Mɑtʉ̈ɔ 24
24
Yɛ́su cú ŋ ɡɔ pɛ́ ɡʉ ńtɑ́ɑ ɛ́sɑt zʉꞋ-nɔŋpɔꞋ
(Mɑ́lɛ́kúshi 13.1-2; Lúkɑ́shi 21.5-6)
1Yɛ́su fú zʉꞋ-nɔŋpɔꞋ ńcẅɛt ḿbɔ́ ŋ́ɡʉ, ɡɑŋku pɛ́ tɔ́ nɛjɔ́ŋ yɛ́, ńcú ŋɡɔ ɑ líŋɛ ntɛ́ yi pɛ́ kɑ kútnɛ zʉꞋ-nɔŋpɔꞋ lɑ́ ńjʉ́ɔ. 2Lɑ́ Yɛ́su cú mbɔ̌ pɔ́p ŋɡɔ: «Pʉʉ kɑ jʉ́ɔ zʉꞋ ɛ̂yɑ́ pɔ́ ɔɔ? Lɑ́ ŋ kɛ́ ɛ́sẅíi wʉ́ʉ, kwɑꞋ nɛ́nẅín, yɛcɔ́ lɛ́Ꞌ ɡʉ ŋ́ɡɛ ḿbɔ́, pɛ́ kɛm tɛ ŋɡɔꞋ pɔɔ pɛn ńzɑ́pmɛ nǔu yɛcɔ́ pɔ́.»
Nu ŋɡʉ̈ɔ́Ꞌ yi ɛ́ ɡʉ ńdɑ́Ꞌ ḿbiitɛ ńtɔ́ lɑ Mɔ́ɔ-Ŋu tɔ́
(Mɑ́lɛ́kúshi 13.3-13; Lúkɑ́shi 21.7-19)
3Yɛ́su ɡʉ tɛ ńnɑ́ŋ ndǔ nɛŋkɔ́Ꞌ-mɛtʉ́-mɛɡwɛ́t-ɔliivɛ, ɡɑŋku pɛ́ fɑk mbʉʉ yɔp ńtɔ́ ḿbíkŋɛ wɛ́ ŋɡɔ: «Sẅíi wɛ́k nɛ́ ŋkɑ́ yi yɔ nu ɡʉ ńdɑ́Ꞌ ŋ́ɡɛ. Sẅíi wɛ́k nɛ́ lii yi pɛ́ ɡʉ ńdɑ́Ꞌ ńdɔk ńjí ŋɡɔ ɔ sɛ́ ńtɔ́, mbɑ yi ɛ́ ɡʉ ŋ́ɡɛ pɛ́ jí ŋɡɔ lɛ́Ꞌ yi píi mbí ɡʉ ḿmɛ kuꞋ.» 4Yɛ́su pʉ̈ɔt mbɔ̌ pɔ́p ŋɡɔ: «Pʉʉ lɑk tú yʉ́ʉ, ḿbɑ́ɑ ŋu nɛfʉ́klɛ wʉ́ʉ.» 5MbíꞋŋɡɔ pʉɔ tɛ ńzɑ́ɑ ɡʉ ŋ́ɡɛ tík lík yɑ́ɑ mbi, mbɑ wɔ̌ lɑ́ nǔu pɔ́p pɔ́ cú ŋɡɔ: «A Nzɑ́Ꞌŋkʉ, ńcú pɔ́Ꞌɔ ńdɔk fu pʉɔ tɛ ńzɑ́ɑ.» 6Pʉʉ ɡʉ ńdɑ́Ꞌ zúꞋu pɛ́ pɔ́ ńcú nu nǔu mɛntsɔ mi ɛ́ cẅɛtnɛ nǔu wʉ́ʉ shʉ́ kɛ ŋɡɑ sɛsɑ ɔɔ, lɑ́ kɔɔ pʉʉ kɛ́ ńdɑ́Ꞌ ńcʉ̈ɔꞋ. Ɛ́ sɛ́ ḿbíkŋɛ ŋɡɔ yîyɑ́ yúu piitɛ ńdɛɛtɛ, lɑ́ ɛ́ pɔɔ ɡɔ́ɔ ńdɔk ḿbɔ́ ŋɡɔ píi mbí mɛ pɔ́. 7Lɑ́Ꞌ ɡʉ ńdɑ́Ꞌ ńdɔ sɛ́, ńdʉ̈ɔ́Ꞌ yɛcɔ́, fɔɔtúu lɔ sɛ́, ńdʉ̈ɔ́Ꞌ wɛcɔ́, tsɛ́tsɑ́Ꞌ ɡʉ ńdɑ́Ꞌ ḿbuu tsʉ́Ꞌnɛ nǔu mɛzʉꞋ tɛ ńzɑ́ɑ, cʉ́ pɛn ḿvu nǔu mɛzʉꞋ tɛ ńzɑ́ɑ. 8Mɔnɛ mɛnu ɡʉ ńdɑ́Ꞌ ńdɔk ḿbɔ́ pɑ́Ꞌ mɑŋɡɛ́ ẅi ɑ zɛnɛ nɛnɛ́mɛ lɑ́.
9Pɛ́ ɡẅɛɛ wʉ́ʉ ŋ́ɡɑ́ pɛ́ nyɛt wʉ́ʉ nɛ́ ŋɡʉ̈ɔ́Ꞌ, ŋ́ɡɛ pɛ́ jẅí wʉ́ʉ. Mɛlɑ́Ꞌ tsʉʉ ɡʉ ńdɑ́Ꞌ ḿbuu ḿbɑɑ wʉ́ʉ mɛlɑ́Ꞌ wɑ́ɑ. 10Ɛ́ ɡʉ ńdɑ́Ꞌ ḿbɔ́ pɔ́nɛ tɛ pʉɔ tɛ ńzɑ́ɑ tsɛtsɛt pʉʉ pɔɔ pɛn ńzɑ́p tʉ́m nǔu mɔ pɔ́, pɔ́p shɔtnɛ ɛ́fɛn mɛmbʉʉ mɔ́p, ɛ́shɔtnɛ ḿbɑɑ mɛmbʉʉ mɔ́p. 11Pɛŋɡɛ́mndʉ̈ɔ́Ꞌ-Sɛ́ pɛ́ cɔtnu cẅɛt tɛ ńzɑ́ɑ, ɛ́fúklɛ nɛzɑ́ɑ pʉɔ. 12Mɛnu kɛpɔŋ kẅiꞋ ńzɑ́ɑ, tɛ ŋ́ɡɛ ŋɡɔ nɛzɑ́ɑ pʉɔ pɔɔ pɛn ŋ́kɔŋ Sɛ́ tɛ ŋ́kɔŋ pɔ́. 13Lɑ́, ŋu ẅí ɑ ɛ́sʉk sʉknɛ kɛ́ kɑɑ ɡʉnɛ ŋ́ɡɛ ńduk. 14Ɛ́ píkŋɛ ŋɡɔ Pɛ́ lɑ́Ꞌ ńcẅi wɔ Ŋkʉʉ sʉ́Ꞌnɛ-nu-nɛfɔɔ-Sɛ́ mbɑ ɡɔ́ lɑ́ ndǔ tsɛ́tsɑ́Ꞌ, nɛpɔ́ yi mɛlɑ́Ꞌ mɛlɑ́Ꞌ tsʉʉ ɡʉ ńzúꞋ, lɑ píi mbí ɡɔ́ɔ ŋ́kɛ́ ḿmɛ.
Nu nǔu ŋɡʉ̈ɔ́Ꞌ ɡwɛ́
(Mɑ́lɛ́kúshi 13.14-23; Lúkɑ́shi 21.20-24)
15Ɛ́ ɡʉ ńdɑ́Ꞌ ḿbɔ́ ŋkɑ́ yîyɑ́, pʉʉ jʉ́ɔ ŋu ẅí Ŋɡɛ́mndʉ̈ɔ́Ꞌ-Sɛ́ Ndɑníyɛ̂ kɑ fúŋnɛ wɛ́ ŋɡɔ ŋkʉꞋnɛ ntɑ́kzʉꞋ. A tɔ́ ńtʉ́ʉ kwɑꞋ tsɛt zʉꞋ yí Sɛ́ zúꞋu. Ŋu fúŋ zʉꞋ-ŋwɑꞋnɛ yɔ, ɑ sɑ́Ꞌ tʉʉ nɛniitɛ zúꞋ. 16Ɛ́ pɔŋ ŋɡɔ, pɛ́ lɑɑ ńdɑ́Ꞌ ḿbɔ́ tɛ ńjʉ́ɔ wɛ́, pʉɔ pínɛ pɔ́p Judɛ̂ kʉ̈ɔ́ ńdɔk wɛ mɛŋkɔ́Ꞌ ŋ́ɡʉ ńdʉɔmɛ. 17Ŋu ẅí ɑ ɡʉ ńdɑ́Ꞌ ḿbɔ́ ndǔ tɛtɑ́ɑ yi ɛ́ ndǔ ndɑ́#24.17 Ndǔ tɛtɑ́ɑ yi ɛ́ ndǔ ndɑ́ ndǔ ndɑ́ ndɛ̂k yi pɛ́ kɑ́ kẅii, pɛ́ fúŋ nǔu cú-fɛlɑɑncí ŋɡɔ «dɑlle.», pɑ́ɑ nɛpfúu ŋɡɔ ɑ ɡʉ ḿbɛ́ɛ yúu ndɑ́ lɑ́ ńdɔk ŋ́kʉɔ. 18Ŋu ẅí ɑ ɡʉ ńdɑ́Ꞌ ḿbɔ́ ŋkɑ́Ꞌ, pɑ́ɑ nɛcú ŋɡɔ ɑ ɡʉ ḿbɛn ndɑ́ ḿbɛ́ɛ ndẅí-fɑ́k yɛ.
19Yɛ̌ɛ ŋɡʉ̈ɔ́Ꞌ pɑŋɡɛ́ pínɛ pɔ́p ɡʉ ńdɑ́Ꞌ ḿbɔ́ shǔutɛ, mbɑ pínɛ pɔ́p ɡʉ ńdɑ́Ꞌ ḿbɔ́ ńnɔ́ŋ pɔ́ɔmbɔ́t nǔu mîmɑ́ mɛlɛ́Ꞌ ɛɛ! 20Pʉʉ cɛꞋlɛ Sɛ́ ŋɡɔ kɔɔ nɛkʉɔ ɛ̂yɑ́ lɑ́Ꞌ ḿbɔ́ ŋkɑ́ cɛpcɛp mbʉŋ, kɛ pɔ lɛ́Ꞌnji ɔɔ. 21MbíꞋŋɡɔ ŋɡʉ̈ɔ́Ꞌ yi ɛ́ ɡʉ ńdɑ́Ꞌ ŋ́kúu pʉɔ, ɡʉ ńdɑ́Ꞌ ńzɑ́ɑ tɛꞋ, tɛ mbɔ pɛ́ ŋkɑɑ mɔ́ jʉ́ɔ yɛcɔ́ pɔ́Ꞌɔ pɔ́, tɛ ɛ́fú pɑ́Ꞌ Sɛ́ kɑ nɔŋnɛ ŋɡɔŋ, ŋ́ɡʉ ŋ́kúu ŋkɔ̂ɔnɛ, pɛ́ kɛ́ mbɔɔ lɑ́Ꞌ ḿbɛn ńjʉ́ɔ yɛcɔ́ pɔ́Ꞌɔ, pɔ́. 22Lɑ́ ḿbɔ́ yi Sɛ́ ŋkɑɑ pɔ́ pɛ́Ꞌnɛ, ńzɛɛ mbɔɔ jʉ́ɔ ŋɡɔ ɑ ɡʉ ńcẅɛɛtɛ mîmɑ́ mɛlɛ́Ꞌ pɔ́, mbɔ ɛ́ lɑɑ ḿbɔ́ sɑ̌ɑ ŋu lɑ́Ꞌ ḿbɔɔ luk. Lɑ́ ɑ kɑ lɔk nu-pʉɔ pínɛ ɑ kɑ tsɔ́Ꞌnɛ, lɑ ńcẅɛɛtɛ mɛlɛ́Ꞌlɑ́Ꞌ ɛ̂mɑ́.
23Pɔ́Ꞌɔ lɑ́, ŋu lɑɑ ŋ́kɛ́ ńdɑ́Ꞌ ńcú mbɔ̌ pʉʉ ŋɡɔ: «Nzɑ́Ꞌŋkʉ pʉ́ɔ zɑꞋnɛ, kɛ pɔ ŋɡɔ ɑ pʉ́ɔlíinɛ zíꞋnɛ ɔɔ kɔɔ pʉʉ pɛ́m, 24mbíꞋŋɡɔ pɛnzɑ́Ꞌŋkʉ pɛ́ cɔtnu, pɔ́p pɛŋɡɛ́mndʉ̈ɔ́Ꞌ-Sɛ́ pɛ́ cɔtnu ɡʉ ńdɑ́Ꞌ ńcẅɛt, ńnyɛt mɛmɑ́ mɛlii, ŋ́ɡɛ mɛŋkʉꞋnɛ mɛnu nɛlɔk fu pʉɔ tɛ ńzɑ́ɑ, tɛ ḿbɔ́ yi pɔ́p ḿbɔ́ pɛ́Ꞌnɛ ŋ́kuꞋ, mbɔ ɛ́ lɑɑ ḿbɔ́ pɔ́p fu mbɑ pʉɔ pínɛ Sɛ́ kɑ tsɔ́Ꞌnɛ.» 25Ɛ́ pʉ̈ɔ́lɑɑ, mbɔ ŋ kɛ́ ńzɑ́Ꞌ njí ɛ́sẅíi wʉ́ʉ.
26Pɔ́Ꞌɔ lɑ́, pɛ́ lɑɑ ńcú mbɔ̌ pʉʉ ŋɡɔ: «Pʉʉ jʉ́ɔ, Nzɑ́Ꞌŋkʉ pʉ́ɔlíinɛ kɔ̂ŋtɛt, kɔɔ pʉʉ ɡʉ zúꞋu, ńcú mbɔ̌ pʉʉ ŋɡɔ: Pʉʉ jʉ́ɔ, ɑ pʉ́ɔ ńdʉɔmɛ zɑꞋnɛ, kɔɔ pʉʉ pɛ́m.» 27Jínɛ ŋɡɔ mɛnɛ́ɛ-mbʉŋ ɡɛ ŋɡɔ ŋwɑŋ, ɛ́fú nɛsɑ́Ꞌ-nɛm, ŋ́ɡʉ ŋ́kúu mbɛ́nɛm, ɛ́ ndʉ́ŋndʉŋ pɑ́Ꞌ pɛ́ ńdɑ́Ꞌ ńjʉ́ɔ Mɔ́ɔ-Ŋu pɑ́Ꞌ ɑ tɔ́nɛ. 28Pfú-yúu nǔu zʉꞋ, pɛɡúm cúꞋlɛ zúꞋu.
Mɔ́ɔ-Ŋu ɡʉ ŋ́ɡɛ ńtɔ́
(Mɑ́lɛ́kúshi 13.24-27; Lúkɑ́shi 21.25-28)
29Mîmɑ́ mɛlɛ́Ꞌ ŋɡʉ̈ɔ́Ꞌ ɡʉ ńdɑ́Ꞌ ŋ́ɡɔ́ ńdɛɛ, nɛm shɔtnɛ sʉ́ʉ, sɑŋ pɔɔ pɛn ńtɑ́ pɔ́, pɛcɔ́Ꞌ-sɑŋ fú tʉ́ nɛpú ḿvutɛ sɛ́, mbɑ kʉ̈ɔ́ lɑ́ yi ɛ́ nɛpú puu ɛ́sɑtnɛ. 30Lii-Mɔ́ɔ-Ŋu ɡɔ́ɔ ŋ́kɛ́ ńcẅɛt nɛpú. Mɛŋɡɔŋ mɛŋɡɔŋ mí ɛ́ ndǔ tsɛ́tsɑ́Ꞌ kʉ́ɔꞋ nɛvú ńdɑɑ, pɛ́ ɡɔ́ɔ ŋ́kɛ́ ńjʉ́ɔ Mɔ́ɔ-Ŋu pɔ́ tsɛt lɑ́ɑ tʉ́ nɛpú ḿbɔ́ ńtɔ́, ŋ́ɡẅɛɛ nɛŋwɑ́ŋɛ mbɑ mɑ́mɑ́ mɛtʉʉ, 31ńtúu pɛcʉ̈ɔ́Ꞌ pɛ́, ŋkɑ́ yi pɛ́ tɔ́ŋnɛ mɑ́mɑ́ ntɑŋ-nɛsɔŋ-shʉ́ɔ, ńdɔk ńcúꞋlɛ pʉɔ pɛ́ pi ɑ kɑ tsɔ́Ꞌnɛ ndǔ mbí mɛsɑ́k mɛ́nɛ́kwɑ, pɔ́p fú mɛshʉ́ mɛshʉ́ ńtɔ́.
Nu nǔu tʉ́-ŋɡɛ̌m
(Mɑ́lɛ́kúshi 13.28-31; Lúkɑ́shi 21.29-33)
32Pʉʉ pɛ́ɛ fʉꞋ nǔu tʉ́-ŋɡɛ̌m, pʉʉ pɔ́ tɛ ńjʉ́ɔ mɛfu mɛ́ kunɛ tɛ ḿbɛn ńzɛ nɛtɔ́p, pʉʉ jí ŋɡɔ, ŋkɑ́ luu sɛ́ ńtɔ́. 33Ndʉ́ŋndʉŋ pɔ́Ꞌɔ, pʉʉ lɑɑ ńdɑ́Ꞌ ḿbɔ́ tɛ ńjʉ́ɔ mɔnɛ mɛnu, pʉʉ jí ŋɡɔ: Mɔ́ɔ-Ŋu tɔ́ tɛ ḿbɔ́ ntsundɑ́. 34Ɛ sẅíi wʉ́ʉ, kwɑꞋ nɛ́nẅín, pʉɔ pínɛ pɔ́p ndǔ mbí ŋkɔ̂ɔnɛ kɛ́ ɡɛ ńdɑ́Ꞌ ḿpfútɛ tɛ ḿmɛ kɛ́ pɔ́ yi mɔnɛ mɛnu tsʉʉ tɔ́ pɔ́. 35Nɛpú pɔ́p tsɛ́tsɑ́Ꞌ ɡʉ ŋ́ɡɛ ḿmɛ lɑ́ sẅiŋɛ yɑ́ɑ lɑ́Ꞌ mbɔɔ pɛ́.
Sɛ́ zɛ́nɛ jʉ́ jí ndẅiknzʉʉ lɛ́Ꞌ
(Mɑ́lɛ́kúshi 13.32-37; Lúkɑ́shi 17.26-30, 34-36)
36Lɑ́, ɛ́ kɛ́ ŋ́ɡʉ nǔu lɛ́Ꞌ ɛ̂yɑ́, pɔ ŋkɑ́ yi mɔnɛ mɛnu ɡʉ ŋ́ɡɛ ḿbɔ́ ńdɛɛ, mbɑ sɑ̌ɑ ŋu kɛ́ jí tɛ mbɑ pɛcʉ̈ɔ́Ꞌ-Sɛ́ pi pɔ́p tʉ́nɛ́pú, tɛ mbɑ mɔ́ɔ-Sɛ́, ndɑꞋ Tɑ̌ɑ zɛnɛjʉ́ jínɛ. 37Mɔ́ɔ-Ŋu ɡʉ ńdɑ́Ꞌ ŋ́ɡɔ ńtɔ́, mɛnu mí ɛ́ kɑ ɡɛnɛ ŋkɑ́ Nɔwɛ pɛn ŋ́ɡɛ. 38Ŋki kɑ ɡɔ ŋ́kɔ́Ꞌ ńjʉ́ zʉꞋ, pʉɔmɛsɔŋ pɔ́ ŋ́kwɛ́t yúu, ḿbɔ́ ńnɔ́ mɛluꞋ, ḿbɔ́ ńdɑ́ɑ ndɑ́, ŋ́ɡɑ́ pɔ́ɔ pɔ́p lɑ́ɑndɑ́, tɛ ŋ́kúu lɛ́Ꞌ yi Nɔwɛ kɑ kúunɛ tsɛt pɑ́ŋ, 39lɑ́Ꞌ zɛɛ ḿbɔɔ ḿbɔ́ ḿmʉk yɛcɔ́ nu pɔ́, tɛ ŋki ɡɛ ŋ́kɔ́Ꞌ, ḿbuu ḿbík wɔ́p pɛtsʉʉ. Mɔ́ɔ-Ŋu ɡʉ ńdɑ́Ꞌ ŋ́ɡɔ ńtɔ́ ɛ́ pɛn ḿbɔ́ pɔ pɔ́Ꞌɔ. 40Mbɛ́ɛnɛ yɛ́pɑ́ ɡʉ ńdɑ́Ꞌ ḿbɔ́ ŋkɑ́Ꞌ, pɛ́ lɔk tɑ́Ꞌ ŋ́ɡʉ, ńnɑ́ wɛcɔ́. 41Pɑŋɡɛ́ pɛ́pɑ́ pɔ́ ŋ́ɡɔꞋ yúu ndǔ luŋ, pɛ́ lɔk tɑ́Ꞌ ŋ́ɡʉ, ńnɑ́ wɛcɔ́. 42Ɛ́ yɛ́tɛ́ lɑ́ pʉʉ pɑ́ɑ nɛmɛꞋ ku, mbíꞌŋɡɔ pʉʉ kɑ́ pɔ́ ńjí lɛ́Ꞌ yi Tsɑpʉɔ wʉʉ ɡʉ ńtɔ́ pɔ́. 43Jínɛ sʉ́Ꞌnɛ ŋɡɔ, ŋɡɑŋndɑ́ ḿbɔ́ pɛ́Ꞌnɛ, ńjí ŋkɑ́ yi ntsɔ́ŋ ɡʉ ńtɔ́, mbɔ ɛ́ lɑɑ ḿbɔ́ ɑ lɛ́ kɛ́ lɛ́, nɛpyɛ́p tɛ ntsɔ́ŋ pɔɔ kúu njɛ́Ꞌ yɛ́ pɔ́. 44Ɛ́ Pɔ́Ꞌɔ lɑ́, mbɑ pʉʉ yʉ́ʉ, pʉʉ niitɛ mbʉʉ yʉʉ ḿbyɛ́p, mbíꞋŋɡɔ Mɔ́ɔ-Ŋu ɡʉ ŋ́ɡɛ ńtɔ́ ŋkɑ́ yi pʉʉ ḿbyɛ́p pɔ́.
Nu-ŋɡɑŋfɑꞋ sʉ́Ꞌnɛ pɔ́p wɛ kɛpɔŋ
(Lúkɑ́shi 12.41-48)
45ŊɡɑŋfɑꞋ ẅí ɑ zúꞋnɛnɛ, ḿbɛn ŋ́ɡẅɛɛ jínu ɑ pɑ́Ꞌɑ? A ẅi tɑ́fɑꞋ wɛ kɑ níꞋnɛ pʉɔ pɛ́ mbɔ̌ wɛ́, pɑ́Ꞌ ɑ ɡʉ ńtsʉ́Ꞌ ŋ́ɡɑ́ yúupɛjʉ́ mbɔ̌ pɔ́p nǔu ŋkɑ́ yi ɛ́ sɛ́ ḿbíkŋɛ. 46A pɔ́ttú pɑ́Ꞌ tɑ́fɑꞋ wɛ lɑɑ ŋ́ɡɔ ḿbɛn nzʉʉ, ńjʉ́ɔ ɑ pɔ́ ɛ́fɑꞋ yîyɑ́ fɑꞋ. 47Ɛ sẅíi wʉ́ʉ, kwɑꞋ nɛ́nẅín, tɑ́fɑꞋ wɛ ɡʉ ńníꞋ yúu pɛ́ tsʉʉ tsʉʉ mbɔ̌ wɛ́. 48Lɑ́ ŋ́kɛ́ ḿbɔ́ yi ɑ lɑɑ ḿbɔ́ ŋɡɑŋfɑꞋ kɛpɔŋ, ńcú lɔ́ŋ yɛ́ ŋɡɔ: «Tɑ́fɑꞋ wɑɑ kɛ́ fɛ́Ꞌnɛ ńtɔ́ pɔ́, 49ńzɛ nɛtswɑ́ɑ pʉɔ pínɛ pɔ́p pɛ́pɔ́p fɑꞋnɛ, pɔ́p pɛpɑ́lɛ́-mɛluꞋ cúꞋlɛ ŋ́kwɛ́t yúu, ḿbɛn ńnɔ́ mɛluꞋ.» 50Mbɔ tɑ́fɑꞋ wɛ ɡʉ ḿvukŋɛ vukŋɛ́nɛ ńtɔ́, nǔu ŋkɑ́ yi ɑ kɑ́ pɔ́ ńjí pɔ́, 51ńtɔ́, ńníꞋ ŋɡʉ̈ɔ́Ꞌ tú yɛ́ tɛꞋ, ńzuŋ wɛ́, ɑ ɡʉ nɛ́ zʉꞋ yi pɛ́ zuŋnɛ pɛŋkɔŋmík ŋ́ɡɑ́ zúꞋu, ńnɑ́ŋ zúꞋu ḿbɔ́ ńdɑɑ, ḿbɔ́ ŋ́kwɛ́t mɛsɔŋ.
Currently Selected:
Mɑtʉ̈ɔ 24: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
