Mak 5

Jesus chuk wel wɛ ɛyfime nè luun ɛ wen əblɛɛ

(Mat 8.28-34; Luk 8.26-39)

1Ghene me diaŋ jio è chin ɛ njine vii nɛ shi ɛylake Gelasa. 2Jesus se fəye se kenək ɛ leghɛ, è konen ghene wel əblee nɛ əb lòò ɛ ngvəəmese. Wele ten nè ki ɛyfim, 3chii ɛ ngvəəmese, wel nè wiy wɛ nè lòó əb kul wen chèmè nɛ̀ nchakse. 4Ɛ́ nè sɛɛ kule wen nɛ̀ nchakse ɛykoy gese nɛ̀ se ɛvəə, əb teene nchake sɛ ɛykoye è gese tente əbnkùm se ɛvəə. Wel nè wiy wɛ nè lòó əb taa è chia wen. 5Əb nè lóó əb yɛ ghanle ɛ ngvəəmese nɛ̀ se kfənse, nɛ̀ ntəke nɛ̀ nchuy toŋe gwɛte ngeŋ ə wen nɛ̀ ɛtiye.

6Əb nè yɛn Jesus bo bɛɛy naa əbtəm, è nyiŋ, è ndu è təm ɛləy ɛ wen ɛyshiɛ, 7è toŋ ɛ giɛ ɛytaa ge: Jesus wɛ Wán ə Feyin Fɛ Fe ngaŋten è chia, wɛ̀ kɛŋe se jɛl lɛɛy nɛ̀ mɛ? Mɛ lone wɛ̀ ɛ Feyine ɛyghel ge ghàà wɛ̀ nyable nɛ̀ mɛ! 8Əb nè suuy dì bek ka Jesus kè suuyenmen ge: Ɛyfime, fəy se wel vin əbghun!

9Jesus me bif se wen ge: Ɛyghel ə yiɛ lu ndɛ?

Əb fise ge: Ɛy lu ge feliɛ, bek ge ghɛs lu se ɛydio. 10Əb se beŋte Jesus ketaan ketaan ge ghàà əb jum ghene se ntaam fo.

11Nè lu dì nɛ ngoo nkfəənyamse yiɛ əbghune kfən ɛylee fo. 12Tefim tii me beŋte Jesus ge: Tinse ghɛs é ghɛs ndu è like se nkfəənyam shii əmlɛɛ. 13Əb bééme, te me fəyke se wel vi əblɛɛ, è ndu, è like se nkfəənyam shi əmlɛɛ. Se me foonten, è biŋle è chio ɛ koŋ, è chakle se kechəm keghuye è kuoke. Nkfəənyamse ten nè lu ka nkam sebaa dî.

14Ghel ghɛ ɛ́ nè chiyen ngoo nkfəənyamse yi nyiŋke è ndu è se fekte sakghɛ ten se ghele ɛ ntɛk fo nɛ̀ se keleŋ fo. Ghele me fəyke è gwiy se yɛne kenəə kɛ ke ganen. 15Ghene gwiyke se ghaa Jesus nè luun, è yɛn wel vi wɛ ngoo ɛyfim nè foon ngɛk se wen, nɛ əb diom fo, nɛ əb makmen ndəyse, è se lu ɛ wen ɛytof, ghene me se fane. 16Ghel ghɛ ke nè ganen nɛ ghene yɛnen kenəə kɛ ke kè ganen se wel wɛ əb nè kiin tefim, gese nɛ̀ se nkfəənyamse, me se fekte se ghele. 17Ghene me kɛɛte se yɛ beŋte Jesus ge əb ko lòò se ghene keleŋ.

18Jesus loo lii se kenək, wel wɛ ɛyfime nè fóon ngɛk se wen se beŋte ge ghene wen yɛ ndu. 19Jesus tun, è sɛ́y suuy se wen ge: Kase kfəəy, è fekte se ghel ə ghiɛ ka Báàba koosen ɛysen se wɛ̀, è suuy kenəə kɛ əb nɛ̀ɛ̀yèn se wɛ̀. 20Wele ten me lòò è se jɛle ntɛk se ghakene sɛ́ nseŋ foo dii Ntɛk-Sɛ-Ɛyvəm fekte kenəə kɛ Jesus nɛ̀ɛ̀yèn se wen, ghel ɛjime yio è se lu nɛ̀ əbchíò əbyúméné.

Kediake Jesuse chuke gese lose ghel se ɛykuo

(Mat 9.18-26; Luk 8.40-56)

21Nɛy se lu ka Jesus nè liin kenək è kase diaŋ se njine vii, ngose wel kaame è wen ɛybee əbghune jio fo. 22Wel əblee gwiy fo nɛ ɛyghel ə wene lu ge Jailus, nɛ lu wel se ghele mbiye ngay ɛyjem yɛ́ ntɛk fo, è yɛn Jesus è chia, è təm ɛləy ɛ wen ɛyshiɛ, 23è se beŋte wen ketaan suuye ge: Fewane fom fekiye se kuo. Kiy wɛ̀ ko gwiy è lɛm ɛghoo ə ghiɛ ɛ wen ə ketuu é əb bonen, è yɛ chii.

24Ghene Jesus me lòò, è se nduu, ngose wel me lòò è se yiike nduu nɛ̀ wen. 25Əbvii əblee se lu ɛ kenon fo nɛ shi se nguk njio-sebaa ɛyvəm ka əb nè yɛ́nen əbliy ə wen, əb yɛ gwiy naa se ŋaŋ. 26Əb nè lô yɛn ngɛk ɛ ɛghoo nə ghɛ́ nchuke se ɛydio, jefse əbfua ə wen naa əbjim, dî è jia bonen, ɛyyaf ə wen sɛ́y se taa taan. 27Əb nè yiomen feteete fɛ kum Jesus, è me chem ɛ ngoo fɛy, è kokte è gwiy ɛ wen ɛybam, è kum ndəyse wen. 28Əb nè kume dì suuye ɛ wen ɛytem ge: Mɛ chèmè kum kɛn ndəyse wen, é mɛ ko bonen.

29Əb kum ndəyse Jesus ɛ leghɛ, ɛyyaf ə wene bonen, əb yio ɛ wen əbghun ge yi bonenmen. 30Jesus keele kɛn se əbliy ge kediake nchuke lu nɛ ke fəy ɛ yi əbghun, è benle, è bif se ghele ge: Kum ndɛ ndəy ə som?

31Ghon-ɛyfɛl nə wene fise ge: Wɛ̀ yɛne nɛ ngose wel yiike gwiye nɛ̀ wɛ̀ ko gese bife ge sɛ kum ndɛ wɛ̀-a?

32Jesus ko se kiye kale se keele wel wɛ əb kumen wen. 33Əbvii vi keele kenəə kɛ ke ganen se wen è se chiŋe fane, è me gwiy è təm ɛləy ɛ Jesus ɛyshiɛ, è fiɛl kenəə kejim se wen. 34Jesus me suuy se wen ge: Wan ə wom, ghal ɛyteme. Ɛytem yɛ wɛ̀ foon se Feyine nɛɛymen wɛ̀ bonen.

35Se lu nɛ Jesus bo suŋnen se əbvii vi, ghel ɛlee mii fo nɛ ɛ́ lòò ɛ ndaa nə Jailus wɛ ketuu ə ngay ɛyjim, è suuy se wen ge: Wan ə viɛ vi kuomen, nɛ ghàà gese yɛ jefse ndinte. 36Jesus bukle se kenəə kɛ ghene nè suuyen, è suuy se ketuu se ngay ɛyjem ki ge: Ghàà yɛ fan, fó kɛn ɛytem se mɛ. 37Jesus jia beeme ge wel yɛ gwiy ɛ ghene ɛybam buu kɛn Bita ghene Jɛms nɛ̀ Joon wɛ wan-no ə Jɛms. 38Se lu əbliy wɛ ghene nè nduun è chin ɛ bɛy nə ketuu se ngay ɛyjem kii, Jesus yɛn nɛ ghele buke buken, toŋnen ketaan, make giɛ ɛykuo. 39Jesus me lii se ndaa è bif se ghene ge: Ɛybuk yin nɛ̀ ɛytoŋ yine lu yɛ́ ghɛ-ɛ? Wan vine báà kuo, əb buune buunen.

40Ghene me se buu wen buun, əb jum ghene ghel ɛjim se ndaa, è liɛ ba ə wan ghene no ə wan gese nɛ̀ ghel ghɛ ghene ghene kè luun, ghene ghene lii è ndu ghaa wan kè nyiŋen. 41Əb ghal keghoo ə wen, è suuy se wen ge: Talita kumi, nɛ lu ge: Wan əbvii loole ɛyyio.

42Əb loole kɛn se əbliy è se jɛle. Əbchio yum ghene naa se ŋaŋ. [Wan nɛ̂ vin nè lu nguk njio-sebaa ɛyvəm]. 43Jesus chiise se ghene ge ghàà ghene fiɛl kenəə ten se wel ghɛy, è gese suuy ge: Ghɛn fo kefaa é əb yiɛ.

Currently Selected:

Mak 5: oku

Highlight

Copy