Lúkasɛ 1
1
Ɛfɛka yɛ́ mutilə
1Á ifəyí á Tiofíli, bɛndɔ bəəŋí bá ka ɛŋana tiləkə yɛ́ bɛkɔa ɔbɛ́á bɛ́ ná tɔ́mbáká ɔ uwəsú ətíə́. Bá ná bɛɛ́ta túmbə́lə́kə́níə́. 2Ɔwɔŋgɔkɔnɔ yatɛ́ ɔyɛ́á bəmbóŋímboŋi bá taká ɔ nɛbalɛ́ná bá ná bəsú lákɛ́na, bá ná híáná bəyəmbələniə bá Ɛtambá yɛ́ Huɛlɛ́. 3Ɛlɔ́áyɛ́ nɔ́yɛ́, mɛaŋɔ́á tɔ́na mɛ ka tíbə́kiniə muɛsɛ muɛsɛ bɛkɔa bikimə ɔbɛ́á bɛ́ ná tɔ́mbáká ɔ bibotólíníə́; isíŋáka mɛ ná bɛtɛ́nɛ́mɛ́ná ɛ́tá ɔ ɔwáwɔ ɔŋana wɔ́ bátaká utilinə, 4ɔkɛaka ɔ sɛ́á ɔ́ manyá ɔwá ɔ ka bilə́líə́ bɛ́ ɔ́nɔ́kɛ́nátɔ́ kusənə.
Áŋgɛlɛ a ndɔ nibíbíə́nə nɛ́ Yɔhánɛsɛ Mɔsɔabɛndɔ mənyəsiə
5Ɔ mɔɔsɛ́ ɔmá Əlóto a ná bámɛ́nɛ́ná munəni ɔ bɔnɔŋɔ bɔ́ Bɛyútɛnɛ, mutitiəmahánɛna ɔmɔtɛ́ a ka báá ɔmɔ́tɔ́yɛ́, nɛ́áyɛ́á niínyə á Sakalɛ́á, a ka báá wa ilúkunə yɛ́ bətitiəmahánɛna yɛ Ábia, wayɛ́á muəndú, nɛ́áyɛ́á niínyə á Ilísabɛtɛ, a ka báá wa hikúlə hɛ́ Álɔnɔ. 6Ɔ busíə́ bɔ́ Huɛlɛ́, Sakalɛ́á na muənyí bá ka báá bátaká bá wɛɛ́ya ɔ́kɔ́kɛnɛna. Bá kɛndakɛna tɔ́na ɔ imbə́ndə́ yɛ Isə́lúkú. 7Mba, bá sa bá na mɔná bɔkɔasɛ́á, Ilísabɛtɛ a ka bá ɛlɛla, bəə́bu bəkimə tɔ́na lunə́tɔ́. 8Buɔsɛ́ bɔ́mɔtɛ́, Sakalɛ́á a ka báá ɔ ɔwayɛ́ bɔsɔ́ma ɔ ɛbɔ́ka yɛnaŋanaŋa bɔkɔasɛ́á, yáyɛ́á ilúkunə yɛ́ ná báá na bɔsɔ́ma ɔ yɛ́táyɛ́ ikúílí. 9Ɛ́sɛ́á ɛnɛ́ma yɛ́ bətitiəmahánɛna, bá ka bá bá ndɔ mɔndɔ tɛ́fa ufíə́kinə ɔ bɔlɔ utitiə ɔ ɛbɔ́ka yɛnaŋanaŋa yɛ́ Isə́lúkú. Ɔ bɔ́táyɛ́ buɔsɛ́, ɔ ɔwayɛ́ bá ná tɛ́fá ɔ bɔlɔ utitiə. 10Ikúílí ɔyɛ́á a ná báá ɔ bɔlɔ utitiə, ilúkunə yikimə yɛ́ bɛndɔ bá ka báá ɔ mabɛ́kálɛ́na ɔ niə́lətíə́. 11Sakalɛ́á a ná yɛ́ɛ́yɛ́ ikúílí áŋgɛlɛ yɛ Isə́lúkú yámá tɛ́nɛ́mátɔ́ ɔ ɛsalɛ yɛ́ bɛnɔ́mɛ yɛ́ niɔlɔ nɛ́ mahánɛna má bɔlɔ utitiə. 12Ɛnaka á wɛɛ́ya ɛ́ná, a ná sakɛ́mɛ́la, bɔkɔ́lɔ́ma bɔ́ ná wɛɛ́ya itíə́. 13Mba, áŋgɛlɛ a ná wɛɛ́ya lɛ́na a sɛ́á: «Á Sakalɛ́a, ɔ lɛ kɔ́lɔ́má bɔ́ányɛ bɔkɔasɛ́á, Huɛlɛ́ a ná máwɔ́á mabɛ́kálɛ́na ɔkɔ, wawɔ́á muəndú á Ilísabɛtɛ a ŋɔ aŋɔ́á mɔná mɛlɛ́mɛndɔ́ bíə́ninə ɔwá ɔ ŋɔ lɔaka á Yɔhánɛsɛ. 14Ɔ ŋɔ bá úndúə́tɔ́ na nɛhɔnɔ, bɛndɔ bəəŋí bá ŋɔ bílə́nə́kə ɛlɔ́áyɛ́ nɛ́áyɛ́á nibíbíə́nə. 15Ɔ taká a ŋɔ báá mɔŋɛ́ŋa ɔ busíə́ bɔ́ Isə́lúkú. A sa ndá məluku nyɛna, ata mɔ́mɔtɛ́ məluku má uhíólosoniə. Ubusíə́ ɔbɔ́á a bíbíə́nə́, a ŋɔ báá úndúə́tɔ́ na Umbúínyi Mɔnaŋanaŋa. 16A ŋɔ bɛndɔ bəəŋí bá Ísilahɛ́lɛ húlə́kənə ɔ busíə́ bɔ́ Isə́lúkú ɔ yəbúə́ Huɛlɛ́. 17A ŋɔ ndasá ɛ́sɛ́á mɔsɔ́másɔma wa Huɛlɛ́ na Umbúínyi na injiŋə yɛ mɔhɛ́nátɔtányɛ́ á Ɛlíásɛ. Wawɔ́á mɔná a ŋɔ bumbə́nú hákɛna ətíə́ yɛ bisə́ na bə́búə́ baná. A ŋɔ mɔlɛ́má wɔ́ bááyɛ́ kɔ́ŋɔ́na ɔbá bá lɛ ndɔ Huɛlɛ́ ɔ́kɛ́na ɔ ɛmanya yɛ bɛndɔ bátaká, a ŋɔ ilúkunə tábɔ́naka ɔyɛ́á yɛ́ ŋɔ bá ɔ bɛtáta ɛlɔ́áyɛ́ Isə́lúkú.»
18Sakalɛ́á a sɛ́á: «Yatɛ́ hɛŋgɛtɛ́nɛ́á hɛ́ ndɔ mɛaŋɔ́á ínə́niə ɔwá nɔ́yɛ́ lɛa taká əə́? Ɔ́ mɛaŋɔ́á wɔ́ɔwɔ lunə́tɔ, wamɛ́á muəndú tɔ́na yɔ́kɔ́bɔ́nɔ́tɔ.» 19Áŋgɛlɛ a sɛ́á: «Mɛaŋɔ́á Kábɛlɛ́á, mɛ lɛa bikúílí bikimə á Huɛlɛ́ busíə́ ɔwayɛ́ ɔ ɔnyɛna; a ná mɛaŋɔ́á lɔ́má a sɛ́á mɛ́ ndá aŋɔ́á hɔ́kɛ́na, mɛ́ aŋɔ́á yɛ́táná Imbə́nú Yɛɛsɛ húlə́nínə. 20Mba, ɔ sá bɛ́ámɛ́á bɛtambá lumininə ɔbɛ́á Huɛlɛ́ a ŋɔ úndúsiniə ɔ ɔwayɛ́ ikúílí. Ɛlɔ́áyɛ́ nɔ́yɛ́ ɛkasɛ ɔ híáná imúkú, ɔ sɔ́ ŋɔ hɔ́ɔ tɔ́na ɔkafámáká ɔ hinó ɔhɛ́á Huɛlɛ́ a ŋɔ bɛ́táyɛ́ bɛkɔa úndúsiniə.»
21Ɔ yɛ́ɛ́yɛ́ ikúílí yikimə, ilúkunə yɛ́ bɛndɔ yɛ́ ka bá yɛ́ ndɔ Sakalɛ́á táta, bá ka ə́lə́mənə ɛ́sɛ́á a ná túə́nə́ ikúílí yɛtatánɛ ɔ nuúmə́ yɛ́ ɛbɔ́ka yɛnaŋanaŋa. 22Mba ikúílí a ná fámá, a sa óso ɔ uwəbú ɔhɛ́na, ɛlɔ́áyɛ́ nɔ́yɛ́, bɛndɔ bá ná manyá ɔwá, a ná bɔkɔa bɔ́ isə́mə́tə́ síə́kínə ɔ ɛbɔ́ka yɛnaŋanaŋa, a ka bá a ndɔ bəə́bu hɛ́na na makátá, a ka tuənə tɔ́na imúkú.
23Əlimə yɛ tunó tɔ́ nitifə́ tɔ́ bɔ́áyɛ́á bɔsɔ́ma uwundúsiniə, Sakalɛ́á a ná úlúə́ ɔ ɔwayɛ́ ɔmbɛ́la. 24Ɛnaka bɛ́táyɛ́ bɛkɔa bɛ́ tɔ́mbáká, Ilísabɛtɛ ɔ wayɛ́á muəndú, a ná nifumə ɛta. A ná bítímə́ ɔ məə́sə má bɛndɔ miilí ɛ́lánɔ, a sɛ́á: 25«Siəkínə́nu yatɛ́ ɔyɛ́á Isə́lúkú a ná kɛ́áka ɛlɔ́áyɛ́ ámɛ, a ná hikə́kíə́ ɔ ɔwámɛ ɔsɔ́ŋɔ́na, isíŋáka a ná mɛaŋɔ́á ɛsɛ́má húlə́kíə́ ɔ busíə́ bɔ́ bɛndɔ, ɔwámɛ ɔwá mɛ ná bámɛ́nɛ́ná ɛlɛla yɛ́ muəndú.»
Nɛnɔŋɔna nɛ́ nibíbíə́nə nɛ́ Yə́susu
26Əlimə yɛ miilí ɛ́lɛ́ndálɔ yɛ́ nifumə nɛ́ Ilísabɛtɛ, Huɛlɛ́ a ná Áŋgɛlɛ Kábɛlɛ́á lɔ́má ɔ bətínə́ yɛ Násalɛtɛ ɔ misí yɛ́ Kalɛ́lɛa. 27A ná wɛɛ́ya lɔ́má ɔ busíə́ bɔ́ ɔmɔ́la muəndú ɔmɔtɛ́ nɛ́áyɛ́á niínyə á Malɛ́á, a ka báá ɛkɔŋɛna yɛ́ Yɔ́sɛbɛ. Ɔwá a ná báá wa hikúlə hɛ́ munəni á Ndə́witi. 28Áŋgɛlɛ a ná káfámá ɔ ɛbɔ́ka ɔyɛ́á Malɛ́á a ná báá tuənə́tɔ́, a ná wɛɛ́ya lɛ́na a sɛ́á: «Bílə́nə́kə, ɔ lɛa úndúə́tɔ́ na nyɔnɔ, Isə́lúkú a lɛa na aŋɔ́á.»
29Əlimə yɛ bɛ́táyɛ́ bɛtambá, Malɛ́á a ná sakɛ́mála, a ná botólíə́ ɔ ɔbɛ́bata a sɛ́á: «Yatɛ́ ɛnya yɛ məbíhóloniə máama əə́?» 30Áŋgɛlɛ a sɛ́á: «Á Malɛ́á, ɔ lɛ kɔ́lɔ́má ata bɔkɔa bɔkɔasɛ́á, Huɛlɛ́ a ka aŋɔ́á bɔ́áyɛ́á buɛsɛ ínə́niə. 31Siəlínə ɛkasɛ ɔ ɛ́mɛla, ɔ ŋɔ mɔná mɛlɛ́mɛndɔ́ bíə́nə ɔwá ɔ ŋɔ niínyə lɔaka á Yə́susu. 32A ŋɔ bá mɔndɔ mɔŋɛ́ŋa, bá ŋɔ wɛɛ́ya ɛ́lɛakɛnɛna Mɔná wa Huɛlɛ́ yɛ nɔɔ́mɛná. Isə́lúkú á Huɛlɛ́ a ŋɔ wɛɛ́ya hikómo hɛ́ yayɛ́á isə́kínə́ á Ndə́witi índiə. 33A ŋɔ miímə yɛ Yákɔbɔ manakɛna ɔ tɔɛya na tɔɛya, nɛ́áyɛ́á nɛmanɛna nɛ́ sa ndáhɔa.»
34Malɛ́á a ná áŋgɛlɛ batá a sɛ́á: «Nəníə́ nɔ́yɛ́ yɛ́ ŋɔ bɛ́kɛaka əə́? Ɔ taká, mɛ lɛ ndɔ balɛ́mɛndɔ́ manya.» 35Áŋgɛlɛ a sɛ́á: «Umbúínyi Mɔnaŋanaŋa wɔ́ ŋɔ ndasá na aŋɔ́á, injiŋə yɛ Huɛlɛ́ yɛ nɔɔ́mɛná yɛ́ ŋɔ aŋɔ́á húə́ na yayɛ́á ihúə́húə́; ɛlɔ́áyɛ́ nɔ́yɛ́, wɛ́ɛ́yɛ́ ɔwá a ŋɔ bíbíə́nə, a ŋɔ báá mɔnaŋanaŋa, bá ŋɔ wɛɛ́ya ɛ́lɛakɛnɛna Mɔná wa Huɛlɛ́. 36Ɔ́kɔ́kɛ́na, nɛ́áwɔ́á nikúlə á Ilísabɛtɛ wɛɛ́ya tɔ́na a lɛa ɛ́mɛ́látɔ́ ɔ ɔwayɛ́ bulunú. Ɔwayɛ́ ɔwá bá ná bá bá ndɔ ɛ́lɛnɛna bá sɛ́á ɛlɛla yɛ́ muəndú, a lɛa na nifumə nɛ́ miilí ɛ́lɛ́ndálɔ, 37ɔ taká, ata bɔkɔa bɔ́mɔtɛ́ bɔ́ lɛ ndɔ Huɛlɛ́ yáyɛ́na.» 38Ɔ yɛ́ɛ́yɛ́ ikúílí, Malɛ́á a sɛ́á: «Mɛ lɛa mɔnyɛna wa Isə́lúkú, Huɛlɛ́ á kɛ́áká bikimə ɛ́sɛ́á ɔ ná laa.» Áŋgɛlɛ a ná ákána, a ná wɛɛ́ya tikə.
Malɛ́á a nɔ́ ákáná á Ilísabɛtɛ ɔmbɛ́la
39Ɔ tunó ɔtɔ́á tɔ́ ná ɔ́ŋgɔ́nɔ, Malɛ́á a ná mɔkɛnda ɛtá tɔfá ɔ bálaka ɔ ɛmáá ɔ yɛmɔtɛ́ bətínə́ ɔ misí yɛ Yútɛa. 40Ɛnaka a fínə á Sakalɛ́á miímə, a ná Ilísabɛtɛ bíhólíə́. 41Ikúílí ɔyɛ́á a ná məbíhóloniə má Malɛ́á ɔ́kɔ́, mɔná a ná sakɛ́mála ɔ ɔwayɛ́ tɔna. Umbúínyi Mɔnaŋanaŋa wɔ́ ná fínə́ ɔ ɔwayɛ́ mɛɛ́lɔ. 42A ná yə́mə́ na nióni nɛŋɛ́ŋa a sɛ́á: «Huɛlɛ́ aŋɔ́á lɛa sanátɔ́ yáyɛ́ná bəəndú bəkimə, hɛtámátámá tɔ́na ɔhɛ́á hɛ́ lɛ́á ɔ ɔwáwɔ tɔna hɛ́ lɛa sanátɔ. 43Mɛaŋɔ́á ɛ́yánɛ́ ɔkɛaka ɔwá, inyə́ yɛ yamɛ́á Isə́lúkú a ndásá ɔ ɔwámɛ ɔmbɛ́la əə́? 44Siəlínə, ikúílí mɛ ná bɛ́áwɔ́á bɛtambá bɛ́ məbíhóloniə ɔ́kɔ́, mɔná ɔwá a lɛ́á ɔ ɔwámɛ tɔna, a ná sakɛ́málá na nɛhɔnɔ. 45Ɔ lɛa na nyɔnɔ; ɛ́ɛ! Ɔ ka lumininə ɔ bɛkɔa bikimə ɔbɛ́á á Isə́lúkú a ná aŋɔ́á lákɛ́na, bɛ́ ŋɔ bíúndúsiniə.»
Bɔŋana bɔ́ Malɛ́á
46Malɛ́á a ná yɛ́ɛ́yɛ́ ikúílí láá a sɛ́á:
«Híə́míə́ hɛtányɛ́ hɛ́ ndɔ bɔŋɛ́ŋa bɔ́ Isə́lúkú nyama.
47Wə́míə́ mɔlɛ́má wɔ́ lɛa úndúə́tɔ́ na nɛhɔnɔ ɛlɔ́áyɛ́ Huɛlɛ́ ɔ wamɛ́á Munuəniə,
48bɔkɔasɛ́á a ka mɛaŋɔ́á bɛ́kɔ́lɔmɔna, ɔwámɛ ɔwá mɛ lɛ́á wayɛ́á mɔnyɛna mɔtɛ́tɛ́á. Ɛ́ɛ! Ɔ botolokiə isíŋáka, bɛndɔ bá tɔɛya tukimə bá ŋɔ mɛaŋɔ́á ɛ́lɛakɛnɛna wa bɛnyɔnɔ,
49bɔkɔasɛ́á Huɛlɛ́ yɛ injiŋə yikimə, a ka bɛkɔa bɛ́ yələ́mənə kɛaka ɛlɔ́áyɛ́ ámɛ, nɛ́áyɛ́á niínyə nɛ́ lɛa nɛnaŋanaŋa.
50A lɛa na iwə́mɛɛ́lɔ ɔ tɔɛya na tɔɛya ɛlɔ́áyɛ́ bááyɛ́ ɔbá bá ndɔ wɛɛ́ya kɔ́lɔ́ma.
51A ka bɛkɔa bɛŋɛ́ŋa kɛaka na iŋgínə́ yɛ́ wə́yíə́ mɔkátá, a ná bɛndɔ bá mɔlɛ́má wɔ́ nɛfama yosíə́.
52A ka bənəni kuəsəkiə ɔ uwəbú tukómo, mba, a ná bá mɛlɛ́má tɔmbɔ́kɔ́tɔ́ húə́líníə́.
53A ka bá mɛtaná íyə́səkiə na bɛɛ́la bɛɛsɛ, a ná bambiaŋɛ bulə́kə́ makátá ndəmə.
54A ka ndasá ɔ ilúkunə yɛ́ Ísilahɛ́lɛ ɔwɔ́lɔ ɔ wayɛ́á mɔnyɛna, á sa fəliə ɔ wə́yíə́ mɔlɛ́má muɛsɛ uwinə́niə.
55Ɛlɔ́áyɛ́ Ábɛlaháma na yayɛ́á ɛndɛkɛ, ɛ́sɛ́á a ná bílíhə́níə́ ɔ bíə́súə́ bisə́kínə́ ɔ bikúílí bikimə.»
56Malɛ́á a ka tuənəkinə na Ilísabɛtɛ hoóyi na miilí ɛ́lálɔ́, əlimə yɛ nɔ́yɛ́, a ná tilə́ ɔ ɔwayɛ́ ɔmbɛ́la.
Nibíbíə́nə nɛ́ Yɔhánɛsɛ Mɔsɔabɛndɔ
57Ɛnaka ikúílí yɛ́ ndáfámá ɔyɛ́á Ilísabɛtɛ a ná hɔ́ánána ubíə́nə, a ná mɔná mɛlɛ́mɛndɔ́ biənə. 58Bɛndɔ bá mamɛ́ŋɛ́ na bɛláŋa bɛ́ nɛ́áyɛ́á nikúlə, bá ná ɔ́kɔ́ bá sɛ́á, Isə́lúkú a ná wɛɛ́ya hɛŋgɛtɛ́nɛ́á hɛ́ bɔ́áyɛ́á buɛsɛ ínə́níə́, bá ná botólíə́ ɔ ubílə́nə na wɛɛ́ya. 59Ikúílí tunó tɔ́námanɛ́ tɔ́ ná ndáfámá, bɛndɔ bá ná ndásákɔ́na ɔ nɛbíánda nɛ́ mɔná, bá ka siəkə ɔ ɔwayɛ́ uwíndiə á niínyə nɛ́ yayɛ́á isə́ á Sakalɛ́á. 60Mba, yayɛ́á inyə́ a sɛ́á: «Bá ŋɔ wɛɛ́ya ɛ́lɛakɛnɛna á Yɔhánɛsɛ.» 61Bá ná wɛɛ́ya bíhíə́níníə́ bá sɛ́á: «Ata mɔndɔ ɔmɔtɛ́ ɔ ɔwáwɔ nikúlə a lɛ bá na nɛ́táyɛ́ niínyə.»
62Bá ná isə́ batá na makátá bá sɛ́á yatɛ́ niínyə a ndɔ siə ɔwá a wayɛ́á mɔná lɔ́áka. 63Sakalɛ́á a ná batá a sɛ́á bá wɛɛ́ya nɛbámbɔ́ índíə́. Umə́ a ná tilə́kə a sɛ́á: «Nɛ́áyɛ́á niínyə á Yɔhánɛsɛ.» Bɛndɔ bəkimə bá ná ə́lə́mə́nə. 64Ɔ umisíúmə́, Sakalɛ́á a ná munuə úbúnə́, nɛ́áyɛ́á nɛbɔ́mbɛ nɛ́ ná sandɔ́nɔ́á, a ná botólíə́ ɔ ɔhɔ́ɔ́, a Huɛlɛ́ nyamaka. 65Bɔkɔ́lɔ́ma bɔ́ ná yɛ́ɛ́yɛ́ ikúílí bɛndɔ bá mamɛ́ŋɛ́ itíə́, ɔ ɛmáá yɛ́ Yútɛa yikimə ɔ́maná ɔ bɔ́táyɛ́ bɔkɔa bá na bá bá ndɔ hɛ́na. 66Bɛndɔ bəkimə ɔbá bá ná ɔ́kɔ́kɛ́na, bá ka bɛ́táyɛ́ bɛkɔa tə́tə́niə ɔ uwəbú mɔlɛ́má, bá sɛ́á: «Nəníə́ mɔ́tána mɔná a ŋɔ bámɛnɛna əə́?» Ɔ taká, Isə́lúkú a ka báá na wɛɛ́ya.
Bɔŋana bɔ́ Sakalɛ́á
67Umbúínyi Mɔnaŋanaŋa wɔ́ ná fínə́ á Sakalɛ́á mɔlɛ́má, ɔ yayɛ́á isə́. A ná lúmə́ ɔ ɔhɔ́ɔ́ ɛ́sɛ́á mɔhɛ́nátɔtányɛ́ a sɛ́á:
68«Mɛ ndɔ Isə́lúkú á Huɛlɛ́ yɛ Ísilahɛ́lɛ lúbúnə,
bɔkɔasɛ́á a nɔ́ ndasá ɔ yáyɛ́á ilúkunə ɔháŋɔ́na.
69A ná bəsú munuəniə wa iŋgínə́ lɔ́mɛ́ná ɔ miímə yɛ Ndə́witi ɔ wayɛ́á mɔnyɛna.
70Nɔ́yɛ́ á ná bílíhə́níə́ ɔ tɔ́mbákɛna na munuə wɔ́ bɔhɛ́nátɔtányɛ́ banaŋanaŋa bá buɔnɔ́.
71A ka bílíhə́niə ɔwá, a ŋɔ bəsú nuəkəniə ɔ makátá má bə́súə́ bəbəniə,
na iŋgínə́ yɛ bááyɛ́ bəkimə ɔbá bá ndɔ bəsú bánya.
72A ka yáyɛ́á iwə́mɛɛ́lɔ ínə́niə ɔ uwəsú bisə́kínə́,
a ka nɛ́áyɛ́á nɛkaka nɛnaŋanaŋa bɛ́kɔ́lɔmɔna.
73Ɛ́ɛ! A ka yəsúə́ isə́ á Ábɛlaháma nɔ́yɛ́ bíkúminə.
74Na uwəsú ɔwɔ́lɔ ɔ makátá má bə́súə́ bokóyíkoyi,
a na kɛ́áká tɔ́na ɔwá tɔ wɛɛ́ya nyɔkɛ́ná ɛŋaná bɔkɔ́lɔ́ma,
75tɔ́ bámɛ́nɛ́ná banaŋanaŋa, bátaká muɛsɛ ɔwayɛ́ busíə́ ɔ uwəsú tunó tukimə tɔ́ buɔmɔ́.
76Ɔwáwɔ ɔ wamɛ́á mɔná, bá ŋɔ aŋɔ́á ɛ́lɛakɛnɛna mɔhɛ́nátɔtányɛ́ wa Huɛlɛ́ yɛ nɔɔ́mɛná
bɔkɔasɛ́á, ɔ ŋɔ buəkəkinə ɔ busíə́ bɔ́ Isə́lúkú ɔkɛaka ɔwá ɔ yáyɛ́á ɛnɔ́mɛ tábɔ́náka,
77usiəkə ɔ sɛ́á a yáyɛ́á ilúkunə mənyə́síə́ ɔwá
a ŋɔ ndasá ɔ ɔwayɛ́ unuəniə na nɛniasɛna nɛ́ máyɛ́á mabɛ́á.
78Ɛ́ɛ! Yəsúə́ Huɛlɛ́ a lɛa na iwə́mɛɛ́lɔ, na mɔlɛ́má muɛsɛ.
A ŋɔ kɛaka isəmú yɛ́ ɔmbáŋá yɛ́ bəsú nɔ́mákɛ́na hɔ́ákátɔ́ ɔ nɛhɔalɛ́nɛ́ná nɛ́ hiɔtɔ́tɔ́.
79Yɛ́táyɛ́ isəmú yɛ́ ka bááyɛ́ nɔmakɛna ɔbá bá lɛ́á tuənə́tɔ́ ɔ ibínə́binə,
na bááyɛ́ ɔbá bá lɛ́á húə́tɔ́ ɔ ɛlɔndɔ́ yɛ́ nyɛmbɛ́, ɛlɔ́áyɛ́ mə́súə́ mabaná ɔkɛndana ɔ ɛnɔ́mɛ yɛ́ bumbə́nú.»
80Mɔná a kɔmaka, wə́yíə́ mɔlɛ́má wɔ́ ɔ́nɔ́kɛna, a ka niŋəkə ɔ makɔ́tákɛ ɔkafámáká ɔ buɔsɛ́ ɔbɔ́á a ná bínə́níə́ ɔ busíə́ bɔ́ ilúkunə yɛ́ Ísilahɛ́lɛ.
Currently Selected:
Lúkasɛ 1: tvu
Highlight
Share
Copy
Want to have your highlights saved across all your devices? Sign up or sign in
© 2019, CABTAL
