Bɛnyɛná 11

Bíə́lə a ndɔ binífúnínə́ índiə ɔ yatɛ́ ɔyɛ́á a ná kɛ́áka ɔ ilúkunə yɛ́ bəlumininə ɔ Yəlúsalɛma

1Basɔ́másɔma na bənísə́ ɔbá bá ná bámɛ́nɛ́na ɔ Yútɛa bá ná ɔ́kɔ́kɛ́na ɔwá, bááyɛ́ ɔbá bá lɛ bá Bɛyútɛnɛ bá ka Ɛtambá yɛ́ Huɛlɛ́ ɔ́kɔ́kɛna bá ná luminə tɔ́na. 2Ɛnaka Bíə́lə a ndáhíáná ɔ Yəlúsalɛma, bəlumininə bá Bɛyútɛnɛ bá ná lúmə́ ɔ ɔwayɛ́ ɔkɛ́kɛ́lɛna bá sɛ́á: 3«Nəníə́ ɔ ná kábɛ́látá na bɛndɔ ɔbá bá lɛ bá Bɛyútɛnɛ, ɔ ná nɛ́áká tɔ́na na bəə́bu əə́?» 4Nɔ́yɛ́, Bíə́lə a ná bəə́bu nɛŋɔ́nákɛ́ná tə́lə́ŋu yatɛ́ yikimə ɔyɛ́á yɛ́ ná bɛtɔmbaka, a sɛ́á:

5«Mɛ ka báá ɔ mabɛ́kálɛ́na ɔ bətínə́ yɛ Yobə́, mɛ ná bɔ́mɔtɛ́ bɔɔ́la yámá ɔ binónó bɔ́ nɔ́ húlínə ɔ ɔmbáŋá, bɔ́ ndɔ ndasá ɔwámɛ busíə́, ɛnya yɛ nɛbata nɛŋɛ́ŋa tiŋə́tɔ́ ɔ bɛsalɛ bínisə. 6Mɛ ná məə́sə tálá muɛsɛ, mɛ ná mɛnyama yɛ́ makɔlɔ́ ə́nisə yámá ɔ nuúmə́, yɛ́ ɛmbɔ́ma, mɛnyama ɔyɛ́á yɛ́ ndɔ hələ, na tunoní. 7Mɛ ná yɛ́ɛ́yɛ́ ikúílí nióni nɛ́ mɔndɔ ɔ́kɔ́ nɛ́ sɛ́á: “Á Bíə́lə, hɔalɛ́na, ɔ́nɔ, nɛ́áka!” 8Mɛ ná bíhíə́níníə́ mɛ sɛ́á: “Haa! Á Isə́lúkú bóo bɔkɔasɛ́á, ata bɔɔ́la bɔ́ ikiní mbá ata bɔ́ məhilə́, bɔ́ lɛ boóko ufínə ɔ ɔwámɛ munuə.” 9Mɛ ná manyɔ́ nɛ́ɛ́yɛ́ nióni ɔ́kɔ ɔ nɔɔ́mɛná nɛ́ sɛ́á: “Ɔ lɛ híə́nə́síə́ məhilə́ yatɛ́ ɔyɛ́á Huɛlɛ́ a ná nəŋə́síə́!” 10Bɔ́ɛ́yɛ́ bɔkɔa bɔ́ ka híánɔlɔna bikúílí bɛ́lálɔ́, əlimə yɛ ikúílí, bikimə bɛ́ ná tilə́ ɔ ɔmbáŋá. 11Ɔ umisíúmə́, bɛndɔ bálálɔ́ bá ná ndáfámá ɔ miímə ɔyɛ́á tɔ ná bámɛ́nɛ́na, wɔmɔtɛ́ mɔndɔ wa Sɛsalɛ́ a ná bəə́bu lɔ́má ɔkɛaka ɔwá, a ndá mɛaŋɔ́á ɛ́lɛ́ákɛ́na. 12Umbúínyi Mɔnaŋanaŋa wɔ́ ná mɛaŋɔ́á lɛ́ná ɔwá mɛ ákáná na bəə́bu ɛŋaná ubíyə́bə. Bənísə́ bálɛ́ndálɔ ɔbá bá ná mɛaŋɔ́á ɔ́ŋgɔ́kɔ, bá ná ká mɛaŋɔ́á tíkə́ ɔ Sɛsalɛ́, tɔ ná fínə́ ɔ miímə yɛ Kɔlɔnɛ́yɛ. 13Kɔlɔnɛ́yɛ a ná bəsú nɛŋɔ́nákɛ́ná nəníə́ a ná áŋgɛlɛ siəkínə́ tɛ́nɛ́mátɔ́ ɔ ɔwayɛ́ miímə, a sɛ́á: “Lɔ́má bɛndɔ ɔ bətínə́ yɛ Yobə́, bá ká Símono ɛ́lɛ́ákɛ́na ɔwá bá ndɔ ɛ́lɛnɛna á Bíə́lə. 14A ŋɔ aŋɔ́á bɛtambá lakɛna ɔbɛ́á bɛ́ ŋɔ aŋɔ́á nibínuəniə húlə́ninə na nɛ́áwɔ́á nikúlə nikimə.” 15Mɛ ná botoliə ɔhɔ́ɔ́, Umbúínyi Mɔnaŋanaŋa wɔ́ ná bəə́bu kɔ́ɛ́na, hɔ́ánánátɔ́ ɛ́sɛ́á wɔ́ ná əsú kɔ́ɛ́na ɔ ikúílí yíbúsíə́. 16Mɛ ná bɛ́kɔ́lɔ́mɔ́ná yatɛ́ ɔyɛ́á Isə́lúkú a ná mɛaŋɔ́á lɛ́na, a sɛ́á: “Yɔhánɛsɛ a ka nɛsɔa índiəkinənə na mənífə́, mba uwənú, nɛsɔa ɔnɛ́á nɔ ŋɔ kusənə, ɔ́ Umbúínyi Mɔnaŋanaŋa.” 17Nɔ́yɛ́, Huɛlɛ́ a ka bəə́bu niəbə índiə hɔ́ánánátɔ́ ɛ́sɛ́á nɛ́ɛ́yɛ́ ɔnɛ́á tɔ́ ná əsú kúsə́nə ɔ ikúílí ɔyɛ́á tɔ ná níə́súə́ nɛkɔmba tálɛ́ná á Isə́lúkú á Yə́susu Kilísitusu. Mɛaŋɔ́á ɛ́yánɛ́ ɛ́kɛ mɛ Huɛlɛ́ kotiə ɔwá a lɛ nɔ́yɛ́ kɛ́á əə́?» 18Ɛnaka bɛndɔ bəkimə bá bɛtambá bɛ́ Bíə́lə ɔ́kɔ́, bá ná nə́yə́níə́ yə́ə́bu, bá Huɛlɛ́ nyamaka bá sɛ́á: «Yɛ́ lɛa taká nɔ́yɛ́ ɔwá, Huɛlɛ́ a ná bááyɛ́ ɛnɔ́mɛ kunínə ɔbá bá lɛ bá Bɛyútɛnɛ ɔkɛaka ɔwá, bá mɔlɛ́má kɔ́ŋɔ́ná, bá tiísi yɛ buɔmɔ́ bɔ́ ikúílíə́kimə kúsə́nə tɔ́na.»

Ilúkunə yɛ́ bəlumininə yɛ́ nɔ́ bɛ́tɛ́kɛ́na ɔ Aŋatiɔ́sɛ

19Ɛnaka bá Itiənə ɔ́nɔ́kɔ́, bá ná botólíə́ ɔ bəlumininə utəkəsə, nɔ́yɛ́, uwəbú, bá ná sámbáná ɔ mɔnɔŋɔ mənə́mənə́, bɔ́mɔtɛ́ ɔ uwəbú ətíə́ bá ná ákáka ɔ bɔnɔŋɔ bɔ́ Finisíə́, bɔ́ Síbili na ɔ bətínə́ yɛ Aŋatiɔ́sɛ, mba, ɔ́maná ɔ Bɛyútɛnɛ bá ná báá bá ndɔ ɛtambá yɛ́ Huɛlɛ́ nɔŋɔnɛna. 20Nɔ́yɛ́, bɔ́mɔtɛ́ bəlumininə bá bɔnɔŋɔ bɔ́ Síbili na bɔ́ Silɛ́nɛ bá ná ákáná ɔ Aŋatiɔ́sɛ, bá ná bəə́bu hɔ́kɛ́na, bá ná Imbə́nú Yɛɛsɛ yɛ Yə́susu Kilísitusu nɔŋɔ́nákɛ́na ɔ báyɛ́ ɔbá bá lɛ bá Bɛyútɛnɛ. 21Huɛlɛ́ a ná bəə́bu óníníə́ ɔ nindínə́ ɔnɛ́á, ɔmbana muiŋí wɔ́ bɛndɔ bá ná mɔlɛ́má kɔŋɔna, bá ná níə́búə́ nɛkɔmba tálɛ́ná á Isə́lúkú a Yə́susu. 22Bɛláŋa bɛ́ ilúkunə yɛ́ Yəlúsalɛma bá ná yɛ́ɛ́yɛ́ imbə́nú ɔ́kɔ, nɔ́yɛ́, bá ná Banábasɛ lɔ́má ɔ bətínə́ yɛ́ Aŋatiɔ́sɛ. 23Ɛnaka a káfámá umə́, a ná siəkínə́ ɛ́sɛ́á Huɛlɛ́ a ná bəlumininə sana, nɛhɔnɔ nɛ́ ná wɛɛ́ya itíə́, a ná bəkimə makɛ́nda índíə́ ɔwá, bá bɛ́ɔ́lɔ́kɔ́kɛ́na á Isə́lúkú a Yə́susu. 24Ɔ taká, Banábasɛ a ka báá mɔndɔ muɛsɛ, úndúə́tɔ́ na Umbúínyi Mɔnaŋanaŋa na ilumininə. Ɔmbana muiŋí wɔ́ bɛndɔ bá ná bɛ́tɔ́á á Isə́lúkú.

25Banábasɛ a ná yɛ́ɛ́yɛ́ ikúílí ákáná ɔ bətínə́ yɛ Tálɛsɛ ɔkɛaka ɔwá a ká Sáwolo ɛta. 26Ɛnaka a wɛɛ́ya bɔ́ŋɔ́, a ná ndá wɛɛ́ya híánáná ɔ Aŋatiɔ́sɛ. Bá ná túmbíə́ iŋgində́ hiɔŋɔ hikimə ɔ buolí ətíə́ yɛ yɛ́táyɛ́ ilúkunə, bá ɔmbana muiŋí wɔ́ bɛndɔ úkúnəkiə. Háha ɔ bətínə́ yɛ Aŋatiɔ́sɛ a bá ná bəlumininə lúmə́ ɔ ɔwɛ́lɛnɛna ɔ ikúílí yíbúsíə́ «bikilísitənə.»

Nihíkə́nə

27Ɔ yɛ́táyɛ́ ikúílí bɔhɛ́nátɔtányɛ́ bá ná lɔɔ́kɔ ɔ Yəlúsalɛma ɔ wákaka ɔ bətínə́ yɛ Aŋatiɔ́sɛ. 28Wɔmɔtɛ́ ɔ uwəbú ətíə́, nɛ́áyɛ́á niínyə á Akabúsu, a ná botólíə́ ɔnɔŋɔna ɔwá, ɛkasɛ mətíli má bálá ɔ misí ɔbánɔ́ mikimə. Ɔ taká, má ka bála ɔ ikúílí ɔyɛ́á Kolóto a ná bámɛ́nɛ́ná káyɛsa. 29Bəlumininə ɔbá bá ná ɛtambá yɛ́ Akabúsu ɔ́kɔ́, bá ná ihə́ŋiə ɛtá ɔwá, mɔɛ́ta tɛ́á a ná hɔ́ánána ɔ məndunə́ uwíndiə ɛ́sɛ́á bɛ́áyɛ́á bɛhámbálɛ́ ɔkɛaka ɔwá, bá bənísə́ ɔ́lɔ́ ɔbá bá lɛ́á ɔ bɔnɔŋɔ bɔ́ Yútɛa. 30Ɔ́ nɔ́yɛ́ bá ná kɛ́áka, bá ná məndunə́ lɔ́mɛ́ná ɔ bɛkámɔ bɛ́ ilúkunə ɔ makátá má Banábasɛ na Sáwolo.

Currently Selected:

Bɛnyɛná 11: tvu

Highlight

Copy