Mak 10
10
Ghàà wel jum wiy ə wen
(Mat 19.1-12; Luk 16.18)
1Jesus nɛy me lòò se Kabanaum è ndu ɛ keleŋe Judea è me diaŋ ɛ njine jio Joldan, ngose wel gese kaame ɛ wen ɛybee, əb me se dinte əbnəə se ghene kɛn ka əb nè sɛɛ nɛɛy.
2Ghele kenone Falisee ɛlee kokte è gwiy se mome wen, è bif ge: Nchil ə yɛsen lɛ dine ge lòó wel jum wiy ə wen-a?
3Jesus me bif ge: Moses nè fo nchil se ghɛn gee ghɛ?
4Ghene fise ge: Moses nè lô vəse ge wel yɛ̂ loo lu se jum əbvii, əb fó ŋwaale se wen yɛ ɛydinen ge ghene wen giabsenmen.
5Jesus me fise se ghene ge: Moses nè fo nchil nɛ̂ yin se ghɛn bek ka ghɛn nè taan ketuu se yio kenəə kɛ Feyine nè dinten se ghɛn. 6Ghɛn keele ge, nè lu ɛ kenkɛɛte, Feyine bom əbluumen, ghene əbvii. 7Bek kii nɛ̂ kine, əbluumene yî yɛ lòò əb vəse ba ə wen ghene no ə wen ghene wiy ə wen chinten. 8Ka ke luun dì fene ghene bo bɛɛy wiy ghel ndun ndun, ghene shi wel əbmok. 9Ke me se lu ge, ghàà wel yî giabsen kii dii kɛ Feyine chintenmen.
10Ghene nɛy loo lu ɛ ndaa, ghon-ɛyfɛl nə wene gese bif kenəə kum kenəə nɛ̂ ki se wen. 11Əb fise ge: Naa ndɛ wɛ əb jumen wiy ə wen, è ndu əbvii əbchin lu nɛ əb jas se əbvii wɛ̂ mbiy bek ka əb liin nchiine kenjaŋ 12Ghɛɛ ghɛɛ ka əbvii wɛ əb fəyen lum ə wen è lii ghene əbluumen əbchin lu nɛ əb lii nchiine kenjaŋ.
Jesuse bose ghon ɛtɛlɛɛ
(Mat 19.13-15; Luk 18.15-17)
13Ghel ɛlee se gwiye nɛ̀ ghone ɛtɛlɛɛ se Jesus ge əb kum nɛ̀ keghoo nzəətee, ghon-ɛyfɛl nə wene sɛ́y se yole ghene yolen. 14Jesus yɛn ke yaf wen, əb suuy se ghene ge: Ghɛn vəse ghon é ghene gwiy se mɛ, ghàà ghɛn se jum bek ge ɛysak ə Feyine lu se ghel ka ghine. 15Mɛ suuy əbluuy se ghɛn ge: Naa ndɛ wɛ əb báà beeme ɛysak ə Feyin ka wán əbtɛlɛ jia yî lii se ten. 16Əb suuy dì, è me se koyten ghon ghi, lɛme ɛghoo ɛ ghene əbtuu, bose ghene.
Ketaa nɛ wel əbghaken kiile ɛyboy
(Mat 19.16-30; Luk 18.18-30)
17Nɛy se lu nɛ Jesus se lòò, wel əblee nyiŋ, è gwiy, è təm ɛləy ɛ wen ɛyshiɛ, è suuy se wen ge: Ndinte, wɛ̀ lu wel əbjuŋ. Lòó mɛ nɛɛy ghɛ se geese kiile ɛychii yɛ ɛy jia yî mɛy?
18Jesus fise ge: Lu bek ghɛ wɛ wɛ̀ toŋten mɛ ge wel əbjuŋ. Wel əbjuŋ báà se lu buu kɛn Feyin wen nyiŋ. 19Wɛ̀ ke nchil sɛ ge: Ghàà yuy wel, ghàà liɛ wiy ə wel, ghàà choŋ, ghàà toy wel se kenəə, ghàà fif wel, nɛ̀ yɛ ge: Ngvəmle ba ə viɛ ghene no ə viɛ.
20Wel vi fise ge: Ndinte, mɛ nè se lɛme nchil shin sejim kɛɛte se əmtɛlɛ.
21Jesus kiy wen nɛ̀ ɛykoŋe è suuy ge: Kenəə bɛɛy kemok kɛ lòó wɛ̀ nɛɛy. Ndu, è feene əbfua ə viɛ əbjim, è fo əbkaa ten se ghɛ́ ketane, è yɛ jumte mɛ. Wɛ̀ nɛɛy dì é wɛ̀ yɛ ki əbghaake nɛ lu ɛyyio. 22Əb yio di, ɛykek wene gvənen, bek ge əb nè ki ɛykɛŋ naa se ŋaŋ. Əb se lóò se fo lu ɛysen-ɛysen.
23Jesus me kiynen əblik, è suuy se ghon-ɛyfɛl nə wene ge: Ketaa se ghɛ́ əmkaa se lii se ɛysak nə Feyine. 24Ghene se lu nɛ̀ əbchíò əbyúméné. Jesus me gese suuy se ghene ge: Ghon ghine, ketaa náà se ŋaŋ se [ghel ghɛ samsen əbkaa] se lii se ɛysak nə Feyine! 25Ke bonen se nyam fenkok#10.25 Nyam fenkok nɛ̂ yi lu nyam ɛylee yɛ ɛy sɛɛ lu əbkwake kesɛsɛy nɛ é toŋte əblame mekale ge Kamel. se chia ɛ kebuke tas chia ka wel əbghaken yɛ lu wel əblee ɛ məme ɛysak nə Feyine.
26Ghon-ɛyfɛle yio kii nɛ̂ kine è se loote lu nɛ̀ əbchíò əbyúméné kante ge: Ke lòò è yɛ lu dì, é naa boy ndɛ?
27Jesus kiy ghene, è suuy ge: Lu se wel nɛ kenəə tene taa, dî nɛ lu kenəə kebole se Feyine. Lòó kenəə jia ghak Feyin se nɛɛy.
28Bita me suuy se wen ge: Yɛn-a, ghɛs vəsemen əbnəə ə wɛs əbjim è se jumte ɛybam ə yiɛ.
29Jesus me suuy se ghene ge: Mɛ suuy əbluuy se ghɛn ge: Wel wiy wɛ əb vəsen kebɛy ə wen, kene ghone-no ə wen ɛluumene, kene ɛkiye, kene no ə wen, kene ba ə wen, kene ghon ə wen, kene əbkwak ə wen, bek mɛ, gese nɛ̀ sakghɛ əbjuŋ, 30wɛ əb jia nɛ̂y kiile əbfua ten se ɛydio ɛ mbi fɛn. Ə́b nɛ̂y kiile ndaase, əbbɛy, nɛ̀ ghone-nyii ɛluumene, nɛ̀ ɛkiye, nɛ̀ ɛnoo ə wene, nɛ̀ ghone, gese nɛ̀ ɛykwake naa ka əblik əbviɛ di, è gese kiile ngɛkse, é loo lu ɛ mbi yɛ ɛy gwiyen é əb kiile ɛychii yɛ ɛy jia yî mɛy. 31Dî nɛ ghel se ɛydio ghɛ ɛ́ luun ɛ mbiy ɛ leenene nɛ̂y yɛ lu ɛybam nɛ̀ ghel se ɛydio ghɛ ɛ́ luun ɛybame nɛ̂y yɛ lu ɛ mbiy.
Jesus gese suuy ge ɛ́ nɛy yuy yi
(Mat 20.17-19; Luk 18.31-34)
32Jesus ghene ghon-ɛyfɛl nə wene lòò è se koke ɛ Jolesalem nɛ Jesus nduu ɛ ghene mbiy. Ghon-ɛyfɛl nə wene se lu nɛ̀ əbchíò əbyúméné, nɛ ghel ghɛ ɛ́ nè nduun ɛ wen ɛybam gese fane. Jesus liɛ ghɛ́ ntum nə wene ghɛ njio-sebaa ɛyvəm ghene ghene bak əbghun, əb me kɛɛte se suuy se ghene kenəə kɛ ke nɛ̂y gan se wen. 33Əb nè suuye ge: Yɛn-a, ghɛsen kok ɛ Jolesalem ghaa ɛ́ nɛ̂y fo Wanwel se ghele mbiy se ghɛ́ ntaŋlee, nɛ̀ ghɛ́ ɛydinte tesake, ɛ́ chiase ɛysak ge əb lu se kuo, è vii wen se keghoo nɛ̀ ghel əbtume. 34É ghene nyable nɛ̀ wen è tio teliɛ ɛ wen əbghun, è tɛl wen, è yuy wen, é əbchii chia əbtal é əb loolé se ɛykuo.
Jɛms ghene Joon lon əblik əbgaŋtene
(Mat 20.20-28)
35Jɛms ghene Joon ghɛ ghone Zebedee me kokte è gwiy è suuy se Jesus ge: Ndinte, ghɛse kɛŋe ge wɛ̀ nɛɛy naa ghɛ se ghɛs kɛ ghɛse bif se wɛ̀.
36Əb bif se ghene ge: Ghɛne kɛŋe ge mɛ nɛɛy ghɛ se ghɛn?
37Ghene fise ge: Wɛ̀ náà loo sak əbfon ə viɛ wɛ̀ nɛɛy é ghɛs diom ɛ wɛ̀ ɛybee, wel əblee se ɛybee əbkoy əbkiye, nɛ̀ əblee se ɛybee əbkoy əbtaa.
38Jesus suuy se ghene ge: Ghɛne báà se ke kenəə kɛ ghɛne bifen kin. Lɛ lòó ghɛn nəə əbbome ngɛk wɛ mɛ nəə-a? Ghɛne lɛ nɛ̂y fii ngɛk yɛ ɛ́ nɛ̂y fo san-a?
39Ghene fise ge: Ghɛs lu kebaaten.
Jesus me suuy se ghene ge: Ghɛne nɛ̂y nəə əbbom wɛ mɛ nəə, è gese fii ngɛk sɛ ɛ́ fó san. 40Dî nɛ mɛ báà se ki əbtaawe se choke ghel ghɛ ɛ́ yî diom se mɛ ɛybee əbkoy əbtaa nɛ se mɛ ɛybee əbkoy əbkiye. Əblik nɛ̂ vine lu se ghel ghɛ ɛ́ nè siysen se ghene.
41Ghon-ɛyfɛl ghɛ ɛyvəme yio kenəə nɛ̂ kin, è me se yafse ɛytem se Jɛms ghene Joon. 42Jesus me jaŋ ghene ghel ɛjim è suuy ge: Ké ghɛn ke ge ghel ghɛ ɛ́ luun se yɛ sak əbtum nɛ ghel ghɛ tiyen ɛ mbiy nə ghene ki əbtaawe se nɛɛy naa ghɛ se ghene? 43Ké dí jia nɛ̂y yɛ lu dî ɛ ghɛne məm. Wel ɛ ghɛne məm lòò è yɛ kɛŋ se yɛ lu ketuu, fene əb lu se yɛ fɛl se wel əbjim. 44Nɛ naa ndɛ wɛ əb kɛŋen se yɛ lu wele mbiy lu se yɛ lu kekos se ghɛn ɛjim. 45Wanwel dì nè báà gwiy ge ɛ́ yɛ fɛl se wen. Əb nè gwiy se yɛ fɛl se ghele, è fo ketuu ə wen ka ngvəə ntaŋle se tene ghel se ɛydio se ghene mbeese.
Jesus chuk ɛshiɛ Baltimaeus
(Mat 20.29-34; Luk 18.35-43)
46Jesus ghene ghon-ɛyfɛl nə wene ndu è chin ɛ Jeliko, è loo chia, feliɛ wele lòò ɛ ghene ɛybam. Ghene loo ndu è yɛn kenfef nɛ ɛ́ toŋte ge Baltimaeus (nɛ lu wán ə Timaeus), nɛ əb diom è se lone əbfua. 47Əb yio ge lu Jesus wɛ̂ Nazalet ka əb chian, è me se jaŋe ge: Jesus wɛ wán ə David, koosen ɛysen se mɛ!
48Ghel se ɛydio me se wamnen wen wamnen, suuy ge əb yɛ lu ɛ chichi. Əb sɛ́y gese jaŋ ketaan ge: Wan ə David, koosen ɛysen se mɛ!
49Jesus teem è suuy se ghon-ɛyfɛl nə wene ge:
Ghɛn jaŋ wen. Ɛ́ jaŋ kenfef ki è suuy se wen ge: Kul ɛyteme. Loole ɛyyio, əb jaŋe wɛ̀.
50Əb maay ndəy sɛ əb nè limen, è tum è lòòle è ndu se Jesus.
51Jesus bif se wen ge: Wɛ̀ kɛŋe ge mɛ nɛɛy ghɛ se wɛ̀?
Kenfef ki fise ge: Ndinte! Mɛ kɛŋe ge ɛshiɛ ə ghome yiase!
52Jesus suuy se wen ge: Yɛɛ nduu, ɛytem yɛ wɛ̀ foon san nɛɛymen wɛ̀ bonen.
Ɛshiɛ kenfef kii ko me yiase kɛn se əbliy, əb se yɛne əblik, è me lòò è se nduu ɛ Jesus ɛybam.
Currently Selected:
Mak 10: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012
