Jɑ̂ŋ 15
15
Yɛ́su kwɑꞋ nɛtsɛ́n-tʉ́
1Yɛ́su pɛn ḿbɛ́ɛ yɔ fʉꞋ ńcú ŋɡɔ: «Mɔ kwɑꞋ nɛtsɛ́n-tʉ́ ni pɛ́ kíɛ mɛntɑ́ɑ mɛ́ ńdɔk ńniitɛ mɛluꞋ#15.1 Ɛ́ lɔk ḿbɔ́ tʉ́ yi pɛ́ fúŋnɛ ŋɡɔ «viɡne». Tʉ́ yi pɛ́ pí Íslɑɛ̂l tɛꞋ, ɛ́ zɛ́m mɛntɑ́ɑ ɛ́ pɔŋ tɛꞋ, pɛ́ lɔk ńniitɛ mɛluꞋ, ŋ́kɛ́ mbɔɔ pɔ́Ꞌɔ pɔ́ pɛ́ sɑŋ ńdɔk ŋ́ɡɛ yúu pɛjʉ́. Yîyɑ́ tʉ́ tsɛt ŋwɑꞋnɛ-Sɛ́ ḿbɔ́ lii-pʉɔ-Islɑɛ̂l pí Sɛ́ kɑ kɑŋnɛ wɔ́p, ńníꞋ wɔ́p tsɛt ŋɡɔŋ wɔ́p, pɑ́Ꞌ pɛ́ pi tʉ́-mbɛ́lɛ ŋkɑ́Ꞌ lɑ́.. Tɑ̌ɑ mɔ pɔ́ ŋu ẅí ɑ fɑꞋnɛ nǔu.» 2«A njʉ́ɔ pɔ́tʉ́ ẅi ɛ́ lɑtnɛ́nɛ nǔu mɔ ḿbɔɔ ńzɛ́m ntɑ́ɑ pɔ́, ŋ́kʉ́ɔꞋ, ńtɔ́ nǔu yi ɛ́ sɛ́ ńzɛ́m mɛntɑ́ɑ, ńniitɛ ŋ́kwɑk yîyɑ́, ɛ́ tsuŋ ńzɛ́m mɛntɑ́ɑ sʉ́Ꞌnɛ.» 3«Yúu mi ŋ kɑ zíꞋnɛ wʉ́ʉ kɑ lɑ́Ꞌ mɔ ŋ́ɡɛ pʉʉ pɔ́ sʉ́Ꞌnɛ.» 4«Pʉʉ lɑtnɛ nǔu mɔ, pɑ́Ꞌ n dɑtnɛ́nɛ yɑ́ɑ nǔu pʉʉ! Pɔ́tʉ́ lɑɑ mbɔɔ lɑtnɛ nǔu nɛtsɛ́n-tʉ́ pɔ́, mbɔ ɛ́ kɛ́ kuꞋ nɛzɛ́m mɛntɑ́ɑ pɔ́. Ɛ́ ndʉ́ŋndʉŋ pɑ́Ꞌ pʉʉ lɑɑ mbɔɔ tɛmtɛ nǔu mɔ pɔ́, pʉʉ pɔɔ kuꞋ nɛɡɛ yɛcɔ́ yúu tɛ ɛ́ pɔŋ pɔ́.» 5Nɛtsɛ́n-tʉ́ ɑ mɔ, mbɔ́tʉ́ pɔ́ pʉʉ. Ŋu ẅí ɑ lɑtnɛ́nɛ mbʉʉ yɛ nǔu mɔ, n dɑtnɛ mbʉʉ yɑɑ nǔu yɛ ɡúu, ɑ ŋu ẅí ɑ ɡɛnɛ yúu sʉ́Ꞌnɛ tɛꞋ. Ɛ́ mbíꞋŋɡɔ pɛkŋɛ lɑɑnɛ mbɔɔ pɔ́, pʉʉ pɔɔ yɛcɔ́ yúu ɡɛ. 6«Ŋu lɑɑ mbɔɔ lɑtnɛ mbʉʉ yɛ nǔu mɔ pɔ́, ɑ pɔ́ pɑ́Ꞌ pɔ́tʉ́ ẅi pɛ́ kʉ́ɔꞋnɛ, ḿmɑꞋ nzʉʉ ŋkɑ́Ꞌ ɛ́ zúu. Pɛ́ lɑk ńtɔɔ múk.» 7«Pʉʉ lɑɑ ńdɑtnɛ mbʉʉ yʉʉ nǔu mɔ, sẅiŋɛ yɑ́ɑ pɔ́ tsɛt tʉ́m pʉʉ, pʉʉ lɔ́ɔ yúu mi pʉʉ kɔŋnɛ, mbɔ pɛ́ ɡʉ ŋ́ɡɑ́ yîyɑ́ yúu mbɔ̌ pʉʉ.» 8«Yúu mi ɛ́ lɑɑ ḿbɔ́ ɛ́ ɡɛ pɛ́ ɡúꞋlɛ Tɑ̌ɑ mɔ, ɛ́ pɑ́Ꞌ ɛ́ lɑɑ ḿbɔ́ pʉʉ ɡɛ yúu sʉ́Ꞌnɛ tɛꞋ, ḿbɛn ḿbɔ́ ɡɑŋku pɑ́ɑ.»
9«Pɑ́Ꞌ Tɑ̌ɑ mɔ kɔŋnɛ wɑ́ɑ lɑ́, mbɑ mɔ yɑ́ɑ, ŋ kɔŋ wʉ́ʉ. Pʉʉ lɑt mbʉʉ yʉʉ nǔu mɔ nǔu ntɛ́ yi ŋ ɡʉ ŋ́kɛ́ ḿbɔ́ ŋ́kɔŋ wʉ́ʉ kɔŋnɛ.» 10«Pʉʉ lɑɑ ŋ́ɡẅɛɛ nɛpʉ́ʉ nɑ́ɑ, mbɔ ŋ ɡʉ ḿbɔ́ ŋ́kɔŋ wʉ́ʉ kɔŋnɛ. Ndʉ́ŋndʉŋ pɑ́Ꞌ ŋ kɑ ɡẅɛɛnɛ nɛpʉ́ʉ-Tɑ̌ɑ mɔ ɑ pɛn ḿbɔ́ ŋ́kɔŋ wɑ́ɑ kɔŋnɛ.» 11«N cú yɔ nu mbɔ̌ pʉʉ nɛpɔ́ yi tsɑ́ɑtɛ yí ɛ́ tsɛt tʉ́m mɔ ɡʉ ḿbɛn ḿbɔ́ tsɛt tʉ́m yʉ́ʉ, pʉʉ ɡẅɛɛ kwɑꞋ tsɑ́ɑtɛ.» 12Nɛpʉ́ʉ nɑ́ɑ pʉ́ɔlɑɑnɛ: «Pʉʉ kɔŋɛ pʉʉ nɛ́ pʉʉ pɑ́Ꞌ ŋ kɑ kɔŋnɛ wʉ́ʉ lɑ́.» 13«Wɛcɔ́ ŋu kɛ́ pɛn ŋ́ɡẅɛɛ ŋkɔŋɛ tɛ ɛ́ lɛɛ yi ŋu ẅí ɑ ɡɑ́nɛ yɛ luk nǔu tú-pʉɔ pí ɑ kɔŋnɛ wɔ́p pɔ́.» 14«Pʉʉ lɑɑ ŋ́ɡɛ yúu mi m bíkŋɛ́nɛ wʉ́ʉ, mbɔ pʉʉ tsʉ́Ꞌ ḿbɔ́ pɔ pɛsúu pɑ́ɑ.» 15«M bɔɔ pɛn ɛ́fúŋ wʉ́ʉ ŋɡɔ mbɔ́ŋkʉ̈ɔ́ pɔ́, mbíꞋŋɡɔ mɔ́ɔ-fɑꞋ kɑ́ jí yúu mi tɑ́fɑꞋ wɛ sɛ́ ŋ́ɡɛ pɔ́. Ɛ fúŋ wʉ́ʉ ŋɡɔ pɛsúu pɑ́ɑ, mbíꞋŋɡɔ ŋɡɔŋ nu tsʉʉ yí ŋ kɑ zúꞋnɛ mbɔ̌ Tɑ̌ɑ mɔ, ŋ ɡɛ pʉʉ jí.» 16«Pʉʉ ŋkɑɑ nɛ́ tsɔ́Ꞌ wɑ́ɑ pɔ́, mɔ kɑ tsɔ́Ꞌnɛ wʉ́ʉ, ńtúu wʉ́ʉ ŋɡɔ pʉʉ ɡʉ ɛ́fɑꞋ fɑꞋ yɑ́ɑ. Yúu mi pʉʉ ɡɛnɛ ńdɑ́Ꞌ ḿbɔ́ pɔ ɡú, mbɔɔ lɑ́Ꞌ ḿbɛ́ pɔ́. Ɛ́ lɛɛ pɔ́Ꞌɔ, ḿbɔ́ yi pʉʉ lɑɑ ńdɔk lík yɑ́ɑ ńdɔ́ɔ pɔ ku mbɔ̌ Tɑ̌ɑ lɑ́, mbɔ ɑ ɡʉ ŋ́ɡɑ́ mbɔ̌ pʉʉ.» 17«Yúu mi ŋ kɛ́ nɛ ḿbíkŋɛ wʉ́ʉ, ɛ́ pɔ́ pɔ ŋɡɔ, pʉʉ ɡẅɛɛ ŋkɔŋɛ pʉʉ nɛ́ pʉʉ.»
Pʉɔ-ndǔmbí sɛ́ ḿbɑɑ pʉɔ-Yɛ́su
18«Pʉɔ-ndǔmbí lɑɑ ḿbɔ́ ḿbɑɑ wʉ́ʉ, pʉʉ jí ŋɡɔ pɔ́p kɑ piitɛ ḿbɑɑ wɑ́ɑ ɡúu.» 19«Pʉʉ kɑ pɔ́ pɛ́Ꞌnɛ ḿbɔ́ pʉɔ-ndǔmbí, mbɔ ndǔmbí kɔŋ wʉ́ʉ tɛꞋ, mbíꞋŋɡɔ ndǔmbí kɔŋ yúu mi ɛ́ yɛ́. Lɑ́ pʉʉ kɛ́ mbɔɔ pʉɔ-ndǔmbí pɔ́, mɔ kɑ tsɔ́Ꞌnɛ wʉ́ʉ, ɛ́fyɑk wʉ́ʉ nǔu pʉɔ-ndǔmbí. Ɛ́ yúu mi ɛ́ ɡɛnɛ ndǔmbí pɑɑ wʉ́ʉ.» 20Pʉʉ kẅíitɛ nu yí ŋ kɑ cúnɛ mbɔ̌ pʉʉ ŋɡɔ: «mɔ́ɔ-fɑꞋ kɑ́ ɡúꞋ ńdɛɛ tɑ́fɑꞋ wɛ pɔ́, ɛ́ lɑɑ ḿbɔ́ yi pɔ́p kɑ pɑɑ wɑ́ɑ, mbɔ pɔ́p ɡʉ ḿbɛn ḿbɑɑ wʉ́ʉ ɡúu pɔ pɔ́Ꞌɔ, ḿbɔ́ yi pɔ́p kɑ ɡẅɛɛ sẅiŋɛ yɑ́ɑ, mbɔ pɔ́p ɡʉ ḿbɛn ŋ́ɡẅɛɛ yʉ́ʉ pɔ pɔ́Ꞌɔ.» 21«Pɔ́p ɡʉ ŋ́ɡɛ pɔ́Ꞌɔ nǔu pʉʉ mbíꞋŋɡɔ pʉʉ pʉɔ pɑ́ɑ, pɔ́p pɛn ŋ́kɛ́ ḿbɔɔ ḿbɔ́ ńjí ŋu ẅí ɑ kɑ túunɛ wɑ́ɑ pɔ́.»
22«Mɔ ḿbɔ́ pɛ́Ꞌnɛ, mbɔɔ tɔ́, m bɔ́ pɛ́Ꞌnɛ pɛk pɛ́ pɔ́p pɔɔ sẅiŋɛ, mbɔ yɛcɔ́ mɛnu kɛpɔŋ kɑ́ pɔ́ nǔu pɔ́p pɔ́. Lɑ́ ɛ́ kɛ́ ḿbɔ́ ŋkɔ̂ɔnɛ pɑ́Ꞌnɛ yɛcɔ́ nu mbɔ pɔ́p cú ńdɔk ńcẅɛ́ɛ tú yɔ́p ntɛ́ mɛnu kɛpɔŋ mɔ́p kɑ́ pɔ́ ɡú pɔ́.» 23«Ŋu lɑɑ ḿbɑɑ wɑ́ɑ, mbɔ ɑ lɔk ḿbɑɑ Tɑ̌ɑ mɔ.» 24«Mɔ ḿbɔ́ pɛ́Ꞌnɛ ŋ́kɛ́ mbɔɔ ɡɛ mɛfɑꞋ mí wɛcɔ́ ŋu ŋkɑɑ zɛɛ ŋ́ɡɛ tsɛtsɛt pɔ́p pɔ́ pɔ́, mbɔ pɔ́p ŋkɑɑ ɡẅɛɛ mɛnu kɛpɔŋ pɔ́. Lɑ́ ɛ́ nǔu ŋkɔ̂ɔnɛ yí pɔ́p jʉ́ɔnɛ lɑ́, pɔ́p kɛ́ ḿbɛn ḿbɔ́ ḿbɑɑ wɑ́ɑ pɑɑnɛ mbɑ Tɑ̌ɑ mɔ.» 25«Ɛ́ pɔ́Ꞌɔ, ńdɔk ḿbuutɛ nǔu nu yí pɛ́ kɑ cúnɛ tsɛt ŋwɑꞋnɛ-nɛpʉ́ʉ nɔ́p ŋɡɔ pɔ́p kɑ pɑɑ wɑ́ɑ pɔ nɛ sɔ́ɔ.»
26«Ncẅɛ́ɛntɑ́ŋ ẅi ŋ ɡʉ ŋ́ɡɛ ɛ́fú nɛjɔ́ŋ Tɑ̌ɑ mɔ túu mbɔ̌ pʉʉ, ɛ́ zẅikŋɛ yí ɛ́ fúnɛ mbɔ̌ Tɑ̌ɑ mɔ, ɛ́ lɛꞋlɛ nu nɛ́nẅín nǔu Sɛ́. Jʉ́ ɡʉnɛ ŋ́ɡɛ ɛ́sẅíi nu yí ɑ jínɛ nǔu mɔ.» 27Pʉʉ yʉ́ʉ pɛn ŋ́kɑ́t ɛ́sẅíi nu yí pʉʉ jínɛ nǔu mɔ, ɛ́ pɔ́ pɔ pɑ́Ꞌ pɛkŋɛ pɔ́nɛ tɛ ɛ́fú nzɛnɛ.
Currently Selected:
Jɑ̂ŋ 15: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
