Jɑ̂ŋ 16
16
1Ɛ sẅíi wʉ́ʉ nɛ́ mɔnɛ mɛnu nɛpɔ́ yi pʉʉ kɛ́ tsʉꞋ nzʉʉ ḿmɛꞋ nɛzɑ́p tʉ́m nǔu mɔ pɔ́. 2Pɛ́ ɡʉ ŋ́ɡɛ ɛ́fú tsɛt mɛndɑ́-cúꞋlɛ-Pɑyúdɑ ńzuŋ wʉ́ʉ. Ɛ́ pɔɔ pɔ́ pɔ ndɑꞋ pɔ́Ꞌɔ pɔ́. Ŋkɑ́ sɛ́ ŋ́kuꞋ pɑ́Ꞌ ŋu ɡʉ ŋ́ɡɛ ḿbɔ́ ńjẅí tɑ́Ꞌ ŋu tsɛtsɛt pʉʉ, ŋ́kwɑŋɛ ŋɡɔ ɑ nɔŋ pɔ pɔꞋ mbi Sɛ́. 3Pɔ́p ɡʉ ŋ́ɡɛ pɔ́Ꞌɔ, mbíꞋŋɡɔ pɔ́p kɑ́ jí Tɑ̌ɑ pɔ́, ŋ́kɛ́ mbɔɔ wɑ́ɑ jí. 4Lɑ́, ŋ kɛ́ ḿbiitɛ ɛ́sẅíi wʉ́ʉ, lɑ́ ŋkɑ́ ɛ̂yɑ́ ɡɛ ḿbɔ́, pʉʉ kẅíitɛ ŋɡɔ ŋ kɑ zɛɛ ɛ́sẅíi wʉ́ʉ.
FɑꞋ-zẅikŋɛ Lɛ́ɛnɛ́nɛ
Ŋ kɑ ɡɔ́ ńzɛ, mbɔɔ sẅíi wʉ́ʉ nɛ́ yɔ nu pɔ́, mbíꞋŋɡɔ ŋ kɑ pɛ́t tsɛtsɛt pʉʉ. 5Mɔ ŋkɔ̂ɔnɛ pɑ́Ꞌnɛ, ŋ́ɡʉ nɛ́ nɛjɔ́ŋ Tɑ̌ɑ ẅí ɑ kɑ túunɛ wɑ́ɑ. Mɔ sɛ́ ŋ́ɡʉ, wɛcɔ́ ŋu wʉʉ kɛ́ mbɔɔ píkŋɛ wɑ́ɑ ŋɡɔ: «Ɔ ɡʉ pɔ nɛ́ ɡɔ́ pɔ́ pɔ́ ɔɔ?» 6Pʉʉ kɛ́ ḿbɔ́ ḿmʉk mʉknɛ, mbíꞋŋɡɔ ɛ sẅíi wʉ́ʉ ŋɡɔ ŋ ɡʉ ŋ́ɡʉ. 7Lɑ́ ŋ kɛ́ ḿbɔ́ ɛ́sẅíi wʉ́ʉ pɑ́Ꞌnɛ pɔ nɛ́ nu nɛ́nẅín, ŋɡɔ ɛ́ nu sʉ́Ꞌnɛ mbɔ̌ pʉʉ ŋɡɔ ŋ ɡʉ. Ɛ́ mbíꞋŋɡɔ n dɑɑ mbɔɔ ɡʉ, mbɔ Ncẅɛ́ɛntɑ́ŋ wʉʉ kɛ́ tɔ́ ńtsɛ́t wʉ́ʉ pɔ́. Lɑ́ ŋ kɛ ḿbɔ́ tɛ ŋ́ɡʉ, mbɔ ŋ ɡʉ ńtɔ́ ńtúu wɛ́ ŋ́ɡɑ́ mbɔ̌ pʉʉ. 8A ɡʉ ḿbɔ́ tɛ ńtɔ́, ńtsuŋ ńnyɛt mbɔ̌ pʉɔ-ndǔmbí ŋɡɔ pɔ́p ɡɛ pɔ nu kɛpɔŋ, ŋɡɔ pɔ́p kɑ pɔ́ ńjí yúu mi nu ndʉ́ŋndʉŋ ɛ́ yɛ́t pɔ́, ḿbɛn ŋ́kɛ́ ḿbɔ́ɔ ńjí yúu mi nɛŋɑk, ɛ́ yɛ́t pɔ́. 9Nu kɛpɔŋ yí ɑ ɡʉ ńtɔ́ ńnyɛt wɔ́p, ɛ́ pɑ́Ꞌ pɔ́p ŋkɑɑ zɑ́p tʉ́m nǔu mɔ pɔ́. 10Pʉɔ-ndǔmbi jʉ́ɔ ŋɡɔ pɔ́p sɛ́ ɛ́fɑɑnɛ nǔu nu ndʉ́ŋndʉŋ, mbíꞋŋɡɔ mɔ sɛ́ ḿbɛn nɛ́ nɛjɔ́ŋ Tɑ̌ɑ mɔ, pʉʉ pɔɔ pɛn ńjʉ́ɔ wɑ́ɑ pɔ́. 11Pʉɔ-ndǔmbi jʉ́ɔ ŋɡɔ pɔ́p sɛ́ ɛ́fɑɑnɛ nǔu nu nɛŋɑk, mbíꞋŋɡɔ fɔɔ ẅí ɑ sɑ́Ꞌnɛ yɔ njí kɑ vu ntsɑŋ.
12M bɛn ŋ́ɡẅɛɛ mɛnu mí ŋ ɡʉ ɛ́sẅíi wʉ́ʉ tɛꞋ, lɑ́ ḿbɔ́ pʉʉ pɔɔ zúꞋ ŋkɔ̂ɔnɛ pɔ́. 13Zẅikŋɛ yí ɛ́ lɛ́Ꞌlɛ́nɛ nu nɛ́nẅín nǔu Sɛ́ ɡʉ ŋ́ɡɛ ńtɔ́, ŋ́ɡɛ pʉʉ jí nu nɛ́nẅín tsʉʉ, mbíꞋŋɡɔ jʉ́ lɛ́Ꞌlɛ́nɛ nu nɛ́nẅín, ɛ́ kɛ́ ɡɛ ńcú pɔ yɛ́ nu pɔ́. Zẅikŋɛ yí ɛ́ lɛ́Ꞌlɛ́nɛ nu nɛ́nẅín nǔu Sɛ́ ɡʉ ŋ́ɡɛ ńcú pɔ nu yí ɛ́ zúꞋnɛ, ḿbɛn ɛ́sẅíi wʉ́ʉ nɛ́ mɛnu mí ɛ́ sɛ́ ńtɔ́. 14Ɛ́ ɡʉ ŋ́ɡɛ nyɛt wɑɑ nɛɡúꞋ, mbíꞋŋɡɔ ɛ́ ɡʉ cẅɛ́ɛ mbɔ̌ mɔ lɑ́ ńzíꞋ wʉ́ʉ. 15Mbɑ kʉ̈ɔ́ lɑ́ yi ɛ́ mbɔ̌ Tɑ̌ɑ mɔ ɛ́ yɑ́ɑ. Ɛ́ yúu mi ɛ́ ɡɛnɛ, lɑ n cú ŋɡɔ: «Zẅikŋɛ-nɛnẅín ɡʉ ŋ́ɡɛ ńzúꞋ sẅiŋɛ yɑ́ɑ, ńtɔ́ ɛ́sẅíi wʉ́ʉ.»
Nɛfú nǔu nɛmʉk ŋ́kúu nǔu tsɑ́ɑtɛ
16Ɛ́ ńtsʉ́Ꞌ mɔ́zʉꞋ pʉʉ pɔɔ pɛn ńjʉ́ɔ wɑ́ɑ pɔ́, ɛ́ pɛn ŋ́kɛ́ ŋ́ɡɔ́ ńdɑ́ɑtɛ pʉʉ pɛn ńjʉ́ɔ wɑ́ɑ. 17Pɛcɔ́ ntɑ́Ꞌ-ɡɑŋku-Yɛ́su ɡɔ́ɔ ŋ́kɛ́ ńcú tsɛtsɛt pɔ́p ŋɡɔ: «A lɔk ńcú ŋɡɔ ku?» A cú ŋɡɔ: «Ɛ́ ńtsʉ́Ꞌ mɔ́zʉꞋ pɛkŋɛ pɔɔ pɛn ńjʉ́ɔ wɛ́ pɔ́, ɛ́ pɛn ńdɛɛ mɔ́zʉꞋ pɛkŋɛ pɛn ńjʉ́ɔ wɛ́, ḿbɛn ŋɡɔ, ɑ ɡʉ nɛ́ nɛjɔ́ŋ Tɑ́t wɛ. 18Wɔ mɔ́zʉꞋ mɔ́zʉꞋ ẅí ɑ cúnɛ lɔk ńcú ŋɡɔ ku? Pɛkŋɛ kɑ́ pɔ́ ńzúꞋ yúu mi ɑ lɔɔnɛ nɛcú pɔ́.»
19Yɛ́su jʉ́ɔ pɑ́Ꞌ pɔ́p sɛ́ ńdɔɔ nɛpíkŋɛ wɛ́ nɛ́ nu, ńcú mbɔ̌ pɔ́p ŋɡɔ: «Ɛ sẅíi wʉ́ʉ ŋɡɔ ɛ́ ńtsʉ́Ꞌ mɔ́zʉꞋ pʉʉ pɔɔ pɛn ńjʉ́ɔ wɑ́ɑ pɔ́, ɛ́ pɛn ŋ́kɛ́ ŋ́ɡɔ́ ńdɑ́ɑtɛ, pʉʉ pɛn ńjʉ́ɔ wɑ́ɑ. Yɛ́t ɡɛnɛ lɑ́ pʉʉ lɔɔ nɛpíkŋɛ wɑ́ɑ nɛ́ nu kíi? 20Lɑ́ ɛ sẅíi wʉ́ʉ, kwɑꞋ nɛ́nẅín, pʉʉ ɡʉ ŋ́ɡɛ ńdɑɑ, ńtswɑ́ɑ mbʉʉ yʉʉ, pʉɔ-ndǔmbí pɔ́ ńtsɑ́ɑtɛ yɔ́p tsɑ́ɑtɛ́nɛ. Pʉʉ nɑ́ŋ tsɛt nɛmʉk; lɑ́ nɛmʉk wʉʉ ɛ̂wɑ́ ɡɛ ɛ́shɔtnɛ ńtsʉ́Ꞌ pɔ tsɑ́ɑtɛ.» 21Mɑŋɡɛ́ pɔ́ tɛ ḿbɔ́ ńnɛ́mɛ, ńzɛ nɛzúꞋ kɛpɔŋ, mbíꞋŋɡɔ ŋkɑ́ ŋɡʉ̈ɔ́Ꞌ kuꞋ. Lɑ́, ŋ́kɛ́ ḿbɔ́ tɛ ḿbí mbɔɔ pɛn ŋ́kẅíitɛ ŋkɑ́ yi mɔ́ɔ kɑ pɔ́ ńnɛ́m wɛ́ pɔ́, mbʉʉ yɛ́ tsʉꞋ ḿbɔŋ pɔŋnɛ ntɛ́ pɑ́Ꞌ tɑ́Ꞌ ŋumɛsɔŋ tɔ́nɛ ndǔ tsɛ́tsɑ́Ꞌ. 22Ɛ́ ndʉ́ŋndʉŋ pɑ́Ꞌ pʉʉ ŋkɔ̂ɔnɛ ḿbɔ́ ḿmʉk mʉknɛ, lɑ́ ŋ ɡʉ ŋ́ɡɛ ḿbɛn ńjʉ́ɔ wʉ́ʉ, pʉʉ ɡɔ́ɔ ŋ́kɛ́ ńtsʉ́Ꞌ ńtsɑ́ɑtɛ tsɑ́ɑtɛ́nɛ. Wɛcɔ́ ŋu pɔɔ kuꞋ nɛsɑꞋ yʉ́ʉ tsɑ́ɑtɛ pɔ́.
23Ɛ́ ɡɛ ḿbɔ́ lɛ́Ꞌ ɛ̂yɑ́, pʉʉ pɔɔ pɛn ŋ́ɡẅɛɛ yɛcɔ́ nu yí pʉʉ ɡʉ ḿbíkŋɛ wɑ́ɑ pɔ́. Lɑ́ ɛ sẅíi wʉ́ʉ, kwɑꞋ nɛ́nẅín, pʉʉ lɑɑ ńdɔk lík yɑ́ɑ ńdɔ́ɔ yúu mbɔ̌ Tɑ̌ɑ mɔ, mbɔ ɑ ɡʉ ŋ́ɡɑ́. 24Lɑ́ ŋ́kúu ŋkɔ̂ɔnɛ, pʉʉ ŋkɑɑ zɛɛ ńdɔk lík yɑ́ɑ ńdɔ́ɔ yɛcɔ́ yúu mbɔ̌ Sɛ́ pɔ́. Pʉʉ lɔ́ɔ ɑ ɡɑ́ mbɔ̌ pʉʉ, tsɑ́ɑtɛ niitɛ ńdúu tsɛt tʉ́m yʉ́ʉ.
Yɛ́su tsɑ píimbí
25N dɔk pɔ sɑknɛkɛt ńcú mɔ mɛnu. Yɛcɔ́ ŋkɑ́ ɡʉ ŋ́ɡɛ ḿbɔ́, m bɔɔ pɛn ńdɔk pɔ sɑknɛkɛt ńcú nu mbɔ̌ pʉʉ pɔ́. N tsʉ́Ꞌ ɛ́sɑ́ɑnɛ sɑ́ɑnɛ́nɛ ɛ́sẅíi wʉ́ʉ nɛ́ nu yí ɛ́ líŋɛ́nɛ Tɑ̌ɑ mɔ. 26Lɛ́Ꞌ ɛ̂yɑ́, pʉʉ lɔk lík yɑ́ɑ ńdɔ́ɔ yúu mbɔ̌ Sɛ́. Ŋ kɑ́ pɔ́ ɛ́sẅíi wʉ́ʉ ŋɡɔ ŋ ɡʉ ŋ́ɡɛ ḿbúꞋ mbɔ́ mbɔ̌ Tɑ̌ɑ mɔ ŋ́ɡɑ́ mbɔ̌ pʉʉ pɔ́. 27Ɛ́ mbíꞋŋɡɔ kwɑꞋ jʉ́ Tɑ̌ɑ mɔ kɔŋ wʉ́ʉ. A kɔŋ wʉ́ʉ, mbíꞋŋɡɔ pʉʉ kɑ kɔŋ wɑ́ɑ, ḿbɛn ḿbɔ́ ḿbɛ́m ŋɡɔ ɛ fú mbɔ̌ Sɛ́. 28Ŋ kɑ fú mbɔ̌ Tɑ̌ɑ mɔ, ńtɔ́ ndǔmbí, m bɛn ḿbɔ́ ŋkɔ̂ɔnɛ ḿbɔ́ ɛ́fú ndǔmbí ŋ́ɡʉ nɛtsɛ́t wɛ́.
29Gɑŋku pɛ́ ńcú ŋɡɔ: «Jʉ́ɔ pɑ́Ꞌ ɔ sɑ́ɑnɛ sɑ́ɑnɛ́nɛ ńcú nu kɛ́ lɔk sɑknɛkɛt. 30Pɛk jí ŋkɔ̂ɔnɛ ŋɡɔ ɔ jí mbɑ kʉ̈ɔ́ lɑ́, tɛ ḿbiitɛ ńjí yúu mi pɛk lɔɔ nɛpíkŋɛ wú. Ɛ́ yúu mi ɛ́ ɡɛnɛ pɛk pɛ́m ŋɡɔ ɔ fú mbɔ̌ Sɛ́.» 31Yɛ́su tsɔ́Ꞌ mbɔ̌ pɔ́p ŋɡɔ: «Ńjí ŋɡɔ pʉʉ ḿbɛ́m ŋkɔ̂ɔnɛ pʉ́ɔ!» 32Ŋkɑ́ sɛ́ ŋ́kuꞋ, tɛ ɛ́ zɛɛ ŋ́kuꞋ kuꞋnɛ, pɑ́Ꞌ pʉʉ ɡʉ ńtɑ́kŋɛ ɛ́sɑt zʉꞋ. Mbɑ wɔ̌ lɑ́ lɔk yɛ́ ɡúŋ, ńnɑ́ wɑ́ɑ zɛ́nɛ mɔ, lɑ́ ŋ kɛ́ mbɔɔ zɛ́nɛ mɔ pɔ́, pɛk Tɑ̌ɑ mɔ pɔ́nɛ. 33N zɑ́Ꞌ njí ɛ́sẅíi wʉ́ʉ nɛ́ mɔnɛ mɛnu ɛ́ lɛɛ pɔ́Ꞌɔ, mbɔ́tnɛ pɔ́ tʉ́m pʉʉ. Pʉʉ ɡʉ ŋ́ɡɛ ńjʉ́ɔ ŋɡʉ̈ɔ́Ꞌ ndǔmbí, lɑ́ kɔɔ pʉʉ cʉɔꞌ. Ŋ kɑ tsɑ píimbí.
Currently Selected:
Jɑ̂ŋ 16: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
