Jɑ̂ŋ 13
13
Yɛ́su suk mɛku-ɡɑŋku pɛ́
1Ɛ́ kɑ tsʉꞋ pɔ pɑ́Ꞌ njí ɡʉ kiɛ pɛ́ jʉ́ ndínɑ-Pɑ́skɑ, Yɛ́su pɔ́ ńjí ŋɡɔ yîyɑ́ ŋkɑ́ kuꞋ pɑ́Ꞌ ɑ ɡʉ ɛ́fú ndǔ yɔ mbí ŋ́ɡʉ ŋ́kẅɛ́ɛtɛ Tɑ́t wɛ. Pɑ́Ꞌ jʉ́ Yɛ́su kɑ pɔ́ ŋ́kɔŋ pʉɔ pí pɔ́p ndǔmbí ḿbɔ́ pɛ́ lɑ́, ɑ kẅiꞋ ŋ́kɔŋ wɔ́p tɛ ḿmɛkŋɛ. 2Ntsuŋkẅɛ́Ꞌ ɡɛ ḿbɔ́, pɔ́p pɛ́ pɔ́p nɑ́ŋ sɛ́ nɛjʉ́ yúu. Ɛ́ ɡɔ́ ḿbɔ́, mbɔ Sɑ́ttɑ lɑ́Ꞌ mɔ ńníꞋ kwɑŋɛ nɛfɛn Yɛ́su tsɛt tʉ́m Júdɑs Iskɑlyɔt, mɔ́ɔ-Símɔ. 3Yɛ́su pɔ́ ńjí ŋɡɔ Tɑ́t wɛ kɑ níꞋ mɛtʉʉ nɛlɔk ŋ́ɡɛ yúu tsʉʉ mbɔ̌ wɛ́, ḿbɛn ḿbɔ́ ńjí ŋɡɔ ɑ kɑ fú mbɔ̌ Sɛ́, ɑ pɛn ḿbɔ́ ŋ́ɡʉ nɛ́ nɛjɔ́ŋ Sɛ́. 4Ńnɑ́ŋ tɛ ńdɔ sɛ́, ɛ́sɔt ndẅí-fɑ́k yɛ́, ńnɔŋ sɛ́, ḿbɛ́ɛ tɑ́wɛtɛ ńzʉ́ʉ lúꞋ yɛ́. 5Ŋ́ɡɛ pɔ́Ꞌɔ, ńníꞋ ŋki tsɛt kɑ́ŋ, ńzɛ nɛlɔk ɛ́suk mɛku ɡɑŋku pɛ́, ńdɔk tɑ́wɛtɛ ẅí ɑ kɑ zʉ́ʉnɛ lúꞋ yɛ́ ńtuk.
6Ŋ́ɡʉ tɛ ŋ́kúu nǔu Símɔ̂ŋ Pyɛ̂, ɑ cú mbɔ̌ wɛ́ ŋɡɔ: «Ndɛ ɡʉnɛ ɛ́suk mɛku mɑ́ɑ!» 7Yɛ́su tsɔ́Ꞌ mbɔ̌ wɛ́ ŋɡɔ: «Yúu mi mɔ sɛ́ ŋ́ɡɛ, ɛ́ lɑɑ ḿbɔ́ ɔ pɔɔ zúꞋ ŋkɔ̂ɔnɛ pɔ́. Lɑ́ ŋ́kɛ́ ŋ́ɡʉ ńzúꞋ.» 8Pyɛ̂ cú mbɔ̌ wɛ́ ŋɡɔ: «Zɑŋ yɑ́ɑ, ɛ́ lɑɑ ḿbɔ́ ɔ pɔɔ mɛku mɑ́ɑ ɛ́suk.» Yɛ́su tsɔ́Ꞌ mbɔ̌ wɛ́ ŋɡɔ: «N dɑɑ mbɔɔ ɛ́suk, mbɔ pûu kɛ́ pɛn ḿbɔ́ nǔu yɛcɔ́ nu pɔ́.» 9Símɔ̂ŋ Pyɛ̂ cú mbɔ̌ wɛ́ ŋɡɔ: «Ɛ́ lɑɑ ḿbɔ́ pɔ́Ꞌɔ, mbɑ̌ɑ Ndɛ, kɔɔ suk pɔ ndɑꞋ mɛku mɑ́ɑ, ɔ tɛmtɛ ɛ́suk mbɔ́ mɑ́ɑ pɔ́p tú yɑ́ɑ.» 10Yɛ́su cú mbɔ̌ wɛ́ ŋɡɔ: «Ɛ́ kɑ́ pɔ́ ḿbíkŋɛ ŋɡɔ pɛ́ pɛn ɛ́suk mbʉʉ ŋu ẅí ɑ suk mɔ pɔ́, (ńdíꞋ ndɑꞋ mɛku mɛ́). MbíꞋŋɡɔ ŋɡɑŋ ńdɛ́ɛnɛ mɔ́. Pʉʉ pɑ́Ꞌɑ, mbɔ mbʉʉ yʉʉ lɛɛnɛ#13.10 Mbʉʉ yʉʉ lɛɛnɛ: pɛ́ lɑ́Ꞌ tsɛt mbʉʉ-ŋu., lɑ́ ɛ́ kɑ́ pɔ́ yʉʉ pɛtsʉʉ pɔ́.» 11Ńcú pɔ́Ꞌɔ, mbíꞋŋɡɔ ɑ kɑ pɔ́ ńjí ŋu ẅí ɑ ɡʉ ŋ́ɡɛ ɛ́fɛn wɛ́ lɑ́ ńcú ŋɡɔ mbʉʉ yʉʉ pɛtsʉʉ kɑ́ lɛɛnɛ.
12Yɛ́su suk mɛku mɔ́p tɛ ḿbɔ́tnɛ ńnɑ́ŋ, ḿmɑꞋ ndẅí yɛ́, ḿbɛn ńnɑ́ŋ sɛ́ nɛjʉ́ yúu, ńcú mbɔ̌ pɔ́p ŋɡɔ tɛ pʉʉ zúꞋ yúu mi ɛ fúnɛ nɛɡɛ nǔu pʉʉ? 13Pʉʉ fúŋnɛ wɑ́ɑ ŋɡɔ Cícɑ, ɛ́fúŋ wɑ́ɑ ŋɡɔ Tsɑpʉɔ, ńcú sẅíinu mbíꞋŋɡɔ mɔ jʉ́. 14Ɛ́ lɑɑ ḿbɔ́ yi kwɑꞋ mɔ Tsɑpʉɔ, ḿbɔ́ Cícɑ, ɛ suk mɛku mʉ́ʉ, mbɔ ɛ́ píkŋɛ ŋɡɔ pʉʉ yʉ́ʉ, pʉʉ pɔ́ ɛ́suk mɛku mʉ́ʉ pʉʉ nɛ́ pʉʉ. 15Mbíꞌŋɡɔ, n nyɛt wʉ́ʉ nɛ́ fʉꞋ nɛpɔ́ yi pʉʉ yʉ́ʉ pʉʉ ɡʉ ŋ́ɡɛ pɑ́Ꞌ pʉʉ jʉ́ɔnɛ ŋ ɡɛ lɑɑ. 16Lɑ́ ɛ sẅíi wʉ́ʉ, kwɑꞋ nɛ́nẅín, nzíꞋfɑꞋ kɑ́ ɡúꞋ ńdɛɛ tɑ́fɑꞋ wɛ pɔ́, ŋɡɑŋntúu kɛ́ mbɔɔ ɡúꞋ ńdɛɛ ŋu ẅí ɑ lɑ́Ꞌnɛ ńtúu wɛ́ pɔ́. 17Pɑ́Ꞌ pʉʉ sɛ́ ńjí ŋkɔ̂ɔnɛ lɑ́, pʉʉ lɑɑ ŋ́ɡɛ pɔ́Ꞌɔ, mbɔ pʉʉ pɛpɔ́ttú.
18Ŋ kɑ́ kɛ́ ńcú yɔ nu mbɔ̌ pʉʉ pɛtsʉʉ pɔ́, mɔ sɛ́ ńjí pʉɔ pí ŋ kɑ tsɔ́Ꞌnɛ wɔ́p. Lɑ́ ɛ́ pɔŋ ŋɡɔ yúu mi pɛ́ kɑ ŋwɑꞋnɛ́nɛ tsɛt ŋwɑꞋnɛ-ndɛn kɑɑ puutɛ. Pɛ́ kɑ ŋwɑꞋnɛ ŋɡɔ ŋu ẅí pɛkŋɛ sɛ́ ńtɛmtɛ yúu pɛjʉ́ ńjʉ́ kɑ tsʉ́Ꞌnɛ ŋɡɑŋmbuu wɑɑ. 19N zɑ́Ꞌ njí ɛ́sẅíi wʉ́ʉ ŋkɔ̂ɔnɛ lɑ mɔ mɛnu ɡɛ ńtɔ́, pʉʉ lɔk pɔ́Ꞌɔ ḿbɛ́m ŋɡɔ mɔ ɡú. 20Lɑ́ ɛ sẅíi wʉ́ʉ, kwɑꞋ nɛ́nẅín, ŋu lɑɑ ŋ́kúkŋɛ ŋu ẅí n túunɛ wɛ́, mbɔ ɑ kúkŋɛ pɔ wɑ́ɑ. Ŋu ẅí ɑ pɛnnɛ ŋ́kúkŋɛ wɑ́ɑ, ɑ kúkŋɛ pɔ ŋu ẅí ɑ túunɛ wɑ́ɑ.
Yɛ́su cú ŋɡɔ Júdɑs ɡʉ ɛ́fɛn wɛ́
21Yɛ́su cú pɔ́Ꞌɔ, lɛ́m yɛ́ sɑ́ɑnɛ tɛꞋ, ɑ sɑ́ɑnɛ sɑ́ɑnɛ́nɛ ńcú ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, wɛcɔ́ tɑ́Ꞌ ŋu nǔu pʉʉ ɡʉ ɛ́fɛn wɑ́ɑ.» 22Gɑŋku-Yɛ́su zúꞋ, mbɑ wɔ̌ lɑ́ shɔtnɛ ńdíŋɛ mɔ́ɔmɑ́ wɛ, pɔ́p pɔɔ jí ŋu ẅí ɑ lɑ́Ꞌ jʉ́ pɔ́. 23Wɛcɔ́ tɑ́Ꞌ nǔu ɡɑŋku Yɛ́su ẅi ɑ kɑ pɔ́ ŋ́kɔŋ wɛ́ tɛꞋ, pɔ́ nɛjɔ́ŋ yɛ́ ḿbɔ́ ńjʉ́ yúu. 24Símɔ̂ŋ Pyɛ̂ nɔꞋ mík ńdɔk ńcú ŋɡɔ: «Ɛ́ píkŋɛ ŋɡɔ ɑ cú ŋɡɑŋ.» 25Ẅîwɑ́ ŋɡɑŋku lɛmtɛ nɛtúutɛ-Yɛ́su, ḿbíkŋɛ wɛ́ ŋɡɔ: «Tsɑpʉɔ, ŋɡɑŋ wɔ̌?» 26Yɛ́su tsɔ́Ꞌ ŋɡɔ: «A ŋu ẅí ŋ ɡʉ ńcʉ̈ɔꞋ mbʉ̈ɔꞋ-yúu pɛjʉ́, ŋ́ɡɑ́ mbɔ̌ wɛ́.» Ńcú pɔ́Ꞌɔ, ḿbɛ́ɛ mbʉ̈ɔꞋ-yúu, ńcʉ̈ɔꞋ. Ŋ́ɡɑ́ mbɔ̌ Jẅidɑ Iskɑlyɔt, mɔ́ɔ-Símɔ. 27Jẅidɑ pɔ́ tɛ ńcẅɛ́ɛ, Sɑ́ttɑ kúu tsɛt tʉ́m yɛ́. Yɛ́su ɡɔ́ɔ ŋ́kɛ́ ńcú mbɔ̌ wɛ́ ŋɡɔ: «ɛ́fɛ́Ꞌnɛ ŋ́ɡwɛtnɛ ŋ́ɡɛ yúu mi ɔ ɡẅɛɛnɛ nɛɡɛ.» 28Sɑ̌ɑ ŋu nǔu pʉɔ pí pɔ́p pɛ́pɔ́p ḿbɔ́nɛ ńjʉ́ yúu, pɔɔ zúꞋ nu yí Yɛ́su lɔɔnɛ nɛcú pɔ́. 29Pɛcɔ́ pʉɔ pɔ́ ŋ́kwɑŋɛ ŋɡɔ ɑ cú ŋɡɔ Jẅidɑ ɡʉ ńzúu yɔ́p pɛ́ pɔ́p yúu-ndínɑ, Kɛ pɔ ŋɡɔ ɑ ɡɑ́ yúu mbɔ̌ pɛpúŋ ɔɔ, mbíꞋŋɡɔ jʉ́ m̄bɔ́nɛ ŋ́ɡẅɛɛ mɔ́ɔpɑɑ-ŋkɑ́p wɔp pɛ́pɔ́p. 30Jẅidɑ cẅɛ́ɛ mbʉ̈ɔ́Ꞌ-yúujʉ́ pɔ́Ꞌɔ, ŋ́ɡɔ́ɔ ɛ́fú ndɑ́ ńcẅɛt. Mbɔ túꞋ lɑ́Ꞌ sʉ́ʉ.
Yɛ́su ɡɑ́ nɛpʉ́ʉ nɛ fí
31Jẅidɑ pɔ́ tɛ ɛ́fú ndɑ́ ńcẅɛt, Yɛ́su cú ŋɡɔ: «Ɛ́ ŋkɔ̂ɔnɛ pɑ́Ꞌnɛ, pɛ́ ɡɑ́ nɛɡúꞋ mbɔ̌ Mɔ́ɔ-Ŋu. Mɔ́ɔ-Ŋu kɑ ɡɑ́ nɛɡúꞋ mbɔ̌ Sɛ́. 32(Pɑ́Ꞌ Mɔ́ɔ-Ŋu kɑ ɡɑ́ nɛɡúꞋ mbɔ̌ Sɛ́ lɑ́), Sɛ́ nɛ túmbʉʉ yɛ́ ɡʉ ŋ́ɡɛ ŋ́ɡɑ́ nɛɡúꞋ mbɔ̌ wɛ́, lɑ́ ɛ́ tsʉꞋ pɔ mɔ́zʉꞋ ɑ ɡɑ́.» 33Mbɔ́ŋkʉ̈ɔ́ pɑ́ɑ, pɛkŋɛ kɛ́ pɛn ńnɑ́ŋ tɛ ntí sɑk pɔ́. Pʉʉ ɡʉ ŋ́ɡɛ ḿbɔ́ kɑ́t ńdɔɔ wɑ́ɑ pɑ́Ꞌ ŋ kɑ cúnɛ mbɔ̌ Pɑyúdɑ ŋɡɔ: «ZʉꞋ yí ŋ ɡʉnɛ nɛ́ zúꞋu, pʉʉ kɛ́ kuꞋ nɛtɔ́ zúꞋu pɔ́. Mɔ ḿbɛn ńcú yîyɑ́ nu mbɔ̌ pʉʉ ŋkɔ̂ɔnɛ.» 34Ŋ ɡʉ ŋ́ɡɑ́ nɛpʉ́ʉ nɛ fí mbɔ̌ pʉʉ, ɛ́ pɔ́ ŋɡɔ: «Pʉʉ kɔŋɛ pʉʉ nɛ́ pʉʉ. Pɑ́Ꞌ ŋ kɑ kɔŋnɛ wʉ́ʉ lɑ́, pʉʉ yʉ́ʉ kɔŋɛ pʉʉ nɛ́ pʉʉ. 35Pʉʉ lɑɑ ŋ́kɔŋɛ pʉʉ nɛ́ pʉʉ, mbɔ pʉɔ tsʉʉ ɡʉ ńjí ŋɡɔ pʉʉ ɡɑŋku pɑ́ɑ.»
Yɛ́su cú ŋɡɔ Pyɛ̂ ɡʉ ŋ́ɡɛ muŋɛ wɛ́
36Símɔ̂ŋ Pyɛ̂ píkŋɛ wɛ́ ŋɡɔ: «Tsɑpʉɔ, ɔ ɡʉ pɔ nɛ́ ɡɔ́.» Yɛ́su tsɔ́Ꞌ mbɔ̌ wɛ́ ŋɡɔ: «ZʉꞋ yí ŋ ɡʉnɛ nɛ́ zúꞋu, ɔ kɑ́ kuꞋ nɛcʉ́ɔ nzʉʉ mɔ ŋkɔ̂ɔnɛ pɔ́. Ɔ ɡʉ ńtɑ́ɑ lɑ ńcʉ́ɔ nzʉʉ mɔ.» 37Pyɛ̂ cú mbɔ̌ Yɛ́su ŋɡɔ: «Tsɑpʉɔ, kʉ̈ɔ́ ɡʉ ŋ́ɡɛ lɑ m bɔɔ ɡɔ́ɔ ńcʉ́ɔ nzʉʉ wú pɔ́ ɔɔ? Ŋ ɡʉ ŋ́ɡɑ́ tú yɑ́ɑ ntɛ́ wú.» 38Yɛ́su tsɔ́Ꞌ ŋɡɔ: «Ɔ cú ŋɡɔ ɔ ɡʉ ŋ́ɡɑ́ tú yú ntɛ́ wɑ́ɑ? Lɑ́ mɔ ɛ́sẅíi wú, kwɑꞋ nɛ́nẅín, mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ́ ńtɔ́ŋ lɔ́Ꞌnɛ, mbɔ ɔ muŋɛ wɑ́ɑ ŋkɑ́ yɛ́tɑ́t.»
Currently Selected:
Jɑ̂ŋ 13: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
