Lúkasɛ Nifínínə́
Nifínínə́
Lúkasɛ a ka tuəfulə tiləkə na injiŋə yɛ Umbúínyi Mɔnaŋanaŋa. A ka báá ɛmɔ́ɛ́nɛ́, ɛŋgɔ́áyɛ́ tɔ́na yɛ Báwolo. Lúkasɛ a sa báá Mɔyútɛnɛ mbá ata mɔsɔ́másɔma wa Yə́susu, a sa ayɛ́ Yə́susu sinə ɛ́sɛ́á a ná níŋə́kə. Ata nɔ́yɛ́, a ka siəkə, a ná tilə́kə́ ɛ́sɛ́á Yə́susu a ná nɔ́mɔ́kɔ ɔkɛaka ɔwá, a yayɛ́á ɛŋgɔ́áyɛ́ á Tiofíli ínə́níə́ nəníə́ bɛkɔa bɛ́ ná bɛtɔmbaka. (Tɔ lɛ ndɔ yɛ́táyɛ́ Tiofíli manya)
Ɔ́ ɛlɔ́áyɛ́ nɔ́yɛ́ a ná bɛndɔ batáka, a ná bɛkɔa tíbə́kíníə́ muɛsɛ muɛsɛ uwəbú ɔbá bá ná buɔmɔ́ bɔ́ Yə́susu siəkínə. (1.1-4). Lúkasɛ a ka siəkə ɔwá, a bɛndɔ bɛkɔa bɛ́ nibotólíníə́ nɛ́ ilumininə nífúnə́kínə, bááyɛ́ tɔ́na ɔbá bá ndɔ níə́búə́ nɛkɔmba tálɛ́na á Yə́susu Kilísitusu. Ɔ́ ɛlɔ́áyɛ́ nɔ́yɛ́ a ná tuəfulə tilə́kə́ tɔ́fandɛ́: Imbə́nú Yɛɛsɛ na Hiəfulə hɛ́ bɛnyɛná bɛ́ basɔ́másɔma. A ka síə́kə́ tɔ́na ɔ bɛndɔ uwinə́niə ɔwá, á Yə́susu a lɛ́á Munuəniə wa bɛndɔ, wa bɛndɔ bəkimə, a lɛ tɛ́fá ata ɔmɔtɛ́.
Ikúílí ɔyɛ́á ɔ ndɔ híihí hiəfulə hɛ́ Lúkasɛ fana ɔhɛ́á a ná tílə́kə, bɔkɔa búbúsíə́ ɔbɔ́á ɔ ndɔ fanaka: Nibíbíə́nə nɛ́ Yə́susu á Mɔná wa Huɛlɛ́ (2.6-7), bɔ́áyɛ́á bɔlɔ́matɔ́ na bisə́mə́tə́ ɔbɛ́á a ná kɛ́áka, yayɛ́á nyɛmbɛ́ (23.33) na nɛ́áyɛ́á nɛbálaka ɔ Nɔɔ́mɛná (24.50-51). Bɛkɔa bikimə bɛ́ lɛa tilə́kə́tɔ́ tɔ́na ɔmɔ́tɔ́yɛ́. Tɔ́ láá tɔ sɛ́á buɔmɔ́ bukimə bɔ́ Yə́susu bɔ́ lɛa tilə́kə́tɔ́ háha ɔ híihi hiəfulə nuúmə́.
Bɛkɛ́tɛ bɛ́ ɔnjɔmɔ bɛ́ híihi hiəfulə
Náana bɛkɔa bɛ́ híihí hiəfulə bɛ́ lɛ́á tɛ́kɛ́nátɔ
Nibíbíə́nə na bɔlɔ́matɔ́ bɔ́ Yə́susu (1–2).
Nɛsɔa na mɔkɔ́lɛna má Yə́susu (3–4; 13).
Buolí bɔ́ Yə́susu ɔ misí yɛ Kalɛ́lɛa (4.9-14, 17).
Mɔkɛnda wɔ́ Yə́susu ɔ ɔwákaka ɔ Yəlúsalɛma (9.18-19, 28).
Buolí bɔ́ Yə́susu ɔ Yəlúsalɛma (19.29-21, 38).
Mɔɔsɛ́ má məsə́kə má buɔmɔ́ bɔ́ Yə́susu (22–23).
7. Nɛhɔŋɔa nɛ́ Yə́susu (24).
Currently Selected:
Lúkasɛ Nifínínə́: tvu
Highlight
Share
Copy
Want to have your highlights saved across all your devices? Sign up or sign in
© 2019, CABTAL