Mak 4

Ngane ngos ɛymaken

(Mat 13.1-9; Luk 8.4-8)

1Jesus nɛy gese se dinte əbnəə se ghele nɛ lu əbghune kechem keghuye. Ngose wel kaame ɛ wen ɛybee bɛme, ke ghak, əb lii è diom ɛ məme kenək nɛ lu ɛ jio. Ghel ɛjime me gok ɛ shife jio. 2Əb se dinte əbnəə se ghene se ɛydio ɛ nganse ge:

3Ghɛn yiote! Wel nè lô shik se make ngos, 4è loo mak, ɛylee chemke ɛ beelese, əmnənme gwiy è yiɛ. 5Ɛylee chemke əbkuk ɛtiy, ghaa ntiɛ nɛ luun se ɛylaay è me fəyke chikiy chikiy bek ka ntiɛ nɛ̀ báà se ki kefif se ɛydio. 6Chuy nɛy loo ban, è nyok, ɛy yoble bek ka ɛghaŋe nè báà loote lii se ntiɛ. 7Ɛylee chemke ɛ məme kenjoonjoŋ, ke me tooke, è kuy è chite, ɛy jia koom. 8Ɛylee chemke nɛ lu ɛ ntiɛ ɛyjuŋ è fəy, è kuy è loote koom. Ketuu kelee fó ɛshiɛ ɛsaŋ əmmtal, kelee fó ɛshiɛ ɛsaŋ əmntuufe, kelee ɛshiɛ ɛsaŋ əbviɛ.

9Jesus maa ngan yi è mɛyse è suuy ge: Naa ndɛ wɛ əb kiin əbtuule se yio, əb yio.

Shii ngan sɛ Jesus nè maan

(Mat 13.10-17; Luk 8.9-10)

10Jesus nɛy loo lu wen nyiŋ, ghon-ɛyfɛl nə wen ghɛ njio-sebaa ɛyvəm nɛ̀ ghel ɛlee ghɛ ɛ́ nè báksen se wen me bif se wen ge ngan nɛ̂ shin sɛ dine gee ghɛ-a? 11Əb fise ge: Feyine nɛɛymen ghɛn se ke əbnəə wɛ əb luun ɛ kenlete kum ɛysak ə wen, dî nɛ ghel ghɛ ɛ́ báà se lu ɛ məm ɛysak fɛn lu se yɛ yio əbnəə ɛ nganse, 12ka,

“Ghene yɛ kiy yɛne wiy,

yiote, yio wiy,

buu dî é ghene fiile se Feyine

é əb lɛyse mbeese ghen.”

Jesus loote din kenəə kɛ ngane ngos ɛymaken dinen

(Mat 13.18-23; Luk 8.11-15)

13Jesus me bif se ghene ge: Ghɛn lɛ maa kenəə kɛ ngan yine dinen, é ghɛn nɛ̂y keele lɛɛy ngan selee? 14Ngos yɛ wel nè shiken se mak lu kenəə ə Feyin. 15Ngos yɛ ɛy nè chemken ɛ beelese lu ghele ghii dii ghɛ ɛ́ yion kenəə ə Feyin, Satan me gwiy è fəyse se ghene tetem. 16Nɛ ngos yɛ ɛy nè chemken ɛ əbkuk ɛtiy lu ghele ghii dii ghɛ ɛ́ yion kenəə ə Feyin ɛ́ fiisen nɛ̀ ɛysaŋlee. 17Ɛ́ fiisen dì, ghàà ɛ́ vii ɛytem se ten, ke jia moote. Ngɛkse ghene əbbaanese loo gwiy bek kenəə ə Feyin nɛ̂ kin, ghene me fɛy kɛn se əbliy. 18Nɛ ngos yɛ ɛy nè chemken ɛ məme kenjoonjoŋ lu ghele ghii dii ghɛ ɛ́ yion kenəə ə Feyin, 19dî è loo chii kok, əbnəə ka ɛyfof, nɛ̀ ɛykɛŋe gese nɛ̀ nseemese njuŋe ntiɛ me jefse kenəə ə Feyin se ghene tetem, ke lɛy se lólò. 20Dî nɛ ngos yɛ ɛy nè chemken ɛ ntiɛ ɛyjuŋ lu ghele ghii dii ghɛ ɛ́ yion kenəə ə Feyin, ɛ́ beeme è yɛ nɛɛye ka ke dinen. Ɛlee yɛ koom əmtam əblik əmmtal, nɛ ɛlee koom əblik əmntuufe nɛ ɛlee koom əblik əbviɛ.

Ngane kekaaken

(Luk 8.16-18)

21Jesus me bif se ghene ge: Lɛ lòó wel lii nɛ̀ kekaakene ɛ ndaa è lɛme ɛyshaa keghen, kene ɛ ntinkun, nɛ wiy ɛ ketuu ketatan-a? 22Chèmè lu naa ghɛ kɛ ɛ́ leten leten fene ɛ́ nè lete ka ke náà yɛnsen ɛ ngɛngɛ, nɛ naa ghɛ kɛ ɛ́ chiten lu nɛ ɛ́ náà keele, è fəyse è gwiy so əmlanen. 23Wel wɛ əb kiin əbtuule se yio, əb yio.

24Əb gese suuy se ghene ge: Ghɛn yɛ toknen kum əbnəə wɛ ghɛne yion. Əbfek wɛ wɛ̀ feken kefaa so se geese fo se wel lu əbghene wɛ Feyine náà fek kiɛ so, è loo fo se wɛ̀ è gise. 25Naa ndɛ wɛ əb kiin kefaa lu nɛ Feyine náà gise, nɛ naa ndɛ wɛ əb báà se ki lu nɛ Feyine náà fii kɛ́ ɛylaaye kɛ əb kiin.

Ngane ngos yɛ ɛy kuyen

26Jesus me gese suuy ge: Ɛysak ə Feyine lu ka wele lóó əb mak ngos ɛ ɛylem, 27əb yɛ buune nɛ ntəke, loole nɛ nchuy, nɛ ɛy fəye, kuye, nɛ əb ke wiy əbnəə wɛ əb chian. 28Nɛɛye ntiɛ se wene ngeŋ nɛ ɛy kuye. Loo kɛɛte tum ntoo, kumte felɛɛ ɛysaŋ, kenləysene yɛ lu ɛshiɛ ɛsaŋ. 29Ɛsaŋe biye ɛ leghɛ, əb tum ghel ɛdənene bek ka əbliy ɛydəne kwɛnenmen.

Ngane ngos yɛ ɛy layten è ləysen

(Mat 13.31-32,34; Luk 13.18-19)

30Jesus me gese bif ge: Lòó ghɛsen suuy ge ɛysak ə Feyine lu ka ghɛ, lòó ɛ́ maa ngan ɛykɛ se chiote so? 31Ɛy lu ka ɛyhiɛ ngose fekak yɛ wel nè liɛn è mak ɛ wen ɛylem. 32Dî nɛ ɛ́ make, ɛy kuy è ghak è chia əmkak əmjim, ɛytame tene zəə, əmnənme yɛ tane gwiye bakle ndaase ghen ɛ ten.

33Jesus nè fekte nduu nɛ̀ kenəə ə Feyine se ghene ɛ ngan selee se ɛydio ka shine, liɛ kɛn ɛ jii yɛ ghene nè yion ɛ ten. 34Əb nè báà suuy kenəə se ghene nɛ wiy ɛ nganse, dî nɛ əb loo lu kɛn ghene ghon-ɛyfɛl nə wene, əb banse əbnəə ten əbjim se ghene.

Jesus chil mfəme

(Mat 8.23-27; Luk 8.22-25)

35Nɛy se lu ɛ likfəəy ɛ kechii kɛ Jesus nè maalen nganse ɛ ten dì, əb suuy se ghon-ɛyfɛl nə wene ge: Ghɛsen diaŋ se njine jio se vəəy. 36Ghene me vəse ngose wel yɛ ɛy nè luun fo, è lii se kenək kɛ Jesus nè luun ɛ ten è liɛ wen ghene ghene lòò, ghel ɛlee lii se əbnək əblee è se jumtee. 37Mfəme me fəy, è se lose moo, nɛ əm lii lune se kenək fo. 38Nè lu dì nɛ Jesus nyiim ɛ ɛybame kenək è nyiŋse ketuu ə wen ɛ kebuŋten è se buunee. Ghene yɛm wen è suuy ge: Ndinte, ghɛsen kuo nɛ wɛ̀ bene wiy-a?

39Əb kamke, è kɛy mfəme ten, è suuy se jio yi ge: Ghusen! Teem dî! Mfəme yi ghusen, əblike se lu nyiaŋ. 40Əb me bif se ghene ge: Lu bek ghɛ wɛ ghɛne fanen, ghɛn chèmè bɛɛy ghàà fo ɛytem se mɛ-a?

41Ghene se fane naa se ŋaŋ, kante se ngeŋse ghene ge: Vin lu ndɛ wɛ mfəme gese nɛ̀ jio yionen se wen?

Currently Selected:

Mak 4: oku

Highlight

Copy