔ miáhɔ halɛakɛna na makátá, ábá bá ná hɛlɔkɔ nyáá, hɛ́ sa ndá bəə́bu bɔbɛ́á kɛa, bá ŋɔ bɛnákɛnákɛ makátá tálákɛna, báaba bá ŋɔ niŋəkə.»

Yə́susu a nɔ́ tilə á Huɛlɛ́ ɛmɛ́ŋɛ́

(Lúk 24.50-53; Bɛn 1.9-11)

19Ɛnaka á hɔ́á ɔ uwəbú ɔhɛ́na nɔ́yɛ́, Huɛlɛ́ a ná Isə́lúkú á Yə́susu hɔalɛ́nána ɔ nɔɔ́mɛná, a ná tuə́nə ɔwayɛ́ mɔkátá wɔ́ bɛnɔ́mɛ. 20Bɔkɔ́nɛna bá ná ákáka ɔ bɛbɔ́ka ɔbánɔ́ bikimə ɔ Imbə́nú Yɛɛsɛ ɔnɔŋɔna. Isə́lúkú a ka bá a ndɔ bəə́bu ɔ́lɔ ɔ bɔ́táyɛ́ buolí, a taká yɛ níə́búə́ nɛnɔŋɔna ónókiniə na tɔŋgɛtɛ́nɛ́á tɔ́ yələ́mənə ɔtɔ́á tɔ́ ná bá tɔ́ ndɔ nɛɛ́ta ɔŋgɔ.

Currently Selected:

Mə́líkusu 16: tvu

Highlight

Copy