Mɑtʉ̈ɔ 20
20
Sɑknɛkɛt nǔu ɡɑŋfɑꞋ pí pɛ́ fúŋnɛ wɔ́p nǔu fɑꞋ mɛku mɛku
1Yɛ́su pɛn ŋɡɔ: «nu-nɛfɔɔ-Sɛ́ ɡɔ́ɔ ḿbɔ́ pɔ pɑ́Ꞌ nu-wɛcɔ́ ŋu ẅí ɑ kɑ mʉ́ʉnɛ mbɑ́ꞋmbɑꞋɑ́, ŋ́ɡʉ lɔɔ ɡɑŋfɑꞋ pínɛ ɑ ɡʉ ńníꞋ ŋkɑ́Ꞌ yɛ́.» 2Pɔ́p pɛ́ ɡɑŋfɑꞋ niitɛ pɑ́Ꞌ ɑ ɡʉ ŋ́ɡɑ́ tɑ́Ꞌ pɑk-ŋkɑ́p mbɔ̌ tɑ́Ꞌ ŋu nǔu lɛ́Ꞌlɑ́Ꞌ. A ɡɔ́ɔ ŋ́kɛ́ ńcú pɔ́p ɡʉ nɛ́ ŋkɑ́Ꞌ yɛ́#20.2 Pɑk-kɑ́p lɔk ḿbɔ́ «denier».. 3Nɛm yɛ́nɛ́pfuꞋú pɛn ŋ́kuꞋ, ɑ pɛn ńcẅɛt njɛ́Ꞌ yɛ́, ńjʉ́ɔ pɛcɔ́ ɡɑŋfɑꞋ pɛn ńtʉ́ʉ mɛfyɑkŋɛ-ndúŋ, mbɔɔ pɔ́ ŋ́ɡɛ yɛcɔ́ yúu pɔ́. 4A cú mbɔ̌ pɔ́p ŋɡɔ: «Pʉʉ ɡʉ yʉ́ʉ ŋkɑ́Ꞌ mɔ ɛ́fɑꞋ fɑꞋ. Ŋ ɡʉ ŋ́ɡɛ ńdʉŋtɛ yʉ́ʉ tsɔ́ꞋfɑꞋ nǔu fɑꞋ yʉ́ʉ.» 5Píipɑ́ pʉɔ ɡʉ nɛ́ ŋkɑ́Ꞌ. Ŋɡɑŋkɑ́Ꞌ ɡɛ ḿbɔ́ nǔu tẅɛp, ḿbɛn ńcẅɛt njɛ́Ꞌ yɛ́, ŋ́ɡɛ ḿbɔ́ mbɔ́tnjí nǔu nɛm pɛtɑ́t, ḿbɛn ńcẅɛt, ńjʉ́ɔ ɡɑŋfɑꞋ ŋkɑ́ kʉ̈ɔ́ ɔɔ, ńcú pɔ pɔ́Ꞌɔ. 6A ɡɛ ḿbɔ́ ntsuŋkẅɛ́Ꞌ nǔu nɛm yɛ́tɑ́ɑ, ńcẅɛt, ńjʉ́ɔ pɛcɔ́ ɡɑŋfɑꞋ tʉ́ʉtɛ, ɑ píkŋɛ wɔ́p ŋɡɔ: «Mɛlɑ́Ꞌ kʉ̈ɔ́ pʉʉ tʉ́ʉ zɑꞋɑ tɛ ɛ́fú mbɑ́ꞋmbɑꞋɑ́ kɛ́ pɔ́ ŋ́ɡɛ yɛcɔ́ yúu?» 7Pɔ́p pʉ̈ɔt ŋɡɔ: «Ɛ́ ɡɔ́ ḿbɔ́, mbɔ wɛcɔ́ ŋu kɑ́ fúŋ wɛ́k nǔu fɑꞋ pɔ́.» A cú mbɔ̌ pɔ́p ŋɡɔ: «Pʉʉ ɡʉ yʉ́ʉ ŋkɑ́Ꞌ mɔ ɛ́fɑꞋ fɑꞋ.» 8Ŋkɑ́ nɛtsɔ́Ꞌ fɑꞋ kuꞋ, ŋɡɑŋkɑ́Ꞌ cú mbɔ̌ ŋu ẅí ɑ líŋɛ́nɛ yúu pɛ́ ŋɡɔ: «Fúŋ ɡɑŋfɑꞋ, ŋ́ɡɑ́ ŋkɑ́p yɔp, zɛ nǔu pʉɔ pínɛ ɛ fúŋnɛ wɔ́p nǔu fɑꞋ pɔ nzʉʉ lɑ́, ŋ́ɡʉ ŋ́kúu nǔu pʉɔ pínɛ n dɑ́Ꞌ ńzɛ nǔu pɔ́p.» 9Pʉɔ pínɛ pɔ́p zɛ yɔ́p fɑꞋ nǔu nɛm yɛ́tɑ́ɑ ntsuŋkẅɛ́Ꞌ tɔ́, pɛ́ ɡɑ́ tɑ́Ꞌ pɑk-ŋkɑ́p mbɔ̌ mbɑ wɔ̌ lɑ́ nǔu pɔ́p. 10Pʉɔ pínɛ pɔ́p lɑ́Ꞌnɛ ḿbiitɛ ńzɛ fɑꞋ ɡɔ́ ńtɔ́ yɔ́p, ḿbɔ́ ŋ́kwɑŋɛ ŋɡɔ yɔp ŋkɑ́p ɡʉ nɑꞋ ńzɑ́ɑ, lɑ́ pɛ́ pɛn ŋ́ɡɑ́ pɔ tɑ́Ꞌ pɑk-ŋkɑ́p mbɔ̌ mbɑ wɔ̌ lɑ́ nǔu pɔ́p. 11Pɔ́p ɡɔ ńcẅɛ́ɛ lɔ́ŋ wɔp pɔ́ ńzɑ́ŋ ntɛ́ ŋɡɑŋkɑ́Ꞌ. 12Pɔ́p pɔ́ ńcú ŋɡɔ: «Pʉɔ pɔ́nɛ tɔ́ pɔ nzʉʉ, pɔ́p fɑꞋ pɔ ndɑꞋ nǔu tɑ́Ꞌ nɛm, ɔ kɛ́ ḿbɛn ḿbíi wɔ́p pɔ pɑ́Ꞌ pɛk lɑ́, lɑ́ mbɔ pɛk lɑ́Ꞌ ńzɛ fɑꞋ mbɑ́ꞋmbɑꞋɑ́, pɛk kɛ́ ńjúk ɛ́fɑꞋ pɔ kɛ́ jẅiitɛ, mɔ́nɛm pɔ́ ńtɔɔ wɛ́k.» 13Ŋɡɑŋkɑ́Ꞌ tsɔ́Ꞌ mbɔ̌ wɛcɔ́ tɑ́Ꞌ ŋu nǔu pɔ́p ŋɡɔ: «Súu wɑɑ, ŋ kɑ́ fɑɑnɛ yɛcɔ́ nu mbɔ̌ ɡu pɔ́. Pûu lɑ́Ꞌ ńniitɛ tɛ ḿbɔ́ tɑ́Ꞌ ŋu, pɑ́Ꞌ ɔ ɡʉ cẅɛ́ɛ tɑ́Ꞌ pɑk-ŋkɑ́p nǔu lɛ́Ꞌlɑ́Ꞌ.» 14Kɔ ŋkɑ́p yu, ɛ́fú nɛjɔ́ŋ mɔ ńtsʉ́ʉtɛ. Ɛ́ ɡʉ nǔu ŋu ẅí ɑ tɔ́ pɔ nzʉʉ, mbɔ n jʉ́ɔ ŋɡɔ ŋ ɡʉ ŋ́ɡɑ́ ndʉ́ŋndʉŋ yúu mi ŋ ɡɑ́nɛ mbɔ̌ ɡu mbɔ̌ wɛ́. 15Ŋ ɡẅɛɛ nɛlɔk ŋkɑ́p yɑɑ ŋ́ɡɛ yúu mi ŋ kɔŋnɛ, ɛ́ kɑ́ pɔ́ pɔ́Ꞌɔ pɔ́ kɛ? Kɛ ɔ zɑ́ŋ lɔ́ŋ ntɛ́ pɔ nu yí ɔ jʉ́ɔnɛ m bɔ́ ŋɡɑŋ-pɔŋtʉ́m ɔɔ? 16Yɛ́su pɛn ńcú ŋɡɔ: «Ɛ́ pɔ́Ꞌɔ lɑ́ ɡɑŋ nzʉʉ ɡʉ ńdɑ́Ꞌ ńtsʉ́Ꞌ pɑ pɔ́ mbi, ɡɑŋ mbi tsʉ́Ꞌ pɑ pɔ́ nzʉʉ.»
Yɛ́su pɛn ḿbɔ́ ḿbʉ́ pɑ́Ꞌ ɑ ɡʉ mpfú ḿbɛn ńzẅíimɛ
(Mɑ́lɛ́kúshi 10.32-34; Lúkɑ́shi 18.31-34)
17Yɛ́su pɔ́ ḿbʉʉ nɛ́ Yɛlúsɑlɛm, ńdɔɔ ɡɑŋku pɛ́ ntsɔ̌ppɑ́ nɛ́ nɛɡɛ́m, pɔ́p pɛ́pɔ́p pɔ́ ńnɛn, ɑ cú mbɔ̌ pɔ́p ŋɡɔ: 18«Pʉʉ tsuŋ ńzúꞋ sʉ́Ꞌnɛ, pɛkŋɛ sɛ̂ndúŋ ḿbɔ́ ḿbʉʉ nɛ́ Yɛlúsɑlɛm pɑ́Ꞌɑ, ŋ́kúu zúꞋu, pɛ́ fɛn Mɔ́ɔ-Ŋu mbɔ̌ pɛtɑ́tndɑ́-pɑnɔŋpɔꞋ pɔ́p pɑkyɛ́ꞌtɛ nɛpʉ́ʉ-Mɔ̌sɛ̂ɛ. Pɔ́p ŋɑk wɛ́, ńzɑ́p ŋɡɔ ɑ ɡʉ mpfú, 19ŋ́ɡɑ́ wɛ́ mbɔ̌ pʉɔ pɔ́p kɑ́ pɔ́ pɑyúdɑ pɔ́, pɔ́p zɔɔtɛ wɛ́, ńdɔk ŋɡwɑɑ ńtswɑ́ɑ wɛ́, ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ. A pɛn ńzẅíimɛ nǔu nɛvú nǔu mbɑ́ɑtɛ lɛ́Ꞌ pɛtɑ́t.»
Mɑ́ pɛ́ Jɑ̂k pɔ́p Jɑ̂ŋ sɛ́ ńdɔ́ɔ zʉꞋ ɡwɛ́ ntɛ́ wɔ́p
(Mɑ́lɛ́kúshi 10.35-45; Lúkɑ́shi 22.25-27)
20Mɑ́ pɛ́ Jɑ̂k pɔ́p Jɑ̂ŋ, pɔ́ɔ-Zɛbɛ́dɛ́ɛ, lɔk wɔ́p ńtɔ́ mbi Yɛ́su, ŋ́kẅíꞋlɛ sɛ́ nɛlɔ́ɔ yɛcɔ́ yúu mbɔ̌ wɛ́. 21Yɛ́su píkŋɛ wɛ́ ŋɡɔ: «Ɔ tsɑ́ɑ ŋɡɔ ŋ ɡɛ ŋɡɔ́ku?» A pʉ̈ɔt ŋɡɔ: «Mɔ sɛ́ ńtsɑ́ɑ ŋɡɔ ɔ pɛ́m mbɔ̌ mɔ ŋɡɔ, ɔ ɡʉ ŋ́ɡɛ ḿbɔ́ fɔɔ, mbɔ́ŋkʉ̈ɔ́ pɑ́ɑ pɔnɛ pɛ́pɑ́ nɑ́ŋ nɛjɔ́ŋ ɡu, tɑ́Ꞌ pɔ́ nǔu ɡúŋ-pɔ́ yú yɛ tʉʉ, wɛcɔ́ pɔ́ nǔu ɡúŋ-pɔ́ yú yɛ ŋkẅɛpmɛ.» 22Yɛ́su tsɔ́Ꞌ ŋɡɔ: «Pʉʉ kɑ́ jí yúu mi pʉʉ lɔ́ɔnɛ pɔ́. Pʉʉ kuꞋ nɛnɔ́ ntúꞋ-ŋɡʉ̈ɔ́Ꞌ yi ŋ ɡʉ nɛnɔ́?» Pɔ́p pʉ̈ɔt ŋɡɔ: «Pɛk kuꞋ nɛnɔ́.» 23Yɛ́su cú mbɔ̌ pɔ́p ŋɡɔ: «Ɔ́ɔŋ pʉʉ ɡʉ ŋ́ɡɛ ńnɔ́ ntúꞋ yɑɑ. Lɑ́, ŋ́ɡʉ nǔu nɛtsẅíkŋɛ ŋu nǔu ɡúŋ-pɔ́ yɑ́ɑ yɛ tʉʉ kɛ pɔ yɛ ŋkẅɛpmɛ ɔɔ, mbɔ mɔ kɑ́ nɛ́ ɡẅɛɛ nɛɡɑ́ mbɔ̌ ŋu pɔ́. Tɑ̌ɑ mɔ sɛ́ jínɛ pʉɔ pí ɑ kɑ niitɛ́nɛ yîyɑ́ zʉꞋ ńdɔk ḿbyɛ́p wɔ́p.»
24Pɛcɔ́ ɡɑŋku-Yɛ́su nɛɡɛ́m pɔ́ tɛ ńzúꞋ nu yí pɔ́ɔ-Zɛ́bɛ́dɛ́ cúnɛ, ńzɑ́ŋ lɔ́ŋ ntɛ́ wɔ́p. 25Yɛ́su fúŋ wɔ́p pɛtsʉʉ, ńcú mbɔ̌ pɔ́p ŋɡɔ: «Pʉʉ sɛ́ ńjí ŋɡɔ pɛtɑ́ɑ-ŋɡɔŋ sɛ́ ɛ́sɑ́Ꞌ lɑ́Ꞌ, ńnɔꞋ pʉɔ nɔꞋnɛ, pɛmɑ́pʉɔ pɔ́ ɛ́fyɛ́t lɑ́Ꞌ fyɛ́tnɛ. 26Lɑ́ ɛ́ kɛ́ mbɔɔ pɔŋ ŋɡɔ ɛ́ pɔ́ tsɛtsɛt pʉʉ ḿbɔ́ pɔ́Ꞌɔ pɔ́. Ŋu lɑɑ ḿbɔ́ ŋ́kɔŋ nɛpɔ́ ndʉ́m tsɛtsɛt pʉʉ, mbɔ ɛ́ pɔ́ŋ ŋɡɔ ɑ tsʉ́Ꞌ mɔ́ŋkʉ̈ɔ́ wʉʉ. 27Ŋu nǔu pʉʉ lɑɑ ḿbɔ́ ŋ́kɔŋ nɛpɔ́ ndʉ́m tsɛtsɛt pʉʉ, mbɔ ɛ́ pɔŋ ŋɡɔ ɑ pɛ́m nɛpɔ́ ŋkwɑɑ wʉʉ. 28Ndʉ́ŋndʉŋ pɑ́Ꞌ Mɔ́ɔ-Ŋu ŋkɑɑ tɔ́ ndǔ tsɛ́tsɑ́Ꞌ, pɔ pɑ́Ꞌ pʉɔmɛsɔŋ ɡʉ ɛ́fɑꞋ mbɔ̌ wɛ́ pɔ́, ɑ kɑ tɔ́ pɔ nɛfɑꞋ mbɔ̌ pʉɔmɛsɔŋ, ɛ́fɑꞋ fɑꞋ tɛ ḿbɛn ŋ́ɡɑ́ tú yɛ́ nɛlɔk ńtsúꞋ pʉɔ tɛ ńzɑ́ɑ.»
Yɛ́su ɡɛ pɛfʉmík pɛ́pɑ́ jʉ́ɔ zʉꞋ
(Mɑ́lɛ́kúshi 10.46-52; Lúkɑ́shi 18.35-43)
29Yɛ́su pɔ́p ɡɑŋku pɛ́ ɡɛ ḿbɔ́ ɛ́fú tsɛt tʉ́sɔŋ-Yɛlíkɔ ńcẅɛt, nɔɔ-lɑ́Ꞌ cʉ́ɔ nzʉʉ yɛ́. 30Pɛcɔ́ pɛfʉmík pɛ́pɑ́ pi pɔ́p nɑ́ŋnɛ mbʉʉ-sɛ̂ndúŋ, zúꞋ ŋɡɔ Yɛ́su sɛ́ ńdɛɛ zúꞋu, ńzɛ nɛɡɑ́ ɡwɑ́t, ńcú ŋɡɔ: «Tsɑpʉɔ ŋu nǔu njẅɛt-fɔɔ Ndɑvît tsɑ́ɑ mɛjʉ́ŋ mɛ́k.» 31Pʉɔ tɛ ńzɑ́ɑ kɑkŋɛ wɔ́p ŋɡɔ pɔ́p nɑꞋ, lɑ́ pɔ́p ɡɔ́ɔ mɛkŋɛ ŋ́ɡɑ́Ꞌ nɛɡɑ́ ɡwɑ́t ńcú ŋɡɔ: «Tsɑpʉɔ, ŋu nǔu njẅɛt-fɔɔ Ndɑvît tsɑ́ɑ mɛjʉ́ŋ mɛ́k.» 32Yɛ́su tʉ́ʉ ɛ́fúŋ wɔ́p, ḿbíkŋɛ wɔ́p ŋɡɔ: «Pʉʉ tsɑ́ɑ ŋɡɔ ŋ ɡɛ ŋɡɔ́ku nǔu pʉʉ?» 33Pɔ́p pʉ̈ɔt ŋɡɔ: «Tsɑpʉɔ, ɡɛ ŋɡɔ mík mɛ́k jʉ́ɔ zʉꞋ.» 34Yɛ́su tsɑ́ɑ mɛjʉ́ŋ mɔ́p, ńzɑ́p mbɔ́ mɛ́ nǔu mík mɔ́p, ɛ́ ɡɔ́ɔ ńzɛ nɛjʉ́ɔ zʉꞋ, pɔ́p cʉ́ɔ nzʉʉ yɛ́.
Currently Selected:
Mɑtʉ̈ɔ 20: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
