MATEO 4
4
Jesusta diablo pandachisha nishcami
(Mr 1.12-13; Lc 4.1-13)
1Chai q'uipami Jesustaca, diablo pandachisha nichun Taita Diospaj Espirituca, shitashca pambaman pusharca. 2Chuscu chunga punllacunata, chuscu chunga tutacunata ayunashca q'uipaca yaricachircami. 3Pandachij diablo paipajman c'uchuyashpaca:
–Taita Diospaj Churitaj cashpaca, cai rumicunata tanda tucuchun niyari– nijpimi, 4Jesusca:
–Quillcachishcapica: “Runaca mana tandallahuan causangachu. Ashtahuanpish Taita Diospaj shimimanta llujshishca shimicunahuanmi causanga” ninmi– nirca.
5Chaimi diabloca, Taita Diospajlla puebloman pushashpa Jesustaca Taita Diospaj huasi jahua puntapi churashpa, 6cashna nirca:
–Taita Diospaj Churitaj cashpaca, caimanta huashicui. Quillcachishcapica:
“Canta japichun Taita Diosca paipaj angelcunata cachangami.
Cambaj chaqui rumipi ama ñitcarichun, paicunapaj maquipi cantaca charirangami” ninmi– nircami.
7Chaimi Jesusca:
–Quillcachishcapica cashnapish ninmi: “Mandaj cambaj Jatun Diostaca ama pandachisha ningui” ninmi– nircami.
8Cutinllatajmi Diabloca, tucuimanta yalli jatun urcu jahuaman Jesusta pushashpa, tucui cai pachapi mandanacunata, sumajcunata ricuchishpaca, 9cashna nirca:
–Ñucata cungurishpa adorajpica, tucui caicunatami cusha– nirca.
10Shina nijpi Jesusca:
–Anchui, Satanás. Quillcachishcapica: “Mandaj cambaj Jatun Diosllata adorangui, paipajllata rurangui” ninmi– nijpimi, 11diabloca pandachisha ninataca saquirca. Angelcuna shamushpami Jesuspajtaca rurarcacuna.
Jesusca pai rurana cashcata callarishcami
(Mr 1.14-20; Lc 4.14-15; 5.1-11; 6.17-19)
12Bautizaj Juan prezupi nijta uyashpami Jesusca Galileaman tigrarca. 13Paica Nazaretpica mana saquirishpami cucha uripi caj Zabulón, Neftalí llajtacuna chaupipi caj Capernaumpi causagrirca. 14Profeta Isaías nishca pajtachunmi, chashna tucurca. Isaiasca:
15“¡Jordán ch'imba ladota cuchaman rina ñanpi caj llajtacuna Zabulón llajta, Neftalí llajta uyaichij
Galileapi causaj mana israelcuna uyaichij!
16Amsapi churashca puebloca, jatun luztami ricurca.
Huañunalla amsapi churashca llajtacunataca luzmi lamyachinga” nishcami carca.
17Chai punllamanta pacha Jesús huillai callarishpaca: “Mana allita ruracushcata saquishpa cutirichij. Jahua pachamanta mandanamari ña c'uchuyamushca” nircami.
Jesusca chalhuata japij chuscu runacunata cayashcami
18Jesusca, Galilea cucha urita puricushpami, huauquindij ishqui runacunata ricurca. Pedrota shutichishca Simonmi, paipaj huauqui Andresdij chalhuata japijcuna cashcamanta linchita cuchapi shitacurcacuna. 19Paicunatami Jesusca:
–Ñucata catichij. Chalhuacunata japijta shinallataj, gentecunata pushamujcunatami rurasha– nirca.
20Paicunaca, linchicunata saquishcahuanmi Jesusta catircacuna. 21Chaimanta rishpaca, shujtaj ishqui huauquindijcunatami ricurca. Paicunataca Zebedeopaj churi Jacobo, paipaj huauqui Juandij, paicunapaj yaya Zebedeohuan barcopi linchicunata allichicujta ricushpami cayarca. 22Paicunapish paicunapaj yayata, barcota saquishcahuanmi Jesusta catircacuna.
Achcacunaman Jesús yachachishcami
23Jesusca, tucui Galileata rishpami paicunapaj sinagogacunapi yachachishpa, Taita Dios mandana alli huillaita huillashpa, tucui laya ungüihuan cajcunatapish, ima nanaihuan cajcunatapish tucuicunata alliyachirca. 24Chaitaca tucui Siria llajtapi huashan huashan yachaj chayashpami, tucui nanaicunahuan cajcunata, ch'ican ch'ican ungüihuan llaquita apacujcunata, supai japishcacunata, uraticucunata, mana cuyuri tucujcunatapish pushamujpi tucuicunata alliyachirca. 25Chaimantami Galileamanta, Decapolismanta, Jerusalenmanta, Judeamanta, Jordán yacu ch'imbanijmantapish achca gentecuna catircacuna.
Currently Selected:
MATEO 4: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
