Mɑtʉ̈ɔ 23
23
Yɛ́su cú ŋɡɔ kɔɔ pɛ́ ɡɛ pɑ́Ꞌ pɑfɑlísɑy pɔ́p pɑkyɛ́ꞌtɛ ŋwɑꞋnɛ-Sɛ́
(Mɑ́lɛ́kúshi 12.38-39; Lúkɑ́shi 11.43-46; 20.45-46)
1Yɛ́su ɡɛ ńcú mbɔ̌ nɔɔ-lɑ́Ꞌ tɛ mbɑ mbɔ̌ ɡɑŋku pɛ́ ŋɡɔ: 2«pɑkyɛ́ꞌtɛ nɛpʉ́ʉ-Mɔ̌sɛ̂ɛ pɔ́p pɑfɑlísɑy ɡẅɛɛ nɛkyɛ́Ꞌtɛ nɛpʉ́ʉ-Mɔ̌sɛ̂ɛ. 3Pɔ́Ꞌɔ, ɛ́ sɛ́ ḿbíkŋɛ ŋɡɔ pʉʉ zúꞋ ntsu wɔ́p, ŋ́ɡɛ kʉ̈ɔ́ lɑ́ yi pɔ́p sɛ́ ńcú mbɔ̌ pʉʉ. Lɑ́ kɔɔ pʉʉ fʉꞋnɛ tswɛ́ wɔp. MbíꞋŋɡɔ yúu mi pɔ́p zíꞋnɛ pʉɔ pɔ́p kɑ́ pɔ́ ŋ́ɡɛ yɛ́tɛ́ pɔ́. 4Pɔ́p cúꞋlɛ piꞋ yi ɛ́ jɔtnɛ tɛꞋ, ńzɑ́p ŋkɑmbʉ̈ɔꞋ-pʉɔmɛsɔŋ, lɑ́ ńdʉꞋ nɛpɔ́ yi kwɑꞋ pɔ́p ɡʉ sǐi ńdɔk mɔ́ncɛꞋ tɔ̂pɔ́ ŋ́ŋɑ́Ꞌ mbɑ ŋɑ́Ꞌnɛ. 5Pɔ́p pɔ́ ŋ́ɡɛ kʉ̈ɔ́ lɑ́ ḿbɔ́ ńdɔɔ ŋɡɔ pɛ́ jʉ́ɔ wɔ́p. Ɛ́ yúu mi ɛ́ ɡɛnɛ pɔ́p ɡʉ nǔu pɔ́ɔ mɛtɔ́Ꞌlɛ mi pɛ́ níꞋnɛ sẅíŋɛ-Sɛ́ tsɛtú ŋ́kút nǔu nɛzíi mbɑ nǔu pɔ́ lɑ́, ŋ́ɡɛ mɔ́p ɛ́ ɡúꞋ tɛꞋ. Pɔ́p pɛn ŋ́ɡɛ ŋɡɔ mɛcɔ́ŋ-ndẅí mɔ́p mi pɛ́ mɑꞋnɛ ńdɔk ńcɛꞋlɛ Sɛ́ sɑk tɛ ńtsɑ. 6Pɔ́p kúu zʉꞋ mɛndínɑɑ, ńnɑ́ŋ pɔ nǔu zʉꞋ-pɛlʉ́m, ŋ́kúu mɛndɑ́-cúꞋlɛ ŋ́kɑŋ yɔ́p zʉꞋ pɔ mbi. 7Pɔ́p kɔŋ ŋɡɔ pɛ́ tʉ́ʉ zɑ́n, ńcɛꞋlɛ wɔ́p nɛ́ mɛkuꞋ, pʉɔ pɛn ńnɑ́ŋ ɛ́fúŋ wɔ́p nɛ́ cícɑ.»
8Lɑ́ ŋ́ɡʉ nǔu pʉʉ, kɔɔ pʉʉ ɡɛ ŋɡɔ pɛ́ fúŋ wʉ́ʉ ŋɡɔ cícɑ, mbíꞌŋɡɔ pʉʉ pɔ́ pɔ́ɔpɛ́mɑ́, ḿbɛn ŋ́ɡẅɛɛ pɔ tɑ́Ꞌ cícɑ wɛ́mɔ́Ꞌ. 9Kɔɔ pʉʉ fúŋ wɛcɔ́ ŋu ndǔ tsɛ́tsɑ́Ꞌ ŋɡɔ tɑ̌ɑ wʉʉ, mbíꞌŋɡɔ pʉʉ ɡẅɛɛ pɔ tɑ́Ꞌ tɑ́t wɛ́mɔ́Ꞌ ɑ pɛn ḿbɔ́ pɔ tʉ́nɛ́pú. 10Kɔɔ pʉʉ pɛ́m pɛ́ fúŋ wʉ́ʉ ŋɡɔ ntʉ́ʉmbi, mbíꞌŋɡɔ ŋu ẅí ɑ tʉ́ʉnɛ mbi ɑ pɔ́ wɛ́mɔ́Ꞌ, ḿbɔ́ Nzɑ́Ꞌŋkʉ ẅí Sɛ́ kɑ kɑꞋnɛ. 11Ɛ́ pɔŋ ŋɡɔ ndʉ́m tsɛtsɛt pʉʉ lɔk mbʉʉ yɛ pɔ pɑ́Ꞌ ŋkwɑɑ wʉʉ lɑ́. 12Jínɛ ŋɡɔ, ŋu ŋ́ŋɑ́Ꞌ mbʉʉ yɛ, mbɔ Sɛ́ ɡʉ ŋ́kɔk wɛ́ ŋ́ɡɑ́ sɛ́, ŋu pɛn ŋ́kɔk mbʉʉ yɛ ŋ́ɡɑ́ sɛ́, mbɔ Sɛ́ ɡʉ ŋ́kɑꞋ wɛ́.
Yɛ́su sɛ́ ńcú ŋɡɔ tswɛ́-pɑkyɛ́tɛ́ nɛpʉ́ʉ-Mɔ̌sɛ̂ɛ pɔ́p wɛ pɑfɑlísɑy kɑ́ pɔŋ
(Mɑ́lɛ́kúshi 12.40; Lúkɑ́shi 11.39-50; 20.45-47)
13Pʉʉ pɛpʉ́ktú, pʉʉ pɑkyɛ́ꞌtɛ nɛpʉ́ʉ-Mɔ̌sɛ̂ɛ pɔ́p pʉʉ pɑfɑlísɑy. Pʉʉ pɑkɔŋmík, pʉʉ sɛ́ ŋ́kíitɛ ntsundɑ́ ẅi pʉɔmɛsɔŋ lɛɛnɛ nǔu lɑ ŋ́kúu tsɛt nu-nɛfɔɔ-Sɛ́, kwɑꞋ pʉʉ yʉ́ʉ sɛ́ mbɔɔ ŋ́kúu pɔ́, ŋ́kɛ́ ḿbɔɔ ńnɑ́ pʉɔ pí pɔ́p sɛ́ ŋ́kɔŋ nɛkúu tsɛtú kúu zúꞋu pɔ́.
14(Pʉʉ pɛpʉ́ktú, pʉʉ pɑfɑlísɑy pɔ́p pʉʉ pɑkyɛ́ꞌtɛ nɛpʉ́ʉ-Mɔ̌sɛ̂ɛ, pʉʉ ɡɑŋ-mɛfʉklɛ, pʉʉ ɡẅɛɛnɛ pɛpfúk ńcẅɛ́ɛ mɛndɑ́ mɔ́p, ńtsʉ́Ꞌ nɛcɛꞋlɛ Sɛ́, ńcú nu ɛ́ sɑk, nɛlɔk ɛ́fú mík-pʉɔ, pɔ́p kwɑŋɛ ŋɡɔ pʉʉ pʉɔ sʉ́Ꞌnɛ. Ɛ́ ɡʉ ńdɛɛ pɔ́Ꞌɔ, pʉʉ lɑ́Ꞌ ŋ́kúu tsɛt ŋɡʉ̈ɔ́Ꞌ ɡwɛ́.
15Pʉʉ pɛpʉ́ktú, pʉʉ pɑfɑlísɑy pɔ́p pʉʉ pɑkyɛ́ꞌtɛ nɛpʉ́ʉ-Mɔ̌sɛ̂ɛ, pʉʉ pɑŋkɔŋmík. Pʉʉ sɑ́Ꞌ tʉʉ ŋ́kɑ́t ńtúu mɛŋki kɛ nɛpɔ́ ŋ́ɡʉ mɛŋɡɔŋ nɛɡɛ tɑ́Ꞌ ŋu ẅí ɑ kɑ́ jí Sɛ́ pɔ́ cʉ́ɔ nzʉʉ pʉʉ ńjí Sɛ́. Lɑ́ ɑ kɛ ḿbɔ́ tɛ ŋ́kɛ́ ńcʉ́ɔ nzʉʉ pʉʉ, pʉʉ ɡɛ ɑ tsʉ́Ꞌ ŋu ẅí ɑ kuꞋnɛ nɛkúu pɔ tsɛtsɛt múk tɛ ńdɛɛ wʉ́ʉ.
16Pʉʉ pɛpʉ́ktú, pʉʉ ẅí pʉʉ pɛfʉmík, ḿbɛn ḿbɔ́ ŋ́ɡẅɛɛ pɔ́-pɛcɔ́ pʉɔ, ńnyɛt wɔ́p nɛ́ sɛ̂ndúŋ. Pʉʉ yɛcɔ́ ŋkɑ́ ńzíꞋ pʉɔ ŋɡɔ ŋu lɑɑ ńdɔk zʉꞋ-nɔŋpɔꞋ ŋ́kɑɑ Sɛ́, mbɔ ɑ kɑ́ tíi ndɔɔ pɔ́. Lɑ́ ḿbɔ́ yi ɑ lɔk tʉ́n-ŋɡɔ̂l yi ɛ́ tsɛt zʉꞋ-nɔŋpɔꞋ ŋ́kɑɑ Sɛ́, mbɔ ɑ tíi ndɔɔ. 17Pʉʉ kɑ́ pɔ́ pɛɡɛɡʉʉ ḿbɔ́ pɛfʉmík pɔ́ pɛ́Ꞌɛ, ɛ́ ɡʉ nǔu tʉ́n-ŋɡɔ̂l pɔ́p zʉꞋ-nɔŋpɔꞋ kʉ̈ɔ́ lɛɛ kʉ̈ɔ́? ZʉꞋ-nɔŋpɔꞋ kɑ́ nɛ́ ɡɛ lɑ́ tʉ́n-ŋɡɔ̂l tsʉ́Ꞌ yɛ́ Sɛ́ pɔ́ kɛ? 18Pʉʉ cú ŋɡɔ ŋu lɑɑ ńdɔk zʉꞋ yí pɛ́ nɔŋnɛ pɔꞋ zúꞋu, ŋ́kɑɑ Sɛ́, mbɔ yɛcɔ́ mɛlɑ́Ꞌ kɑ́ pɔ́ ɡú pɔ́. Lɑ́ ŋ́kɛ́ ńdɔk pɔꞋ yi ɛ́ ndǔ ŋ́kɑɑ Sɛ́, mbɔ ɑ tíi ndɔɔ. 19Pɛfʉmík, ɛ́ ɡʉ nǔu zʉꞋ yí pɛ́ nɔŋnɛ pɔꞋ zúꞋu, pɔ́p pɔꞋ, kʉ̈ɔ́ tsɑ kʉ̈ɔ́? ZʉꞋ yí pɛ́ nɔŋnɛ pɔꞋ zúꞋu kɑ́ nɛ́ ɡɛ pɔꞋ tsʉ́Ꞌ wɛ́ Sɛ́ pɔ́ ɔɔ?#23.19 23.14 Mɔnɛ mɛŋkɑŋ kɑ́ pɔ́ tsɛt mɛlwɛn ŋwɑꞋnɛ-Ŋɡɛlɛk pɔ́.) 20Pɔ́Ꞌɔ, ŋu lɑɑ ńdɔk zʉꞋ pɛ́ nɔŋnɛ pɔꞋ zúꞋu ŋ́kɑɑ Sɛ́, mbɔ ɑ lɔk yîyɑ́ zʉꞋ mbɑ yúu mi ɛ́ ndǔ ŋ́kɑɑ. 21Ŋu ẅí ɑ lɔknɛ zʉꞋ-nɔŋpɔꞋ ŋ́kɑɑ Sɛ́, ɑ lɔk zʉꞋ-nɔŋpɔꞋ mbɑ Sɛ́ ẅi ɑ zúꞋu ŋ́kɑɑ. 22Ŋu lɑɑ ńdɔk tʉ́nɛ́pú ŋ́kɑɑ Sɛ́, mbɔ ɑ lɔk kɔꞋ-Sɛ́, mbɑ Sɛ́ ẅi ɑ nɑ́ŋnɛ ndǔ ŋ́kɑɑ.
23Pʉʉ pɛpʉ́ktú, pʉʉ pɑkyɛ́ꞌtɛ nɛpʉ́ʉ-Mɔ̌sɛ̂ɛ pɔ́p pʉʉ pɑfɑlísɑy, pʉʉ pɑŋkɔŋmík, pʉʉ ɡɑptɛ yúu-nɑ́Ꞌ yʉ́ʉ tɛ mbɑ nzɑp yʉʉ, nji nɛɡɛ́m, ŋ́ɡɑ́ tɑ́Ꞌ nji mbɔ̌ Sɛ́, lɑ́, ŋ́ɡwɑ́ktɛ mɛnu mi nɛpʉ́ʉ-Sɛ́ zíꞋnɛ, ɛ́ pɔ́ kwɑꞋ mɛnu mí ɛ́ cẅɛ́lɛ́nɛ. Nu pɑ́Ꞌ nɛsẅíi nu nɛ́nẅín, nɛtsɑ́ɑ mɛjʉ́ŋ, nɛɡúꞋlɛ pɔ ndɑꞋ Sɛ́, lɑ́ yɛ́tɛ́ pɔ́nɛ yúu mi ɛ́ ḿbɔ́ ḿbíkŋɛ ŋɡɔ pʉʉ ɡɛ. Pʉʉ ɡɛ pɔ́Ꞌɔ, lɑ́ ŋ́kɛ́ mbɔɔ yɛcɔ́ ɡɛ́ɡɛ́ yúu likŋɛ. 24Pʉʉ ẅí pʉʉ pɛfʉmík, ḿbɛn ḿbɔ́ ŋ́ɡẅɛɛ pɔ́ pɛcɔ́ pʉɔ, ńnyɛt wɔ́p nɛ́ sɛ̂ndúŋ. Pʉʉ pɔ́k nɛmi njinji nǔu yúu mi pʉʉ ɡʉ ńnɔ́, ḿbɛn ḿmi shʉ́ɔ.
25Pʉʉ pɛpʉ́ktú, pʉʉ pɑkyɛ́ꞌtɛ nɛpʉ́ʉ-Mɔ̌sɛ̂ɛ pɔ́p pʉʉ pɑfɑlísɑy, pʉʉ pɑŋkɔŋmík. Pʉʉ tuk mbʉʉ-ntúꞋ lɔk ńnɔ́ mɛluꞋ mbɑ yɛ kɑ́ŋ, lɑ́ yúu mi pʉʉ lɔknɛ tsɔ́ŋ pɔ́p ɡɑ́tɛ ŋ́ɡẅɛɛ pɔ́nɛ tsɛtú. 26Ŋu-Fɑlísɑy, ɔ fʉmík, ɔ lɑɑ ḿbiitɛ ńtuk tsɛt ntúꞋ, tɛ ɛ́ lɛ́ɛnɛ, mbɔ nzɛmpíi ɡʉ ḿbɑ́ɑtɛ ńdɛ́ɛnɛ.
27Pʉʉ pɛpʉ́ktú, pʉʉ pɑkyɛ́ꞌtɛ nɛpʉ́ʉ-Mɔ̌sɛ̂ɛ pɔ́p pʉʉ pɑfɑlísɑy, pʉʉ pɑŋkɔŋmík, pʉʉ pɔ́ pɑ́Ꞌ mɛshi, mi pɛ́ lɔk mbʉ̈ɔ́ɔ ńzɔ́Ꞌ tɛ ɛ́ pɔ́ fúk. Nzɛm píi síi tɛꞋ, lɑ́ mɛtsẅíi-pɛpfú pɔ́p mɛlʉ̈ɔ́ yúu pɔ́nɛ tsɛtú. 28Ɛ́ pɛn ḿbɔ́ pɔ ndʉ́ŋndʉŋ pɑ́Ꞌ pʉʉ pɔ́nɛ yʉ́ʉ ɡúu, ŋ́ɡɛ pʉʉ pɔ́ mbi-pʉɔmɛsɔŋ, ḿbɔ́ pʉɔ-Sɛ́ tɛꞋ, lɑ́ ḿbɔ́ pɑŋkɔŋmík, kwɑŋɛ kɛpɔŋ pɔ́ tʉ́m pʉʉ tɛ ńdúu.
29Pʉʉ pɛpʉ́ktú, pʉʉ pɑkyɛ́ꞌtɛ nɛpʉ́ʉ-Mɔ̌sɛ̂ɛ pɔ́p pʉʉ pɑfɑlísɑy, pʉʉ pɑŋkɔŋmík, pʉʉ sɛ́ niitɛ ḿbɔ́ɔ mɛshi nǔu mɛzʉꞋ mi pɛ́ kɑ tẅíinɛ pɛŋɡɛ́mndʉ̈ɔ́Ꞌ-Sɛ́ zúꞋu, pʉʉ sɛ́ ńníꞋ mɛsuu nǔu mɛshi pʉɔ pínɛ pɔ́p kɑ ɡɔ́ mpfú ḿbɔ́ ŋ́ɡẅɛɛ nɛpʉ́ʉ-Sɛ́ sʉ́Ꞌnɛ. 30Tɛ ɛ́ kuꞋ pʉʉ cú ŋɡɔ: «Pɛk m̄bɔ́ pɛ́Ꞌnɛ m̄bɔ́ yɛ́k zúꞋu nǔu ŋkɑ́-pɛmɑ̂ɑŋɡɑpnjẅɛt pɛk, mbɔ pɛk ŋkɑɑ pɛ́m ŋɡɔ pɛ́ jẅí pɛŋɡɛ́mndʉ̈ɔ́Ꞌ-Sɛ́ pɔ́.» 31Pʉʉ lɔk pɔ́Ꞌɔ, ḿbɛ́m ŋɡɔ pʉʉ pɔ́ɔ-pʉɔ pínɛ pɔ́p kɑ jẅítɛ́nɛ pɛŋɡɛ́mndʉ̈ɔ́Ꞌ-Sɛ́. 32Pɔ́Ꞌɔ lɑ́, pʉʉ lɔk fɑꞋ-pɛmɑ̂ɑŋɡɑpnjẅɛt pʉ́ʉ, ŋ́ɡʉ nɛ́ mbi. 33Pʉʉ njẅɛt-mɛnɔ́, ḿbɔ́ pɛmɑ́sɛ́m-nɔ́, ḿbɔ́ pʉʉ ɡɛ pɑ́Ꞌɑ ńdɑ́Ꞌ ńnɑ́ kɛ́ kúu tsɛt múk?
34Pʉʉ kɛ́ ńzúꞋ, ŋ ɡʉ ŋ́ɡɛ ńtúu pɛŋɡɛ́mndʉ̈ɔ́Ꞌ-Sɛ́, pɔ́p pɑjínu, pɔ́p pɑkyɛ́ꞌtɛ ŋwɑꞋnɛ-Sɛ́. Pʉʉ jẅítɛ pɛcɔ́, ŋ́kẅii pɛcɔ́ nǔu tʉ́ mbɑ́ŋtɛ pɑ́ŋtɛ́nɛ, ńtswɑ́ɑ pɛcɔ́ nɛ́ mɛŋɡwɑɑ tsɛt mɛndɑ́-cúꞋlɛ mʉ́ʉ, ɛ́fú mɛtʉ́sɔŋ mɛtʉ́sɔŋ ńnɑ́ɑ wɔ́p. 35Pɔ́Ꞌɔ, mɛci-pɛpúꞋ pɛtsʉʉ mi pɛ́ kɑ tswɛtnɛ ndǔ tsɛ́tsɑ́Ꞌ tɛmtɛ ńcúŋ nǔu pʉʉ. Nɛfú nǔu mɛci-Abɛ̂ ẅí ɑ kɑ pɔ́ ńzúꞋnɛ Sɛ́, ŋ́ɡʉ ŋ́kúu nǔu mɛ́ Sɑkɑlíyɑ, mɔ́ɔ-Mbɑlɑshi, ẅi pʉʉ kɑ jẅínɛ wɛ́ nzʉʉ nɛkɛlɛmúk-pɔꞋ lɑ pɛ́ kúu ndɑ́-nɔŋpɔꞋ. 36Ɛ sẅíi wʉ́ʉ, kwɑꞋ nɛ́nẅín, pɛ́ ɡʉ ńdɑ́Ꞌ ḿbɑꞋ ndɔɔ-mɛnu ɛ̂mɑ́, ŋ́ɡɑ́ mbɔ̌ pʉɔ pínɛ pɔ́p ndǔ mbí ŋkɔ̂ɔnɛ.
Nu yí Yɛ́su kɑ cúnɛ nǔu Yɛlúsɑlɛm
(Lúkɑ́shi 13.34-35)
37Ŋkɑ́ kuꞋ Yɛ́su cú ŋɡɔ: «Pʉɔ-Yɛlúsɑlɛm, pʉɔ-Yɛlúsɑlɛm, pʉʉ ẅí pʉʉ jẅínɛ pɛŋɡɛ́mndʉ̈ɔ́Ꞌ-Sɛ́ jẅínɛ, ńdɔk mɛŋɡɔꞋ ńtɛ́m pʉɔ pínɛ Sɛ́ túunɛ wɔ́p mbɔ̌ pʉʉ ńjẅítɛ, ŋkɑ́ yɛsʉ́Ꞌʉ́ pɑ́Ꞌ n dɔɔnɛ nɛcúꞋlɛ wʉ́ʉ, pɑ́Ꞌ mɔ̂ŋɡɛ́p cúꞋlɛ pɔ́ɔ pɛ́ mɛpɑp yɛ́, pʉʉ kɛ́ ńdʉꞋ lʉꞋnɛ? 38Ɛ́ ŋkɔ̂ɔnɛ pɑ́Ꞌɑ zʉꞋ yí pʉʉ kɑ kútnɛ nɛɡúꞋlɛ Sɛ́ tsɛtú, ẅîwɑ́ Sɛ́ ɡʉ ŋ́kɛ́ ɛ́ tʉ́ʉ níinɛ.» 39Ɛ́ yɛ́tɛ́ lɑ́ ŋ ɡʉ ɛ́sẅíi wʉ́ʉ ŋɡɔ: «Tɛ ɛ́fú ŋkɔ̂ɔnɛ, pʉʉ kɛ́ pɛn ńjʉ́ɔ wɑ́ɑ pɔ́, tɛ ńdɑ́Ꞌ ŋ́kúu lɛ́Ꞌ yi pʉʉ ɡʉ ńcú ŋɡɔ: Sɛ́ pɔ́ nɛ́ ŋu ẅí ɑ tɔ́nɛ nǔu lík yɛ́.»
Currently Selected:
Mɑtʉ̈ɔ 23: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
