Bɛnyɛná 10

Bá nɔ́ Bíə́lə ɛ́lɛakɛna á Kɔlɔnɛ́yɛ ɔmbɛ́la

1Wɔmɔtɛ́ mɔndɔ a ka bá ɔ bɔnɔŋɔ bɔ́ Sɛsalɛ́, nɛ́áyɛ́á niínyə á Kɔlɔnɛ́yɛ, a ka bá mɔkɔfɔnɛa mɔŋɛ́ŋa ɔ mɔlɔ́ŋɔ́ wɔ́ ɛbɔ́ɛ́yɛa yɛ́ banɔabilə́ wɔ́ Lɔ́ma, bá ɛ́lɛakɛnɛna bá sɛ́á: «Banɔabilə́ bá Itália.» 2Na nɛ́áyɛ́á nikúlə nikimə, a ka báá a na yɔkɛ́nana, a Huɛlɛ́ kɔ́lɔ́maka, a tɔsɔ́kánɔ́ tɔ́ ilúkunə yɛ́ Bɛyútɛnɛ hə́lə́bəkiə, a Huɛlɛ́ bɛ́kálákɛna ikúílí tɛ́á. 3Bɔ́mɔtɛ́ buɔsɛ́, hoóyi na ɛŋgɛ́ŋɛ́ ɛ́lálɔ́ yɛ́ əlimə yɛ kɔɔsɔ, yɛmɔtɛ́ áŋgɛlɛ yɛ Huɛlɛ́ a ná wɛɛ́ya bínə́níə́ ɔ binónó, a ná tíbíníə́ muɛsɛ, áŋgɛlɛ a ná fínə́ ɔ ɔwayɛ́ miímə, a ná wɛɛ́ya ɛ́lɛ́na, a sɛ́á: «Á Kɔlɔnɛ́yɛ!» 4Kɔlɔnɛ́yɛ a ná wɛɛ́ya məə́sə tala, na bɔkɔ́lɔ́ma bukimə, a sɛ́á: «Á Isə́lúkú, yatɛ́ əə́?» Áŋgɛlɛ a sɛ́á: «Huɛlɛ́ a ná wə́wúə́ uŋgə́lə́kí káhá na máwɔ́á mahánɛna ɔmá ɔ ndɔ kɛa ɔ tɔtɔyɔ́nɔ́, a sɔ́ ŋɔ aŋɔ́á fəliə. 5Isíŋáka, lɔ́má bɛndɔ ɔ Yobə́ ɔkɛaka ɔwá bá wɔmɔtɛ́ mɔndɔ hulənə, nɛ́áyɛ́á niínyə á Símono, wə́yíə́ mɔlɔ́ŋɛ́ná, á Bíə́lə. 6A ndɔ tuənə tɔ́na ɔ ɔmbɛ́la wɔ́ wɔmɔtɛ́ mɔndɔ, nɛ́áyɛ́á niínyə tɔ́na á Símono, mɔnyɔɔbɛɔfɔ, wə́yíə́ ɔmbɛ́la wɔ́ lɛa ɔ ɛsɛ́lɛ́ yɛ́ nɔmɔ́.» 7Ikúílí áŋgɛlɛ a ná ákáná ɔyɛ́á yɛ́ nɔ́ húlə ɔ ɔwayɛ́ ɔhɛ́na, Kɔlɔnɛ́yɛ a ná báyɛ́á bɛndɔ ɛ́lɛ́ná báfandɛ́ na wɔmɔtɛ́ mɔkɔfɔnɛa wa mɔlɛ́má muɛsɛ, a ka báá mɔŋákátɔ́ ɔ ɔwayɛ́ nɛmanɛna. 8A ná bəə́bu bɛkɔa bikimə nɛŋɔ́nákɛ́ná ɔbɛ́á bɛ́ ná bɛtɔmbaka, əlimə yɛ nɔ́yɛ́, a ná bəə́bu lɔ́má ɔ Yobə́.

9Ɔ ɔyáyáka, ɛnakaka bəə́bu ɔ ɛnɔ́mɛ hoóyi na Yobə́, yɛ́ ka báá hoóyi na kɔɔsɔ, Bíə́lə a ná báláka ɔ nɔáta nɛ́ miímə ɔmbáŋá ɔ mabɛ́kálɛ́na. 10Nɔ́yɛ́, mɛtaná yɛ́ ná wɛɛ́ya itíə́, a ka siəkə ɔ ɔnɛ́á. Ɛnaka bá tuə́nə ɔ bɛ́labɔ́nɛ́á ɔtábɔ́na, a ná kɔ́á ɔ binónó. 11A ná nɔɔ́mɛná yámá úbúnə́tɔ, bɔɔ́la bɔ́ húlə́kinə umə́ ɛ́sɛ́á ɛnya yɛ ɛŋáŋáláŋá yɛ́ nɛbata itíə́tɔ́ ɔ məbə́ŋú ə́nisə, nɛ́ ná ndátálɛ́má ɔ misí. 12Mɛnyama mikimə yɛ́ makɔlɔ́ ə́nisə, yííyí ɔyɛ́á yɛ́ ná báá yɛ́ ndɔ hələ ɔ misí, yííyí tɔ́na ɔyɛ́á yɛ́ ná báá yɛ́ ndɔ hululuə ɔ ɔmbáŋá, yɛ́ ka bákɔna mikimə ɔ nuúmə́. 13Nɛ́mɔtɛ́ nióni nɛ́ ná wɛɛ́ya lɛ́na nɛ́ sɛ́á: «Á Bíə́lə, hɔalɛ́na, ɔ́nɔ, nɛ́áka tɔ́ná!» 14Mba, Bíə́lə a ná wɛɛ́ya bíhíə́níníə́ a sɛ́á: «Bóo! Á Isə́lúkú, mɛ lɛ boóko ɔ bɔɔ́la bɔ́ ikiní ɔnɛ́á ata bɔ́ tífílə́kə́tɔ.» 15A ná manyɔ́ nióni ɔ́kɔ ɔ bikúílí bɛ́fandɛ́ nɛ́ sɛ́á: «Yatɛ́ ɔyɛ́á Huɛlɛ́ a ná nəŋə́síə́, ɔ sá hɔ́ánana ufə́mə́ləniə ɔwá yɛ́ báka tífílə́kə́tɔ!» 16Nɛ́ɛ́yɛ́ nióni nɛ́ ka bɛ́kɛaka bikúílí bɛ́lálɔ́, əlimə yɛ nɔ́yɛ́, ɔ umisíúmə́ yɛ́ɛ́yɛ́ ɛŋáŋáláŋá yɛ́ bɔɔ́la bɔ́ ná tilə́ ɔ nɔɔ́mɛná.

17Bíə́lə a ná bɛ́ɔ́kɔ́lɛ́ná ɔ binífúnínə́ nɛ́ bɛ́ɛ́yɛ́ binónó ɔ ɔbɛ́bata ɔbɛ́á a nɔ siəkinə, a lɛ kafámá ɔ ɔmanya. Ɔ umisíúmə́, bɛndɔ ɔbá Kɔlɔnɛ́yɛ a ná lɔ́má, ɔbá bá ndɔ húlə́ miímə yɛ Símono siə, bá ná ndáfámá ɔ ɔwayɛ́ busíə́ bɔ́ hɛkɔ́kɛ. 18Bá ɛ́lɛakɛna, bá bataka nióni nɛŋɛ́ŋa ɔkɛaka ɔwá, bá manyá ábá á Símono ɔwá bá ndɔ ɛ́lɛnɛna Bíə́lə, a ndɔ tuənə ɔ yɛ́táyɛ́ miímə. 19Bíə́lə a ka báá tátɛ́átɔ́ ɔ mabɛ́kɔ́lɔmɔna má bɛ́áyɛ́á binónó, mba, Umbúínyi Mɔnaŋanaŋa wɔ́ sɛ́á: «Ɔ́ bɛndɔ bálálɔ́ bááyɛ́ bá ndɔ aŋɔ́á siə. 20Hɔalɛ́ná, lɔɔ́kɔ́ tɔfá na bəə́bu ɔ mɔndɔ́ŋɔ́ ɛŋaná unə́ŋə́liniə bɔkɔasɛ́á, mɛaŋɔ́á mɛ ná bəə́bu lɔma.» 21Nɔ́yɛ́ Bíə́lə a ná lɔɔ́kɔ a báyɛ́ bɛndɔ busíə́, a sɛ́á: «Mɛaŋɔ́á mɛ lɛ́á wɛ́ɛ́yɛ́ ɔwá nɔ ndɔ siə. Ɛlɔ́áyɛ́ yatɛ́ nɔ ná ndá háha sɛ́ná ɔ ɔwámɛ usiə əə́?» 22Bá sɛ́á: «Á Kɔlɔnɛ́yɛ á mɔkɔfɔnɛa mɔŋɛ́ŋa ɔ mɔlɔ́ŋɔ́ wɔ́ ɛbɔ́ɛ́yɛa yɛ́ banɔabilə́ a ná bəsú lɔma. Mɔndɔ wataká, ɔwá a ndɔ Huɛlɛ́ kɔ́lɔ́ma, Bɛyútɛnɛ bikimə bɛ́ bɔnɔŋɔ bá ndɔ hɛ́na muɛsɛ ɔ ɔwayɛ́ ɛlɔ́á. Yɛmɔtɛ́ áŋgɛlɛ yɛ Huɛlɛ́ a ná wɛɛ́ya lɛ́na ɔwá, bá aŋɔ́á húlə́nə́ ɔ ɔwáyɛ́ busíə́ ɔkɛaka ɔwá, a ɔkɔ́kɛ́ná yatɛ́ ɔyɛ́á ɔ ndɔ wɛɛ́ya lakɛna.» 23Nɔyɛ́, Bíə́lə a ná bəə́bu kaha, a ná bəə́bu bɛsianɛ́ná ínə́níə́.

Ɔ ɔyáyáka, a ná mɔkɛnda ɛtá na bəə́bu, bɔ́mɔtɛ́ bənísə́ bá Yobə́ bá ná ká bəə́bu tikə. 24Ɔ hinó ɔhɛ́á hɛ́ ná ɔ́ŋgɔ́nɔ, a ná káfámá ɔ bɔnɔŋɔ bɔ́ Sɛsalɛ́. Kɔlɔnɛ́yɛ ɔwayɛ́, a ka bá a ndɔ bəə́bu táta, na bɛláŋa bɛ́ nɛ́áyɛ́á nikúlə, na bɛŋgɔ́áyɛ́ bɛ́ mɔlɛ́má tɔ́na ɔbá a ná ɛ́lɛ́ákɛ́na. 25Ɔ ikúílí ɔyɛ́á Bíə́lə a ná ndáfámá, Kɔlɔnɛ́yɛ a ná ndásá ɔ ɔwayɛ́ nɛnyáná, a ná kiníə́ ɛlɔ́áyɛ́ ɔwayɛ́ ɔ hibə́təniə uhíə́niniə. 26Mba, Bíə́lə a sɛ́á: «Hɔalɛ́na! Mɛaŋɔ́á mɔndɔ tɔ́na ɛ́sɛ́á aŋɔ́á, a ná wɛɛ́ya itíə́ ɔ mɔkátá, a ná wɛɛ́ya huəlíníə́.» 27Wɛɛ́ya ɔ ɛŋgamɔ́ nɔ́yɛ́ na Kɔlɔnɛ́yɛ, a ná fínə́ ɔ miímə, a ná bɛndɔ kɔ́áná bəəŋí kɔtákánátɔ. 28A sɛ́á: «Nɔ ndɔ manya muɛsɛ ɔwá, ikiní yɛŋɛ́ŋa ɔ Bɛyútɛnɛ ɔ ufínə ɔmbɛ́la wɔ́ wɛ́ɛ́yɛ́ ɔwá a lɛ bá Mɔyútɛnɛ, ata ɔ ukindəniə iŋgində́ na wɛɛ́ya. Mba, Huɛlɛ́ a ná mɛaŋɔ́á ínə́níə́ ɔwá, mɛ lɛ mɔndɔ sinə́ ɛ́sɛ́á a lɛa bítífílə́kə́tɔ́, ataná mɛ́ wɛɛ́ya bítə́tə́kə́níə́. 29Ɔ́ ɛlɔ́áyɛ́ nɔ́yɛ́ mɛ sa mɔlɔ́á nata ɔ ikúílí ɔyɛ́á nɔ́ ná mɛaŋɔ́á ɛ́lɛ́ákɛ́na. Mba isíŋáka, mɛ ndɔ siə ɔmanya ɛlɔ́áyɛ́ yatɛ́ nɔ́ ná mɛaŋɔ́á ɛ́lɛ́ákɛ́nɛ́na.» 30Kɔlɔnɛ́yɛ a sɛ́á: «Á álálɔ́ niɔfɛ́nɛ, mɛ ka báá ɔ mabɛ́kálɛ́na ɔ yɛ́tana ikúílí, ɔ ɛŋgɛ́ŋɛ́ ɛ́lálɔ́ yɛ́ əlimə yɛ kɔɔsɔ. Ɔ umisíúmə́, mɛ ná mɔndɔ yámá ɔwámɛ busíə́ na bɛlɛŋa laŋɔlaŋɔ, 31a sɛ́á: “Á Kɔlɔnɛ́yɛ, Huɛlɛ́ a ná máwɔ́á mabɛ́kálɛ́na ɔ́kɔ́kɛ́na, a sa fəlíə́ tɔ́na ɔwá ɔ ka tɔtɔyɔ́nɔ́ ɔ́lɔ́kɛna.” 32A ná mɛaŋɔ́á lɛ́na tɔ́na a sɛ́á: “Lɔ́má bɛndɔ ɔ Yobə́ ɔkɛaka ɔwá bá Símono húlə́nə́ ɔwá bá ndɔ ɛ́lɛnɛna tɔ́na á Bíə́lə. A ndɔ tuənə á Símono miímə á mɔnyɔɔbɛɔfɔ, wə́yíə́ ɔmbɛ́la wɔ́ lɛa ɔ tanɛ́ yɛ nɔmɔ́.” 33Mɛ ná bɛndɔ lɔ́má ɔ umisíúmə́ ɔkɛaka ɔwá bá ndá aŋɔ́á ɛ́lɛ́ákɛ́na, muɛsɛ nɔ́yɛ́ ɛ́sɛ́á ɔ ná ndáfama. Isíŋáka, ɔ́ bəsú báaba á Huɛlɛ́ busíə́ ɔkɛaka ɔwá, tɔ ɔ́kɔ́kɛ́na yatɛ́ yikimə ɔyɛ́á Isə́lúkú a ná aŋɔ́á mánɛ́ná ɔwá ɔ bəsú lákɛ́na.»

Ɛtambá yɛ́ Bíə́lə á Kɔlɔnɛ́yɛ ɔmbɛ́la

34Nɔ́yɛ́, Bíə́lə a ná ɛtambá ɛ́tá, a sɛ́á: «Isíŋáka, mɛ ná manyá taká ɔwá, Huɛlɛ́ a lɛ ndɔ nifəŋə háá ətíə́ yɛ bɛndɔ: 35Ɔ mɔnɔŋɔ ɔbánɔ́ məkimə, ata ɛ́yánɛ́ mɔndɔ ɔwá a ndɔ wɛɛ́ya bə́tiə na nɛkɔmba nikimə, ɔwá a ndɔ kɛa yatɛ́ ɔyɛ́á yɛ́ lɛ́á taká, a lɛa muɛsɛ á Huɛlɛ́ busíə́. 36Huɛlɛ́ a ka yáyɛ́á ɛtambá lɔ́mɛ́na ɔ bɛndɔ bá Ísilahɛ́lɛ. Ɔ́ Imbə́nú Yɛɛsɛ ɔkɛaka ɔwá tɔ bá ɔ bumbə́nú ɔ tɔ́mbákɛna na Yə́susu Kilísitusu, ɔwayɛ́ ɔwá a lɛ́á Isə́lúkú yɛ bɛndɔ bəkimə.»

37«Nɔ ndɔ manya yatɛ́ ɔyɛ́á yɛ́ ná taŋá ɔ ɔbɛ́kɛa ɔ Kalɛ́lɛa, ɔ bɔnɔŋɔ bɔ́ Yútɛa tɔ́na ɔ ikúílí ɔyɛ́á Yɔhánɛsɛ a ná húlə́ nɔŋɔnaka, a ná nɛsɔa índíə́kínə́nə. 38Nɔ ndɔ manya nəníə́ Huɛlɛ́ a ná Umbúínyi Mɔnaŋanaŋa na injiŋə indíə́ á Yə́susu wa Násalɛtɛ. Nɔ ndɔ manya tɔ́na nəníə́ Yə́susu a ná kɛ́ndáka ɔ bɔnɔŋɔ, a húlə́ buɛsɛ kɛaka, a bááyɛ́ niŋəsəkiə tɔ́na ɔbá bá ná báá bɛɔlɛ́ bɛ́ isə́lúkú yɛ imbúinyi mɛbɛ́á bɔkɔasɛ́á, Huɛlɛ́ a ka bá na wɛɛ́ya.»

39«Uwəsú ɔ báaba, bəsú tɔ́ lɛ́á bəmbóŋímboŋi bá bɛ́ɛ́yɛ́ bɛkɔa ɔbɛ́á a ná kɛ́áka ɔ bɔnɔŋɔ bɔ́ Bɛyútɛnɛ ɔkafámáká ɔ Yəlúsalɛma. Bá ka wɛɛ́ya ɔ́nɔ́kɔ, bá ná wɛɛ́ya ɔ́mɔ́kɛ́na ɔ ɔmbásá. 40Mba, Huɛlɛ́ a ka wɛɛ́ya huŋuəsiə əlimə yɛ tunó tɔ́lálɔ́, a ná kɛ́áka ɔwá a bífə́mə́lə́níə́, 41tátá ɔ ilúkunə yikimə, mba, ɔ uwəsú ɔbá Huɛlɛ́ a ná táŋá ɔ ɔtɛ́fa ɛ́sɛ́á bəmbóŋímboŋi. Əlimə yɛ nɛ́áyɛ́á nɛhɔŋɔa ɔ ətíə́ yɛ bəwə́nú, tɔ ka nɛ́áka, tɔ ná nyákɛ́ná na wɛɛ́ya. 42A ka bəsú manɛna ɔwá tɔ bɛndɔ bəkimə nɔŋɔ́nákɛ́na, tɔ́ mənyə́síə́ tɔ sɛ́á ɔ ɔwayɛ́ Huɛlɛ́ a ná tínímíə́ ɛ́sɛ́á mukə́lə́siə wa bɔɔmɔ́ na bəwə́nú. 43Bɔhɛ́nátɔtányɛ́ bəkimə bá ka hɔ́kɛna ɔwayɛ́ ɛlɔ́á bá sɛ́á: “Ata ɛ́yánɛ́ ɔwá a ŋɔ nɛ́áyɛ́á nɛkɔmba tálɛ́na ɔ ɔwayɛ́, Huɛlɛ́ a ŋɔ wɛɛ́ya máyɛ́á mabɛ́á niasɛna.”»

Balɛmanyáhuɛlɛ́ bá nɔ́ Umbúínyi Mɔnaŋanaŋa kusənə

44Bíə́lə a ka báá a ndɔ bɛ́ɛ́yɛ́ bɛyɔŋɔlɛ nífúnə tɔ́na, Umbúínyi Mɔnaŋanaŋa wɔ́ na kɔ́ɛ́na ɔ báyɛ́ bəkimə ɔbá bá ná báá bá ndɔ yáyɛ́á Ɛtambá ɔ́kɔ. 45Bəlumininə bá Bɛyútɛnɛ ɔbá bá ná ndásákɔ́ná na Bíə́lə bá ná ə́lə́mə́nə, bá ná siəkínə́ ɔwá, Umbúínyi Mɔnaŋanaŋa ɔwá Huɛlɛ́ a ndɔ índiənə, wɔ́ ná bááyɛ́ áyɛ́ná tɔ́na ɔbá bá lɛ bá Bɛyútɛnɛ. 46Ɔ taká, bá ka bəə́bu ɔ́kɔ́kɛna bá ndɔ hɔ́ɔ́ na mohókí mənə́mənə́, bá bɔŋɛ́ŋa bɔ́ Huɛlɛ́ nyamaka. Nɔ́yɛ́, Bíə́lə a sɛ́á: 47«Mɔndɔ a óso ukotiə ɔwá bá lɛ báaba bɛndɔ nɛsɔa índíə́ na mənífə́ ɔbá bá ná Umbúínyi Mɔnaŋanaŋa kusə́nə́ hɔ́ánánátɔ́ ɛ́sɛ́á bəsú əə́?» 48A ná iŋgínə́ índíə́ ɔwá bá bəə́bu nɛsɔa índíə́kínə ɔ niínyə nɛ́ Yə́susu Kilísitusu. Bá ná wɛɛ́ya batá ɔwá a tɛ́tɛ́á yɛ tunó túmbíə́ na bəə́bu.

Currently Selected:

Bɛnyɛná 10: tvu

Highlight

Copy