Mɑtʉ̈ɔ 28
28
Yɛ́su zẅíimɛ nǔu nɛvú
(Mɑ́lɛ́kúshi 16.1-10; Lúkɑ́shi 24.1-12; Jɑ̂ŋ 20.1-10)
1Lɛ́Ꞌnji-Pɑyúdɑ ɡɛ ńdɛɛ, ɛ́ pɔ́ mbɑ́ꞋmbɑꞋɑ́ nǔu nduŋmbi lɛ́Ꞌ nǔu ŋɡɑplɑ́Ꞌ, Mɑlíyɑ-Mɑkdɑlɑ pɔ́p wɛcɔ́ Mɑlíyɑ pɔ́ ŋ́ɡʉ nɛjʉ́ɔ nɛshi, 2ŋ́ɡɔ́ ŋ́kúu zúꞋu, ńzúꞋ tsɛ́tsɑ́Ꞌ puu ńtsʉ́Ꞌnɛ tɛꞋ. MbíꞋŋɡɔ Cʉ̈ɔꞋ-Sɛ́ ɛ́fú tʉ́nɛ́pú ńcúŋ, ńtɔ́ ŋ́kiimɛ ŋɡɔꞋ yí pɛ́ kɑ lɔknɛ ńjʉ́ɔꞋ ntsu-nɛshi, ŋ́kɔ́Ꞌ ńnɑ́ŋ ndǔ ŋɡɔꞋ ɛ̂yɑ́. 3A kɑ pɔ́ ŋ́kyɛꞋ zʉꞋ pɑ́Ꞌ mɛnɛ́ɛ-mbʉŋ lɑ́, mɛndẅí mɛ́ pɛn ḿbɔ́ fúk tɛ ŋ́ŋwɑŋɛ. 4Pɑpyɛ́p nɛshi jʉ́ɔ pɔ́Ꞌɔ, ŋ́ɡwɛt, ḿbɔ́k, ḿvutɛ ńnɔɔtɛ sɛ́ pɑ́Ꞌ pɛpfú lɑ́.
5Cʉ̈ɔꞋ-Sɛ́ cú mbɔ̌ pɑŋɡɛ́ ɛ̂pɑ́ ŋɡɔ: «Kɔɔ pʉʉ pɔ́k, n jí ŋɡɔ pʉʉ tɔ́ lɔɔ Yɛ́su ẅí pɛ́ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ lɑ́.» 6A kɑ́ pɛ́t ḿbɔ́ zɑꞋnɛ pɔ́, ɑ zẅíimɛ nǔu nɛvú pɑ́Ꞌ ɑ kɑ cúnɛ lɑ́. Pʉʉ tɔ́ ńdíŋɛ zʉꞋ yí pfú yɛ́ ḿbɔ́nɛ zúꞋu lɑ ńjʉ́ɔ. 7Pʉʉ ɡɔ́ɔ ŋ́ɡʉ ɛ́sẅíi ɡɑŋku pɛ́ ŋɡɔ ɑ zẅíimɛ nǔu nɛvú, ŋɡɔ ɑ piitɛ Ŋɡɑlilɛɛ ḿbɔ́ ńzẅíꞋlɛ wʉ́ʉ pɛ́ pɔ́p, pʉʉ ɡʉ ŋ́kúu zúꞋu lɑ ńjʉ́ɔ wɛ́. Yɔ nu yí mɔ ḿbɔ́ ŋ́ɡẅɛɛ nɛsẅíi wʉ́ʉ.
8Pɑŋɡɛ́ pɔ ɡɔ́ɔ ɛ́fú mbʉʉ nɛshi ŋ́ɡʉ nɛcú yɔ nu mbɔ̌ ɡɑŋku-Yɛ́su. CʉɔꞋ pɛ́t ḿbɔ́ pɔ nǔu pɔ́p, lɑ́ pɔ́p pɔ́ ńtsɑ́ɑtɛ tsɑ́ɑtɛ́nɛ, 9ńtɔ́ nɛnɛn, ḿbuutɛ Yɛ́su. A cú mbɔ̌ pɔ́p ŋɡɔ. «N cɛꞋlɛ wʉ́ʉ!» Pɔ́p pi mɛkẅíꞋlɛ mbi yɛ́, ŋ́ɡẅɛɛ mɛku mɛ́, ŋ́ɡúꞋlɛ wɛ́. 10Yɛ́su ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Kɔɔ pʉʉ pɔ́k.» Pʉʉ ɡʉ ńcú mbɔ̌ pɔ́ɔpɛ́mɑ́ pɑ́ɑ, ŋɡɔ pɔ́p ɡʉ nɛ́ Ŋɡɑlilɛɛ, ŋɡɔ pɔ́p ɡʉ ńjʉ́ɔ wɑ́ɑ pɔ zúꞋu.
Sẅiitɛ-pɑpyɛ́p nɛshi
11Pɑŋɡɛ́ pɔ́ sɛ̂ndúŋ ḿbɔ́ ŋ́ɡʉ, pɛcɔ́ pɑlʉ̈ɔ́Ꞌntsɔ nǔu pi pɔ́p kɑ pɔ́ ḿbyɛ́p nɛshi ɡʉ tʉ́sɔŋ, ḿbɛ́ɛtɛ mbɑ kʉ̈ɔ́ lɑ́ yi ɛ́ lɛɛnɛ, ɛ́sẅíi mɑ́nzɔŋ-pɛtɑ́tndɑ́-pɑnɔŋpɔꞋ. 12Pɛtɑ́tndɑ́-pɑnɔŋpɔꞋ, fúŋ pɛkɛ́m-lɑ́Ꞌ, pɔ́p pɛpɔ́p cúꞋlɛ ńnɑ́ŋ sɛ́, ŋ́kwɑŋɛ, ŋ́ɡɑ́ ḿbʉ̈ɔꞋ-ŋkɑ́p mbɔ̌ pɑlʉ̈ɔ́Ꞌntsɔ, 13ńcú mbɔ̌ pɔ́p ŋɡɔ: «Pʉʉ cú pɔ ŋɡɔ pʉʉ lɑ́Ꞌ ḿbɔ́ ńdɛ́ nɛtúꞋ, ɡɑŋku-Yɛ́su tɔ́ ńjɔ pfú yɛ́ ńdɔk ŋ́ɡʉ. 14Ŋɡɔ́mnɑɑ lɑɑ ŋ́kɛ́ ńzúꞋ, mbɔ pɛk ɡʉ ńjí nu yí pɛk ɡʉ ɛ́sẅíi wɛ́, ḿbɔ́k wʉ́ʉ nɛjʉ́ɔ ŋɡʉ̈ɔ́Ꞌ.» 15Pɑlʉ̈ɔ́Ꞌntsɔ cẅɛ́ɛ ŋkɑ́p, ŋ́ɡɛ pɑ́Ꞌ pɛ́ cúnɛ mbɔ̌ pɔ́p. Ɛ́ pɔ́Ꞌɔ lɑ́ yɔ nu ɡɔ́ɔ ɛ́sɑt zʉꞋ tsɛtsɛt pɑyúdɑ. Pɛ́ cú pɔ yɛ́tɛ́ tɛ ŋ́kúu lɔ́Ꞌnɛ.
Yɛ́su sɛ́ ńtúu pʉɔ pɛ́ ndǔ mbí
(Mɑ́lɛ́kúshi 16.14-18; Lúkɑ́shi 24.36-49; Jɑ̂ŋ 20.19-23; ŊwɑꞋnɛ-Gɑŋntúu Yɛ́su Kɛlístɔ 1.6-8)
16Gɑŋku-Yɛ́su ntsɔ̌pmɔꞋ nɛ́ nɛɡɛ́m ɡɛ pɔ́Ꞌɔ ŋ́ɡʉ nɛ́ Ŋɡɑlilɛɛ, ŋ́kɔ́Ꞌ ndǔ nɛŋkɔ́Ꞌ ni Yɛ́su kɑ pɔ́nɛ zúꞋu, mbɔ ɑ kɑ lɛꞋlɛ mbɔ̌ pɔ́p, ŋɡɔ pɔ́p pɛ́pɔ́p ɡʉ ńdɑ́Ꞌ ḿbuutɛ zúꞋu. 17Pɔ́p pɔ́ tɛ ńjʉ́ɔ Yɛ́su, ŋ́kẅíꞋlɛ sɛ́, ŋ́ɡúꞋlɛ wɛ́, lɑ́ pɛcɔ́ pʉɔ pɔ́ tsɛtsɛt pɔ́p, ḿbɔ́ ḿmʉꞋlɛ mʉꞋlɛ́nɛ. 18Yɛ́su tɔ́ nɛjɔ́ŋ pɔ́p, ńcú mbɔ̌ pɔ́p ŋɡɔ: «Sɛ́ kɑ ɡɑ́ mɛtʉʉ tsʉʉ mbɔ̌ mɔ nɛlɔk ɛ́sɑ́Ꞌ yúu mi ɛ́ tʉ́nɛ́pú mbɑ yi ɛ́ ndǔ tsɛ́tsɑ́Ꞌ.» 19Pɔ́Ꞌɔ lɑ́, pʉʉ ɡʉ túu nɛ́ túu, ńdɔk pʉɔmɛsɔŋ ŋ́ɡɛ ɡɑŋku pɑ́ɑ, ńnuꞋ wɔ́p ŋki nǔu lík Tɑ́t, mbɑ Mɔ́ɔ, mbɑ zẅikŋɛ Lɛ́ɛnɛ́nɛ, 20ńzíꞋ wɔ́p nɛtík ku nǔu mɛnu tsʉʉ mi mɔ ńzíꞋnɛ wʉ́ʉ. Pʉʉ jí ŋɡɔ, kwɑꞋ mɔ, ŋ ɡʉ ńdɑ́Ꞌ ḿbɔ́ pɔ tsɛtsɛt pʉʉ tɛ ntsɛ́llɛ́ lɑ́Ꞌ mɛ.
Currently Selected:
Mɑtʉ̈ɔ 28: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
