Mɑtʉ̈ɔ 19
19
Nu yí Yɛ́su sɛ́ ńcú nǔu nu-lɑ́ɑndɑ́
(Mɑ́lɛ́kúshi 10.1-12)
1Yɛ́su kɑ ɡɑ́ mɔnɛ mɛntík mbɔ̌ pʉɔ tɛ ḿbɔ́tnɛ ńnɑ́ŋ, ɛ́fú Ŋɡɑlilɛɛ ńcẅɛt, ńdɔk shʉ́ Judɛ̂ ŋ́ɡʉ, nǔu yɛcɔ́ njʉ́n-ŋki-Juudɛŋ. 2Lɑ́Ꞌ cʉ́ɔ nzʉʉ yɛ́ tɛ ńzɑ́ɑ. A kúu zúꞋu ŋ́ɡɛ ɡɑŋɡɔɔ tsɛtsɛt pɔ́p fíitɛ.
3Pʉɔ nǔu nɔɔ-pɑfɑlísɑy tɔ́ ḿbɔ́ ńdɔɔ nɛkwɑꞋnɛ Yɛ́su, ḿbíkŋɛ wɛ́ ŋɡɔ: «Tɛ ɛ́ pɛ́Ꞌɛ nɛpʉ́ʉ nɛkŋɛ pɛ́m ŋɡɔ ŋu zuŋ nzwɛ́ wɛ tɛ mbɑ nǔu yɛ́tɛ́ nu yí ɑ fɑɑnɛ́nɛ?» 4Yɛ́su píkŋɛ wɔ́p ŋɡɔ: «Pʉʉ kɑ́ fúŋ ŋwɑꞋnɛ-Sɛ́ ńzúꞋ pɔ́ kɛkʉ̈ɔ́? Pɛ́ kɑ ŋwɑꞋnɛ ŋɡɔ: Sɛ́ kɑ nɔŋ ŋɡɔŋ ḿbɔ́ɔ ŋu mbɛ́ɛnɛ pɔ́p mɑŋɡɛ́. 5Ɛ́ yúu mi ɛ́ ɡɛnɛ ŋu nɑ́ŋ tɛ ɛ́fɑk mbʉʉ yɛ nǔu tɑ́t wɛ pɔ́p mɑ́ wɛ, ŋ́ɡʉ ńdɑt mbʉʉ yɛ nǔu yɛ́ nzwɛ́ wɛ, pɔ́pmɛ tɛmtɛ ńtsʉ́Ꞌ tɑ́Ꞌ ŋu. 6Ɛ́ fú nǔu ŋkɑ́ yîyɑ́ pɔ́p pɔɔ pɛn ḿbɔ́ pʉɔ pɛ́pɑ́ pɔ́, pɔ́p tsʉ́Ꞌ ḿbɔ́ pɔ tɑ́Ꞌ ŋu. Pɔ́Ꞌɔ lɑ́, ŋumɛsɔŋ pɑ́ɑ nɛfɑk yúu mi Sɛ́ tɛmtɛ́nɛ.»
7Pɑfɑlísɑy píkŋɛ wɛ́ ŋɡɔ: Tɛ mɛlɑ́Ꞌ kʉ̈ɔ́, Mɔ̌sɛ̂ɛ kɑ cú ŋɡɔ: «pɛ́ ɡɑ́ ŋwɑꞋnɛ mbɔ̌ mɑŋɡɛ́ nɛlɔk ńzuŋ wɛ́.» 8Yɛ́su tsɔ́Ꞌ mbɔ̌ pɔ́p ŋɡɔ: «Mɔ̌sɛ̂ɛ kɑ pɔ́ ńcú pɔ́Ꞌɔ, mbíꞋŋɡɔ ɑ kɑ jʉ́ɔ ŋɡɔ pʉʉ tʉʉ tú mbɔ̌ Sɛ́ tɛ ɛ́ tsɑ. Lɑ́ ɑ pɛ́m ŋɡɔ pʉʉ zuŋ pɛzwɛ́ pʉ́ʉ, mbɔ ɛ́ kɑ fú nɔŋnɛ ŋɡɔŋ ŋ́kɛ́ mbɔɔ pɔ́Ꞌɔ pɔ́. 9Ɛ sẅíi wʉ́ʉ, ŋu lɑɑ ńzuŋ nzwɛ́ wɛ kɛ́ pɔ́ pɔ ŋɡɔ ɑ ɡɛ ɡɑp, ńzɔ́Ꞌ wɛcɔ́, mbɔ ŋɡɑŋ ɡɛ pɔ ɡɑp.»
10Gɑŋku-Yɛ́su cú mbɔ̌ wɛ́ ŋɡɔ: «Lɑ́ɑndɑ́ lɑɑ ḿbɔ́ pɔ pɑ́Ꞌɑ, mbɔ mbi ŋu nɛnɑ́ŋ kɛ́ zɔ́Ꞌ.» 11Yɛ́su tsɔ́Ꞌ mbɔ̌ pɔ́p ŋɡɔ: «Pʉɔ tsʉʉ kɑ́ nɛkuꞋ nɛpɛ́m yɔ nu pɔ́. ŃdíꞋ ndɑꞋ pʉɔ pí Sɛ́ tɔ́ɔtɛ́nɛ wɔ́p.» 12Yúu mi ɛ́ ɡɛnɛ pʉɔ pɔɔ zɔ́Ꞌ, pɔ́ tɛ ńzɑ́ɑ: Ɛ́ ɡʉ nǔu pɛcɔ́ pʉɔ, pɔ́p pɔɔ kuꞋ nɛzɔ́Ꞌ pɔ́ tɛ ɛ́fú pɔ lɛ́Ꞌ nzɛnɛ, ŋ́ɡʉ nǔu pɛcɔ́, mbɔ pʉɔmɛsɔŋ kɑ ɡɛnɛ, ḿbɛn ŋ́ɡʉ nǔu pɛcɔ́, mbɔ pɔ́p kɑ pɛ́m nɛpɔ́ pɔ́Ꞌɔ, ntɛ́ nu-nɛfɔɔ-Sɛ́. Ŋu ẅí ɑ jʉ́ɔ nɛpɛ́m yɔ nu pɛ́m.
Yɛ́su pɔ́p ɡɛ́ɡɛ́ mbɔ́ŋkʉ̈ɔ́
(Mɑ́lɛ́kúshi 10.13-16; Lúkɑ́shi 18.15-17)
13Pʉɔ ɡɛ ḿbɔ́ ńdɔk mbɔ́ŋkʉ̈ɔ́ ńtɔ́ mbi Yɛ́su nɛpɔ́ yi ɑ ɡʉ ŋ́ɡɔ́ ńzɑ́p mbɔ́ nǔu pɔ́p, ḿbɔ́ ńcɛꞋlɛ Sɛ́. Lɑ́ ɡɑŋku pɛ́ pɔ́ ńtɔꞋ wɔ́p. 14Yɛ́su cú ŋɡɔ: «Pʉʉ nɑ́ mbɔ́ŋkʉ̈ɔ́ pɔ́p tɔ́ ŋ́kẅɛ́ɛtɛ wɑ́ɑ, kɔɔ pʉʉ zuŋ wɔ́p, pʉɔ pínɛ pɔ́p pɑ́Ꞌ mbɔ́ŋkʉ̈ɔ́ ɡẅɛɛnɛ nu nǔu nɛfɔɔ-Sɛ́, 15ńcú pɔ́Ꞌɔ, ńzɑ́p mbɔ́ mɛ́ nǔu pɔ́p, tɛ ɛ́ kuꞋ ɑ fú zúꞋu ŋ́ɡʉ.»
Mɔ́ɔsuu ŋɡɑŋyúu
(Mɑ́lɛ́kúshi 10.17-31; Lúkɑ́shi 18.18-30)
16Wɛcɔ́ ŋu ɡɛ ńtɔ́ nɛjɔ́ŋ Yɛ́su, ḿbíkŋɛ wɛ́ ŋɡɔ: «Cícɑ, ɛ́ lɑɑ ḿbɔ́ ŋ ɡɛ kʉ̈ɔ́ nu sʉ́Ꞌnɛ lɑ ŋ́ɡẅɛɛ luk kɛ́mɛ?» 17Yɛ́su píkŋɛ wɛ́ ŋɡɔ: «Mɛlɑ́Ꞌ kʉ̈ɔ́ ɔ píkŋɛ wɑ́ɑ nɛ́ nu nǔu yúu mi ɛ́ pɔŋnɛ? Ŋu sʉ́Ꞌnɛ pɔ́ pɔ wɛ́mɔ́Ꞌ. Ɔ lɑɑ ḿbɔ́ ŋ́kɔŋ ŋɡɔ pʉʉ Sɛ́ pɔ́nɛ, ɔ ɡẅɛɛ mɛnɛpʉ́ʉ mɛ́.» 18Ŋu ɛ̂wɑ́ píkŋɛ ŋɡɔ: «Ɛ́ mɛ́tɛ́ mɛnɛpʉ́ʉ?» Yɛ́su pʉ̈ɔt ŋɡɔ: «kɔɔ jẅí ŋu, kɔɔ ɡɛ ɡɑp, kɔɔ jʉ̈ɔ, kɔɔ tík sɔ́ɔ tú-ŋu. 19Gɑ́ mɛkuꞋ-tɑ́t wu, pɔ́p mɑ́ wu, kɔŋ mɔ́ɔmɑ́ wu ŋumɛsɔŋ pɑ́Ꞌ ɔ kɔŋ túmbʉʉ yú.» 20Mɔ́ɔsuu ɛ̂wɑ́ cú mbɔ̌ wɛ́ ŋɡɔ: «Mɔ, n dɔ ŋ́kɛ́ ńtswɛ́ ŋ́ɡẅɛɛ mɛnɛpʉ́ʉ ɛ̂mɑ́ ɡẅɛɛnɛ tsʉʉ, kʉ̈ɔ́ pɛ́tnɛ ńjɑ́k wɑ́ɑ?» 21Yɛ́su pʉ̈ɔt mbɔ̌ wɛ́ ŋɡɔ: «Ɔ lɑɑ ḿbɔ́ ńdɔɔ nɛmɛkŋɛ ńdẅiklɛ, ɔ ɡʉ ɛ́fɛn yúu pinɛ ɔ ɡẅɛɛnɛ tsʉʉ, ŋ́ɡɑ́ ŋkɑ́p mbɔ̌ pɑkɛ́yúu, ŋ́ɡɔ́ɔ ŋ́kɛ́ ńdɑ́Ꞌ ŋ́ɡẅɛɛ yúu tʉʉndɛn tʉ́nɛ́pú. Gʉ ŋ́ɡɛ pɔ́Ꞌɔ, ḿbɛn ńtɔ́ ńcʉ́ɔ nzʉʉ mɔ.» 22Mɔ́ɔsuu zúꞋ yɔ sẅiŋɛ, shʉ́ wɛ́ pfúu, ɑ tɛ́m ŋkwɛn yɛ́ ŋ́ɡʉ, mbíꞋŋɡɔ ɑ kɑ ɡẅɛɛ yúu tʉʉndɛn tɛꞋ. 23Yɛ́su cú mbɔ̌ ɡɑŋku pɛ́ ŋɡɔ: «Ɛ sẅíi wʉ́ʉ, kwɑꞋ nɛ́nẅín, ŋɡɔ Ɛ́ tɛn mbɔ̌ ŋɡɑŋyúu nɛpɛ́m ŋɡɔ Sɛ́ tsʉ́Ꞌnɛ ɛ́sɑ́Ꞌ wɛ́.» 24Ŋ ɡʉ ḿbɛn ńniitɛ ɛ́sẅíi wʉ́ʉ ŋɡɔ, ɛ́ zɑŋɛ mbɔ̌ shʉ̈ɔ́ nɛsɔ́ tsɛt ntẅɛɛ-sɑ́Ꞌ, ńtsɑ ŋɡɑŋyúu nɛpɛ́m ŋɡɔ Sɛ́ tsʉ́Ꞌnɛ ɛ́sɑ́Ꞌ wɛ́. 25Gɑŋku pɛ́ zúꞋ yɔ nu, ɛ́ kʉꞋnɛ wɔ́p tɛꞋ, pɔ́p cú ŋɡɔ tɛ ɛ́ lɑɑ ḿbɔ́ pɑ́Ꞌɑ, mbɔ wɔ̌ ɡʉ ńdɑ́Ꞌ ńduk? 26Yɛ́su líŋɛ wɔ́p tɛ ńcú ŋɡɔ: «Ɛ́ tsɑ pɔ pʉɔmɛsɔŋ, Sɛ́ kuꞋ nɛɡɛ mbɑ kʉ̈ɔ́ lɑ́.» 27Pyɛ̂ cú mbɔ̌ Yɛ́su ŋɡɔ: «Tɛ pɛk kɑ nɑ́ yúu tsʉʉ, ńcʉ́ɔ nzʉʉ ɡu pɑ́Ꞌɑ, tɛ yɛ́k nu ɡʉ ńdɑ́Ꞌ ḿbɔ́ ŋɡɔku?» 28Yɛ́su pʉ̈ɔt ŋɡɔ: «Tsʉ́Ꞌnɛ ɛ sẅíi wʉ́ʉ, kwɑꞋ nɛ́nẅín, pɛ́ ɡʉ ńdɑ́Ꞌ ŋ́kúu tsɛt ŋɡɔŋ fí, Mɔ́ɔ-Ŋu nɑ́ŋ ndǔ kɔꞋ-nɛfɔɔ nɛ́ ni ɛ́ ɡẅɛɛ nɛɡúꞋ, pʉʉ pʉɔ ntsɔ̌ppɑ́ nɛ́ nɛɡɛ́m pi pʉʉ kɑ cʉ́ɔnɛ nzʉʉ mɔ, pɛn ńnɑ́ŋ yʉ́ʉ ndǔ mɛkɔꞋ ntsɔ̌ppɑ́ nɛ́ nɛɡɛ́m, ŋ́ŋɑk pʉɔ-Íslɑyɛ̂l, njẅɛtndɑ́ ntsɔ̌ppɑ́ nɛ́ nɛɡɛ́m.» 29Mbɑ wɔ̌ lɑ́ ẅi ɑ kɑ nɑ́nɛ mɛndɑ́, ńnɑ́ pɔ́ɔpɛ́mɑ́ pɛ́ pɛ́ mbɛ́ɛnɛ mbɑ pɛ́ pɑŋɡɛ́, kɛ pɔ tɑ́t wɛ, kɛ pɔ mɑ́ wɛ, kɛ pɔ mbɔ́ŋkʉ̈ɔ́ pɛ́, kɛ pɔ mɛŋkɑ́Ꞌ mɛ́ ɔɔ, ntɛ́ lík yɑ́ɑ, ɑ ɡʉ ńdɑ́Ꞌ ḿbɛn ŋ́ɡẅɛɛ yîyɑ́ yúu ŋkɑ́ ŋkʉ, ḿbɛn ŋ́ɡẅɛɛ luk kɛ́ mɛ. 30Lɑ́ nɛzɑ́ɑ pɑtʉ́ʉ mbi ŋkɔ̂ɔnɛ, ɡʉ ńdɑ́Ꞌ ńtsʉ́Ꞌ pɑtʉ́ʉ nzʉʉ, nɛzɑ́ɑ pɑtʉ́ʉ nzʉʉ ŋkɔ̂ɔnɛ ńdɑ́Ꞌ ḿbɔ́ pɑtʉ́ʉ mbí.
Currently Selected:
Mɑtʉ̈ɔ 19: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
