Mɑ́lɛ́kúshi 4
4
Sɑknɛkɛt nǔu mbiyúu
(Mɑtʉ̈ɔ 13.1-9; Lúkɑ́shi 8.4-8)
1Yɛ́su kɑ pɛn ńzɛ nɛzíꞋ pʉɔ nɛ́ nu-Sɛ́ mbʉʉ-ŋki-Ŋɡɑlilɛɛ, nɔɔ-lɑ́Ꞌ tɔ́ nɛjɔ́ŋ yɛ́ tɛ ńzɑ́ɑ tɛꞋ, pɔ́Ꞌɔ lɑ́, ɑ kúu tsɛt kɑnúꞋ yi ɛ́ tsɛt ŋki, ńnɑ́ŋ. LɑꞋ tʉ́ʉ mbʉʉ-ŋki. 2A kɑ lɔk sɑknɛkɛt ńzíꞋ wɔ́p nɛ́ mɛnu tɛ ɛ́ zɑ́ɑ zɑ́ɑnɛ, ḿbɔ́ ńzíꞋ wɔ́p ńcú ŋɡɔ: 3«Pʉʉ zẅíꞋlɛ ńzúꞋ, wɛcɔ́ ŋu kɑ ɡʉ mɑꞋ mbiyúu, 4ńtɔ́ nɛmɑꞋ, mɛcɔ́ mɛmbɑŋ vu mbʉʉ-sɛ̂ndúŋ, pɛshʉ́ŋ tɔ́ ńdɑklɛ ŋ́kwɛ́t. 5Mɛcɔ́ mɛmbɑŋ vu nǔu zʉꞋ-mɛŋɡɔꞋ, zʉꞋ yí tsɛ́tsɑ́Ꞌ kɑ́ pɔ́ zúꞋu tɛꞋ pɔ́, ɛ́fɛ́Ꞌnɛ ɛ́sɑ́Ꞌ mbíꞌŋɡɔ ɛ́ kɑ zɑ́pmɛ zɑ́pmɛnɛ. 6Mɔ́nɛm ɡɛ ńtɑ́ sʉ́Ꞌnɛ, ńtɔɔ, ɛ́ zúu, mbíꞌŋɡɔ mɛŋɑŋ ŋ́kɑɑ lɑtnɛ sɛ́ pɔ́. 7Mɛcɔ́ mɛmbɑŋ vu tsɛt nɛɡíi kɛpɔŋ. Nɛɡíi kɛpɔŋ ɡɛ ńdɔ sɛ́, ɛ́fɛ́mɛ mîmɑ́, ɛ́ pɔɔ zɛ́m. 8Mɛcɔ́ mɛmbɑŋ vu ɡúu nǔu zʉꞋ-tsɛtsɑ́Ꞌ sʉ́Ꞌnɛ, ŋ́ɡúꞋ, ɛ́sɑ́ɑ sʉ́Ꞌnɛ. Mɛcɔ́ mɛtsɛ́n pɔ́ ŋ́ɡɑ́ mbɑŋ mɛɡɛ́mɛ́ntɑ́t, mɛcɔ́ ɡɑ́ mɛɡɛ́mɛ́nɛ́ntúkú, mɛcɔ́ ɡɑ́ ŋkʉ.» 9Yɛ́su ɡɔ́ mɛkŋɛ ńcú ŋɡɔ: «Ŋu lɑɑ ŋ́ɡẅɛɛ mɛtúutɛ́ nɛlɔk ńzúꞋ nu, ɑ zúꞋ.»
Yɛ́su lɔk sɑknɛkɛt ɛ́sẅíŋɛ mɛlɑ́Ꞌ kʉ̈ɔ́?
10LɑꞋ ɡɛ ŋ́ɡʉ, pʉɔ pi pɔ́p kɑ zɛɛnɛ ḿbɔ́ nɛjɔ́ŋ Yɛ́su pɔ́p ɡɑŋku pɛ́ ntsɔ̌ppɑ́ nɛ́ nɛɡɛ́m tsʉꞋ nzʉʉ, ḿbíkŋɛ wɛ́ ŋɡɔ ɑ kyɛ́Ꞌtɛ mɛsɑknɛkɛt mɑ́ ɛ́sẅíi wɔ́p. 11A cú mbɔ̌ pɔ́p ŋɡɔ: «Sɛ́ kɑ ɡɛ ŋɡɔ pʉʉ wɔ jínɛ nu nɛ́nẅín nǔu nɛfɔɔ nɛ́ ni ɛ́ lʉɔmɛ́nɛ. Lɑ́ ɛ́ ɡʉ nǔu pɛcɔ́ pʉɔ pi pɔ́p kɑ́ pɔ́ nǔu yʉ́ʉ ku pɔ́, pɔ́p zúꞋ yɔ́p pɔ ndɑꞋ ŋɡɔ pɛ́ lɔk sɑknɛkɛt ńcú nu.»
12Ɛ́ pɔ́Ꞌɔ lɑ́, ḿbɔ́ pɑꞋ pɛ́ kɑ ŋwɑꞋnɛnɛ ŋɡɔ:
«Pɔ́p ɡʉ ḿbɔ́ ńdíŋɛ zʉꞋ, ŋ́kɛ́ ḿbɔɔ yúu jʉ́ɔ
ḿbɔ́ ńzúꞋ zʉꞋ, ḿbɔɔ zúꞋ tɛ ńzúꞋ pɔ́.
Ɛ́ pɛ́Ꞌɛ ḿbɔɔ pɔ́Ꞌɔ pɔ́, mbɔ pɔ́p ḿbɛn mbɔ̌ Sɛ́,
ɑ likŋɛ mɛnu kɛpɔŋ mɔ́p#4.12 Es 6.9-10.»
Nu yi sɑknɛkɛt nǔu mbiyúu lɔknɛ ńcú
13Yɛ́su pɛn ńcú mbɔ̌ pɔ́p ŋɡɔ: «Pʉʉ kɑ́ zúꞋ yɔ sɑknɛkɛt pɔ́ pɑꞋnɛ, tɛ ḿbɛn ńzúꞋ mɛcɔ́ pɔ ŋɡɔ́ku?
14Ŋu ẅí ɑ pinɛ yúu, ɑ pi sẅíŋɛ-Sɛ́. 15Mbiyúu mi ɛ́ vunɛ mbʉʉ-sɛ̂ndúŋ, lɔk ḿbɔ́ pʉɔ pi pɔ́p zúꞋnɛ sẅíŋɛ-Sɛ́, Sɑ́ttɑ ɡɔ́ɔ ńtɔ́, ɛ́fú tsɛt tʉ́m yɔ́p ńcẅɛɛtɛ. 16Mbiyúu mi ɛ́ vunɛ zʉꞋ-mɛŋɡɔꞋ lɔk ḿbɔ́ pʉɔ pi pɔ́p zúꞋnɛ sẅíŋɛ-Sɛ́, ɛ́fɛ́Ꞌnɛ ḿbɛ́m nɛ́ tsɑ́ɑtɛ. 17Lɑ́, ɛ́ pɔɔ lɑt mɛŋɑŋ tsɛt tʉ́m pɔ́p pɔ́, mbíꞌŋɡɔ pɔ́p pɔ́ pʉɔ-lɛ́Ꞌlɑ́Ꞌ, pɛ́ pɔ́ tɛ ńzɛ nɛkʉ́ʉnɛ wɔ́p, ńnyɛt wɔ́p nɛ́ ŋɡʉ̈ɔ́Ꞌ mɛlɑ́Ꞌ nu-Sɛ́, pɔ́p ɡɔ́ɔ ḿmɛꞋ. 18Mbiyúu mi ɛ́ vunɛ tsɛt nɛɡíi kɛpɔŋ, lɔk ḿbɔ́ pʉɔ pi pɔ́p zúꞋnɛ sẅíŋɛ-Sɛ́, 19ŋ́ɡɛ ńzɛ nɛmʉk mɛnu ndǔ mbí, ŋkɑ́p zɛ nɛfʉ́klɛ wɔ́p, pɔ́p pɔ́ ńtsɑ́ɑ mɛcɔ́ mɛyúu tɛ ńzɑ́ɑ, yîyɑ́ yúu ɡɛ sẅíŋɛ-Sɛ́ mɛ tʉ́m pɔ́p kɛ́ zɛ́m ntɑ́ɑ. 20Mbiyúu mi ɛ́ vunɛ nǔu tsɛ́tsɑ́ꞌ sʉ́Ꞌnɛ, lɔk ḿbɔ́ pʉɔ pi pɔ́p zúꞋ sẅíŋɛ-Sɛ́, ḿbɛ́m, ḿbɛn ḿbɔ́ ŋ́ɡɛ pɑꞋ nu-Sɛ́ píkŋɛnɛ, ńdɔk ŋ́ɡʉ mbi, pɔ́p lɔk ḿbɔ́ pɑꞋ mbiyúu mi yɛcɔ́ mbɑŋ pɔ́ ɛ́sɑ́Ꞌ ńtɔ́ ŋ́ɡɑ́ mɛmbɑŋ mɛɡɛ́mɛ́ntɑ́t, yɛcɔ́ ɡɑ́ mɛɡɛ́mɛ́nɛ́ntúkú, yɛcɔ́ ɡɑ́ ŋkʉ.»
Sɑknɛkɛt nǔu lɑ̂m
(Lúkɑ́shi 8.16-18)
21Yɛ́su pɛn ńcú mbɔ̌ pɔ́p ŋɡɔ: «Tɛ ɛ́ lɑɑ ḿbɔ́ ŋu lɔk lɑ̂m ńtɔ́, ḿbɛn ńdɔk kɛ́kɔ́ɔ ŋ́kẅíipɛ, kɛ ńtík pɔ ntsɛnŋkúu? Pɛ́ kɛ́ tík pɔ nǔu zʉꞋ yi pɛ́ ńjʉ́ɔ pɔ́ɔ? 22Kʉ̈ɔ́ lɑ́ yi ɛ́ lʉɔmɛ́nɛ ŋkɔ̂ɔnɛ, ɛ́ pɔ́ pɔ yi pɛ́ ɡʉ ńnyɛt pɛ́ jʉ́ɔ, nu yi ɛ́ ŋkɔ̂ɔnɛ ḿbɔ́ ntsɛm, pɛ́ ɡʉ kíɛꞋ ɛ́sẅíi mɑ́ntɑ́ɑ. 23Ŋu lɑɑ ŋ́ɡẅɛɛ mɛtúutɛ́ nɛlɔk ńzúꞋ nu, ɑ zúꞋ.»
24Yɛ́su pɛn ńcú mbɔ̌ pɔ́p ŋɡɔ: «Pʉʉ lɑɑ ńzẅíꞋlɛ nu-Sɛ́ pʉʉ zúꞋ tɛ ńzúꞋ. Nu yi pʉʉ niitɛ ńzúꞋ sʉ́Ꞌnɛ, ndɛn ẅi ŋu lɔknɛ ńníꞋ tú ńzúꞋ nu-Sɛ́, ɛ́ yɛ́t lɑ́ ɑ ɡʉ ńdɔk ŋ́ɡɑ́ jínu mbɔ̌ ŋɡɑŋ, tɛ ḿbɛn ŋ́kẅiꞋ. 25Ŋu ẅi ɑ ɡẅɛɛnɛ yúu, pɛ́ ɡʉ ŋ́ɡɛ ŋ́kẅiꞋ, ŋu ẅi ɑ kɑ́ ɡẅɛɛ, pɛ́ cẅɛ́ɛ mɔ́zʉꞋ ẅi ɑ zɛnɛ ŋ́ɡẅɛɛ.»
Sɑknɛkɛt nǔu mbiyúu mi ɛ́ sɛ́ ŋ́ɡúꞋ
26Yɛ́su pɛn ńcú ŋɡɔ: «Nɛfɔɔ-Sɛ́ pɔ́ pɑꞋ mbiyúu mi ŋu mɑꞋnɛ nɑŋ yɛ́ lɑ́, 27ɑ pɔ́ tɛ ḿmɑꞋ, ŋ́ɡʉ, kɛ ɑ sɛ́ ńdɛ́ lɛ́nɛ ɔɔ, kɛ ɑ kɑ́ pɔ́ ńdɛ́ pɔ́ ɔɔ, mbɔ yúu sɛ́ ŋ́ɡúꞋ nɛnɛm pɔ́p nɛtúꞋ, ɑ pɔɔ jí yúu mi ɛ́ ɡɛnɛ lɑ́ ɛ́ ɡú pɔ́. 28Tsɛ́tsɑ́Ꞌ zɛ́nɛjʉ́ ɡɛnɛ mbiyúu ɛ́sɑ́Ꞌ, ŋ́ɡúꞋ, ɛ́sɑ́ɑ mɛtsɔ́Ꞌ, ḿmuꞋtɛ. 29Mɛtsɔ́Ꞌ ɡɛ ńtʉʉ, ŋɡɑŋ-nɑŋ tsʉꞋ ńtúu pɔ pʉɔ ŋkɑꞋ nɛlɑk yúu, mbíꞌŋɡɔ ŋkɑ́ nɛlɑk yúu kuꞋ.»
Sɑknɛkɛt nǔu mɔ́nɛsɑɑ-mbi-yúu
(Mɑtʉ̈ɔ 13.31-32; Lúkɑ́shi 13.18-19)
30Yɛ́su pɛn ńcú ŋɡɔ: «Ɛ́ lɑɑ ḿbɔ́ pɛkŋɛ lɔk kʉ̈ɔ́ ḿbɛ́ɛ fʉꞋ pɑꞋ Nɛfɔɔ-Sɛ́ pɔ́nɛ, ḿbɔ́ pɛkŋɛ lɔk yɛ́tɛ́ sɑknɛkɛt ńdɛꞋlɛ? 31Ɛ́ ɡɔ́ɔ ɛ́fí mbiyúu mi ɛ́ kʉ̈ɔ́knɛ pɑꞋ yɛcɔ́ ntɛ́ nɛsɑɑ-sɛ́súk#4.31 Nɛsɑɑ-sɛ́súk lɔk ḿbɔ́: «Moutɑrde.». Pɛ́ ɡɔ́ mɑꞋ, ɛ́ kʉ̈ɔ́k ńtsɑ mɛcɔ́ mɛmbi-yúupɛjʉ́ pinɛ pɛ́ pinɛ ŋkɑꞋ. 32Lɑ́ pɛ́ kɛ́ ḿbɔ́ tɛ ḿbi, ɛ́ sɑ́Ꞌ, ŋ́ɡúꞋ ńtsɑ mɛcɔ́ yúupɛjʉ́ tsʉʉ yi ɛ́ tsɛt ŋkɑꞋ, ńtɔ́k pɛmɑ́ mbɔ́, ŋ́ɡúꞋ, ńtsʉ́ꞌ tɛ ḿbɔ́ yi ɛ́ lɑɑ ḿbɔ́ pɛshʉ́ŋ pɔ́ ńtɔ́ ḿbɑ́Ꞌ mɛŋkɑɑ mɔ́p tsɛtú.»
33Yɔ pɑꞋ Yɛ́su kɑ pɔ́ ńzíꞋ pʉɔ nɛ́ yúu pɔ́Ꞌɔ, ńdɔk pɔ mɛsɑknɛkɛt pɑꞋ mɔnɛ, lɑ sẅíi nu-Sɛ́, ɛ́sẅíi nǔu ntɛ́ yi ḿbɔ́ lɑ́Ꞌ kuꞋ nɛzúꞋ. 34A ŋ́kɑɑ pɔ́ ɛ́sẅíi wɔ́p nɛ́ nu kɛ́ lɔk pɔ́ sɑknɛkɛt pɔ́, ḿbɔ́ ŋkɑ́ yi pɔ́p ɡɑŋku pɛ́ tsʉ́Ꞌnɛ ḿbɔ́, ɑ ŋ́kyɛ́Ꞌtɛ ɛ́sẅíi wɔ́p pɑꞋ ɛ́ lɔknɛ ńcú.
Yɛ́su ɡɛ fɛ́m zɑ́Ꞌnɛ
(Mɑtʉ̈ɔ 8.23-27; Lúkɑ́shi 8.22-25)
35Ɛ́ ɡɛ ḿbɔ́ ntsuŋkẅɛ́Ꞌ lɛ́Ꞌ ɛ̂yɑ́, Yɛ́su cú mbɔ̌ ɡɑŋku pɛ́ ŋɡɔ: «Pɛkŋɛ túu ŋki, ŋ́ɡʉ nǔu yɛcɔ́ njʉ́n.» 36Gɑŋku pɛ́ nɑ́ nɔɔ-lɑ́Ꞌ zúꞋu, ŋ́kẅɛ́ɛtɛ wɛ́ tsɛt kɑnúꞋ yi ɑ ḿbɔ́nɛ tsɛtú ḿbɔ́ ńzíꞋ pʉɔ nɛ́ nu-Sɛ́, ńdɔk wɛ́ ŋ́ɡʉ. Pɔ́p pɛcɔ́ pɛkɑnúꞋ kɑ tɛmtɛ ḿbɔ́ ŋ́ɡʉ, 37yɛcɔ́ mɑ́mɑ́ fɛ́m nɑ́ŋ tɛ ńzɛ nɛtsʉꞌnɛ, ŋki m̄bɔ́ ḿbʉʉnɛ ŋ́kúu tsɛt kɑnúꞋ, tɛ ɛ́ tsʉꞋ ŋ́ɡʉ pɔ nɛlúu, 38Yɛ́su pɔ́ nzʉʉ, ńjʉ́ɔꞋnɛ nǔu yúu ḿbɔ́ ńdɛ́, ɡɑŋku pɛ́ pɔ́ jʉɔmɛ wɛ́ ńcú ŋɡɔ: «Ndɛ, ńjí ŋɡɔ ɔ kɑ́ pɔ́ ńjʉ́ɔ pɑꞋ pɛkŋɛ ɡʉ ḿpfú lɑɑ pɔ́ kɛ?» 39A jʉɔmɛ, ńcʉ̈ɔ́k fɛfʉ̈ɔt pɔ́p ŋki, ńcú ŋɡɔ: «Ɛ́ kuꞋ pɑꞋɑ, pʉʉ nɑ́Ꞌ!» Fɛ́m ɡɔ́ɔ ńzɑ́Ꞌnɛ, ŋki pɔɔ pɛn ńtsʉ́Ꞌnɛ pɔ́. 40A ɡɔ́ɔ ńcú mbɔ̌ ɡɑŋku pɛ́ ŋɡɔ: «pʉʉ zɛɛ ḿbɔ́k kʉ̈ɔ́, pʉʉ fɑ́ɑ ḿbɛ́t pɔ kɛ́ zɑ́p tʉ́m nǔu mɔ kɛ.» 41Pɔ́p ŋ́kẅiꞋ ńcʉ̈ɔꞋ, ḿbɔ́ ńcú tsɛtsɛt pɔ́p ŋɡɔ, yɔ lii-ŋu pɔ́ pɔ ŋɡɔ́ku? Tɛ mbɑ fɛ́m pɔ́p ŋki zúꞋ ntsu wɛ́?
Currently Selected:
Mɑ́lɛ́kúshi 4: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
