LUCAS 9
9
Chunga ishqui yachacujcunata huillanaman cachashcami
(Mt 10.5-15; Mr 6.7-13)
1Jesusca chunga ishqui yachacujcunata tandachishpami, tucui laya supaicunata llujshichi tucunata, ungushcacunata alliyachi tucuna podertapish curca. 2Dios ña mandagricushcata huillashpa, ungushcacunata alliyachichunmi cacharca. 3Paicunataca cashnami nirca:
–Cancuna rishpaca taunata, muchilata, cucayuta, cullquitapish ama apanguichijchu. Shujtaj churanatapish, ama apashpa, churashcalla ringuichij. 4Maijan huasiman yaicushpaca, chai llajtamanta ringacama, chaillapitaj saquiringuichij. 5Maipi cashpapish cancunata mana chasquishun nijpica, chai pueblomanta llujshingapajca, paicuna llaquita apana cashcata ricuchingapaj cancunapaj chaquimanta ñutu allpatapish chaspishpa chaimanta llujshishpa ringuichijlla– nircami.
6Yachacujcuna rishpaca, llajtan llajtan rishpami, alli huillaita huillashpa, ungushcacunatapish alliyachishpa purircacuna.
Bautizaj Juanta huañuchishcami
(Mt 14.1-12; Mr 6.14-29)
7Tucui imallata Jesús ruracushcatami, jatun mandaj Herodesca uyarca. Maijancunaca Jesustaca: “Bautizaj Juanmari huañushcacunapaj chaupimanta causarishca canga” nircacuna. Chaimi Herodesca, yallitaj mancharirca. 8Maijancunaca: “Eliasmari ricurishca” nircacuna. Shujtajcunaca: “Ñaupa profetacunamanta maijanmari causarishca canga” nircacuna. 9Herodesca:
–Juantaca ñucamari cungata p'itichircani. Cunanca shuj runami tucuita rurashpa puricun nijta uyani. ¿Chai runaca pitaj canga?– nishpami, Jesustaca paipaj ñahuihuantaj ricuiman yuyacurca.
Pichca huaranga gentecunaman carashcami
(Mt 14.13-21; Mr 6.30-44; Jn 6.1-14)
10Apostolcunaca huillachun Jesús cachashcamanta tigrashpaca, tucui imalla rurashcatami paiman parlarcacuna. Chai q'uipami paicunata pushashpa, Betsaida pueblo c'uchulla pi mana causanman Jesusca rirca. 11Chaita gentecuna yachashpa paita catishpa rijpimi Jesusca, Taita Diosca ñami mandagrin nishpa huillarca. Alliyaiman yuyacujcunatapish alliyachircami.
12Ashtahuanpish ña chishiyamujpica, chunga ishqui yachacujcuna c'uchuyashpaca:
–Cai muyundij uchilla llajtacunapi, huasicunapi micunata, samarinata mashcagrichuncuna, caipi cajcunataca cayacama niyari. Caipica, pi mana causanpimi canchij– nircacunami.
13Chaimi Jesusca:
–Paicunamanca cancuna caraichigari– nijpi, paicunaca:
–Ñucanchijca pichca tandata, ishqui chalhuallatamari charinchij. Cai tucuicunapajca, randigrinami canga– nircacuna.
14Chaipi caj gentecunaca, pichca huaranga shinami carca. Chaimi yachacujcunataca:
–Tucuicunallatataj pichca chunga, pichca chunga tucushpa tiyarichun nichigari– nirca.
15Chaimi Jesús nishca shinallataj tucuicunata tiyachircacuna. 16Jesusca pichca tandata, ishqui chalhuatapish japishpami, jahua pachata huichilla ricushpa, Taita Diosta pagui nirca. Chai q'uipaca chaupishpa chaupishpami, tucuicunaman carachun yachacujcunaman cushpa catirca. 17Tucuicunami mana nijta micurcacuna. Puchushcacunatapish chunga ishqui canasta jundatami tandarcacuna.
Pedroca Jesustaca Quishpichij Cristomi cangui nishcami
(Mt 16.13-19; Mr 8.27-29)
18Chai q'uipami Jesusca Taita Diosta mañacujpi yachacujcuna paihuan cajpi Jesusca yachacujcunataca cashna tapurca:
–Gentecunaca ¿pi cashcatataj ñucataca yuyancuna?– nijpi, 19paicunaca:
–Shujcunaca, Bautizaj Juanmi. Caishujcunaca, Eliasmi. Maijancunaca ñaupa profetacunapuramanta maijantajshimi causarishca nincunami– nircacuna.
20Chaimi Jesusca:
–Cancunaca ñucataca ¿pi cashcatataj yuyanguichij?– nijpi, Pedroca:
–Canca Taita Diospajmanta shamuj Cristomi cangui– nirca.
Jesusca pai huañuna cashcata huillashcami
(Mt 16.20-28; Mr 8.30–9.1)
21Ashtahuanpish Jesusca caitaca ñataj piman huillanguichijman nishpa mandashpaca, 22cashnami nirca:
–Runa Aichayujca achca llaquicunata apanatajmi. Cunaj yuyajcuna, curacunata pushajcuna, mandashcacunata quillcajcunapish p'iñashpami huañuchingacuna. Ashtahuanpish quimsa punllapica causachishcami canga– nircami.
23Tucui chaipi cajcunataca cashnami nirca:
–Maijanpish ñucata catisha nijca, chacatashpa huañuchina cajpipish, quiquin causaita mana llaquishpa punllanta ñucata catichunlla. 24Pipish paipaj causaita quishpichisha nijca, chingaringami. Pipish ñucamanta paipaj causaita chingachijmi, quishpiringa. 25Tucui cai pachapi tiyajcunata charishpapish, paipaj almata huiñaipaj chingachishpaca ¿ima allitaj cangari? 26Ñucamanta, ñuca yachachishcacunamantapish maijan pingarijtaca, Runa Aichayuj ñucaca jucha illaj angelcunandij, ñuca Yayapaj achij nicuj sumaj cashcahuan shamushpaca, paimantapish pingarishami. 27Taita Dios mandangapaj shamucujta ricungacama, maijan caipi cajcunaca, manaraj huañungacunachu. Chashnatajmi canga– nircami.
Jesusca shujtajyarishcami
(Mt 17.1-8; Mr 9.2-8)
28Cai shimicunata nishca pusaj punlla q'uipa shinatami Jesusca Pedrota, Juanta, Jacobotapish pushashpa, Taita Diosta mañangapaj urcuman huichiyarca. 29Jesús mañacushpaca ñahuipish shujtajyarishpa, churanapish lamyacuj yurajllami tucurca. 30Chaipica, ishqui runacuna Jesushuan parlanacucujmi ricurirca. Chai runacunaca Moisesmi, Eliasmi carca. 31Paicunaca sumaj achij nicuj chaupipi ricurishpaca, Jerusalenpi Jesús ima shina huañuna cashcata, causarina cashcata, jahua pachaman rina cashcatapishmi parlanacucurca. 32Pedropish, paihuan cajcunapish dorminaihuan cashpapish mana dormishpami, Jesusca sumaj achij nicuj cashcata, paihuan parlanacucuj ishqui runacunatapish ricuracurcallacuna. 33Chai ishqui runacuna Jesusmanta caruyashpa rijpica, Pedroca, Jesustaca:
–Yachachij, ñucanchijca allitajchari caipi canchij. Quimsa chujllacunata rurashun. Shujtaca cambaj, caishujtaca Moisespaj, chaishujtaca Eliaspaj– nirca.
Ashtahuanpish Pedroca imata rimacushcatapish mana yacharcachu. 34Pedro chashna rimacujpiraj, p'uyu shamushpa tapajpimi achcata mancharircacuna. 35Chai p'uyumantaca: “Caica ñuca c'uyashca Churimi, paita uyaichij” nishpa rimashcami uyarirca.
36Chai rimacui ña tucurijpica, Jesusca paillami ricurirca. Paicuna tucui imallata ricushcataca chai punllacunapica, piman mana imata huillarcacunachu.
Supai japishca huambrata Jesús alliyachishcami
(Mt 17.14-21; Mr 9.14-29)
37Cayandij punlla urcumanta uriyamujpica, achcacunami Jesusta tupanaman llujshimurcacuna. 38Chai tucuicunapuramanta shuj runami, cashna caparirca:
–Yachachij, ñuca huahuata ayudapai, cai huahuallatamari charini. 39Paitaca millai espíritu japishpamari ñapish caparichishpa, maipish cachun chujchuchishpa, shimimanpish puscuta shitachinlla. Chashna maipishcachun llaquinayajta llaquichishpami paimanta anchurin. 40Chaimari cambaj yachacujcunataca chai millai espirituta llujshichipaichij nishpa rogarcani. Ashtahuanpish mana llujshichi tucuncunachu– nircami.
41Chaimi Jesusca:
–¡Huahua huahuami mana crij millaicuna canguichij! ¿Maicamataj cancunahuan causacushalla? ¿Maicamataj cancunataca yachachicushalla? nishpaca, chai runataca cambaj huahuata caiman pushamui– nirca.
42Shina nijpi huambrata Jesuspajman c'uchuyachigrijpica, supaica chujchuchishpami pambaman urmachirca. Chaimi Jesusca millai espirituta sinchita rimashpa, huambrata alliyachishpa paipaj yayaman curca. 43Taita Diospaj poderca jatun cashcata ricushpaca, tucuicunami achcata mancharircacuna.
Jesusca pai huañuna cashcata cutin huillashcami
(Mt 17.22-23; Mr 9.30-32)
Tucuicuna pai imalla rurashcata ricushpa mancharinacucujpimi, Jesusca paipaj yachacujcunata cashna nirca:
44–Cai ñuca huillashcata alli uyaichij. Pajta cungaringuichijman. Runa Aichayujtaca gentecunapaj maquipimi entreganga– nirca.
45Chaitaca paicunapaj yuyaicuna tapashca cashcamantami paicunaca imata nisha nishcata mana entendircacuna. Chai yachachishcacunaca ¿imatataj nisha nin? nishpa tapunatapish mancharcacunami.
Jahua pachamanta mandacujpica ¿maijanshi jatun cashun? nishcami
(Mt 18.1-5; Mr 9.33-37)
46Chai q'uipami yachacujcunaca, paicunapuralla maijanshi ashtahuan jatun canchij ninacushpa rimanacucurcacuna. 47Paicunapaj shungupi imata yuyacujta yachashpami Jesusca, shuj huahuata japishpa paipaj c'uchupi churashpa, 48cashna nirca:
–Maijanpish ñuca shutipi cai huahuata chasquijca, ñucatami chasquin. Maijanpish ñucata chasquijca, ñucata cachajtami chasquin. Cancunapurapi maijanpish tucuicunamanta yalli uchilla cajmi, tucuicunata yalli jatun canga– nircami.
Ñucanchijta mana p'iñajca ñucanchijpurallatajmi nishcami
(Mr 9.38-40)
49Chaipimi Juanca:
–Yachachij, shuj runa cambaj shutipi supaicunata llujshichicujta ricushpami, paica mana ñucanchijpura cajpi, ama chashna ruraichu nircanchij– nirca.
50Chaimi Jesusca:
–Chashna rurajtaca ama jarcaichijchu. Maijanpish ñucanchijta mana p'iñajca, ñucanchijpurallatajmi– nirca.
Jacobota Juanta Jesús sinchita rimashcami
51Jesusca jahua pachaman rina punlla chayamucujpimi, Jerusalenmanca mana manchashpa rina tucurca. 52Chaimi huillajcunata ñaupachishpa cacharca. Paicuna rishpaca samaritanocuna causan shuj uchilla llajtamanmi, pozadata mashcangapaj rircacuna. 53Ashtahuanpish Jerusalenman ricujta yachashpami, chai gentecunaca mana chasquircacuna. 54Chaita ricushpami Jesuspaj yachacuj Juanpish, Jacobopish:
–Mandaj Jesús, cai tucuicunata chingachichun Elías mañashca shina ¿jahua pachamanta ninata cachachun mañashunchu?– nircacuna.
55Chaimi Jesusca sinchita rimashpa cashna nirca:
–Cancunaca pi rimachijpi chashna rimacushcatapish mana yachanguichijchu. 56Runa Aichayujca, runacunapaj almata chingachingapajca mana shamurcachu, ashtahuanpish quishpichingapajmi shamurca– nishpaca, shujtaj uchilla llajtamanmi rircacuna.
Jesusta catishun nishcacunami
(Mt 8.19-22)
57Paicuna ñanta ricujpica, shuj runami Jesustaca:
–Amito, maiman rijpipish canhuanmi risha– nirca.
58Chaimi Jesusca:
–Zorracunapish causanapaj jutcuta, pajarocunapish tazinta charincunami. Ashtahuanpish Runa Aichayujca, dormingapaj saunallatapish mana charinchu– nirca.
59Cutin shujtaj runataca:
–Ñucata cati– nijpica:
–Amito, ñuca yayataraj pambamugrisha– nirca.
60Chaimi Jesusca:
–Huañushcacunataca huañushcacunallataj pambacuchun saquilla. Ashtahuanpish canca, Taita Dios ima shina mandagrinta huillagri– nircami.
61Chai q'uipaca cutin shujtajmi:
–Amito, ñucaca canta catisha ninimi. Ashtahuanpish ñuca huasipi cajcunataraj, minchacama nimugrisha– nirca.
62Chaimi Jesusca:
–Maijanpish huashaman ricushpaca, mana yapunchu. Chashnacunaca Taita Dios mandacujpica mana paipajta ruraj cai tucunchu– nirca.
Currently Selected:
LUCAS 9: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
