Mɑ́lɛ́kúshi 16
16
Yɛ́su zẅíimɛ nǔu nɛvú
(Mɑtʉ̈ɔ 28.1-8; Lúkɑ́shi 24.1-11; Jɑ̂ŋ 20.1-2)
1Lɛ́Ꞌ-nji-pɑyúdɑ ɛ̂yɑ́ ɡɛ ńdɛɛ, Mɑlíyɑ-Mɑkdɑlɑ pɔ́p Sɑlɔmɛ́ɛ, ŋ́ɡɛ Mɑlíyɑ mɑ́ pɛ́ Jɑ̂k, ɡʉ ńzúu#16.1 Pɔ́p kɑ zúu pɔ nɛtúꞋ. Mbíꞌŋɡɔ lɛ́Ꞌnji-Sɛ́ kɑ pɔ́ ḿmɛ Sɑ́ɑshidɛ́, ŋkɑ́ yi mɔ́nɛm pɛ́nɛ. lɑmɛ́ndɑɑ nɛlɔk ńzɔ́Ꞌ pfú-Yɛ́su. 2Njí kiɛ, tɛ mɔ́nɛm pɔ́ ɛ́sɑ́Ꞌ, pɔ́p mʉ́ʉ ŋ́ɡʉ nɛ́ zʉꞋ-nɛshi. Ɛ́ ḿbɔ́ nduŋmbi lɛ́Ꞌ nǔu ŋɡɑplɑ́Ꞌ. 3Pɔ́p kɑ pɔ́ ńnɛn, ḿbɔ́ ḿbíkŋɛ tsɛtsɛt pɔ́p ŋɡɔ: «Tɛ wɔ̌ ɡʉ ŋ́kúu zúꞋu ŋ́kiimɛ mɑ́mɑ́ ŋɡɔꞋ ntsu-nɛshi ŋ́ɡɑ́ mbɔ̌ pɔ́p ɔɔ?»
4Ŋ́ɡʉ tɛ ŋ́kúu zúꞋu, ńjʉ́ɔ, mbɔ pɛ́ lɑ́Ꞌ ɛ́fú ntsu-nɛshi ŋ́kiimɛ mɑ́mɑ́ ŋɡɔꞋ ɛ̂yɑ́. 5Pɔ́p jɛ́Ꞌ ŋ́kúu tsɛt nɛshi, ńjʉ́ɔ wɛcɔ́ mɔ́ɔsuu nɑ́ŋ nǔu ɡúŋ-pɔ́ tʉʉ, ḿmɑꞋ fúfú ndẅí. Pɔ́p jʉ́ɔ wɛ́ ḿbɔ́k tɛꞋ. 6Lɑ́, ɑ cú mbɔ̌ pɔ́p ŋɡɔ: «Kɔɔ pʉʉ pɔ́k, pʉʉ lɔɔ Yɛ́su mɔ́ɔ-Nɑ̌zɑlɛt ẅí pɛ́ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ lɑ́? A zẅíimɛ nǔu nɛvú, ɑ kɑ́ pɛ́t zɑ́Ꞌnɛ pɔ́. Pʉʉ jʉ́ɔ, yɔ zʉꞋ yí pɛ́ kɑ nɔŋnɛ pfú yɛ́ zúꞋu. 7Pʉʉ ɡʉ ŋkɔ̂ɔnɛ ɛ́sẅíi ɡɑŋku Yɛ́su mbɑ mbɔ̌ Pyɛ̂ ŋɡɔ ɑ piitɛ Ŋɡɑlilɛɛ, ḿbɔ́ ńzẅíꞋlɛ wʉ́ʉ pɑꞋ ɑ kɑ sẅíinɛ wʉ́ʉ ŋɡɔ pʉʉ ɡʉ ńdɑ́Ꞌ ńjʉ́ɔ wɛ́ zúꞋu lɑ́.» 8Pɑŋɡɛ́ ɛ̂pɑ́ ɡɔ́ɔ ḿbuu ḿbɔ́k pɔ́knɛ, ńcẅɛt ŋ́kʉɔ, ńtɛplɛ tɛ ḿbɔɔ pɛn ŋ́kuꞋ nɛcú nu mbɔ̌ ŋu pɔ́, mbɔ cʉɔꞌ ɡẅɛɛ wɔ́p.
Yɛ́su zẅíimɛ nǔu nɛvú tɛ pɛ́ jʉ́ɔ wɛ́#16.8 Nɛzɑ́ɑ mɛŋwɑꞋnɛ mɛ́ ŋkɑ́ mbi kɑ́ ɡẅɛɛ yɔ zʉꞋ nɛfú nǔu kɛm 9-20 pɔ́.
[ 9Yɛ́su kɑ zẅíimɛ nǔu nɛvú, mbɑꞋmbɑꞋɑ́ nduŋmbi lɛ́Ꞌ nǔu ŋɡɑplɑ́Ꞌ, ḿbiitɛ ńnyɛt mbʉʉ yɛ mbɔ̌ Mɑlíyɑ-Mɑkdɑlɑ wɑ́ ẅi mɛzẅikŋɛ kɛpɔŋ sɑɑmbɑ́ kɑ ɡẅɛɛnɛ wɛ́ ḿbɔ́ ḿbúunɛ wɛ́ lɑ́; Yɛ́su cẅɛ́ɛ wɛ́ mbɔ̌ pɔ́p lɑ́. 10A ɡɔ́ɔ ŋ́kɛ́ ŋ́ɡʉ ḿbɛ́ɛtɛ ɛ́sẅíi ɡɑŋku-Yɛ́su. Pɔ́p ḿbɔ́ tsɛt nɛmʉk, ḿbɔ́ ŋ́kíi. 11Pɔ́p zúꞋ ŋɡɔ ɑ zẅíimɛ nǔu nɛvú tɛ Mɑlíyɑ jʉ́ɔ wɛ́ ɑ pɔ́ pɔ ntʉʉ, pɔ́p pɔɔ pɛ́m.
12A kɑ ɡɛ pɔ́Ꞌɔ, ḿbɛn ńnyɛt mbʉʉ yɛ nǔu yɛcɔ́ ntɛ́, mbɔ̌ pɛcɔ́ ɡɑŋku pɛ́ pɛ́pɑ́, pɔ́p pɔ́ sɛ̂ndúŋ ḿbɔ́ ŋ́ɡʉ nɛ́ tsɛt lɑ́Ꞌ. 13Pɔ́p jʉ́ɔ wɛ́ pɔ́Ꞌɔ, ḿbɛn nzʉʉ ɛ́sẅíi pɛcɔ́ pʉɔ, pɔ́p pɛn ŋ́kɛ́ mbɔɔ yɔ́p pɛ́m.
14Ŋ́ɡɔ́ ńdẅiklɛYɛ́su ɡɛ ḿbɛn ńnyɛt mbʉʉ yɛ mbɔ̌ ɡɑŋku pɛ́ ntsɔ̌pmɔꞋ nɛ́ nɛɡɛ́m pɛ́tsʉʉ. Pɔ́p pɔ́ ndɑ́ ŋ́kwɛ́t yúu. A kɑkŋɛ wɔ́p nǔu pɑ́Ꞌ pɔ́p lɑ́Ꞌ mbɔɔ pɛ́m, ḿbɛn ńdʉꞋ mbɑ nɛpɛ́m nu ntsu-pʉɔ pí ɑ zẅíimɛ́nɛ ńnyɛt mbʉʉ yɛ mbɔ̌ pɔ́p pɔ́. 15Ŋ́ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Pʉʉ ɡʉ zʉꞋ tsʉʉ ndǔ mbí, ńcẅi Ŋkʉʉ Sʉ́Ꞌnɛ mbɔ̌ mbɑ wɛ́t ŋumɛsɔŋ lɑ́ kɛ́ vuꞋ wɛcɔ́. 16Ŋu ẅí ɑ pɛ́mnɛ, pɛ́ nuꞋ wɛ́ ŋki, Sɛ́ ɡɛ ɑ luk. Ŋu ẅí ɑ lʉꞋnɛ nɛpɛ́m, ɑ ɡʉ ńdɑ́Ꞌ ḿvu ntsɑŋ. 17Pʉɔ pí pɔ́p pɛ́mnɛ nu yɑ́ɑ, ɡʉ ńdɑ́Ꞌ ŋ́ɡɛ mɛŋkʉꞋnɛ mɛnu: pɔ́p ɡʉ ńdɑ́Ꞌ ńdɔk lík yɑ́ɑ ńzuŋ mɛzẅikŋɛ kɛpɔŋ mi ɛ́ púunɛ́nɛ pʉɔ, pɔ́p ɡʉ ńdɑ́Ꞌ ńcú mɛsẅíŋɛ mi pɔ́p ŋkɑɑ zíꞋ, 18pɔ́p ńdɑ́Ꞌ ńdɔk mbɔ́ mɔ́p ŋ́ɡẅɛɛ nɔ́, ḿbɔ́ yi pɔ́p lɑɑ ńjʉ́ mɛcɔp, yɛcɔ́ yúu pɔɔ wɔ́p ɡɛ, pɔ́p ɡʉ ńdɑ́Ꞌ ńzɑ́p mbɔ́ mɔ́p nǔu ɡɑŋɡɔɔ pɔ́p fíitɛ.»
Yɛ́su kɔ́Ꞌ nɛ́ tʉ́nɛ́pú
(Lúkɑ́shi 24.50-53; ŊwɑꞋnɛ-Gɑŋntúu Yɛ́su Kɛlístɔ 1.9-11)
19Tsɑpʉɔ Yɛ́su kɑ cú mbɔ̌ pɔ́p tɛ ḿbɔ́tnɛ ńnɑ́ŋ, Sɛ́ ŋɑ́Ꞌ wɛ́ ńdɔk ŋ́kɔ́Ꞌ nɛ́ tʉ́nɛ́pú. A nɑ́ŋ nǔu ɡúŋ-pɔ́ yɛ́ yi tʉʉ. 20Gɑŋku-Yɛ́su fú zúꞋu, ŋ́ɡʉ, ńzɛ nɛsẅíi nu-Sɛ́ zʉꞋ tsʉʉ. Tsɑpʉɔ pɔ́ ńdíŋɛ wɔ́p, ńcẅɛ́lɛ́ wɔ́p, ńtɔ́ɔtɛ wɔ́p, pɔ́p ɡɛ mɛŋkʉꞋnɛ mɛnu, mi ɛ́ nyɛtnɛ ŋɡɔ sẅiŋɛ yɔ́p fú mbɔ̌ Sɛ́.]
Currently Selected:
Mɑ́lɛ́kúshi 16: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
