MATEO 14
14
Bautizaj Juanta huañuchishcami
(Mr 6.14-29; Lc 9.7-9)
1Chai punllacunapimi Galileata mandaj Herodesca, Jesús imallata ruracushcata uyashpa, 2paipajta rurajcunataca: “Bautizaj Juanmari huañushcacunapaj chaupimanta causarishca canga. Chaimi pi mana rurai tucuipajta ruracunga” nircami. 3Herodesca paipaj huauqui Felipepaj huarmi Herodiashuanmi causacurca. Chai huarmi mandashcamantami, Juantaca cadenahuan huatashpa carcelpi churarca. 4Juanca Herodestaca: “Apanacushpa causanaca mana allichu” nishcami carca. 5Chaimi Herodesca Juantaca huañuchisha yuyacurca. Ashtahuanpish Juantaca israelcunaca profetami nijcuna cashcamantami, paicunata manchashcamanta mana huañuchi tucurca. 6Herodesca, pai huacharishca huatacuna pajtashca fiestatami ruracurca. Chaipimi Herodiaspaj ushushica, tucuicunapaj ñaupajpi tushushpa Herodesta cushichijpi, 7Herodesca can tucui ima mañashcata cushatajmi nirca. 8Paipaj mama yachachijpimi chai ushushica: “Bautizaj Juanpaj umata shuj platopi cunantaj cuhuai” nirca.
9Jatun mandajca llaquirishpami, chai mizapi paihuan cajcunapaj ñaupajpi imata mañashcata cushatajmi nishcamanta, 10Juanpaj umataca, carcelpi p'itimuchun cacharca. 11Juanpaj umata platopi apamushpa, chai huambraman cujpi huambraca paipaj mamamanmi curca. 12Juanpaj yachacujcuna shamushpa, paipaj cuerpota japishpa pambashpaca Jesusmanmi huillagrircacuna.
Pichca huaranga gentecunaman carashcami
(Mr 6.30-44; Lc 9.10-17; Jn 6.1-14)
13Juan huañushcata yachashpami Jesusca, chai llajtamantaca shuj barcopi shitashca pambaman pailla rirca. Chaita gentecuna yachashpaca, achcacunami pueblocunamanta llujshishpa chaquillahuan Jesuspajman rircacuna. 14Barcomanta Jesús llujshishpaca, achcacuna chaipi cajta ricushpami, paicunata llaquishpa ungushca cajcunataca alliyachirca. 15Ña chishiyamujpimi yachacujcuna Jesuspajman c'uchuyashpaca:
–Caipica shitashca pamballami, ñamari yalli chishi. Cai muyundij uchilla llajtacunaman rishpa, micunapaj imallatapish randigrichij nishpa cayacama ni– nircacunami.
16Ashtahuanpish Jesusca:
–Paicunaca imapaj mana rinachu can, cancunallataj caraichijlla– nijpimi, 17paicunaca:
–Caipica imata mana charinchijchu. Pichca tandata, ishqui chalhuallatami charinchij– nijpi, 18Jesusca:
–Caiman apamuichij– nirca.
19Chaipica, tucuicunatami bulluj jahuapi quinrilla siririchun mandarca. Pichca tandata, ishqui chalhuata japishpa huichilla ricushpa Diosta pagui nishpaca, chai tandataca chaupishpa yachacujcunaman cujpimi, paicunaca chai tucuicunaman cararcacuna. 20Tucuicunami mana nijta micurcacuna. Puchushcacunatapish chunga ishqui canasta jundatami tandarcacuna. 21Chaipi micujcunaca huarmicunata, huahuacunata mana yupashcami, c'aricunalla pichca huaranga carcacuna.
Yacu jahuata Jesús purishcami
(Mr 6.45-52; Jn 6.15-21)
22Chai tucuicunaman carashcahuanmi Jesusca, paipaj yachacujcunataca barcopi yaicuchishpa cucha ch'imba lado uriman ñaupaichij nishpa cacharca. Chaicamaca paica, tucui chaipi cajcunatami cayacamachij nicurca. 23Chai tucuicunata cayacamachij nishca q'uipaca, Taita Diosta pailla mañangapajmi urcuman huichiyarca. Ña tutayajpipish Jesusca paillami chaipiraj carca. 24Chaicamaca barcohuanca ñami chaupi cuchata rirca. Achca huairahuan yacu jatarishpami jarcarca. 25Ñalla pacarimugrijpica, Jesusca yacu jahuata purishpami, paicunapajman c'uchuyagrirca. 26Yacu jahuata purishpa Jesús shamucujta yachacujcuna ricushpaca, achcata mancharishpami:
–¡Ayamari!– nishpa caparircacuna. 27Ashtahuanpish Jesusca:
–Ñucamari cani. ¡Ama mancharichijchu!– nircami.
28Chaimi Pedroca:
–Amito, cantaj cashpaca yacu jahuata cambajman shamuchun ñucata cayai– nirca.
29Shina nijpi Jesusca:
–Shamui– nijpi, Pedroca barcomanta llujshishpami, Jesuspajman cuchuyangapaj yacu jahuata puricurca. 30Ashtahuanpish achca huaira yacuta cuyuchicujta ricushpami, mancharishpa yacupi ñalla millpurigrishpaca:
–¡Amito, quishpichihuai!– nishpa caparijpi, 31Jesusca, maquimanta japishpaca:
–Ashallata crij runa ¿ima nishpataj caita chaita yuyacunguiyari?– nirca.
32Paicuna barcoman huichiyajpica, huairaca casijlla tucurcallami. 33Chaimantami barcopi cajcuna Jesuspajman c'uchuyashpaca:
–Diospaj Churitajmi cangui– nishpa adorarcacuna.
Ungushcacunata Jesús Genesaretpi alliyachishcami
(Mr 6.53-56)
34Ña cuchata ch'imbashpaca, Genesaret llajtamanmi chayarcacuna. 35Chaipi cajcunaca Jesús cashcata rijsishpaca, tucui chai muyundij llajtacunapi causajcunamanmi huillanacunata cachashpa yachaj chayachirca. Chaimi tucui ungushcacunata paipajman apamushpaca, 36cambaj churana puntallapipish tuparichun saquihuai nircacuna. Jesuspaj churanapi tuparijcunaca tucuicunami alliyarcacuna.
Currently Selected:
MATEO 14: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.