Jɑ̂ŋ 12

Mɑlíyɑ lɔk lɑmɛ́ndɑɑ ńzɔ́Ꞌ mɛku-Yɛ́su

1Ɛ́ ɡɛ ńtsʉ́Ꞌ ńjɑ́k lɛ́Ꞌ pɛ́nɛ́ntúkú, ɛ́ pɔ́ lɛ́Ꞌ ndínɑ Pɑ́skɑ Pɑyúdɑ. Yɛ́su ɡʉ nɛ́ Mbɛtɑni, zʉꞋ yí Lɑzɑ̂ɑ ẅí ɑ kɑ zẅíimɛnɛ wɛ́ nǔu nɛvú lɑ́ kɑ pɔ́ ńtswɛ́ zúꞋu. 2Pɛ́ ɡɛ ɛ́fúŋ ndínɑ nǔu lík-yɛ́, Lɑzɑ̂ɑ pɔ́ wɛcɔ́ tɑ́Ꞌ ŋu nǔu pʉɔ pí pɔ́p pɛ́ Yɛ́su kɑ pɔ́ ńjʉ́ yúu, Mɑ́ktɑ pɔ́ ŋ́ɡɑp yúujʉ́. 3Mɑlíyɑ nɑ́ŋ tɛ ńtíi kɛm-lítɑ lɑmɛ́ndɑɑ yí ɛ́ cɔ́k ŋkɑ́p tɛꞋ, mbɔ pɛ́ kɑ lɔk wɛcɔ́ nɛɡíi ẅi pɛ́ fúŋnɛ ŋɡɔ nɑ̂d ńniitɛ. A lɔk ńzɔ́Ꞌ mɛku-Yɛ́su, ńdɔk mɛnuk-tú mɛ́ ńtuk. Jɑ́k-lɑmɛndɑɑ kɔ́Ꞌ ḿbúu ńjʉ́ ndɑ́.

4Wɛcɔ́ Ŋɡɑŋku-Yɛ́su, Júdɑs Iskɑlyɔt ẅi ɑ kɑ pɔ́ ŋ́ɡʉ ŋ́ɡɛ ɛ́fɛn Yɛ́su cú ŋɡɔ: 5«Mɛlɑ́Ꞌkʉ̈ɔ́ pɛ́ lɑ́Ꞌ mbɔɔ fɛn yɔ lɑmɛ́ndɑɑ ńcẅɛ́ɛ mɛndɛníyɛ#12.5 Mɛndɛníyɛ mbɔ pɛ́ pɛn ńjʉ́ɔ tsɛt ŋwɑꞋnɛ Jɑ̂ŋ 6-7. ŋkʉ yɛ́tɑ́t, ŋ́ɡɑ́ mbɔ̌ pɛpúŋ pɔ́ ɔɔ?» 6Júdɑs ŋ́kɑ́ɑ ḿbɔ́ ńcú pɔ́Ꞌɔ, síi ḿbɔɔ ńtsɑ́ɑ pɛpúŋ pɔ́, lɑ́ ɑ kɑ pɔ́ ntsɔ́ŋ, mbíꞋŋɡɔ jʉ́ m̄bɔ́nɛ ŋ́ɡẅɛɛ mɔ́ɔpɑɑ-ŋkɑ́p yɔp pɛ́ Yɛ́su, pɛ́ pɔ́ níꞋ ŋkɑ́p tsɛtú ɑ jʉ̈ɔ. 7Yɛ́su ɡɔ́ɔ ŋ́kɛ́ ńcú ŋɡɔ: «Nɑ́ mɑŋɡɛ́ wɑ́ pɑ́Ꞌɑ, nɑ́ wɛ́, ɑ zɑ́Ꞌ njí ńzɔ́Ꞌ pfú yɑ́ɑ, lɑ́ pɛ́ ɡɛ ńníꞋ wɑ́ɑ tsɛt nɛshi. 8Pɛpúŋ ɡʉ ḿbɔ́ tsɛtsɛt pʉʉ pɔ ŋkɑ́ tsʉʉ. Lɑ́ ŋ́ɡʉ nǔu mɔ, mbɔ pɛkŋɛ kɛ́ ɡɛ ḿbɔ́ pɔ ŋkɑ́ tsʉʉ pɔ́.»

9Ɛ́ ɡɔ́ ḿbɔ́, mbɔ Pɑyúdɑ tɛ ńzɑ́ɑ zúꞋ ŋɡɔ Yɛ́su Mbɛtɑni, ńtɔ́ zúꞋu, ŋ́kɛ́ ḿbɔɔ síi ńtɔ́ pɔ nɛjʉ́ɔ Yɛ́su pɔ́, ńtɔ́ pɔ nɛjʉ́ɔ Lɑzɑ̂ɑ ẅí Yɛ́su kɑ zẅíimɛ́nɛ wɛ́ nǔu nɛvú lɑ́. 10Pɛtɑ́tndɑ́-pɑnɔŋ pɔꞋ jʉ́ɔ pɔ́Ꞌɔ, ńzɑ́p ŋɡɔ pɛ́ lɔɔ shʉ́ nɛjẅí mbɑ Lɑzɑ̂ɑ. 11Pɔ́p ḿbɔ́ ńdɔɔ nɛɡɛ pɔ́Ꞌɔ, mbíꞋŋɡɔ nɛzɑ́ɑ Pɑyúdɑ kɑ fú pɔ nǔu nu-Lɑ̂ɑzɑ̂ɑ, ńtsʉ́Ꞌ ŋ́kʉɔ wɔ́p kʉɔnɛ, ńzɑ́p tʉ́m pɔ nǔu Yɛ́su.

Yɛ́su kúu Yɛlúsɑlɛm pɑ́Ꞌ fɔɔ lɑ́

12Njí ɡɛ ŋ́kiɛ, lɑ́Ꞌ yí ɛ́ tɔ́nɛ ndínɑ-Pɑ́skɑ zúꞋ ŋɡɔ Yɛ́su sɛ́ ńtɔ́ nɛ́ Yɛlúsɑlɛm, 13ŋ́ɡɔ́ɔ ŋ́kɛ́ ŋ́kʉ́ɔꞋ mɛzɑ́ŋ-nɛtʉ́ɔ, ńdɔk ńcẅɛt tʉ́sɔŋ, ŋ́ɡʉ nɛzɑ́Ꞌ wɛ́, ḿbɔ́ ńcú nɛ́ ŋɡi tɛnnɛ ŋɡɔ: «Ɔzɑ́nɑ»#12.13Ɔzɑ́nɑ. Ɛ́ lɔk ḿbɔ́ ntɛ́ yi Pɑyúdɑ m̄bɔ́ ńdɔk ŋ́ɡɛ́mtɛ fɔɔ. mbɔ́tnɛ mbɔ̌ fɔɔ ẅí ɑ lɔknɛ lík-tsɑpʉɔ ńtɔ́. Sɛ́ pɔ́nɛ fɔɔ Pɑíslɑyɛ̂l. 14Yɛ́su jʉ́ɔ mɔ́ɔ-njɑkɑ́ɑshi, ŋ́kɔ́Ꞌ ńnɑ́ŋ nǔu. Ɛ́ pɔ́ pɑ́Ꞌ pɛ́ kɑ ŋwɑꞋnɛ́nɛ tsɛt ŋwɑꞋnɛ-ndɛn kɑɑ ŋɡɔ:

15Pʉɔ-tʉ́sɔŋ-Siyɔ́ŋ, kɔɔ pʉʉ pɔ́k,

pʉʉ jʉ́ɔ pɑ́Ꞌ fɔɔ wʉʉ sɛ́ ńtɔ́,

A nɑ́ŋ nǔu mɔ́ɔ-Njɑkɑ́ɑshi.

16Gɑŋku-Yɛ́su jʉ́ɔ yɔ nu, ḿbɔɔ ɡɔ́ɔ ɛ́fɛ́Ꞌnɛ ńzúꞋ pɔ́. Lɑ́, Yɛ́su ɡɛ ḿbɔ́ tɛ ŋ́kúu tsɛt nɛɡúꞋ wɛ tʉ́nɛpú, lɑ pɔ́p ɡɔ́ɔ ŋ́kɛ́ ŋ́kẅíitɛ ŋɡɔ pɛ́ kɑ zɑ́Ꞌ njí ŋ́ŋwɑꞋnɛ yîyɑ́ nu ntɛ́ wɛ́, ḿbɛn ŋ́kẅíitɛ ŋɡɔ lɑ́Ꞌ kɑ ɡɛ nǔu wɛ́ pɔ pɑ́Ꞌ pɛ́ kɑ ŋwɑꞋnɛ́nɛ.

17Lɑ́Ꞌ kɑ ɡɔ́ ńtɔ́ ńzɑ́Ꞌ Yɛ́su, ḿbɔ́ pʉɔ pí pɔ́p kɑ pɔ́nɛ sɛ́ ŋkɑ́ yi Yɛ́su kɑ cúnɛ mbɔ̌ Lɑzɑ̂ɑ ŋɡɔ ɑ fú tsɛt nɛshi ńcẅɛt, ɑ zẅíimɛ tsɛt nɛvú, pɔ́p lɔk yîyɑ́ nu ɛ́sɑt zʉꞋ. 18Ɛ́ yúu mi ɛ́ kɑ ɡɛnɛ lɑ́ lɑ́Ꞌ cẅɛt, ŋ́ɡʉ nɛzɑ́Ꞌ Yɛ́su, mbíꞋŋɡɔ pɔ́p kɑ zúꞋ pɑ́Ꞌ ɑ ɡɛnɛ yɔ nu mɑ̌ɑmɑɑnɛ. 19Pɑfɑlísɑy jʉ́ɔ pɔ́Ꞌɔ, ńcú tsɛtsɛt pɔ́p ŋɡɔ: pʉʉ kɑ́ jʉ́ɔ? Yɛcɔ́ yúu mi ɛ́ lɑɑ ḿbɔ́ pɛkŋɛ ɡɛ kɑ́ pɔ́ ɡú pɔ́. Lɑ́Ꞌ tsʉꞋ ḿbɔ́ pɔ nzʉʉ yɛ́.

Pɛcɔ́ pʉɔ-Ŋɡɛlɛk sɛ́ ńdɔɔ nɛjʉ́ɔ Yɛ́su

20Pɛcɔ́ ntɑ́Ꞌpʉɔ-ŋɡɛlík, kɑ pʉʉ ńtɔ́ Yɛlúsɑlɛm nɛjʉ́ ndínɑ, ŋ́ɡúꞋlɛ Sɛ́. 21Pɔ́p tɔ́ ńjʉ́ɔ Filîp, ŋu-Mbɛtsɑyídɑ nǔu pɑk-ŋɡɔŋ-Ŋɡɑlílíyɑ, ńcú mbɔ̌ yɛ́ ŋɡɔ: Ndɛ, pɛk sɛ́ ńtsɑ́ɑ nɛjʉ́ɔ Yɛ́su. 22Filîp ɡʉ ɛ́sẅíi Ndɛlɛ́yɑ, pɔ́pmɛ́ pɛ́pɑ́ ɡʉ ńcú mbɔ̌ Yɛ́su. 23Yɛ́su tsɔ́Ꞌ mbɔ̌ pɔ́p ŋɡɔ ŋkɑ́ yi pɛ́ ɡʉ ńjʉ́ɔ nɛɡúꞋ wɛ Mɔ́ɔ-ŋu ɛ́ kuꞋ. 24Lɑ́ ɛ sẅíi wʉ́ʉ, kwɑꞋ nɛ́nẅín, mbi yúu lɑɑ mbɔɔ vu sɛ́ tɛ ḿpfú pɔ́, mbɔ ɛ́ ɡʉ ŋ́kɛ́ ḿbɔ́ pɔ yɛ́mɔ́Ꞌɔ́. Lɑ́ ŋ́kɛ́ ḿpfú, mbɔ ɛ́ ɡʉ ɛ́sɑ́Ꞌ, ŋ́ɡɑ́ mɛmbɑŋ tɛ ɛ́ zɑ́ɑ zɑ́ɑnɛ. 25Ŋu lɑɑ ŋ́kɔŋ wɛ nɛpɔ́, mbɔ ɑ ɡʉ ḿbɛ́ nɛpɔ́ ɛ̂wɑ́. Ŋu kɛ́ ŋ́ɡwɑ́k nu nǔu wɛ nɛpɔ́ ndǔ yɔ mbí, mbɔ ɑ ɡʉ ńdɑ́Ꞌ ŋ́ɡẅɛɛ luk kɛ́ mɛ. 26Ŋu lɑɑ ḿbɔ́ ɛ́fɑꞋ mbɔ̌ mɔ, ɑ cʉ́ɔ nzʉʉ mɔ. ZʉꞋ yí ŋ ɡʉnɛ zúꞋu lɑ́, ŋɡɑŋfɑꞋ wɑɑ ɡʉ ḿbɔ́ yɛ́ zúꞋu. Ŋu lɑɑ ḿbɔ́ ɛ́fɑꞋ mbɔ̌ mɔ, mbɔ Tɑ̌ɑ mɔ ɡʉ ŋ́ɡɛ ŋ́ɡɑ́ mɛkuꞋ mɛ́.

Yɛ́su sɛ́ ḿbʉ́ nɛvú nɛ́

27Yɛ́su pɛn ŋɡɔ: «Mɔ pɑ́Ꞌnɛ, mbɔ lɛ́m yɑ́ɑ sɑ́ɑnɛ. Ŋ ɡʉ ŋ́kɛ́ ńcú ŋɡɔ ku? N cú ŋɡɔ Tɑ̌ɑ mɔ ɡɛ n duk yɔ ŋkɑ́ kíi? Mɔ ḿbɔ́ ńzɛɛ ńtɔ́ ntɛ́ pɔ yɔ ŋkɑ́.» 28Tɑ̌ɑ mɔ, ɡúꞋlɛ lík yú. Ŋɡi-ŋu ɡɔ́ɔ ŋ́kɛ́ ɛ́fú nɛpú ńcú ŋɡɔ: «Ŋ ɡúꞋlɛ mɔ. Ŋ ɡʉ ḿbɛn ŋ́ɡúꞋlɛ fí fí.»

29Lɑ́Ꞌ yi ɛ́ kɑ pɔ́nɛ zúꞋu zúꞋ yîyɑ́ ŋɡi ńcú ŋɡɔ: «Ɛ́ nɛfɑŋ ní ɛ́ kwɛnɛ́nɛ.» Pɛcɔ́ pʉɔ cú ŋɡɔ: «Cʉ̈ɔꞋ-Sɛ́ cú nu mbɔ̌ wɛ́.» 30Yɛ́su cú mbɔ̌ pɔ́p ŋɡɔ: «Yîyɑ́ ŋɡi kɑ́ cú nu pɑ́Ꞌɑ ńdɔk ńnyɛt lii yɛ́ mbɔ̌ mɔ pɔ́, ɛ́ nyɛt pɔ mbɔ̌ pʉʉ. 31Ŋkɑ́ kuꞋ pɑ́Ꞌ Sɛ́ ɡʉ ŋ́ŋɑk yɔ píimbí. Ɛ́ ŋkɑ́ yi Sɛ́ ɡʉ ńcẅɛɛtɛ mɔ́ɔntɔ́Ꞌ yɔ píimbí, ŋ́ɡɑ́ wɛ́ píi.» 32Ɛ́ ɡʉ nǔu mɔ, mbɔ pɛ́ lɑɑ ŋ́ɡɛ ŋ́kɑꞋ wɑ́ɑ nǔu tʉ́ mɛkʉ́Ꞌ tɛ ŋ́ɡɑ́ tʉ́, mbɔ ŋ ɡʉ shuŋ pʉɔ tsʉʉ ŋ́ɡɑ́ nɛjɔ́ŋ mɔ. 33Yɛ́su kɑ pɔ́ ńdɔk yɔ sẅiŋɛ, ńdɛꞋlɛ ntɛ́ nɛvú ni ɑ ɡʉ ŋ́ɡɛ ḿpfú yɛ́tɛ́.

34Lɑ́Ꞌ tsɔ́Ꞌ mbɔ̌ wɛ́ ŋɡɔ: «Pɛk kɑ zúꞋ tsɛt ŋwɑꞋnɛ-nɛpʉ́ʉ ŋɡɔ: Nzɑ́Ꞌŋkʉ ẅi Sɛ́ kɑ kɑꞋnɛ ɡʉ ńdɑ́Ꞌ ḿbɔ́ pɔ ɡú. Ɔ pɛn ŋ́ɡɛ pɑ́Ꞌɑ lɑ ńcú ŋɡɔ, pɛ́ ɡʉ ŋ́kɑꞋ Mɔ́ɔ-ŋu nǔu tʉ́ mɛkʉ́Ꞌ ŋ́ɡɑ́ tʉ́ ɔɔ? Mɔ́ɔ-ŋu ɛ̂wɑ́ wɔ̌?» 35Yɛ́su tsɔ́Ꞌ mbɔ̌ pɔ́p ŋɡɔ: «Kyɛꞌ kɛ́ ɡɛ ḿbɛn ḿbɔ́ tsɛtsɛt pʉʉ tɛ ntí sɑk pɔ́. Kyɛꞌ pɛ́t sɛ́, pʉʉ nɛn, ḿbɔ́k nzɛ́nzʉ́ʉ nɛkẅɛ́ɛtɛ wʉ́ʉ. Ɛ́ mbíꞋŋɡɔ ŋu sɛ́ ńnɛn tsɛt nzɛ́nzʉ́ʉ, ḿbɔɔ ńjí zʉꞋ yi ɑ ɡʉ nɛ́ zúꞋu pɔ́. 36Kyɛꞌ lɑɑ ḿbɛ́t tsɛtsɛt pʉʉ, pʉʉ zɑ́p tʉ́m nǔu kyɛꞌ, ńdɔk ńtsʉ́Ꞌ pɔ́ɔ-kyɛꞋ. Yɛ́su cú yɔ nu tɛ ɛ́ kuꞋ, ɑ ɡʉ ńdʉ̈ɔmɛ nǔu zʉꞋ yi pɔ́p kɛ́ ɡɛ ńjʉ́ɔ wɛ́ pɔ́.»

Pɑyúdɑ kɑ́ zɑ́p tʉ́m nǔu Sɛ́ pɔ́

37Yɛ́su kɑ pɔ́ ŋ́ɡɛ mɛnu mɑɑnɛ tɛꞋ mbi pʉɔ lɑ́, pɔ́p kɛ́ mbɔɔ ńzɑ́p tʉ́m nǔu wɛ́ pɔ́. 38Ɛ́ lɔk ḿbuutɛ nǔu nu yi ŋɡɛ́mndʉ̈ɔ́Ꞌ-Sɛ́#12.38 Ŋɡɛ́mndʉ̈ɔ́Ꞌ-Sɛ́ Ɛs 53.1. Ɛ́sɑ̌yɑ kɑ cúnɛ ŋɡɔ:

«Tsɑpʉɔ, wɔ̌ kɑ kɛ́ ńzɑ́p tʉ́m nǔu nu yí pɛk kɑ cúnɛ?

Tɛ Tsɑpʉɔ kɑ pɔ́ ńnyɛt mɛtʉʉ mɛ́ pɔ mbɔ̌ pɛ́ wɔ̌»? 39Ɛ́sɑ̌yɑ kɑ pɛn ńcú yúu mi ɛ́ ɡʉ ŋ́ɡɛ lɑ Pɑyúdɑ pɔɔ zɑ́p tʉ́m nǔu Sɛ́ pɔ́, ɑ kɑ cú ŋɡɔ:

40«Sɛ́ kɑ ɡɛ mík mɔ́p fʉ.

A kɑ jʉ́ɔꞋ jínu yɔ́p,

nɛpɔ́ yi pɔ́p kɛ́ lɔk mík ńjʉ́ɔ zʉꞋ pɔ́,

pɔ́p pɔɔ lɔk jínu yɔ́p ńjí nu pɔ́;

ɛ́ lɛɛ pɔ́Ꞌɔ, pɔ́p pɔɔ kúpmɛ mɑt wɔp ɑ ɡɛ pɔ́p fíitɛ pɔ́». 41Ɛ́sɑ̌yɑ#12.41 Ɛ́sɑ̌yɑ 66.9-10; 6.1cú nu zɑꞋnɛ nǔu Yɛ́su, mbíꞋŋɡɔ ɑ kɑ zɑ́Ꞌ njí ńjʉ́ɔ nɛɡúꞋ Yɛ́su.

42Pɛ́ kɑ zɛɛ ḿbɔ́ ŋ́ɡwɑ́k Yɛ́su ɡwɑ́knɛ lɑ́, pɛcɔ́ nɛzɑ́ɑ pɛkɛ́m-Pɑyúdɑ zɑ́p tʉ́m nǔu wɛ́. Lɑ́ ŋ́ɡɛ pɔ ńdʉ̈ɔmɛ lʉɔmɛ́nɛ, ḿbɔ́k pɑfɑlísɑy nɛzuŋ wɔ́p ndɑ́-cúꞌlɛ. 43Ɛ́ ḿbɔ́ pɔ́Ꞌɔ, mbíꞋŋɡɔ pɔ́p kɑ kɔŋ mɛkuꞋ mi pʉɔmɛsɔŋ ɡɑ́nɛ mbɔ̌ pɔ́p, ńtsɑ mi ɛ́ fúnɛ mbɔ̌ Sɛ́.

44Yɛ́su nɑ́ŋ tɛ ńcú nɛ́ ŋɡi tɛnnɛ ŋɡɔ: «Ŋu lɑɑ ńzɑ́p tʉ́m nǔu mɔ, mbɔ ŋɡɑŋ kɑ́ zɑ́p pɔ ndɑꞋ nǔu mɔ pɔ́. A pɛn ńzɑ́p nǔu ŋu ẅí ɑ kɑ túunɛ wɑ́ɑ. 45Ŋu ẅí ɑ jʉ́ɔnɛ wɑ́ɑ, ɑ pɛn ńjʉ́ɔ ŋu ẅí ɑ kɑ túunɛ wɑ́ɑ. 46Mɔ njʉ̈ɔ́ kyɛꞌ, ŋ kɑ tɔ́ ndǔmbí nɛpɔ́ yi ŋu lɑɑ ńzɑ́p tʉ́m nǔu mɔ, ɑ pɔɔ ɡɔ́ŋ tsɛt nzɛ́nzʉ́ʉ pɔ́. 47Ŋu lɑɑ zúꞋ sẅiŋɛ yɑ́ɑ mbɔɔ ɡẅɛɛ, mbɔ mɔ kɛ́nɛ ŋɑk wɛ́ pɔ́. MbíꞋŋɡɔ mɔ ŋkɑɑ tɔ́ ndǔmbí nɛŋɑk pʉɔ pɔ́. Ŋ kɑ tɔ́ nɛɡɛ pʉɔ luk.» 48Ŋu lɑɑ ḿmɛꞋ wɑ́ɑ, ńdʉꞋ sẅiŋɛ yɑ́ɑ, mbɔ ŋɡɑŋ ɡẅɛɛ ŋu ẅí ɑ ɡʉ ŋ́ŋɑk wɛ́. Sẅiŋɛ yí ŋ kɑ cúnɛ ɡʉnɛ ńdɑ́Ꞌ ŋ́ŋɑk wɛ́ ndẅiknzʉʉ lɛ́Ꞌ. 49Ɛ́ mbíꞋŋɡɔ mɔ ŋkɑɑ cú pɔ nu yí ɛ́ fúnɛ mbɔ̌ mɔ pɔ́, ŋ kɑ cú pɔ nu yí Tɑ̌ɑ mɔ ẅí ɑ kɑ túunɛ wɑ́ɑ kɑ cúnɛ ŋɡɔ n cú, mbɑ nu yí ŋ ɡʉ ńcú nu nǔu. 50M bɛn ḿbɔ́ ńjí ŋɡɔ Ŋkʉʉ ẅí ɑ kɑ fɛ́ɛnɛ mbɔ̌ mɔ ɛ́ luk kɛ́ mɛ. Ɛ́ pɔ́Ꞌɔ, nu yí n cúnɛ, n cú pɔ pɑ́Ꞌ Tɑ̌ɑ mɔ kɑ cúnɛ.

Currently Selected:

Jɑ̂ŋ 12: JGO

Highlight

Copy