Mɑtʉ̈ɔ 27
27
Pɛ́ lɔk Yɛ́su ŋ́ɡʉ mbi Pilɑtɔ
(Mɑ́lɛ́kúshi 15.1; Lúkɑ́shi 23.1-2; Jɑ̂ŋ 18.28-32)
1Njí ɡɛ ŋ́kiɛ, ŋɡɔŋ pɛtɑ́tndɑ́-pɑnɔŋpɔꞋ, pɔ́p pɛkɛ́m-lɑ́Ꞌ mʉ́ʉ mbɑ́ꞋmbɑꞋɑ́, ńcúꞋlɛ ńzɑ́p ŋɡɔ pɔ́p ɡʉ ŋ́ɡɛ pɛ́ jẅí Yɛ́su, 2pɔ́Ꞌɔ lɑ́, ŋ́ɡɛ pɛ́ kút wɛ́, ńdɔk wɛ́ ŋ́ɡʉ ŋ́ɡɑ́ mbɔ̌ ŋɡɔ́mnɑɑ Pilɑtɔ.
Jẅidɑ cʉŋɛ
(ŊwɑꞋnɛ-Gɑŋntúu Yɛ́su Kɛlístɔ 1.18-19)
3Jẅidɑ ẅí ɑ kɑ fɛnnɛ Yɛ́su zúꞋ pɑ́Ꞌ pɛ́ zɑ́Ꞌnɛ ntsɑŋ ŋɡɔ pɛ́ ɡʉ ńjẅí Yɛ́su, ŋ́ɡɔ́ɔ ŋ́kɛ́ ńzɛ nɛmʉk yúu mi ɑ kɑ ɡɛnɛ, ḿbɛ́ɛ ŋkɑ́p yi ɑ kɑ cẅɛ́ɛnɛ pɑk mɛɡɛ́mɛ́ntɑ́t nǔu yɔ nu lɑ́, ńdɔk ŋ́ɡʉ ńjʉ́ɔ pɛtɑ́tndɑ́-pɑnɔŋpɔꞋ pɔ́p pɛkɛ́m-lɑ́Ꞌ, 4ńcú mbɔ̌ pɔ́p ŋɡɔ: «Ŋ kɑ ɡɛ nu kɛpɔŋ pɑ́Ꞌ ŋ kɑ ɡɑ́nɛ mbúꞋ ŋɡɔ pɛ́ jẅí wɛ́.» Pɔ́p zúꞋ ḿbʉ̈ɔt ŋɡɔ: «Pɛk kɑ́ ɡẅɛɛ nu nǔu pɔ́, ɛ́ zúꞋ nɛ́ ɡu.» 5Pɔ́Ꞌɔ lɑ́, Jẅidɑ mɑꞋ ŋkɑ́p zʉꞋ-nɔŋpɔꞋ, ɛ́fú zúꞋu ŋ́ɡʉ, ŋ́ɡɔ́ɔ ŋ́kɛ́ ŋ́ɡʉ ńcʉŋɛ. 6Pɛtɑ́tndɑ́-pɑnɔŋpɔꞋ lɑktɛ ŋkɑ́p, ńcú ŋɡɔ: «Mbɔ pɛkŋɛ kɛ́ mbɔɔ níꞋ yɔ ŋkɑ́p nǔu ŋkɑ́p-zʉꞋ-nɔŋpɔꞋ pɔ́, mbíꞋŋɡɔ ɛ́ ŋkɑ́p-mɛci-ŋu.» 7Pɔ́p kwɑŋɛ tɛ ḿbɔ́ tɑ́Ꞌ ntsu, ńdɔk ŋkɑ́p ŋ́ɡʉ ńzúu yɛcɔ́ ŋkɑ́Ꞌ ẅi pɛ́ kɑ pɔ́ ɛ́fúŋ ŋɡɔ ŋkɑ́Ꞌ-mbɔ́ɔmɛkʉŋ-tsɑ́Ꞌ, ńzúu pɔ́Ꞌɔ, ńdɔk ŋ́ɡɛ zʉꞋ yí pɛ́ tẅínɛ pɛɡʉʉ zúꞋu. 8Tɛ ɛ́fú ŋkɑ́ yîyɑ́, pɛ́ tsʉ́Ꞌ ɛ́fúŋ ẅîwɑ́ ŋkɑ́Ꞌ, pɔ ŋɡɔ ŋkɑ́Ꞌ-mɛci tɛ ŋ́kúu lɔ́Ꞌnɛ. 9Yîyɑ́ nu ɡɛ pɔ́Ꞌɔ, ḿbuutɛ nǔu pɑ́Ꞌ Ŋɡɛ́mndʉ̈ɔ́Ꞌ-Sɛ́ Yɛlɛmî kɑ cúnɛ ŋɡɔ: «Pɔ́p kɑ cẅɛ́ɛ ŋkɑ́p pɑk mɛɡɛ́mɛ́ntɑ́t, ɛ́ pɔ́ ndɛn ẅí pɑíslɑyɛ̂l kɑ zɑ́pnɛ ŋɡɔ ɛ́ pɔ́ ŋkɑ́p-tú-ŋɡɑŋ.» 10Pɔ́p kɑ ɡɑ́ yîyɑ́ ŋkɑ́p ńdɔk ńzúu ŋkɑ́Ꞌ-mbɔ́ɔmɛkʉŋ-tsɑ́Ꞌ, ɛ́ pɔ́ yúu mi Tsɑpʉɔ kɑ lɑ́Ꞌnɛ ńcú ŋɡɔ pɛ́ ɡɛ.
Yɛ́su mbi Pilɑtɔ
(Mɑ́lɛ́kúshi 15.2-15; Lúkɑ́shi 23.2-5, 13-25; Jɑ̂ŋ 18.29-40; 19.4-16)
11Yɛ́su kúu mbi Ŋɡɔ́mnɑɑ Pilɑtɔ, ɑ píkŋɛ wɛ́ ŋɡɔ: «Ɔ fɔɔ-pɑyúdɑ ɔɔ?» Yɛ́su pʉ̈ɔt mbɔ̌ wɛ́ ŋɡɔ: «Ɔ cú pɔ́Ꞌɔ.» 12Pɛtɑ́tndɑ́-pɑnɔŋpɔꞋ pɔ́p pɛkɛ́m-lɑ́Ꞌ pɔ́ ńtík mɛnu tú-Yɛ́su tɛ ɛ́ zɑ́ɑ zɑ́ɑnɛ, ɑ kɛ́ mbɔɔ ḿbɔ́ ḿbʉ̈ɔt pɔ́. 13Pilɑtɔ, cú mbɔ̌ wɛ́ ŋɡɔ: «Ɔ kɑ́ pɔ́ ńzúꞋ ndɛn mɛnu mí pɛ́ cúnɛ nǔu ɡu pɔ́ kɛ?» 14Lɑ́ Yɛ́su pɔɔ pʉ̈ɔt. Ŋɡɔ́mnɑɑ jʉ́ɔ ɛ́ puu ŋ́kʉꞋnɛ wɛ́ tɛꞋ.
Pɛ́ zɑ́Ꞌ ntsɑŋ ŋɡɔ pɛ́ ɡʉ ńjẅí Yɛ́su
(Mɑ́lɛ́kúshi 15.6-15; Lúkɑ́shi 23.13-25; Jɑ̂ŋ 18.39; 19.16)
15Ɛ́ kɑ pɔ́ ḿbɔ́ lɛ́Ꞌ-ndínɑ-Pɑ́skɑ, Ŋɡɔ́mnɑɑ tsɔ́Ꞌ ŋɡɑŋtsɑ́ŋ ẅi lɑ́Ꞌ píkŋɛ́nɛ. 16Ɛ́ ɡɔ ḿbɔ́ ŋkɑ́ yîyɑ́, wɛcɔ́ ntʉʉ ŋɡɑŋtsɑ́ŋ pɔ́ tsɛt ndɑ́tsɑ́ŋ, pɛ́ fúŋ wɛ́ ŋɡɔ Yɛ́su Pɑnɛpɑ́ɑshi.#27.16 Yɛ́su Pɑnɛpɑ́ɑshiMɛlwɛn ŋwɑꞋnɛ-Ŋɡɛlɛk ɡẅɛɛ pɔ Pɑnɛpɑ́ɑshi mbɔɔ Yɛ́su ɡẅɛɛ. 17Lɑ́Ꞌ tɔ́ ńcúꞋlɛ. Pilɑtɔ píkŋɛ ŋɡɔ: «Pʉʉ kɔŋ ŋɡɔ ŋ ɡʉ nǔu pʉɔ pɔnɛ ńnɑ́ pɔ Yɛ́su Pɑnɛpɑ́ɑshi kɛ pɔ Yɛ́su ẅí pɛ́ fúŋnɛ ŋɡɔ Kɛlístɔ?» 18Pilɑtɔ kɑ pɔ́ ńcú pɔ́Ꞌɔ, mbíꞋŋɡɔ ɑ ńtsuŋ ḿbɔ́ ńjí ŋɡɔ pɛ́ kɔ́Ꞌ pɔ lɔ́ŋ nǔu Yɛ́su lɑ ɛ́fɛn wɛ́. 19Pilɑtɔ kɑ pɔ́ ŋ́ŋɑk nu-Yɛ́su, nzwɛ́ wɛ túu ŋu ŋɡɔ ɑ ɡʉ, ńcú mbɔ̌ wɛ́ ŋɡɔ ɑ lɑk tú yɛ́ nǔu ntsɑŋ-ŋu wɑ́, ŋɡɔ ɑ pɑ́Ꞌɑ ḿbɔ́ mbúꞋ, ŋɡɔ ŋɡɑŋ sẅíi wɛ́ ŋɡɔ ɑ lɑ́Ꞌ ńdɛ́ lɑ́Ꞌ, ńdɛ́ njʉɔ nǔu wɛ́ ɛ́ ɡɑ́ɑnɛ wɛ́ tɛꞋ. 20Pɛtɑ́tndɑ́-pɑnɔŋpɔꞋ pɔ́p pɛkɛ́m-lɑ́Ꞌ pɔ́ ńtsʉ́ʉnɛ lɑ́Ꞌ ŋɡɔ pɔ́p píkŋɛ ŋɡɔ Pilɑtɔ tsɔ́Ꞌ pɔ Pɑnɛpɑ́ɑshi ŋ́ɡɛ pɛ́ jẅí Yɛ́su. 21Ŋɡɔ́mnɑɑ pɛn ńcú mbɔ̌ lɑ́Ꞌ ŋɡɔ: «Ŋ ɡʉ ńnɑ́ tɑ́Ꞌ ŋɡɑŋtsɑ́ŋ mbɔ̌ pʉʉ. Pʉʉ kɔŋ ŋɡɔ ŋ ɡʉ nǔu pʉɔ pɔnɛ pɛ́pɑ́, ńnɑ́ wɔ̌?» Pɔ́p ɡɔ Pɑnɛpɑ́ɑshi! 22Pilɑtɔ pɛn ḿbíkŋɛ ŋɡɔ: «Tɛ mɔ pɑ́Ꞌɑ ŋ́ɡɛ pɔ ŋɡɔ́ku nǔu Yɛ́su ẅí pɛ́ fúŋnɛ ŋɡɔ Kɛlístɔ?» Pʉɔtsʉʉ pʉ̈ɔt ŋɡɔ: «Pɛ́ kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ!» 23Pilɑtɔ píkŋɛ wɔ́p ŋɡɔ: «KwɑꞋ nu kɛpɔŋ yí ɑ ɡɛnɛ pɔ́ pɔ kʉ̈ɔ́?» Lɑ́ lɑ́Ꞌ kẅiꞋ ŋ́ɡɑ́ ɡwɑ́t, ńcú pɔ ŋɡɔ: «pɛ́ kɛ́ ŋ́kẅii wɛ́ kẅiinɛ!» 24Pilɑtɔ jʉ́ɔ ŋɡɔ yɛcɔ́ nɛɡɛ kɑ́ pɔ́ ɡú pɔ́, ḿbɔ́ ńjʉ́ɔ ŋɡɔ mbɔ ɛ́ shɔtnɛ pʉɔ tɑ́k zʉꞋ, ŋ́ɡɔ́ɔ ŋ́kɛ́ ńtíi ŋki, ɛ́suk mbɔ́ mɛ́ mbi-lɑ́Ꞌ, ńcú ŋɡɔ: «Ŋ kɑ́ ɡẅɛɛ nu nǔu nu-ŋu wɑ́ pɔ́, ɛ́ sɛ́ ńdíŋɛ pɔ wʉ́ʉ.» 25Pʉɔtsʉʉ pʉ̈ɔt ŋɡɔ: «Mɛci ŋu wɑ́ ńtúŋ nǔu pɛk tɛ mbɑ nǔu mbɔ́ŋkʉ̈ɔ́ pɛk.» 26Pɔ́Ꞌɔ lɑ́, Pilɑtɔ ɡɔ́ɔ ŋ́kɛ́ ńcẅɛɛtɛ Pɑnɛpɑ́ɑshi ndɑ́tsɑ́ŋ, ŋ́ɡɛ pɛ́ lɔk ŋɡwɑɑ ńtswɑ́ɑ Yɛ́su, ḿbɛn ŋ́ɡɑ́ wɛ́ ŋɡɔ pɛ́ lɔk wɛ́ ŋ́ɡʉ, ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ.
Pɑlʉ̈ɔ́Ꞌntsɔ sɛ́ ńzɔɔtɛ Yɛ́su
(Mɑ́lɛ́kúshi 15.16-20; Lúkɑ́shi 23.11; Jɑ̂ŋ 19.2-3)
27Pɑlʉ̈ɔ́Ꞌntsɔ-pɑlɔ́mɑ ɡɔ́ɔ ŋ́kɛ́ ńdɔk Yɛ́su ŋ́ɡʉ ntɔ́Ꞌ-ŋɡɔ́mnɑɑ, pɔ́p pɛtsʉʉ cúꞋlɛ ńzɛmɛ wɛ́ ńníꞋ sɔŋ, 28ńtɛmtɛ ɛ́sɔt mɛndẅí mɛ́, ńtsʉ́Ꞌ ḿmɑꞋ pɔ ndẅí-nɛfɔɔ nǔu wɛ́, 29ḿbɛn ńdɔk mɛnzɔ́ŋ ḿbɑ́Ꞌ cɔꞋ ɛ́sɔ tú yɛ́, ńníꞋ kɛkɑꞋ nǔu pɔ́ yɛ́ yi tʉʉ, ḿbɔ́ ŋ́kẅíꞋlɛ mbi yɛ́, ńzɔɔtɛ wɛ́ ńcú ŋɡɔ: «Zɑɑmɔ́ɔ, fɔɔ pɑyúdɑ!» 30Ḿbɔ́ ńtẅik mɛ́tɛ́ nǔu wɛ́, ńcẅɛ́ɛ kɛkɑꞋ, ńtswɑ́ɑ tú yɛ́, 31ńzɔɔtɛ wɛ́ tɛ ŋ́kɑɑ, ɛ́fú nǔu wɛ́ ɛ́sɔt ndẅí-nɛfɔɔ, ḿbɛn ḿmɑꞋ kwɑꞋ mɛ́ mɛndẅí nǔu wɛ́. Ɛ́ kuꞋ pɔ́p lɔk wɛ́ ɛ́fú zúꞋu ńcẅɛt, nɛɡʉ ŋ́kẅii nǔu tʉ́ mbɑ́ŋtɛ pɑ́ŋtɛ́nɛ.
Pɛ́ kẅii Yɛ́su nǔu tʉ́ mbɑ́ŋtɛ pɑ́ŋtɛ́nɛ
(Mɑ́lɛ́kúshi 15.21-32; Lúkɑ́shi 23.26-43; Jɑ̂ŋ 19.17-27)
32Pɑlʉ̈ɔ́Ꞌntsɔ lɔk wɛ́ ɛ́fú tʉ́sɔŋ ńcẅɛt, ńnɛn tɛ ḿbuutɛ wɛcɔ́ ŋu Silɛ̂nɛ, pɛ́ fúŋ wɛ́ ŋɡɔ Símɔ, pɛ́ ɛ́fyɛ́t wɛ́ ŋɡɔ ɑ tíi tʉ́ mbɑ́ŋtɛ pɑ́ŋtɛ́nɛ-Yɛ́su. 33Pɔ́p ɡʉ tɛ ŋ́kúu yɛcɔ́ zʉꞋ yi pɛ́ fúŋnɛ ŋɡɔ Ŋɡɔlŋɡɔ́tɑ, ńdɔk ńcú ŋɡɔ: «ZʉꞋ-mɛtsẅí-tú.» 34Pɔ́p kúu zúꞋu, ńdɔk yɛcɔ́ yúu mi ɛ́ lẅi lẅinɛ ɛ́fɛntɛ mɛluꞋ, ŋ́ɡɑ́ ŋɡɔ Yɛ́su nɔ́. Yɛ́su zẅíꞋ mbɔɔ kɔŋ nɛnɔ́ pɔ́. 35Pɑlʉ̈ɔ́Ꞌntsɔ ɡɔ́ɔ ŋ́kɛ́ ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, ḿmɑꞋ ńtíitɛ ńdɔk ŋ́ɡɑp mɛndẅí mɛ́, ŋ́ɡɑ́ yɛ́ mbɑ wɔ̌ lɑ́ tsɛtsɛt pɔ́p. 36Ɛ́ kuꞋ, pɔ́p nɑ́ŋ sɛ́ ḿbɔ́ ḿbyɛ́p Yɛ́su. 37Pɛ́ ŋwɑꞋnɛ yúu mi ɑ fɑɑnɛ́nɛ ŋ́kẅii tʉ́ nǔu zʉꞋ yi tú yɛ́ ḿbɔ́nɛ zúꞋu ŋɡɔ: «Yɔ Yɛ́su, fɔɔ-pɑyúdɑ.» 38Pɔ́p kɑ pɛn ŋ́kẅii pɛtsɔ́ŋ pɛ́pɑ́ nǔu mɛtʉ́ mbɑ́ŋtɛ pɑ́ŋtɛ́nɛ, tɑ́Ꞌ pɔ́ nǔu ɡúŋ-pɔ́-Yɛ́su yi tʉʉ, wɛcɔ́ pɔ́ nǔu ɡúŋ-pɔ́ ŋkẅɛpmɛ. 39Pɑlɛɛ sɛ̂ndúŋ kɑ pɔ́ ŋ́ŋíŋɛ wɛ́ ɡúu, ńzɔɔtɛ Yɛ́su, 40ńcú ŋɡɔ: «Ɔ kɑ pɔ́ ńdɔɔ nɛkɛm ndɑ́-nɔŋpɔꞋ, ńdɔk lɛ́Ꞌlɑ́Ꞌ pɛtɑ́t ŋ́kút. KwɑꞋ ɡu zɛɛ ńcẅɛ́ɛ tú yú, pɑ́Ꞌ ɔ lɑɑ ḿbɔ́ mɔ́ɔ-Sɛ́, ɛ́fú nǔu tʉ́ mbɑ́ŋtɛ pɑ́ŋtɛ́nɛ ḿpfúu.» 41Pɛtɑ́tndɑ́-pɑnɔŋpɔꞋ, pɔ́p pɑkyɛ́ꞌtɛ nɛpʉ́ʉ-Mɔ̌sɛ̂ɛ, pɔ́p pɛkɛ́m-lɑ́Ꞌ pɔ́ ńzɔɔtɛ yɔ́p Yɛ́su ɡúu ńcú ŋɡɔ: 42«A kɑ ɡɛ pɛcɔ́ pʉɔ luk, lɑ́ ɑ kɑ́ kuꞋ nɛcẅɛ́ɛ yɛ́ tú mbɔ̌ nɛvú pɔ́! A lɑɑ ḿbɔ́ fɔɔ-pɑíslɑyɛ̂l, ɑ ɛ́fú nǔu tʉ́ mbɑ́ŋtɛ pɑ́ŋtɛ́nɛ ŋkɔ̂ɔnɛ ḿpfúu pɛk jʉ́ɔ, ńzɑ́p tʉ́m yʉ́k nǔu wɛ́. 43A kɑ zɑ́p tʉ́m yɛ́ nǔu Sɛ́, Sɛ́ lɑɑ ḿbɔ́ ŋ́kɔŋ wɛ́ tɛ ɛ́sẅíi nu, ɑ ɡɛ ɑ luk ŋkɔ̂ɔnɛ!» Jʉ́ ŋkɑɑnɛ zɛɛ ńcú ŋɡɔ: «A mɔ́ɔ-Sɛ́ pɔ́ ɔɔ?» 44Ŋ́ɡʉ nǔu pɛtsɔ́ŋ pi pɛ́ kɑ kẅiinɛ wɔ́p nǔu mɛtʉ́ mbɑ́ŋtɛ pɑ́ŋtɛ́nɛ nɛjɔ́ŋ Yɛ́su pɔ́p pɛn ḿbɔ́ ńzɔɔtɛ yɔ́p wɛ́ pɔ pɔ́Ꞌɔ.
Yɛ́su pfú
(Mɑ́lɛ́kúshi 15.33-41; Lúkɑ́shi 23.44-49; Jɑ̂ŋ 19.28-30)
45Tẅɛp kɑ pɔ́ tɛ ŋ́kuꞋ, zʉꞋ tsʉʉ ndǔ ŋɡɔŋ puu sʉ́ʉ, tɛ ńdɑ́Ꞌ ŋ́kúu nǔu nɛm yɛ́tɑ́t mbɔ́tnjí. 46Ɛ́ pɔ́ nǔu nɛm yɛ́tɑ́t ɛ̂yɑ́, Yɛ́su kíi nɛ́ ŋɡi tɛnnɛ ńcú ŋɡɔ: «Ɛlɔyí, Ɛlɔyí lɑmɑ sɑbɑtɑnîi,» ńdɔk ńcú ŋɡɔ: «Sɛ́ wɑɑ, Sɛ́ wɑɑ, ɔ mɛꞋ wɑ́ɑ mɛlɑ́Ꞌ kʉ̈ɔ́?» 47Pɛcɔ́ pʉɔ pí pɔ́p m̄bɔ́nɛ zúꞋu zúꞋ, ńcú ŋɡɔ: «A pʉɔlɑ́ ɑ sɛ́ ɛ́fúŋ Ɛlíyɑ lɑɑ!» 48Wɛcɔ́ tɑ́Ꞌ ŋu nǔu pɔ́p ɡɔ́ɔ ŋ́kʉɔ, ŋ́ɡʉ ńdɔɔ kuntsɑ́ɑ, ńtsɛp tsɛt cícɔ́k mɛluꞋ, ɛ́sɔ́klɛ nǔu tú-kɛkɑꞋ, ńcɑklɛ ńníꞋ ntsu-Yɛ́su ŋɡɔ ɑ fíitɛ. 49Pɛcɔ́ pʉɔ pɔ́ ńcú ŋɡɔ: «Pʉʉ tsʉ́Ꞌ pɛkŋɛ jʉ́ɔ kɛ Ɛlíyɑ ɡʉ ńtɔ́ ɛ́fú nǔu tʉ́ mbɑ́ŋtɛ pɑ́ŋtɛ́nɛ ŋ́kɔk wɛ́ ɔɔ!» 50Yɛ́su pɛn ŋ́kíi nɛ́ ŋɡi tɛnnɛ ŋ́ɡɔ́ɔ ńcʉ́ɔ. 51Yɛ́su cʉ́ɔ pɔ́Ꞌɔ, ndẅí yi pɛ́ kɑ lɔknɛ ŋ́kʉŋ yɛcɔ́ zʉꞋ tsɛt zʉꞋ-nɔŋpɔꞋ fú tʉ́ ɛ́sɑ́ɑnɛ pɑk pɛ́pɑ́ tɛ ŋ́kúu sɛ́. Tsɛ́tsɑ́Ꞌ tsʉ́Ꞌnɛ, mɛŋɡɔꞋ sɑ́ɑtɛ, 52mɛtú-mɛshi tsɔ́Ꞌnɛ ńtʉ́ʉ, pɛpfú pi pɔ́p kɑ zɑ́pnɛ tʉ́m yɔ́p nǔu Sɛ́ jʉɔmɛ tɛ ńzɑ́ɑ, 53ɛ́fú tsɛt mɛshi cẅɛɛtɛ. Yɛ́su ɡɛ ḿbɔ́ tɛ ńzẅíimɛ nǔu nɛvú, pɔ́p kúu Yɛlúsɑlɛm, tʉ́sɔŋ-ndɛ́ɛnɛ Lɛ́ɛnɛ́nɛ, pʉɔ tɛ ńzɑ́ɑ jʉ́ɔ wɔ́p. 54Yɛ́su kɑ pfú pɑ́Ꞌɑ, tɑ́tndɑ́-pɑlʉ̈ɔ́Ꞌntsɔ pɔ́p pɑlʉ̈ɔ́Ꞌntsɔ pí pɔ́p kɑ pɔ́ ḿbyɛ́p Yɛ́su jʉ́ɔ pɑ́Ꞌ tsɛ́tsɑ́Ꞌ púunɛ ńtsʉ́Ꞌnɛ, ḿbɛn ńjʉ́ɔ mbɑ kʉ̈ɔ́lɑ́ yi ɛ́ sɛ́ ńdɛɛ, ńcʉ̈ɔꞋ tɛꞋ, ńcú ŋɡɔ: «Ŋu wɔ ḿbɔ́ kwɑꞋ mɔ́ɔ-Sɛ́.» 55Pɑŋɡɛ́ tɛ ńzɑ́ɑ tʉ́ʉ ŋɡɑ sɛsɑ ḿbɔ́ ńdíŋɛ, mbɔ pɔ́p kɑ pɔ́ nzʉʉ-Yɛ́su tɛ ɛ́fú Ŋɡɑlilɛɛ, ńnɛn ńtɔ́ɔtɛ wɛ́. 56Ɛ́ m̄bɔ́ tsɛtsɛt pɔ́p, yɔ pɔ́ Mɑlíyɑ-Mɑkdɑlɑ, ŋ́ɡɛ Mɑlíyɑ mɑ́ pɛ́ Jɑ̂k pɔ́p Yɔsɛ̂p, ḿbɛn ŋ́ɡɛ mɑ́ pɛ́ pɔ́ɔ-Zɛbɛ́dɛ́ɛ.
Pɛ́ níꞋ Yɛ́su tsɛt nɛshi
(Mɑ́lɛ́kúshi 15.42-47; Lúkɑ́shi 23.50-56; Jɑ̂ŋ 19.38-42)
57Ɛ́ ɡɛ ḿbɔ́ ntsuŋkẅɛ́Ꞌ wɛcɔ́ ŋɡɑŋyúu tɔ́, lík yɛ́ pɔ́ ŋɡɔ Yɔsɛ̂p, ɑ pɔ́ ŋu-tʉ́sɔŋ-Alimɑtɛ́, ḿbɔ́ ɑ tsʉ́Ꞌ yɛ́ ɡúu wɛcɔ́ ŋu-Yɛ́su. 58A ɡʉ ńjʉ́ɔ pilɑtɔ, ńdɔ́ɔ pfú-Yɛ́su nɛɡʉ ńdẅɛꞋ. Pilɑtɔ pɛ́m, ńcú ŋɡɔ pɛ́ ɡɑ́ nɛ́ jʉ́. 59Pɛ́ kíɛꞋ, Yɔsɛ̂p cẅɛ́ɛ, ńdɔk pɔ́-ndẅí fí ŋ́kɑ́tɛ pfú yɛ́, 60ńtíi wɛ́ ńdɔk ŋ́ɡʉ ńníꞋ tsɛt nɛshi ni ɑ kɑ pɛ́t ɛ́sʉꞋ nǔu ŋɡɔꞋ, ɛ́ pɔ́ nɛ́ Yɔsɛ̂p. A níꞋ Yɛ́su tsɛtú, ńtsʉ́ʉ mɑ́mɑ́ ŋɡɔꞋ ńdɔk ńjʉ́ɔꞋ ntsu-nɛshi ɛ̂nɑ́ ŋ́ɡʉ. 61A kɑ ɡɔ́ ńníꞋ Mɑlíyɑ-Mɑkdɑlɑ pɔ́p wɛcɔ́ Mɑlíyɑ nɑ́ŋ sɛ́ nɛpɑ́ɑtɛ nɛshi, ḿbɔ́ ńjʉ́ɔ.
Pɑlʉ̈ɔ́Ꞌntsɔ sɛ́ ḿbyɛ́p nɛshi-Yɛ́su
62Njí ɡɛ ŋ́kiɛ, ɛ́ pɔ́ lɛ́Ꞌnji-Sɛ́ yi pɛ́ kɑ pɔ́ yɛcɔ́ lɛ́Ꞌ ḿbɔ́ ńniitɛ lɑ́. Pɛtɑ́tndɑ́-pɑnɔŋpɔꞋ pɔ́p pɑfɑlísɑy tɛmtɛ ńcúꞋlɛ njɛ́Ꞌ-Pilɑtɔ, 63ńcú mbɔ̌ wɛ́ ŋɡɔ: «Zɑɑmɛtɑ́ɑ, pɛk sɛ́ ŋ́kẅíitɛ yɛcɔ́ nu.» Ŋɡɑŋcɔtnu wɑ́ kɑ pɛ́t ntʉʉ, ńcú ŋɡɔ: «Ŋ ɡʉ ńdɑ́Ꞌ ńzẅíimɛ nǔu nɛvú nǔu mbɑ́ɑtɛ lɛ́Ꞌ pɛtɑ́t.» 64Ɛ́ pɔ́Ꞌɔ, lɑ́ pɛk sɛ́ ḿbíkŋɛ ŋɡɔ ɔ cú pɑlʉ̈ɔ́Ꞌntsɔ pyɛ́p nɛshi tɛ ŋ́kúu nǔu mbɑ́ɑtɛ lɛ́Ꞌ pɛtɑ́t. Tɛ ɛ́ pɔɔ pɔ́Ꞌɔ pɔ́, mbɔ ḿbɔ́ ɡɑŋku pɛ́ tɔ́ ńjɔ pfú yɛ́, ŋ́ɡɔ́ɔ ŋ́kɛ́ ŋ́ɡʉ ɛ́sẅíi lɑ́Ꞌ ŋɡɔ ɑ zẅíimɛ nǔu nɛvú! Yîyɑ́ cɔtnu mɛkŋɛ ḿbʉ́k tɛ ńtsɑ yi mbi. 65Pilɑtɔ cú mbɔ̌ pɔ́p ŋɡɔ: «Pɑlʉ̈ɔ́Ꞌntsɔ pʉ́ɔlɑ́.» Pʉʉ ɡʉ ŋ́ɡɛ pɛ́ pyɛ́p nɛshi pɑ́Ꞌ pʉʉ kɔŋnɛ! 66Pɔ́p ɡʉ ńdɔk yɛcɔ́ yúu ńnɑŋ ŋɡɔꞋ yí pɛ́ lɑ́Ꞌnɛ ńdɔk ńjʉ́ɔꞋ nɛshi, ŋ́ɡɔ́ɔ ńtík pɑlʉ̈ɔ́Ꞌntsɔ, pɔ́p pɔ́ ḿbyɛ́p, ḿbɔ́k yúu nɛɡɛ nǔu nɛshi.
Currently Selected:
Mɑtʉ̈ɔ 27: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
