Yɔhánɛsɛ 21

Yə́susu a nɔ́ bínə́niə ɔ ɛsɛ́lɛ́ yɛ́ nɛɛ́ŋɛa

1Əlimə yɛ tɛ́tɛ́á yɛ tunó, Yə́susu a ka manyɔ́ bínə́niə ɔ bɔkɔ́nɛna ɔ ɛsɛ́lɛ́ yɛ́ nɛɛ́ŋɛa nɛ́ Tibɛliátɛ. Náana a ná bəə́bu bínə́níə́. 2Símono Bíə́lə, Tɔ́masɛ ɔwá bá ndɔ ɛ́lɛnɛna bá sɛ́á: «Ɔmbɔ́ásalɛ́,» Natanahɛ́lɛ wa bətínə́ yɛ Kána ɔ Kalɛ́lɛa á baná bá Sɛbɛtɛ́ na bɔ́mɔtɛ́ bɔkɔ́nɛna báfandɛ́ bá ka bákɔna iŋgində́. 3Símono Bíə́lə a ná bəə́bu lɛ́na a sɛ́á: «Mɛ nɔ́ ákána ɔ mɔnɔ́fɔ.» Bá sɛ́á: «Tɔ ndɔ ákaka na aŋɔ́á.» Bá ná ə́kə́nə́níə́, bá ná fínə́ ɔ isóyí nuúmə́. Mba ɔ bɔ́táyɛ́ bulúə́, bá sa halɛna ata hiɔfɔ́ hímotí. 4A ka bá a nɔ́ yáá, Yə́susu a ka báá tɛ́nɛ́mátɔ́ ɔmɔ́tɔ́yɛ́ ɔ ɛsɛ́lɛ́ yɛ́ nɛɛ́ŋɛa, mba, bɔkɔ́nɛna bá lɛ manyá bá sɛ́á wɛɛ́ya. 5A ná bəə́bu lɛ́na a sɛ́á: «Nəníə́ ənú a bámɛ́á baná, nɔ ná hɔ́yɛ́ tuɔfɔ́ hálɛ́ákɛ́na əə́?» Bá sɛ́á: «Bóo!» 6A sɛ́á: «Nɔ́ nibúnjə́ əmbínə ɔ mɔkátá wɔ́ bɛnɔ́mɛ wɔ́ isóyí, nɔ ndɔ halɛakɛna.» Bá ná nɛɛ́ta əmbínə, tuɔfɔ́ tɔ́ ka báá úndúə́tɔ́ ɔ nibúnjə́ ɔ nindínə́ ɔnɛ́á bá sa ósó ɔ nɛɛ́ta usúə́. 7Ɔ yɛ́ɛ́yɛ́ ikúílí, mɔkɔ́nɛna ɔwá Yə́susu a ná bá a ndɔ hikiə, a ná Bíə́lə lɛ́na a sɛ́á: «Á Isə́lúkú!» Ɛnaka á ɔ́kɔ́ ɔwá á Isə́lúkú, Símono Bíə́lə a ná bɔlɛŋa bíə́mbínə ɔ mɛɛ́lɔ bɔkɔasɛ́á, a ka báá mɔsámbɔ, a ná bíə́mbínə ɔ nuíyi. 8Bááyɛ́ bɔkɔ́nɛna bɔ́mɔtɛ́ bá ná isóyí nukəkə, bá ná nibúnjə́ súə́kə́ úndúə́tɔ́ na tuɔfɔ́, bá sa bá hata na ɛsɛ́lɛ́, yɛ́ ka báá hoóyi na ɛbɔ́ɛ́yɛa ná niómo nɛ́ amaná. 9Ɛnaka bá ndáfámá ɔ ɛsɛ́lɛ́, bá ná mɔná nɛsanákɛ́ yámá tuɔfɔ́ tálátɔ́ ɔ ɔmbáŋá na bɛbɛlɛ́tɛ. 10Yə́susu a ná bəə́bu lɛ́na a sɛ́á: «Nɔ́ tuɔfɔ́ húlə́nə́ nə́ə ɔtɔ́á nɔ nɔ́ húlə ɔ ɔhalɛna.» 11Nɔ́yɛ́, Símono Bíə́lə a ná manyɔ́ fínə ɔ isóyí, a ná nibúnjə́ súə́kə́ ɔ ɛsɛ́lɛ́ úndúə́tɔ́ na ɛbɔ́ɛ́yɛa na moómo álánɔ má tuɔfɔ́ tɔŋɛ́ŋa na tɔ́lálɔ́, ata nɔ́yɛ́ ɛ́sɛ́á tɔ́ ná báá tuəŋí, nibúnjə́ nɛ́ sa salɛa. 12Yə́susu a sɛ́á: «Nɔ́ sɔ́nɔ ɔnɛ́á.» Ata mɔkɔ́nɛna ɔmɔtɛ́ a sa óso ɔwayɛ́ ɔbata a sɛ́á: «Baánɛ, aŋɔá ɛ́yánɛ́ əə́?» Bá ka manya bá sɛ́á á Isə́lúkú. 13Nɔ́yɛ́, Yə́susu á tɔ́mbálɛ́la ɔ ɛmɛ́ŋɛ́ yɛ nɛsanákɛ́, a ná hiɔfɔ́ ɛ́tá na bɛlɛ́tɛ, a ná bəə́bu índíə́, bá ná nɛaka. 14Ɔ́ bikúílí bɛ́lálɔ́ bɛ́ɛbɛ ɛ́sɛ́á Yə́susu a nɔ́ bínə́niə ɔ ɔwayɛ́ bɔkɔ́nɛna əlimə yɛ nɛ́áyɛ́á nɛhɔŋɔa ɔ ətíə́ yɛ bəwə́nú.

Yə́susu a ndɔ Bíə́lə hɛ́na

15Əlimə yɛ nɛnɛ́á, Yə́susu a ná Símono Bíə́lə lɛ́na a sɛ́á: «Á Símono, á mɔná wa Yɔhánɛsɛ, ɔ ndɔ mɛaŋɔ́á hikiə yáyɛ́ná báaba əə́?» A ná wɛɛ́ya bíhíə́níníə́ a sɛ́á: «Ɛ́ɛ! Á Isə́lúkú, ɔ ndɔ manya ɔwá mɛ ndɔ aŋɔ́á hikiə» Yə́susu a sɛ́á: «Tə́tə́kə́níə́ bámɛ́á banándɔ́mbá.» 16Ɔ bikúílí bɛ́fandɛ́, a sɛ́á: «Á Símono, á mɔná wa Yɔhánɛsɛ, ɔ ndɔ mɛaŋɔ́á hikiə əə́?» A sɛ́á: «Ɛ́ɛ! Á Isə́lúkú, ɔ ndɔ manya ɔwá mɛ ndɔ aŋɔ́á hikiə.» Yə́susu a sɛ́á: «Bámɛ́nɛ́ná mɔkɛndana wa yə́míə́ ɛndɔ́mbá.» 17Ɔ bikúílí bɛ́lálɔ́, Yə́susu a sɛ́á: «Á Símono, á mɔná wa Yɔhánɛsɛ, ɔ ndɔ mɛaŋɔ́á hikiə əə́?» Bíə́lə a ná busə́kə ɔ́kɔ́ bɔkɔasɛ́á, a nɔ́ wɛɛ́ya batɛna ɔ bikúílí bɛ́lálɔ́ ábá a ndɔ wɛɛ́ya hikiə. A ná wɛɛ́ya bíhíə́níníə́ a sɛ́á: «Á Isə́lúkú, ɔ ndɔ manya bɛkɔa bikimə, ɔ ndɔ manya ɔwá mɛ ndɔ aŋɔ́á hikiə.» Yə́susu a sɛ́á: «Tə́tə́kə́níə́ yə́míə́ ɛndɔ́mbá. 18Ɛ́ɛ! Ɔ taká mɛ ndɔ aŋɔ́á nɔ́yɛ́ lɛna, ikúílí ɔ ná báá ɛnjɔ́hɔkɛ, aŋɔ́á bɛ́múɛ́tɛ́ ɔ ná bá ɔ ndɔ híə́wúə́ hiŋgóli bítiŋə, ɔ ka bá ɔ ndɔ ákána ɔ ɛbɔ́ka ɔyɛ́á ɔ ndɔ hikiə, mba, ɛnáká ɔ yɔ́kɔ́bɔ́nɔ, ɔ ŋɔ makátá nandɛa mbá mɔndɔ muinə́muinə́ a aŋɔ́á hiŋgóli tiŋə, a aŋɔ́á ákánána ɔ ɛbɔ́ka ɔyɛ́á ɔ sɔ́ ŋɔ hikiə.» 19Yə́susu a ka hɔ́ɔ́kɔ nɔ́yɛ́ ɛlɔ́áyɛ́ nindínə́ nɛ́ nyɛmbɛ́ uwinə́niə ɔnɛ́á Bíə́lə a ŋɔ tuúmə tɔ́ Huɛlɛ́ fə́mə́ləniə. Əlimə yɛ yɛ́ɛ́yɛ́ ɛtambá, a ná wɛɛ́ya lɛ́na a sɛ́á: «Ɔŋgɔ́kɔ́ mɛaŋɔ́á.»

Yə́susu na mɔkɔ́nɛna ɔwá a ndɔ hikiə

20Bíə́lə á hiamɛ́la, a ná mɔkɔ́nɛna yámá uwəbú əlimə ɔwá Yə́susu a ná bá a ndɔ hikiə, wɛ́ɛ́yɛ́ ɔwá a ná Yə́susu bə́sə́líníə́ ɔ hɛtɔkɔ ikúílí yɛ́ nɛnɛ́á, a ná wɛɛ́ya batá a sɛ́á: «Á Isə́lúkú, ɛ́yánɛ́ mɔ́táyɛ́ ɔwá ɛkasɛ á aŋɔ́á sɛ́má əə́?» 21Ɛnaka Bíə́lə á wɛɛ́ya məə́sə tálá, a ná Yə́susu batá a sɛ́á: «Á Isə́lúkú, mba ɔwayɛ́, yatɛ́ yɛ́ ŋɔ nda wɛɛ́ya fámɛ́ná əə́?» 22Yə́susu a sɛ́á: «Yatɛ́ yɛ́ ndɔ aŋɔ́á sinə ábá mɛ ndɔ hikiə ɔwá a nɔmɔ́kɔ́ ɔkafámáká ɔ ikúílí ɔyɛ́á mɛ ŋɔ ndahíáná əə́? Ɔwáwɔ, ɔŋgɔ́kɔ́ mɛaŋɔ́á ɔbánɔ́.» 23Nɔ́yɛ́, imbə́nú yɛ́ ná yambáná ɔ ətíə́ yɛ bəlumininə bəkimə ɔwá, Yə́susu a ná láá a sɛ́á wɛ́ɛ́yɛ́ mɔkɔ́nɛna a sa ndə́wəə. Ɔ taká, Yə́susu a sa Bíə́lə lɛna ɔwá wɛ́ɛ́yɛ́ mɔkɔ́nɛna a sa ndə́wəə, mba a ka laa a sɛ́á: «Yatɛ́ yɛ́ ndɔ aŋɔ́á sinə ábá mɛ ndɔ hikiə ɔwá a nɔmɔ́kɔ ɔkafámáká ɔ ikúílí ɔyɛ́á mɛ ŋɔ ndahíáná əə́?»

24Ɔ́ mɔ́táyɛ́ mɔkɔ́nɛna a ndɔ imbóŋi índiə yɛ bɛ́táyɛ́ bɛkɔa, a ná bɛɛ́ta tilə́kə, tɔ ndɔ manya ɔwá yayɛ́á imbóŋi yɛ́ lɛa taká.

25Yə́susu a ka manyɔ́ bɛ́mɔtɛ́ bɛkɔa kɛaka biəŋí. Ata bá bɛɛ́ta tiləkə bɔ́mɔtɛ́ əlimə yɛ búíní, mɛ ndɔ fɛka ɔwá, tuəfulə ɔtɔ́á bá ŋɔ tiləkə, nɛbɛ́lɛ́nɛ́ná nɛ́ sa ósó ɔ ɔwɛ́nɛa ɔ misí mikimə.

Currently Selected:

Yɔhánɛsɛ 21: tvu

Highlight

Copy