Mə́líkusu 13

Yə́susu a ndɔ mənyəsiə ɔwá bá ŋɔ tɛ́mbɛlɛ kataka

(Mat 24.1-3; Lúk 21.5-7)

1Ikúílí Yə́susu a ná báá ɔ ɔfámáka ɔ Tɛ́mbɛlɛ, ɔmɔtɛ́ wa báyɛ́á bɔkɔ́nɛna a ná wɛɛ́ya lɛ́na a sɛ́á: «Á Muinə́niə, siəkínə: Yatɛ́ miɔkɔ, yatɛ́ nɛfalaba!» 2Yə́susu a sɛ́á: «Ɔ ndɔ nɛ́ɛnɛ nɛfalaba sinə mɔŋɛ́ŋa! Ata muɔkɔ úmotí wɔ́ sɔ́ ŋɔ tuənə á ɔsɔ́kɔ́ muɔkɔ ɔmbáŋá, bá ŋɔ miítə kataka mikimə.»

Nibotólíníə́ nɛ́ məsə́kə

(Mat 24.4-14; Lúk 21.8-19)

3Yə́susu a ná tuə́nə ɔ ɔmáá wɔ́ olífia ɔ busíə́ bɔ́ Tɛ́mbɛlɛ. Bíə́lə, Yákɔbɔ, Yɔhánɛsɛ na Andɛlɛ́ uwəbú, bá ka báá bísúə́lə́tɔ́ na wɛɛ́ya, bá ná wɛɛ́ya batá bá sɛ́á: 4«Lɛná bəsú, maánɛ́á bɛ́táná bɛkɔa bɛ́ ŋɔ bɛ́kɛaka əə́? Yatɛ́ hibílíndíníə́ hɛ́ ŋɔ ikúílí ínə́niə ɔyɛ́á bɛ́táná bɛkɔa bikimə bɛ́ ŋɔ bɛ́kɛaka əə́?» 5Yə́susu a sɛ́á: «Nɔ́ bíkókósókíə ɔwá, ata mɔndɔ a lɛ bənú nimbə. 6Bɛndɔ bəəŋí bá ŋɔ ndasákɔ́na ɔ ɔwámɛ niínyə, bá ŋɔ laaka bá sɛ́á: “Mɛaŋɔ́á mɛ́ lɛ́á Mɛ́sia”, bá ŋɔ bɛndɔ bəəŋí nənəsəkiə. 7Ikúílí nɔ ŋɔ ɔ́kɔ́kɛna bá ndɔ hɛ́na ɛlɔ́áyɛ́ bilə́ na tɔsɔkɔ́sɔkɔ tɔ́ bilə́, nɔ lɛ kɔlɔma: Ɔ taká, bɛ́táyɛ́ bikimə bɛ́ ná hɔ́ánana ɔbɛ́kɛa. Mba, nisúki nɛ́ sɔ́ ŋɔ bá nɛ́ nɔ́ ndafama. 8Ɔ taká, mɔnɔŋɔ má ŋɔ tátána ɔ bilə́, ɛ́sɛ́á mamanɛna; ɔ bɛ́mɔtɛ́ bɛbɔ́ka misí yɛ́ ŋɔ ndandɛmaka, mətíli má ŋɔ báá məəŋí. Yɛ́ ŋɔ báá nibotólíníə́ nɛ́ məsə́kə má nibíə́nə. 9Nɔ́ báá ɔ bɛtátɛ́ná. Bá ŋɔ bənú sɛmaka ɔ bəkə́lə́siə, bá ŋɔ bənú súbə́kə ɔ məə́bə má mabɛ́kálɛ́na. Nɔ ŋɔ káláka ɔ busíə́ bɔ́ bamanɛna na bənəni ɛlɔ́áyɛ́ ámɛ: Ɔmɔ́tɔ́yɛ́ mbá nɔ ŋɔ imbóŋi kusənə. 10Yɛ́ lɛa hɔ́ánánátɔ́ ɔwá, bá taŋá ɔ Imbə́nú Yɛɛsɛ uyəmbələniə ɔ bɛndɔ bá mɔnɔŋɔ məkimə. 11Ɛnáká bá bənú ákánána ɔ uwənú ɔsɛma, nɔ lɛ sə́híníə́ ubusíə́ bɔ́ ikúílí yatɛ́ ɔyɛ́á nɔ ŋɔ laaka, yatɛ́ ɔyɛ́á yɛ́ ŋɔ bənú bíndiə ɔ yɛ́táyɛ́ ikúíli, nɔ yɛɛ́ta fə́mə́lə́níə́ bɔkɔasɛ́á, tátá bənú nɔ ŋɔ hɔ́ɔ́kɔ, mba Umbúínyi Mɔnaŋanaŋa. 12Munínyə́ a ŋɔ wayɛ́á munínyə́ sɛma ɔ nyɛmbɛ́ ɛ́sɛ́á isə́ na wayɛ́á mɔná, baná bá ŋɔ tátána na túə́búə́ tukúlə, bá ŋɔ bəə́bu hɔkakɛna ɔ nyɛmbɛ́. 13Bɛndɔ bəkimə bá ŋɔ bənú kóyokiə ɛlɔ́áyɛ́ nɛ́ámɛ́á niínyə, mba, wɛ́ɛ́yɛ́ ɔwá a ŋɔ tiŋiminə ɔkafámáká ɔ nisúki, Huɛlɛ́ a ŋɔ wɛɛ́ya nuəkəniə.»

Məsə́kə maŋɛ́ŋa

(Mat 24.15-31; Lúk 21.20-28; 17.23)

14«Ikúílí nɔ ŋɔ nyəkə́ yɛ Mɔtɛŋɛna siəkinə tuənə́tɔ́ ɔ ɛbɔ́ka ɔyɛ́á a sá hɔ́ánana utuənə. (Mɔfana á ɔ́kɔ́ muɛsɛ) nɔ́yɛ́, bɛndɔ ɔbá bá ŋɔ báá ɔ misí yɛ Yútɛa bá ná hɔ́ánáná ɔtɛbɛna ɔ ɛmáá. 15Mɔndɔ ɔwá a ŋɔ báá ɔ muanda ɔmbáŋá wɔ́ miímə, a lɛ tukínə ɔwá á fínə́ ɔ ɔwayɛ́ miímə ɔ bɔɔ́la ɔwɛta. 16Wɛ́ɛ́yɛ́ ɔwá a ŋɔ báá ɔ ɛtɔbɔtɔ́bɔ́, a lɛ tilə́ na əlimə ɔwayɛ́ nilókiə ɔkɛɛta. 17Mahana na bəəndú ɔbá bá ŋɔ báá ɛmɛ́lákátɔ́ na bááyɛ́ ɔbá bá ŋɔ nyóhokiə ɔ mátáyɛ́ mɔɔsɛ́! 18Nɔ́ bɛ́kálákɛ́na ɔkɛaka ɔwá nɔ́yɛ́ lɛ ndáfámá ɔ ikúílí yɛ́ bɛbɔ́lábɔ́lá. 19Ɔ taká, mátáyɛ́ mɔɔsɛ́ má ŋɔ báá mɔɔsɛ́ má məsə́kə ɔmá bá sa ndə́sinə ɔ nibotólíníə́ ɔnɛ́á Huɛlɛ́ a ná misí bɔ́tá, ɔ ndafámáká isíŋáka, ɛ́sɛ́á nɔ́yɛ́ yɛ́ sá ndábáá tɔ́na. 20Ata Isə́lúkú a sa mátáyɛ́ mɔɔsɛ́ kútíhə́síə́, há ata mɔndɔ a sɔ́ ŋɔ bínúə́niə, mba, ɛlɔ́áyɛ́ batɛ́fátɛfa ɔbá a ná tɛ́fá, a ka mátáyɛ́ mɔɔsɛ́ kútíhəsiə. 21Nɔ́yɛ́, ábá mɔndɔ a ná bənú lɛ́na a sɛ́á: “Siəlínə, Mɛ́sia a lɛa háha! Siəlínə, a lɛa hə́ə́ní!” Nɔ lɛ wɛɛ́ya níə́núə́ nɛkɔmba talɛna. 22Bɛmɛ́sia bɛ́ bɛkanja na bɔhɛ́nátɔtányɛ́ bá bɛkanja bá ŋɔ fámáka, bá biələ́mənə bɛ́ bɛkɔa kɛ́áká na bisə́mə́tə́, ɛlɔ́áyɛ́ bááyɛ́ unənəsiə ɔbá Huɛlɛ́ a ná tɛ́fá ɛ́bá nɔ́yɛ́ óso ɔ ɔbɛ́kɛa. 23Mba uwənú, nɔ́ bítə́tə́kə́níə́, mɛ ná bənú bɛkɔa bikimə mə́nyə́síə́.»

Nɛndahíáná nɛ́ Mɔná wa mɔndɔ

(Mat 24.30-31; Lúk 21.25-28)

24«Mba ɔ mátáyɛ́ mɔɔsɛ́, əlimə yɛ mátáyɛ́ məsə́kə, hiɔtɔ́tɔ́ hɛ́ ŋɔ yɔtɔ, muilí wɔ́ sɔ́ ŋɔ nɔma tɔ́na, 25tusənji tɔ́ ŋɔ kɔakɔna ɔ húlə́kinə ɔ ɔmbáŋá, mənjiŋə má nɔɔ́mɛná má ŋɔ bínyúkəkə. 26Ɔ yɛ́táyɛ́ ikúílí, bá ŋɔ Mɔná wa mɔndɔ siəkinə ɔsákɔna ɔ bɛlɔndɔ́ nuúmə́ na injiŋə yɛŋɛ́ŋa na tuúmə. 27A ŋɔ bɛáŋgɛlɛ lɔ́máka ɔ makásá ə́nisə má misí, ɔ bááyɛ́ ɔkɔta ɔbá a ná tɛfa, bá ŋɔ húlə́kinə ɔ misí mikimə.»

Yatɛ́ bɔlɛ́á bɔ́ fíkiə bɔ́ ndɔ bəsú úkúniə

(Mat 24.32-36; Lúk 21.29-33)

28Nɔ́ yɛ́ɛyɛ iŋgətí ɛ́tɛ́na ɔ bɔnɛŋɛ́: Ikúílí ɔyɛ́á yə́yíə́ mɛlɛ́áfɛ yɛ́ nɔ́ botoliə ɔ ɔtɔ́lɔ yɛ́ tɔánjɛ fə́mə́kíə́, nɔ ndɔ manya ɔwá ikúílí yɛ́ hiɔtɔ́ yɛ́ lɛa hoóyi. 29Hɔ́ánánátɔ́ uwənú tɔ́na, ikúílí nɔ ŋɔ bɛ́tána bɛkɔa siəkinə bɛ́ ndɔ bɛ́kɛa, nɔ́ manyá ɔwá Mɔná wa mɔndɔ a lɛa hoóyi, a lɛa ɔ busíə́ bɔ́ túə́núə́ tɔkɔ́kɛ. 30Ɔ taká, mɛ ndɔ bənú nɔ́yɛ́ lɛna ɔwá híihi hɛsɛká hɛ́ sɔ́ ŋɔ tɔ́mba ɛŋaná bɛ́ɛ́yɛ́ bikimə ɔndafama. 31Nɔɔ́mɛná na misí bá ŋɔ tɔ́mba, mba bɛ́ámɛ́á bɛtambá bɛ́ sa ndátɔmba.

Nɔ bá ɛmbɛnyɛ́

(Mat 24.36-44; Lúk 12.36-38; 19.12-13)

32Mba ɔ bɔ́táyɛ́ buɔsɛ́ ata ɔ wútə́yí ɔŋgɛ́ŋɛ́ mɔndɔ a lɛ ndɔ manya, ata bɛáŋgɛlɛ bɛ́ nɔɔ́mɛná, ata Mɔná, ɔ́maná á Isə́ bíbúə́. 33Nɔ bɛ́tátáka, nɔ́ túə́nə ɛmbɛnyɛ́, ɔ taká nɔ lɛ ndɔ manya ɔ uyə́níə́ ikúílí yɛ́ ŋɔ ndafama. 34Yɛ́ ŋɔ báá hɔ́ánánátɔ́ ɛ́sɛ́á mɔndɔ ɔwá a ndɔ ákána ɔ mɔkɛnda, a wə́yíə́ ɔmbɛ́la tíkə, a nɛmanɛna tíkínə́ ɔ ɔwayɛ́ bɔnyɛna, mɔnyɛna tɛ́á na bɔ́áyɛ́á buolí, a mɔtátá wa hɛkɔ́kɛ manɛna ɔwá a báá ɛmbɛnyɛ́. 35Nɔ́ bámɛ́nɛ́ná ɛmbɛnyɛ́, ɔ taká nɔ lɛ ndɔ manya ɔ ikúílí ɔyɛ́á muití ɔmbɛ́la a ŋɔ ndahiana, bɛkɔlakɔ́lá mbá ata ətíə́ yɛ nəbulúə́, ɔ nɛlɔ́ŋɔ́ miɔkɔ́ ata siísíə́, 36ɔkɛaka ɔwá, a lɛ bənú fámɛ́ná həmə́tu, á bənú níbə́ ɔ hinó. 37Yatɛ́ ɔyɛ́á mɛ ndɔ bənú lɛna, mɛ ndɔ nɔ́yɛ́ lɛna ɔ bəkimə: Nɔ́ bámɛ́nɛ́ná ɛmbɛnyɛ́.

Currently Selected:

Mə́líkusu 13: tvu

Highlight

Copy