Mak 11

Jesus lii ɛ Jolesalem ka Əbfon

(Mat 21.1-11; Luk 19.28-40; Jn 12.12-19)

1Jesus ghene ghon-ɛyfɛl nə wene ndu è bɛɛte Jolesalem, è loo bɛɛte ntɛke sɛ Betfej ghene Betani ɛ kfən kekoo Olif, əb tum ghon-ɛyfɛl nə wen ɛlee ɛbaa; 2è suuy se ghene ge: Ghɛn ndu ɛ ntɛk yɛ ɛy luun ɛ ghɛne mbiy yii. Ghɛne loo lii ɛ leghɛ è yɛn nɛ ɛ́ chəŋ wán kembɛɛybiy, nɛ wel nè bɛɛy ghàà kok, é ghɛn yas è gwiy so. 3Yɛ́ lu ge wel bif se ghɛn ge ghɛn sɛ nɛɛy ghɛ di-a, ghɛn suuy se wen ge: Báàba shii keghene, nɛ əb kase tinse ɛybam kɛn ɛ leenen.

4Ghene loo ndu è yɛn wán kembɛɛybiy nɛ ɛ́ chəŋ ɛ əbchio ndaa əbghun ɛ jii, è me yas. 5Ghel ghɛ ɛ́ nè tiyen fo bif se ghene ge: Ghɛne yásè kembɛɛybiy ki bek ghɛ?

6Ghene suuy kenəə kɛ Jesus kè suuyen, ghel ghii me vəse ghene se nduu so. 7Ghene gwiy nɛ̀ kembɛɛybiy kii se Jesus è yiysen nɛ̀ ndəyse kenton nə ghene, Jesus me kok è diom se ten. 8Əb loo ndu ghel se ɛydio me se saŋte ndəyse kenton nə ghen se jii nɛ ɛlee kaŋte ɛytam əmkak ɛyzəə ɛ telem nyiŋse se jii. 9Ghel ghɛ ɛ́ nè nduun ɛ mbiy nɛ̀ ghɛ ɛ́ nè gwiyen ɛybam me se waame ge: Ɛykokse lu se Feyine, ɛykokse lu se wen wɛ əb gwiyen ɛ əbtaawe nə Báàba Feyin. 10Ɛykokse yɛ lu se wen wɛ əb se gwiyen se yɛ sak əbfone ba ə wɛsen wɛ David! Ɛykokse yɛ lu se Feyine!

11Jesus me ndu è chin ɛ Jolesalem, è lii ɛ ndaa-ɛykokse è kiy kal se yɛn ka əbnəə əbjime luun, è loo mɛyse nɛ əbtəke se jiɛ, ghene ghon-ɛyfɛl nə wene ghɛ njio-sebaa ɛyvəm me lòò è kase fiile è ndu ɛ Betani.

Jesus liŋ fekake fig

(Mat 21.18-19)

12Əbtəke nɛy yio, Jesus ghene ghon-ɛyfɛle lòò se Betani è se fiile se Jolesalem, jeŋ se yafe wen. 13Əb loo mak ɛyshiɛ è yɛn fekake fig nɛ fe tɛk, zəəlèè. Əb ndu se kiy ge fetame sɛ lu ɛ ten-a, è yɛn nɛ lu kɛn ɛghaa ɛ ten bek ge nè bɛɛy ghàà yɛ lu əbliy wɛ fe sɛɛ koom ɛ ten. 14Jesus me suuy se fekake fig fii ge: Wele jia bo yî kase yiɛ fetame fiɛ.

Əb loo suuy dì ghon-ɛyfɛl nə wene yio.

Jesus jum ghɛ́ əbwɛye se ndaa-ɛykokse

(Mat 21.12-17; Luk 19.45-48; Jn 2.13-22)

15Ghene chin ɛ Jolesalem, Jesus ndu è lii se ndaa-ɛykokse è me se jume ghel ghɛ ɛ́ nè kamnen əbwɛy fo. Əb bvəŋse əbtatan wɛ ɛ́ nè kubsen əbkaa ɛ ten, gese nɛ̀ əbtiɛ ghel ghɛ ɛ́ nè feenen əbnlal, 16beeme wiy ge wel bo bɛɛy kefaa è tosen so ɛ ndaa-ɛykokse. 17Əb me se dinte əbnəə se ghele, suuy ge: Ɛ́ lɛ báà nyak ge: Ɛ́ toŋte ndaa ə yom ge ndaa ɛyjem se əbtume əbjime, ghɛne sɛ́y bense se mbvək ɛchoŋ-a!

18Ghele mbiy se ndaa-ɛykokse Feyin gese nɛ̀ ghɛ́ ɛydinte tesake yio kenəə ten è me se kɛŋe jii yɛ yuy Jesus ɛ ten. Ghene nè fane wen bek ge ghel ɛjime nè lu nɛ̀ əbchíò əbyúméné kum əbnəə wɛ əb nè dinten.

19Nɛy se lu ɛ likfəəy Jesus ghene ghon-ɛyfɛl nə wene lòò se ntɛk fo.

Jesus din kenəə kum fekake fig fɛ fe nè yoblen

(Mat 21.20-22)

20Nɛy se lu ɛ bvəse bvəse, Jesus ghene ghon-ɛyfɛl nə wene se chia è yɛn nɛ fekake fig fii yoblemen è chin se ɛghaŋ. 21Bita me kuume è suuy se Jesus ge: Ndinte, yɛn-a! Fekake fig fɛ wɛ̀ nè liŋen fi yoblemen!

22Jesus suuy se ghene ge: Ghɛn fó ɛytem se Feyine. 23Mɛ suuy əbluuy se ghɛn ge, naa ndɛ wɛ əb suuyen se kfən yin ge: Məəke è ndu fɛy se jio ɛyghuy, nɛ əb bééme se wen ɛytem, maanen wiy maanen ge lòó ke gan, é Feyine nɛɛy é ke gan. 24Mɛ me se suuy se ghɛn ge naa ghɛ kɛ ghɛne bifen se Feyine əbliy wɛ ghɛne jemen, foo ɛytem se wen ge əb fomen, é ghɛn kiile. 25Naa ɛ leghɛ wɛ ghɛn teem se yɛ jem, wele yɛ ki kenəə kum wel, əb lɛyse se wen, é ba ə wɛn wɛ əb luun ɛ ɛyyio me lɛyse sɛ̂y mbee ə sɛn. 26[Dî nɛ ghɛn lòò jia yɛ lɛyse əbjas ə ghel ɛlee, é Ba ə wɛn wɛ əb luun ɛ ɛyyio jia yɛ lɛyse mbee sɛn].

Ɛ́ bif ghaa əbtaawe Jesus lòòn

(Mat 21.23-27; Luk 20.1-8)

27Jesus ghene ghon-ɛyfɛl nə wene kase fiile se Jolesalem. Əb ndu ɛ ndaa-ɛykokse è loo ghanle fo ghele mbiy se ndaa-ɛykokse Feyin, nɛ̀ ghɛ́ ɛydinte tesake gese nɛ̀ chɛɛse kokte gwiy, 28è se bife se wen ge: Wɛ̀ nɛɛy əbnəə vin ɛ əbtaawe nə ndɛ? Fo ndɛ əbtaawe ge wɛ̀ yɛ nɛɛy əbghene?

29Jesus fise ge: Mɛ bif ɛybif se ghɛn. Ghɛn fó ɛyfise ten, é mɛ me fekte ghaa mɛ liɛn əbtaawe se yɛ nɛɛy əbnəə nɛ̂ vin so. 30Fo ndɛ əbtaawe ge Joon yɛ foo moo, nè fo Feyin moo nè fo wel-a? Ghɛn fise yi mɛ.

31Ghene me se beke ɛ ghene məm ge: Ghɛsen loo lu è suuy ge ə́b nè lòò se Feyine, é əb me bif ge sɛ nè nɛɛy ghɛ ge ghɛsen jia beeme kenəə Joon-a? 32Yɛ lu wɛ ghɛsen suuy ge ə́b nè lòò se wel é ke yɛ lu ɛ titiy-a? Ghene nè fane ghel bek ge wel əbjim nè beeme ge Joon lu wele ntum nə Feyine. 33Ghene me fise se Jesus ge: Ghɛse báà se ke.

Əb suuy se ghene ge: Fene mɛ jia fekte se ghɛn ghaa mɛ liɛn əbtaawe se yɛ nɛɛy əbnəə wɛ́ tene so.

Currently Selected:

Mak 11: oku

Highlight

Copy