Bɛnyɛná 1

Umbúínyi Mɔnaŋanaŋa ɔwá Yə́susu á ná bílíhə́níə́ ɔ basɔ́másɔma

1Á yamɛ́á ɛŋgɔ́áyɛ́ á Tiofíli, ɔ ɔwámɛ hiəfulə híbúsíə́, mɛ ka bɛkɔa bikimə tiləkə ɔbɛ́á Yə́susu a ná kɛ́áka, na bɛ́ɛ́yɛ́ ɔbɛ́á a ná úkúnə́kíə́ hata yɛ ikúílí ɔ nibotólíníə́. 2Ɔkafámáká ɔ buɔsɛ́ ɔbɔ́á a ná bálá ɔ nɔɔ́mɛná. Ubusíə́ ɔbɔ́á a bálá, a ná báyɛ́á Basɔ́másɔma manɛ́na ɔ tɔ́mbákɛna na injiŋə yɛ́ Umbúínyi Mɔnaŋanaŋa ɔbá a ná tɛfa. 3Nɔ́yɛ́, əlimə yɛ yayɛ́á nyɛmbɛ́, a ná bəə́bu bínə́níə́ na uwəbú umənyəsiə ɔwá a lɛa muɔmɔ́. Ətíə́ yɛ moómo ə́nisə má tunó, a ka bá a ndɔ bəə́bu bínə́niə, a bəə́bu bɛkɔa bɛ́ nɛmanɛna nɛ́ Huɛlɛ́ hɔ́kɛna.

4Bɔ́mɔtɛ́ buɔsɛ́, wɛɛ́ya ɔ ɔnɛ́á na bəə́bu, a ná bəə́bu manɛ́na a sɛ́á: «Nɔ lɛ ákáná hata na Yəlúsalɛma, mba, nɔ́ tátáká yatɛ́ ɔyɛ́á Isə́ a ná bənú bílíhə́níə́: Ɔ́ yatɛ́ ɔyɛ́á mɛ ná bənú mə́nyə́síə́. 5Yɔhánɛsɛ a ka nɛsɔa índiəkinə na mənífə́, mba uwənú, tɛ́tɛ́á yɛ mɔɔsɛ́, bá ŋɔ bənú nɛsɔa índiəkinə ɔ Umbúínyi Mɔnaŋanaŋa.»

Yə́susu a nɔ́ bála ɔ nɔɔ́mɛná

6Basɔ́másɔma ɔbá bá ná báá kɔtálánátɔ́ ɔ ɛmɛ́ŋɛ́ yɛ Yə́susu, bá ná wɛɛ́ya batá bá sɛ́á: «Á Isə́lúkú, ɔ́ yɛ́táyɛ́ ikúílí ɔ ŋɔ manyɔ nɛmanɛna nɛ́ Ísilahɛ́lɛ tínímiə əə́?» 7Yə́susu a ná bəə́bu bíhíə́níníə́ a sɛ́á: «Nɔ lɛ bá na ɔmanya ikúílí mbá ata ɔŋgɛ́ŋɛ́ ɔwá Isə́ bɛ́múɛ́tɛ́ a ná tínímíə́ na yayɛ́á iŋgínə́. 8Mba ɛkasɛ nɔ iŋgínə́ kúsə́nə, ɔ yɛ́ɛ́yɛ́ yɛ Umbúínyi Mɔnaŋanaŋa ɔwá wɔ́ ŋɔ ndasá ɔ uwənú nuúmə́, nɔ ŋɔ bámɛnɛna bámɛ́á bəmbóŋímboŋi ɔ Yəlúsalɛma, ɔ Yútɛa yikimə na ɔ Samália, na ɔ tɔlɛ́ŋɛ́ tɔ́ misí mikimə.»

9Əlimə yɛ bɛ́ɛ́yɛ́ bɛtambá, Yə́susu a ná bálá ɔ nɔɔ́mɛná bəkimə bá ndɔ wɛɛ́ya sinə, ɛlɔndɔ́ yɛ́ ná wɛɛ́ya húə́ ɔ uwəbú məə́sə. 10Ɛnaka bá məə́sə lámbá ɔ ɔmbáŋá ɔhá Yə́susu a ndɔ ákána, ɔ umisíúmə́, bá ná bɛndɔ báfandɛ́ bɔ́ŋɔ́ lɛŋábákátɔ́ na bɛlɛŋa bɛnaŋanaŋa tɛ́nɛ́mátɔ́ ɔ uwəbú ɛmɛ́ŋɛ́, 11bá ná bəə́bu lɛná bá sɛ́á: «Á bɛndɔ bá Kalɛ́lɛa, ɛlɔ́áyɛ́ yatɛ́ nɔ ná tuə́nə hɔ́yɛ́ ɔ usinə ɔ nɔɔ́mɛná əə́? Yə́susu ɔwá Huɛlɛ́ a ná húlíə́ ɔ uwənú ətíə́, ɛlɔ́áyɛ́ ɔwayɛ́ ɔwɛtaka ɔ nɔɔ́mɛná, ɔ́ nɛ́táyɛ́ nindínə́ a ŋɔ ndahíáná ɛ́sɛ́á nɔ ná wɛɛ́ya siəkínə ɔbálaka ɔ nɔɔ́mɛná.»

Nindúmə́ nɛ́ basɔ́másɔma

12Nɔ́yɛ́, ɛnaka bá hɔalɛ́na ɔ hɛmbáŋámbáŋá ɔhɛ́á bá ndɔ ɛ́lɛnɛna bá sɛ́á Ɔmáá wɔ́ Olífia, ɔwá wɔ́ lɛ́á ɔ ɛsalɛ yɛ́ háwa#1.12 Ɔ bɛ́mɔtɛ́ bɛkɛ́tɛ bɛ́ mafana, bá ndɔ laa ɔwá mɔkɛnda wɔ́ Sábatɛ wɔ́ lɛa hoóyi na hikóló hɛ́ amaná. ɔ mɔkɛnda, bá ná híánáka ɔ Yəlúsalɛma. 13Ɔ uwəbú ɔndahíánáka ɔ Yəlúsalɛma, bá ná báláka ɔ ikúíti yɛ́ ɛndɛ́ka mɔlɔ́á ɔhá bá ná báá bá ndɔ kɔtana ikúílí tɛ́á. Bíə́lə, Yɔhánɛsɛ, Yákɔbɔ na Andɛlɛ́. Filíbo na Tɔ́masɛ, Bətələmíə́ na Matíó; Yákɔbɔ, mɔná wa Alafə́, Símono ɔwá bá ndɔ ɛ́lɛnɛna bá sɛ́á muhikiəbɔnɔŋɔ#1.13 Ɔ ikúílí yɛ́ Yə́susu, Bɛyútɛnɛ bá ná bá bá ndɔ nɔɛna ɛlɔ́áyɛ́ búə́búə́ bukuənjə. bɔ́ Ísilahɛ́lɛ, na Yútu á mɔná wa Yákɔbɔ.

14Bá ka báá bá ndɔ kɔtana bikúílí biəŋí, bəə́bu bəkimə mɔlɛ́má úmotí á Huɛlɛ́ ɔbɛ́kálɛ́na iŋgində́ na bɔ́mɔtɛ́ bəəndú: Malɛ́á á inyə́ yɛ Yə́susu a ka báá ilúkunə na bátáyɛ́ bəəndú, na bənínyə́ bá Yə́susu.

Bá nɔ́ Matiásɛ kɔnda

15Buɔsɛ́ bɔ́mɔtɛ́ ɔbɔ́á bəlumininə bá ná báá kɔtákánátɔ́ hoóyi na ɛbɔ́ɛ́yɛa na moómo áfandɛ́, Bíə́lə a ná tɛ́nɛ́má ɔ uwəbú ətíə́, a sɛ́á: 16«Á bámɛ́á bənísə́, Mətilə má Huɛlɛ́ má ná hɔ́ánána ubíúndúsiniə ɔmá Umbúínyi Mɔnaŋanaŋa wɔ́ ná hɔ́ɔ́kɔ́ buɔnɔ́ ɔ munuə wɔ́ Mɔmanɛna á Ndə́witi ɔ bɔkɔa bɔ́ Yútasɛ, wɛ́ɛ́yɛ́ ɔwá a ná báá mɔkɛndana bááyɛ́ ɔbá bá ná Yə́susu halɛ́na. 17A ka báá ɔ uwəsú ilúkunə, a ka báá na nioko ɔ uwəsú buolí ɔ ɔwafana. 18Mba nɔ́yɛ́, wɔ́ɔwɔ mɔndɔ a ka bɔkɔa bɔbɛ́á kɛaka, bá ná wɛɛ́ya bɛcácɔ́ índíə́kínə, a ná bɛɛ́ta ɔ́ndɛ́ná ɔ ɛtɔbɔtɔ́bɔ́. Ɛtɔbɔtɔ́bɔ́ ɔyɛ́á a ná kɔ́á imbúbiə, tɔna tɔ́ ka tə́miə, bɛna bɛ́ ná fama, a ná wəə. 19Bɛndɔ bəkimə bá Yəlúsalɛma bá ka bɔ́táyɛ́ bɔkɔa ɔ́kɔ́kɛna, nɔ́yɛ́, bá ná yɛ́táyɛ́ ɛtɔbɔtɔ́bɔ́ niínyə lɔ́áká bá sɛ́á “Akɛlɛtáma”, ɔ́ niɔŋɔ́ sɛ́á “ɛtɔbɔtɔ́bɔ́ yɛ́ manɔ́ŋɔ́.” 20Yɛ́ lɛa tilə́kə́tɔ́ ɔ hiəfulə hɛ́ tumboŋo yɛ́ sɛ́á:

“Yayɛ́á miímə yɛ́ tíkə́nə́ bɛhálálá.

Mɔndɔ a lɛ tíkə́ tuənə ɔmɔ́tɔ́yɛ́.” Yɛ́ báka tilə́kə́tɔ́ tɔ́na yɛ́ sɛ́á:

“Mɔndɔ muinə́muinə́ á bɔ́áyɛ́á buolí ɛ́tá bɔ́ bəlumininə ɔkɛndana.”

21Bɛndɔ bá lɛa ɔ uwəsú ətíə́ ɔbá bá ná kɛndáká na bəsú ikúílí yikimə ɔyɛ́á Isə́lúkú á Yə́susu a ná nɔ́mɔ́kɔ uwəsú busíə́. 22Ɔ botolokiə ikúílí ɔyɛ́á Yɔhánɛsɛ Mɔsɔabɛndɔ a ná wɛɛ́ya nɛsɔa índíə́, ɔkafámáká ɔ ikúílí ɔyɛ́á, Huɛlɛ́ a ná wɛɛ́ya bə́líə́ ɔ nɔɔ́mɛná. Yɛ́ lɛa muɛsɛ ɔwá wɔmɔtɛ́ wa bátáyɛ́ bɛndɔ a bámɛ́nɛ́ná na bəsú mumbóŋímboŋi wa nɛ́áyɛ́á nɛhɔŋɔa.»

23Ɔ́ ikúílí ɔyɛ́á bá ná wútə́yí ɔhɔ́ɔ́ wɔ́ Bíə́lə ɔ́kɔ́kɛ́na, bá ná tínímíə́ bɛndɔ báfandɛ́: Yɔ́sɛbɛ ɔwá bá ndɔ ɛ́lɛnɛna bá sɛ́á á Balasábasɛ, wə́yíə́ mɔlɔ́ŋɛ́ná tɔ́na á Yusútusu, wɛɛ́ya na Matiásɛ. 24Bá ná bɛ́kálákɛ́na náana bá sɛ́á: «Á Isə́lúkú, ɔwáwɔ ɔwá ɔ ndɔ mɛlɛ́má yɛ́ bɛndɔ bəkimə manya; ínə́níə́ bəsú ətíə́ yɛ báaba bɛndɔ báfandɛ́ ɔwanɛ́ ɔ ná tɛfa, 25ɔkɛaka ɔwá a buolí bɔ́ mɔsɔ́másɔma úndúsíníə́ ɔ ɛbɔ́ka ɔyɛ́á Yútasɛ a ná niása, ɔwá a ná tɛ́fá á ɛbɔ́ka ɔyɛ́á yɛ́ ná wɛɛ́ya hɔ́ánánɛ́na.» 26Bá ná ndɔŋɔ́ ə́mbínə́ na mə́búə́ məə́nyə, ndɔŋɔ́ yɛ́ ná Matiásɛ tɛfa, bá ná wɛɛ́ya latá ɔ umúlə wɔ́ niómo na ɔmɔtɛ́ nɛ́ basɔ́másɔma.

Currently Selected:

Bɛnyɛná 1: tvu

Highlight

Copy