Mə́líkusu 15

Bá nɔ́ Yə́susu ákánana á Bilátɛ busíə́

(Mat 27.1-2, 11-26; Lúk 23.1-5, 13-25; Yɔh 18.28-40; 19.4-16)

1Ɛsɔ́mbalɛ́, bətitiəmahánɛna na bɛnatákɛ bá ná kɔtákána ilúkunə na baŋɛ́ŋa bá Bɛyútɛnɛ, bamanyumbə́ndə́ na nindúmə́ nɛ́ Bəkə́lə́siə. Bá ná Yə́susu ɔ́lɔ́kɔ́kɔ, bá ná wɛɛ́ya sɛmɛ́na á Bilátɛ. 2Bilátɛ a ná wɛɛ́ya njɔnɔ́kɔ a sɛ́á: «Baánɛ, aŋɔ́á ɔ́ lɛ́á munəni wa Bɛyútɛnɛ əə́?» Mba, Yə́susu a sɛ́á: «Aŋɔá ɔ ndɔ nɔ́yɛ́ laa.» 3Bətitiəmahánɛna bá Yə́susu sɔ́mɔkɛna. 4Nɔ́yɛ́, Bilátɛ a ná híánɔ́lɔ́na ɔwayɛ́ ɔnjɔnɔ a sɛ́á: «Ɔ lɛ ndɔ bíhíə́niniə ata bɔkɔa əə́? Ɔ ndɔ məndínə́ má bɛsɔ́mɛna ɔ́kɔ muɛsɛ ɔmá bá ndɔ aŋɔ́á sɔ́mɛna əə́?» 5Mba, Yə́susu a sa bɛ́kámɔsɔna ata bɔkɔa ɔ nindínə́ ɔnɛ́á, Bilátɛ a ná ə́lə́mə́nə.

Bá nɔ́ Yə́susu hɔkɛna ɔ nyɛmbɛ́

(Mat 27.15-26; Lúk 23.13-25; Yɔh 18.39–19.16)

6Ɛŋganda tɛ́á, a ka bá a ndɔ bəə́bu mɔndɔ wa ɛbɔka niasɛna ɔmɔtɛ́ ɔwá bá ná bata. 7Nɔ́yɛ́, wɔmɔtɛ́ mɔndɔ a ka báá ɔ ɛbɔka, nɛ́áyɛ́á niínyə á Balábasɛ. A ka báá ɔ ilúkunə na báaba bɛndɔ ɔbá bá ná ituəmə kuəsíə́. 8Iloŋo yɛ́ bɛndɔ yɛ́ ná ákáná á Bilátɛ, bá ná batá yatɛ́ ɔyɛ́á a ná bá a ndɔ bəə́bu hɛ́na ikúílí tɛ́á. 9Bilátɛ a sɛ́á: «Nɔ ndɔ siə ɔwá mɛ bənú munəni wa Bɛyútɛnɛ niasɛ́na əə́?» 10Ɔ taká a ka siəkinə ɔwá, bisə́lúkú bɛ́ bətitiəmahánɛna bá ná wɛɛ́ya sɛmá ɛlɔ́áyɛ́ ɛhɛ́tɛ́. 11Bisə́lúkú bɛ́ bətitiəmahánɛna bá ná ilúkunə yɛ́ bɛndɔ íkíníə́ ɔwá bá Balábasɛ niása. 12Bilátɛ a ná manyɔ́ bata a sɛ́á: «Yatɛ́ mɛ ndɔ wɔ́ɔwɔ kɛaka nə́ə ɔwá nɔ ndɔ ɛ́lɛnɛna nɔ sɛ́á munəni wa Bɛyútɛnɛ əə́?» 13Ilúkunə bá ná yə́mə́níə́ tɔ́na bá sɛ́á: «Ɔ́mɔ́kɛ́ná wɛɛ́ya!» 14Bilátɛ a sɛ́á: «Yatɛ́ bɔbɛ́á a ná kɛáka nə́ə əə́? » Ilúkunə bá ná manyɔ́ yə́mə́niə mɔŋɛ́ŋa bá sɛ́á: «Ɔ́mɔ́kɛ́ná wɛɛ́ya!» 15Bilátɛ a ka hikəkiə ɔkɛa yatɛ́ ɔyɛ́á ilúkunə yɛ́ ndɔ siə, a ná bə́əbu Balábasɛ niasɛ́na, a ná Yə́susu hɔkɛ́na əlimə ɔwá, bá nɔ́ wɛɛ́ya hɔ́ányaka muɛsɛ ubusíə́ ɔbɔ́á bá wɛɛ́ya ɔ́mɔ́kɛ́na ɔ ɔmbásá.

Bá nɔ́ Yə́susu hitəkə́ hɛ́ bɛsɛ́ndɛ́ háá

(Mat 27.27-31; Yɔh 19.2-3)

16Bɔkɔfɔnɛa bá ná Yə́susu fínə́nə ɔ niə́lətíə́ nɛ́ mɔmanɛna. Bá ná iloŋo ɛ́lɛ́ákɛ́ná yikimə. 17Bá ná wɛɛ́ya lɛŋáká na maŋgɔmba manyɔakánɔ́, bá ná wɛɛ́ya hitəkə́ hɛ́ bɛsɛ́ndɛ́ háá ɔ mɔlɔ́á ɔhɛ́á bá ná nɔ́áka. 18Bá ná lúmə́ ɔ ɔwayɛ́ ɔnyama bá sɛ́á: «Tɔ ndɔ aŋɔ́á bíhóliə á munəni wa Bɛyútɛnɛ!» 19Bá wɛɛ́ya súbə́kə na nɛtɔŋɔ ɔ mɔlɔ́á, bá wɛɛ́ya túə́kinə na malá tɔ́na, bá kiniəkiə, bá kutiməkinə ɔ ɔwayɛ́ busíə́. 20Əlimə yɛ ɔwayɛ́ ɔsɔ́kɔ́nɛna, bá ná wɛɛ́ya maŋgɔmba manyɔakánɔ́ húlə́kíə́, bá ná wɛɛ́ya bɛ́áyɛ́á bɛlɛŋa híə́níə́ ɔ mɛɛ́lɔ. Nɔ́yɛ́, bá ná wɛɛ́ya fə́míə́ ɔkɛaka ɔwá, bá ka wɛɛ́ya ɔ́mɔ́kɛna ɔ ɔmbásá.

Bá nɔ́ Yə́susu ɔ́mɔ́kɛna ɔ ɔmbásá

(Mat 27.33-44; Lúk 23.26-43; Yɔh 19.17-27)

21Bɔkɔfɔnɛa bá ná wɔmɔtɛ́ mɔtɔ́mbátɔmba halɛ́na ɔwá a ná húlínə́ ɔ bɛtɔbɔtɔ́bɔ́, bá ná wɛɛ́ya íkíníə́ ɔ ɔmbásá ɔtúána, nɛ́áyɛ́á niínyə á Símono wa Sília, isə́ yɛ́ Alɛkɛsándɛlɛ na Lufúsu. 22Bá ná wɛɛ́ya ákánána ɔ ɛbɔ́ka ɔyɛ́á bá ndɔ ɛ́lɛna bá sɛ́á Kolokóta, yɛ́ ndɔ bínífúnə yɛ́ sɛ́á ɛbɔ́ka yɛ́ hɛbɔmbɔ́. 23Bá ka siəkə ɔ ɔwayɛ́ ɔ məluku má sə́kə́kə́tɔ́ na hɛlɔkɔ uwíndiə, mba, a sa nyɛ́na. 24Bá ná wɛɛ́ya ɔ́mɔ́kɛ́na ɔ ɔmbásá, nɔ́yɛ́, bá ná bɛ́áyɛ́á bɛlɛŋa afákána, bá ná súbínə́ ɔ ndɔŋɔ́ ɛlɔ́áyɛ́ ɔmanya yatɛ́ mɔndɔ tɛ́á a ndɔ kusəkənə. 25Yɛ́ ka báá ɛŋgɛ́ŋɛ́ ibo, ikúílí ɔyɛ́á bá ná wɛɛ́ya ɔ́mɔ́kɛ́na ɔ ɔmbásá. 26Mətilə ɔmá má ndɔ hɛkɔma hɛ́ nɛ́áyɛ́á nɛhɔkɛna ínə́niə má ka báá tilə́kə́tɔ́ náana: «Munəni wa Bɛyútɛnɛ.» 27Ɔ ɔwayɛ́ ɛmɛ́ŋɛ́, bá ná bəcəŋə báfandɛ́ ɔ́mɔ́kɛ́na ɔ ɛmbásá, wɔ́ɔwɔ ɔ mɔkátá wɔ́ bɛnɔ́mɛ, wə́ə́ní ɔ mɔkátá wɔ́ biəní. 28(Nɔ́yɛ́ mətilə má ná bíúndúsíníə́ ɔmá má ndɔ laa má sɛ́á: «Bá ka wɛɛ́ya fanɛná ɔ ɔmbana wɔ́ baŋɛ́na.») 29Batɔ́mbátɔmba bá wɛɛ́ya kɔ́báka, bá mɔlɔ́á fúkə́kə, bá laaka bá sɛ́á: «Ə́ə́! Ɔwáwɔ ɔwá ɔ ná láá ɔ sɛ́á, ɔ ndɔ Tɛ́mbɛlɛ kataka ɔ yɛmɔtɛ́ lúmə́kə́ ɔ tunó tɔ́lálɔ́, 30bínúə́kə́níə́ aŋɔ́á bɛ́múɛ́tɛ́, tukínə ɔ ɔmbásá!» 31Nɔ́yɛ́, bisə́lúkú bɛ́ bətitiəmahánɛna na bamanyumbə́ndə́ bá Yə́susu sɔ́kɔ́nakɛna, bá laaka bəə́bu na bəə́bu bá sɛ́á: «A ka bɛndɔ bənə́bənə́ nuəkəniə, mba, a sa ósó ubínuəniə wɛɛ́ya bɛ́muɛ́tɛ́! 32Mɛ́sia, munəni wa Ísilahɛ́lɛ á tukínə́ isíŋáka ɔ ɔmbásá, ɔkɛaka ɔwá tɔ nɔ́yɛ́ síə́kínə mbá tɔ lumínínə!» Bááyɛ́ ɔbá bá ná ɔ́mɔ́kɛ́na ɔ ɔmbásá na wɛɛ́ya, bá wɛɛ́ya kɔ́báka tɔ́na.

Nyɛmbɛ́ yɛ Yə́susu

(Mat 27.45-61; Lúk 23.44-56; Yɔh 19.28-30)

33Ɔ kɔɔsɔ, ibínə́binə yɛ́ ná kɔ́á ɔ misí mikimə ɔkafámáká ɔ ɛŋgɛ́ŋɛ́ ɛ́lálɔ́. 34Nɔ́yɛ́, ɔ ɛŋgɛ́ŋɛ́ ɛ́lálɔ́, Yə́susu a ná yə́mə́ mɔŋɛ́ŋa a sɛ́á: «Əlóhí, Əlóhí, lama sabakataní» Ɔ́ niɔŋɔ́ sɛ́á: «Á yamɛ́á Huɛlɛ́, á yamɛ́á Huɛlɛ́ ɛlɔ́áyɛ́ yatɛ́ ɔ ná mɛaŋɔ́á níása əə́?» 35Bɔ́mɔtɛ́ ɔbá bá ná báá ɔmɔ́yɛ́, bá na ɔ́kɔ́kɛ́ná, bá sɛ́á: «Nɔ́ ɔ́kɔ́kɛ́na, a ndɔ Ɛlíásɛ ɛ́lɛna!» 36Ɔmɔtɛ́ ɔ uwəbú ətíə́ a ná tɛbálɛ́na, a ná ká kɔcá yubə́ ɔ bɛnásákɛ bɛ́ məluku, a ná mɛɛ́ta kɛ́má ɔ ɛnjá yɛ nɛtɔŋɔ, a ná mɛɛ́ta nyilə́líə́ ɔ munuə wɔ́ Yə́susu ɔkɛaka ɔwá a maáta nyaa, a sɛ́á: «Nɔ́ tátɛ́lá tɔ́ siəlínə ábá Ɛlíásɛ ɛkasɛ a ndá wɛɛ́ya tukíníə́ ɔ ɔmbásá.» 37Mba, Yə́susu a ná yə́mə́ mɔŋɛ́ŋa; a ná kátɛ́á. 38Nɛbata ɔnɛ́á nɛ́ ná báá tiŋə́tɔ́ ɔ tɛ́mbɛlɛ nɛ́ ná salɛ́á ɔ ətíə́, ɔ botolokiə ɔ mɔlɔ́á ɔkafámáká ɔ matá. 39Isə́lúkú yɛ bɔkɔfɔnɛa bá Lóma ɔwá a ná báá ɔ busíə́ bɔ́ Yə́susu, a ná yámá ɔwá a nɔ́ kátɛa, a sɛ́á: «Taká taká, wɔ́ɔwɔ mɔndɔ a ka báá mɔná wa Huɛlɛ́.» 40Bɔ́mɔtɛ́ bəəndú bá ka báá ɔmɔ́tɔ́yɛ́, bá siəkinə hata. Ɔ uwəbú ətíə́ Malɛ́á wa Mákátala, Malɛ́á á inyə́ yɛ́ ɛnɔ́kɔ́ a Yákɔbɔ na Yósua na Salomə́, 41ɔ́ bááyɛ́ ɔbá bá ná wɛɛ́ya ɔŋgɔ́kɔ, bá wɛɛ́ya nyɔkɛna ikúílí a ná báá ɔ Kalɛ́lɛa, na bɔ́mɔtɛ́ bəəndú bəəŋí ɔbá bá ná báláká na wɛɛ́ya ɔ Yəlúsalɛma.

Bá nɔ́ Yə́susu háá ɔ munyə́

(Mat 27.57-61; Lúk 23.50-56; Yɔh 19.38-42)

42Ɛnaka bɛkɔlakɔ́lá bɛ́ ndáfámá, nɔ́yɛ́ ɛ́sɛ́á yɛ́ ná bá buɔsɛ́ bɔ́ nɛbɛ́tábɔ́na, ɔ́ niɔŋɔ́ uyə́səkiə wɔ́ Sábatɛ, 43ɛláŋa ɛ́mɔtɛ́ yɛ́ nindúmə́ nɛ́ bəkə́lə́siə, nɛ́áyɛ́á niínyə á Yɔ́sɛbɛ wa Alimatíə́, a ná ndáfama. Wɛɛ́ya tɔ́na a ka bá a ndɔ nɛmanɛna nɛ́ Huɛlɛ́ táta. A ná ká umimə wɔ́ Yə́susu batá á Bilátɛ na makɛ́nda məkimə. 44Bilátɛ a ka bá ə́lə́mə́nə́tɔ́ ɔwá Yə́susu a lɛa wə́ə́tɔ. A ná isə́lúkú yɛ bɔkɔfɔnɛa ɛ́lɛ́ákɛ́na, a ná wɛɛ́ya batá ábá buɔnɔ́ Yə́susu a ná kátɛ́á. 45Ɛnaka mɔkɔfɔnɛa a wɛɛ́ya mənyə́síə́ ɔwá Yə́susu a lɛa wə́ə́tɔ́ taká, Bilátɛ a ná Yɔ́sɛbɛ kuənjə índíə́ ɔ umimə wɔ́ Yə́susu ɔwɛta. 46Yɔ́sɛbɛ a ná ká ɔmbɔ́mɔ́ ɔ́ndɔ, a ná umimə tukíníə́ ɔ ɔmbásá, a ná muítə ɔ́lɔ́kɔ́kɛ́na na ɔmbɔ́mɔ́, a ná ká wɛɛ́ya bɛ́lɛ́na ɔ munyə́ ɔwá wɔ́ ná bá timə́kə́tɔ́ ɔ mɔsálábándá, nɔ́yɛ́, a ná ihíkə yɛ́ muɔkɔ nyɛkákɛ́na ɔ nifínínə́ nɛ́ munyə́. 47Malɛ́á wa Mákátala, Malɛ́á á inyə́ yɛ Yɔ́sua bá ka siəkinə ɔ ɛbɔ́ka ɔyɛ́á bá ná wɛɛ́ya bɛ́lɛ́na.

Currently Selected:

Mə́líkusu 15: tvu

Highlight

Copy